31 Jiyè–6 Out

Travay 22–28

“Yon Minis ak yon Temwen“

Enpresyon Sentespri a bay yo souvan pezib epi pafwa pasaje. Si w ekri enpresyon w resevwa yo, sa ap pèmèt ou reflechi sou yo an pwofondè. Pandan w ap li Travay 22–28la, ekri sa w panse ak sa w santi epi pran tan pou w medite sou yo.

Ekri Enpresyon w yo

Prezidan Thomas S. Monson te di: “Lè nou nan travay Senyè a, nou gen dwa pou n jwenn èd li” (Aprann, Aji, Egziste,” Liahona, Nov. 2008, 62). Men, sa pa vle di nou gen dwa a yon wout ki fasil ak yon pakèt siksè san rete. Pou nou gen prèv sou sa, nou mèt jis gade sou Apot Pòl. Travay Sovè a te ba li sete pou l te “pote non l devan Janti yo, ak wa yo, ak pitit Izrayèl yo” (Travay 9:15). Nan chapit 22–28 nan liv Travay la, nou wè Pòl k ap ranpli misyon sa a pandan ke l t ap rankontre anpil opozisyon—chenn, prizon, abi fizik, nofraj, epi menm atak yon sèpan. Men nou wè tou ke Jezi “te kanpe bò kote l, epi l te di l, Pran kouraj, Pòl” (Travay 23:11). Eksperyans Pòl yo se yon rapèl enspire ke apèl Senyè a pou “deklare levanjil [Li a] avèk son rejwisans” vini avèk pwomès sa a: “Leve kè w epi fè kè w kontan, paske m nan mitan nou” (Doktrin ak Alyans 29:4–5; gade tou nan Matye 28:19–20).

Ide pou Etid Ekriti Pèsonèl

Travay 22:1–21; 26:1–29

Disip Jezikri yo dwe rann temwayaj yo bravman.

Lè Pòl te delivre temwayaj puisan l yo ki ekri nan Travay 22 ak26yo, li te prizonye anba men sòlda Women yo. Moun li t ap adrese yo te gen pouvwa pou yo te kondane l pou l te mouri. Men, li te chwazi pou l te bravman rann temwayaj li ak “vizyon selès” li te fè a (Travay 26:19). Kisa k enspire w nan pawòl li yo? Reflechi sou okazyon ou genyen pou w rann temwayaj ou yo. Paregzanp, èske zanmi w konnen kouman ou santi w konsènan Jezikri? Paregzanp, ki dènye fwa w te di manm fanmi ou oubyen lòt moun kijan w te akeri temwayaj ou konsènan levanjil la?

Lè yo te moke Jèn gason an, Joseph Smith poutèt li te rakonte istwa Premye Vizyon li a, li te enspire nan fason Pòl te temwaye sou vizyon li a (sgade nan Istwa—Joseph Smith 1:24–25). Kòman ou ta ka rezime sa Joseph Smith te aprann nan men Pòl yo? Kisa w aprann nan men de temwen Jezikri sa yo?

Gade tou nan Neil L. Andersen, “Nou Pale konsènan Kris la,” Lyawona, Nov. 2020, 88–91.

Travay 23:10–11; 27:13–25, 40–44

Senyè a bò kote moun k ap eseye sèvi l yo.

Jan ministè Pòl la montre klèman an, pwoblèm lavi nou yo se pa yon siy ki vledi Bondye pa apwouve travay n ap fè yo. Anfèt, se pafwa nan moman pwoblèm yo nou pi plis santi sipò li. Sa ta ka enteresan pou w repase tout sa w te li sou ministè Pòl yo epi fè yon lis sou kèk nan bagay li te andire yo (gade, paregzanp, Travay 14:19–20; 16:19–27; 21:31–34; 23:10–11; 27:13–25, 40–44). Kouman Senyè a te kanpe bòkote l? Kouman L kanpe bòkote w?

Travay 24:24–27; 26:1–3, 24–29; 27

Gen sekirite ak lapè lè nou koute pawòl sèvitè Bondye yo.

Pandan tout ministè li, Pòl te rann temwayaj puisan konsènan Jezikri ak levanjil li a. Anpil moun te aksepte temwayaj li, men se pa t tout moun ki te aksepte l. Pandan w ap li Travay 24:24–27 ak Travay 26:1–3, 24–29la, ekri mo ak fraz ki montre kijan dirijan women yo nan Jide yo te reyaji devan ansèyman Pòl yo:

• Felix

• Festus

• Wa Aggripa

Pandan l te sou bato pou yo te mennen l al Wòm pou Seza t al jije li, Pòl te pwofetize ke bato a ak pasaje l yo ”t ap an peril epi yo ta pral sibi anpil domaj (Travay 27:10). Li chapit 27 la pou w ka wè kijan konpayon vwayaj Pòl yo te reyaji devan avètisman l yo. Èske w jwenn yon leson pou tèt pa ou nan eksperyans pa yo?

Èske w konn reyaji tankou youn nan moun sa yo lè w tande ansèyman dirijan Legliz yo. Ki konsekans posib ki genyen lè n reyaji nan fason sa yo? Kisa w aprann nan resi sa yo sou koute konsèy Senyè a bay palentèmedyè sèvitè l yo?

Gade tou nan 2 Nefi 33:1–2; D. Todd Christofferson, “Vwa Avètisman an,” Lyawona, Me 2017, 108–11; “Suiv Pwofèt Vivan an,” Enseignements des présidents de l eglise: Ezra Taft Benson (2014), 147–55.

Ide pou Etid Ekriti Familyal ak Sware Familyal

Travay 5:41.Anvan konvèsyon l lan, Pòl te gen yon pase plen ofans kont Bondye. Men, paske li te dispoze pou l te repanti, li te vin kapab di: “M kondui tèt mwen yon fason pou m gen yon konsyans ki klè, san ofans kont Bondye, ak kont lèzòm.” (gade tou nan Doktrin ak Alyans 135:4). Kijan nou ka debarase konsyans nou anba ofans kont Bondye ak kont lòt moun?

Travay 26:16–18.Nan vèsè sa yo, kisa Senyè a te aple Pòl pou l te fè? Ki opòtinite nou genyen pou n fè menm bagay yo?

Travay 28:1–9.Èske gen moun nan fanmi w ki renmen koulèv? Ou gen dwa mande moun sa a oubyen yon lòt manm nan fanmi an pou rakonte istwa ki nan Travay 28:1–9yo. Timoun yo gen dwa ta renmen fè desen sou istwa sa yo oubyen jwe wòl yo. Ki leson nou aprann nan istwa sa yo? Youn nan leson yo sèke Senyè a ranpli pwomès li fè sèvitè l yo. Paregzanp, ou gen dwa konpare pwomès li fè nan Mak 16:18 yo avèk akonplisman yo nan sa Pòl te viv yo. Ou gen dwa chèche yon diskou nan dènye konferans jeneral la ki pale de yon pwomès youn nan sèvitè Senyè a te fè—petèt youn ki enpòtan pou fanmi ou—epi afiche l lakay ou. Kijan nou ka montre lafwa nou ke pwomès sa a ap akonpli?

Bondye te pwoteje Pòl anba pwazon yon koulèv ki te mòde l.

Travay 28:22–24.Menmjan avèk Legliz la nan epòk Pòl la (ke yo rele yon “sèk” nan vèsè 22) a, Legliz jodia souvan “rankontre opozisyon.” Lè moun yo te pale kont Sovè a ak Legliz li a, kijan Pòl te reyaji? Kisa nou ka aprann nan eksperyans li yo?

Pou plis ide pou anseye timoun yo, gade plan leson semèn sa a nan Vini, Suiv Mwen—Pou Primè a.

Chan yo sigjere: “Je sais qu’il vit, mon Rédempteur,” Cantiques, no. 73

Amelyore ansèyman nou

Konsantre sou prensip k ap pote benefis pou fanmi ou. Pandan w ap etidye ekriti yo, mande tèt ou: “Kisa m jwenn la a ki ap patikilyèman enpòtan pou fanmi m?” (Gade nan Anseye nan fason Sovè a,17.)

Pòl devan Wa Agripa. Vanyan nan temwayaj Jezikri a, Daniel A. Lewis.