Corinth, Southern Greece, the Forum and Civic Center [Korinetia, Hereni Apato’a, te Māhora ’e te pū o te ’oire], pēni nā Balage Balogh/www.ArchaeologyIllustrated.com

21–27 nō ’Ātete

1 Korinetia 1–7

« ’Ia ’ati māite rā ’outou »

Pāpa’i i te mau mana’o e tae mai ’a tai’o ai ’outou i te 1 Korinetia 1–7. I roto i te mau mana’o e tae mai, tē vai nei paha te fa’aurura’a e tuatāpapa rahi atu ā i te hō’ē mana’o, ’aore rā e fa’a’ite i te tahi ta’ata i te mea tā ’outou i ’apo mai, ’aore rā e rave i te tahi tauira’a i roto i tō ’outou orara’a.

Pāpa’i i te mau mana’o e tae mai

I te mau ’āva’e ’a fa’aea ai Paulo i Korinetia, « e rave rahi […] tō Korinetia i ’ite ’e ’ua fa’aro’o, ’e bāpetizohia ihora » (Te ’Ohipa 18:8). Nō reira, e ’oto iti rahi tō Paulo i te fa’aro’ora’a ma’a matahiti noa i muri iho ē, e « ’āmahamaha » ’e e « mārōra’a » i roto i te feiā mo’a nō Korinetia, mai tōna revara’a, ’ua ha’amata rātou i te pe’e i te « pa’ari o teie nei ao » (1 Korinetia 1:10–11, 20). ’Ei pāhonora’a, ’ua pāpa’i Paulo i te hō’ē rata tā tātou e parau nei, te Korinetia 1. E ha’api’ira’a tumu hōhonu mau i reira, ’āre’a rā, ’ua ta’a ’ore ato’a Paulo i te ’orera’a te feiā mo’a i ineine nō te fāri’i i te ha’api’ira’a tumu ato’a tāna e hina’aro e hōro’a ia rātou. « ’Aita a’era i ti’a iā’u, e au mau taea’e, ’ia parau atu ia ’outou mai te feiā e ha’apa’o i tā te Vārua ra », tāna ho’i i ’oto, « Tei tā te tino ā ho’i ’outou i teienei » (1 Korinetia 3:1–3). ’Ia fa’aineine tātou i te tai’o i te mau parau a Paulo, e riro ē, e tauturu mau ’ia hi’opo’a tātou i tō tātou iho vai-ineine-ra’a nō te fāri’i i te parau mau—mai tō tātou ineine ’ia pe’e i te Vārua ’e ’ia tūtava nō te tāhō’ēra’a i roto i tō tātou mau ’utuāfare, i roto i te feiā mo’a ’e i roto ia tātou ’e te Atua.

Mau mana’o nō tā’u iho tuatāpapara’a pāpa’ira’a mo’a

1 Korinetia 1:10–17 ; 3:1–11

E mea tūtava te mau melo nō te ’Ēkālesia a te Mesia ’ia vai tāhō’ē noa.

’Aita tātou i māramarama hope i te ’orera’a te feiā mo’a nō Korinetia i tāhō’ē roa, ’ua ’ite rā tātou i tō tātou iho hō’ē-’ore-ra’a i roto i tō tātou mau tā’amura’a. E feruri i te hō’ē tā’amura’a i roto i tō ’oe orara’a e maita’i atu ā nā roto i te hō’ēra’a ; ’ei reira e hi’o atu ai i tā Paulo i ha’api’i i roto i te 1 Korinetia 1:10–17 ; 3:1–11 nō ni’a i te ’orera’a te feiā mo’a i Korinetia i tāhō’ē. E aha te tahi mau mea tā ’oe i ’apo mai nō ni’a i te fa’atupu-rahi-atu-ā-ra’a i te hō’ēra’a ’e te ta’ata ?

Hi’o ato’a Mosia 18:21 ; 4 Nephi 1:15–17 ; Te Ha’api’ira’a Tumu ’e te mau Fafaura’a 38:23–27 ; 105:1–5.

1 Korinetia 1:17–31 ;2

Nō te fa’atupu i te ’ohipa a te Atua, tītauhia te pa’ari o te Atua.

Noa atu ā e ’ohipa maita’i—e ’ohipa ho’i tē fa’aitoito-roa-hia—te ’imira’a i te pa’ari i te vāhi ato’a e ’ite mai tātou i te reira (hi’o 2 Nephi 9:29 ; Te Ha’api’ira’a Tumu ’e Te mau Fafaura’a 88:118), ’ua tu’u mai Paulo i te tahi mau parau fa’aara ’eta’eta nō ni’a i te pa’ari hapehape o te ta’ata nei, ’o tāna i parau te « pa’ari o teie nei ao. » ’Ia tai’o ’oe i te 1 Korinetia 1:17–25, ’a feruri e aha te aura’a nō terā parau. E aha tā Paulo e parau ra te « pa’ari o te Atua » ? Nō te aha tītauhia te pa’ari o te Atua nō te fa’atupu i te ’ohipa a te Atua ?

I roto i tā ’oe mau tauto’ora’a e fa’atupu i tā ’oe mau hōpoi’a fa’atupura’a i te ’ohipa a te Atua, ’ua ’ite a’enei ānei ’oe i te « mata’u, ’e te rūrūta’ina » mai tā Paulo i ’ite i tōna ha’api’ira’a i te feiā mo’a nō Korinetia ? (1 Korinetia 2:3). E aha tā ’oe e ’ite ra i roto i te 1 Korinetia 2:1–5 ’o tē fa’aitoito nei ia ’oe ? E feruri e nāhea ’oe e fa’a’ite ai i tō ’oe ti’aturi i te « mana o te Atua », nā ni’a a’e i te « pa’ari ta’ata nei. »

Hi’o ato’a Te Ha’api’ira’a Tumu ’e te mau Fafaura’a 1:17–28.

1 Korinetia 2:9–16

Tītauhia te Vārua Maita’i nō te māramarama i te mau mea a te Atua.

Mai te peu e hina’aro ’oe e ha’api’i rahi atu ā nō ni’a i te mātini ’aore rā te patura’a fare i te tau tahito ra, e nāhea ’oe ? ’Ia au i tei pāpa’ihia i roto i te 1 Korinetia 2:9–16, e aha te ta’a-’ē-ra’a i roto i te ’apora’a i « te mau mea a te Atua » ’e te ’apora’a i « te mau mea a te ta’ata nei » ? Nō te aha e mea tītauhia te Vārua Maita’i nō te māramarama i te mau mea a te Atua ? I muri mai i te tai’ora’a i teie mau ’īrava, e aha tō ’oe mana’o nō te mau mea e rave nō te māramarama hope atu ā i te mau mea pae vārua ? Nāhea te mau parau a Paulo e nehenehe ai e tauturu i te hō’ē ta’ata e tāfifi ra i tōna ’itera’a pāpū ?

1 Korinetia 6:13–20

E mea mo’a tō’u tino.

’Ua mana’o te rahira’a ta’ata i Korinetia ē, e ’ere te vi’ivi’i pae mōrare i te hō’ē fifi ’e ’ua hāmani-nā-mua-roa-hia tō rātou tino nō te ha’amāha i te reira. E nehenehe e parau ē, ’aita Korinetia i ta’a ’ē roa i tō tātou nei ao. E aha tā Paulo i ha’api’i i roto i te 1 Korinetia 6:13–20 ’o tē nehenehe e tauturu ia ’oe ’ia fa’a’ite i te ta’ata nō te aha ’oe e hina’aro nei e ora i te orara’a vi’ivi’i ’ore ?

Mai ia Paulo, ’ua fa’aitoito te tuahine Wendy W. Nelson i te feiā mo’a ’ia vai vi’ivi’i ’ore ; hi’o i tāna a’ora’a « Te here ’e te fa’aipoipora’a » (purera’a ’ati ti’a i te ao nei nō te feiā ’āpī pa’ari, 8 nō Tēnuare 2017, broadcasts.ChurchofJesusChrist.org). ’Ia au i te tuahine Nelson, e aha te mau ha’amaita’ira’a e tae mai nō te orara’a te ta’ata i te mau fa’aturera’a a te Fatu nō ni’a i te here e te hereherera’a ?

1 Korinetia 7:29–33

’Ua ha’api’i ānei Paulo ē, e mea maita’i a’e te fa’aipoipo-’ore-ra’a i te fa’aipoipora’a ?

E rave rahi ’īrava i roto i te 1 Korinetia 7 e huru parau ra ē, e mea au te fa’aipoipora’a, terā rā e mea au a’e te vai-’ōtahi-ra’a ’e te ha’apae-hope-ra’a i te hereherera’a. Terā rā, tē tauturu nei te ’Īritira’a a Iosepha Semita nō te 1 Korinetia 7:29–33 ’ia māramarama ē, tē parau ra Paulo nō rātou i pi’ihia ’ei misiōnare rave tāmau, ma te parau ē, e mea ’ōhie a’e ’ia tāvini i te Atua i roto i tā rātou misiōni mai te peu e vai ’ōtahi rātou. ’Ua ha’api’i te Fatu nā roto i tāna mau tāvini, ’e nā roto ato’a ho’i ia Paulo ē, e tuha’a te fa’aipoipora’a nō tāna fa’anahora’a mure ’ore ’e e mea tītauhia nō te fa’ateiteira’a (hi’o 1 Korinetia 11:11 ; Te Ha’api’ira’a Tumu ’e te mau Fafaura’a 131:1–4).

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

1Korinetia 1:10–17 ; 3:1–11.’Ia tai’o te mau melo o te ’utuāfare i teie mau ’īrava, e ani ia rātou ’ia hi’o mai i te hō’ē mea e nehenehe e tauturu ia rātou ’ia fa’arahi atu ā i te hō’ēra’a.

1 Korinetia 3:1–2.Pēnei a’e e nehenehe tā ’outou e tai’o i teie mau ’īrava ’a inu ai i te ū ’e ’a ’amu ai i te ’īna’i. E nehenehe e fa’aau i te tupura’a o te hō’ē ’aiū ’ei ta’ata pa’ari, i te tupura’a pae vārua.

1 Korinetia 3:4–9.’Ua fa’aau Paulo i tāna tauto’ora’a misiōnare ’ei tanura’a huero. E aha tā teie fa’aaura’a e ha’api’i nei ia tātou nō ni’a i te fa’a’itera’a i te evanelia ?

1 Korinetia 6:19–20.E riro ē, te fa’aaura’a i tō tātou nei tino i te hō’ē hiero, mai tā Paulo ho’i i rave, e rāve’a manuia roa ïa nō te ha’api’i nō ni’a i te mo’ara’a o tō tātou nei tino. Pēnei a’e e nehenehe tā ’outou e fa’a’ite i te hōho’a nō te mau hiero, mai te mau hōho’a i roto i teie arata’i ha’api’ira’a. Nō te aha e mea mo’a te mau hiero ? E aha te tū’atira’a o tō tātou tino ’e te mau hiero ? ¨Nāhea tātou nō te rave i tō tātou nei tino mai te hiero ? (Hi’o ato’a i te nene’ira’a ta’a ’ē nō te Liahona nō Ātete 2020, nō ni’a i te āpenira’a.)

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Je demeure dans un temple », Chants pour les enfants, 73.

Ha’amaita’i i tā’u iho tuatāpapara’a pāpa’ira’a mo’a

E fa’a’oroma’i ia ’oe iho. ’Ua ha’api’i Paulo ē, ’ia ha’api’i tātou i te ’evanelia, e ū nā mua, e ’īna’i i muri iho (hi’o 1 Korinetia 3:1–2). Mai te peu ē, e mea fifi te tahi mau ha’api’ira’a tumu ’ia māramarama i teienei, e fa’a’oroma’i. E ti’aturi ē, e tae mai te mau pāhonora’a, ’ia vai noa rā te fa’aro’o ’e ’ia fa’aitoito noa te tuatāpapara’a.

’Ua fa’aau Paulo i tō tātou nei tino i te mo’ara’a o te hiero. Fa’a’ohura’a nira uāti, ha’amata i ni’a, i te pae ’aui : Hiero nō Tijuana (Mēhiko), hiero nō Taipei (Tāiuane), hiero nō Tegucigalpa (Honetura), hiero nō Houston (Texas, Marite).