11–17 nō Tetepa

2 Korinetia 1–7

« E fa’afaite ’outou i te Atua »

’A tuatāpapa ai ’outou i te mau rata a Paulo i tō Korinetia, e pāpa’i i te tahi o te mau parau tumu nō te ’evanelia tā ’outou e ’ite mai ’e e feruri i te rāve’a nō ’outou nō te fa’a’ohipa i te reira i roto i tō ’outou orara’a.

Pāpa’i i te mau mana’o e tae mai

I te tahi taime, te ti’ara’a fa’atere o te ’Ēkālesia, ’o te paraura’a ïa i te ta’ata i te tahi mau parau fifi. Mai te reira i te tau o Paulo, mai te reira i teienei. E au ē, e rata tā Paulo i hāpono a’ena i te feiā mo’a nō Korinetia tei a’o ’eta’eta ri’i ia rātou, ’e ’ua fa’atupu te reira i te ’ino’ino. I roto i te rata tei riro mai i te 2 Korinetia, ’ua tāmata ’oia i te fa’ata’a i te tumu nō te mau parau ’eta’eta i ni’a ia rātou : « I pāpa’i ho’i au i te parau ia ’outou ma te pohe rahi ’e te māuiui rahi ’ā’au, ’e ma te roimata rahi ho’i ; e ’ere ra ē ’ei fa’a’otora’a atu ia ’outou, ’ia ’ite rā ’outou i te rahi o tō’u nei aroha ia ’outou na » (2 Korinetia 2:4). Nā ’oe ana’e te tahi fa’atītī’aifarora’a mai roto mai i te hō’ē ti’a fa’atere, e mea tauturu mau ’ia ’ite ē, nō roto mai te reira i te here huru Mesia. ’E noa atu ē ’aita, mai te peu ’ua ineine tātou i te hi’o ia vetahi ’ē i te hi’ora’a here a Paulo, e mea ’ōhie a’e ïa ’ia fa’aruru tano i te mau mana’o ’ino’ino ato’a. Mai tā Elder Jeffrey R. Holland i parau : « Nō reira ’a fa’a’oroma’i i te mau hape a te ta’ata nei—tō ’outou iho ’e tō vetahi ’ē ’o tē tāvini ra i roto i teie ’Ēkālesia e arata’ihia nei e te mau tāne ’e te mau vahine tāhuti e hōro’a i tō rātou taime. Ta’a ’ē noa atu tāna Tamaiti fānau tahi ’e te maita’i roa a’e, e mau ta’ata hapehape ana’e tā te Atua e ’ohipa nei mai te ’ōmuara’a mai ā o te tau » (« E te Fatu, ’ua fa’aro’o vau », Liahona, Mē 2013, 94).

Mau mana’o nō tā’u iho tuatāpapara’a pāpa’ira’a mo’a

2 Korinetia 1:3–7 ; 4:6–10, 17–18 ; 7:4–7

E ti’a i tō’u mau fifi i te ha’amaita’i iā’u.

’Ia hi’ohia te mau fifi tā Paulo i fa’aruru i roto i tāna tāvinira’a, e’ita iho ā ïa tātou e māere ē, ’ua pāpa’i rahi ’oia nō ni’a i te fā ’e te ha’amaita’ira’a o te mau ’ati. ’Ia tai’o ’oe i te 2 Korinetia 1:3–7 ; 4:6–10, 17–18 ; 7:4–7, ’a feruri i te huru tā ’oe mau fifi e nehenehe e riro ’ei ha’amaita’ira’a. ’Ei hi’ora’a, e nehenehe e feruri i te huru te Atua i « ha’amāhanahana mai ia [’oe] i tō [’oe] mau pohe ato’a nei » ’e te huru ato’a ’oe e nehenehe e « ha’amāhanahana i te feiā i ro’ohia i te pohe ra » (2 Korinetia 1:4). ’Aore rā e nehenehe tā ’oe e rōtahi i ni’a i te huru te māramarama o Iesu Mesia i « ’ana’ana mai » i roto i tō ’oe ’ā’au, noa atu ā ’oe i « ’ati » ’e i « pe’ape’a » (2 Korinetia 4:6, 8).

Hi’o ato’a Mosia 24:13–17 ; Henry B. Eyring, « Tāmatahia, ha’apāpūhia ’e fa’a’ana’anahia », Liahona, Novema 2020, 96–99.

2 Korinetia 2:5–11

Te fa’a’orera’a hapa e ha’amaita’ira’a ïa tā’u e nehenehe e hōro’a e e fāri’i.

’Aita e parau rahi nō ni’a i te ta’ata tā Paulo i fa’ahiti i roto i te 2 Korinetia 2:5–11—tei ’ite-noa-hia, ’oia ho’i, ’ua ’ōfati ’oia i te ture (hi’o ’īrava 5–6) ’e ’ua hina’aro Paulo i te feiā mo’a ’ia fa’a’ore i tāna mau hapa (hi’o ’īrava 7–8). Nō te aha, i te tahi taime, tē manuia ’ore nei tātou i te « fa’a’ite pāpū i i tō [tātou] aroha » i te ta’ata i fa’a’ino ia tātou ? (’īrava 8). E nāhea te ’orera’a e fa’a’ore i te hapa i te ha’amāuiui ia vetahi ’ē ’e ia tātou ato’a nei ho’i ? (hi’o mau ’īrava 7, 10–11). E nāhea te ’orera’a e fa’a’ore i te hapa « e noa’a mai ho’i tā Sātane vāhi ia tātou » ? (’īrava 11).

Hi’o atoa Te Ha’api’ira’a Tumu ’e te mau Fafaura’a 64:9–11.

2 Korinetia 5:14–21

Nā roto i te tāra’ehara a Iesu Mesia, e nehenehe tā’u e fa’afaite iā’u i te Atua.

Mai te mau ta’ata ato’a, ’ua ’ite ’o Paulo e aha te huru te rirora’a ’ei « ta’ata ’āpī » (2 Korinetia 5:17). Mai te ta’ata hāmani ’ino i te keresetiano ’oia i te rirora’a mai ’ei tino pāruru mata’u ’ore nō te Mesia. ’Ia tai’o ’oe i te 2 Korinetia 5:14–21, ’a feruri i te mau uira’a mai teie : E aha te aura’a te fa’afaitera’a ? E aha te aura’a o te parau e fa’afaite i te Atua ? E feruri i te mau mea e nehenehe e fa’ata’a ’ē ia ’oe i te Atua. E aha tei tītauhia ia ’oe ’ia rave nō te fa’afaite hope roa iāna ra ? E nāhea te Fa’aora i te fa’atupu i te reira ?

E nehenehe ato’a e feruri i te aura’a nō te parau « ve’a […] nā te Mesia » i roto i « te tōro’a fa’afaite nei » (mau ’īrava 18, 20). E aha tā ’oe e tāpe’a mai i roto i te a’ora’a a Elder Jeffrey R. Holland ra « Te tāvinira’a fa’afaitera’a » ? (Liahona, Nov. 2018, 77–79).

Hi’o ato’a 2 Nephi 10:23–25.

2 Korinetia 7:8–11

E arata’i te ’oto e au i te Atua ra i te tātarahapa.

’Aita tātou i mātau i te feruri i te ’oto ’ei mea maita’i, tē fa’ahiti nei rā Paulo i te parau nō « te ’oto e au i te Atua ra » (2 Korinetia 7:10) ’ei tuha’a tumu nō te tātarahapara’a. ’A hi’o i te ha’api’ira’a tā ’oe e ’apo nei nō ni’a i te ’oto e au i te Atua ra, i roto i te mau mea i muri nei : 2 Korinetia 7:8–11 ; Alama 36:16–21 ; Moromona 2:11–15 ; ’e te a’ora’a a te tuahine Michelle D. Craig « Māha ’ore atua » (Liahona, Nov. 2018, 52–55). I te hea taime ’oe i te ’itera’a i te ’oto e au i te Atua, ’e e aha tā te reira i fa’atupu i roto i tō ’oe orara’a ?

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

2 Korinetia 3:1–3.’Ua ani a’enei te mau melo o te ’utuāfare i te hō’ē ta’ata ’ia pāpa’i i te hō’ē rata parau pa’epa’e ia rātou, nō te hō’ē ānei ’ohipa ’aore rā te tahi fare ha’api’ira’a ? E ani ia rātou ’ia fa’ati’a mai i te ’ohipa i tupu. ’Ua ha’api’i Paulo ē, mai te huru te orara’a o te feiā mo’a i te rata parau pa’epa’e nō te ’evanelia a Iesu Mesia, « ’aita i pāpa’ihia i te ’inita, nā te Vārua rā o te Atua ora ra ». ’A tai’o ’āmui ai ’outou i te 2 Korinetia 3:1–3, ’a ’āparau mai te aha te huru tō tātou hi’ora’a mai te mau rata « ’ua ’itea ’e ’ua tai’ohia e te ta’ata ato’a », ’ei fa’a’itera’a i te parau mau ’e te ho’ona o te ’evanelia. Pēnei a’e e nehenehe te melo tāta’itahi o te ’utuāfare e pāpa’i i te hō’ē rata ’aore rā te hō’ē « ’episetole » e fa’a’ite nei ’ua nāhea te tahi melo nō te ’utuāfare i te rirora’a ’ei hi’ora’a maita’i nō te ti’ara’a pipi nō Iesu Mesia. E nehenehe tā rātou e tai’o i tā rātou mau rata i te ’utuāfare ma te hōro’a atu i te melo iho o te ’utuāfare nō ni’a iāna i pāpa’ihia. Nō te aha e mea faufa’a ’ia māramarama ē, e mau « ’episetole nā te Mesia » tō tātou nei orara’a ?

2 Korinetia 5:6–7.E aha te aura’a o te parau « e haere’a fa’aro’o […] e ’ere i te haere’a ’ite mata » ? E aha tā tātou e rave ra nō te fa’a’ite ē, ’ua ti’aturi tātou i te Fa’aora noa atu e’ita tā tātou e nehenehe e ’ite iāna ?

2 Korinetia 5:17.E nehenehe ānei te ’utuāfare e feruri ’aore rā e ’imi mai i te hi’ora’a i roto i te nātura nō te mau mea e nā roto i te mau tauira’a fa’ahiahia nō te riro mai ’ei mea ’āpī ? (hi’o i te hōho’a i te pae hope’a o teie arata’i ha’api’ira’a). Nāhea te ’evanelia a Iesu Mesia e taui ai ia tātou ?

2 Korinetia 6:1–10.’Ia au i tei pāpa’ihia i roto i te 2 Korinetia 6:1–10, e aha te aura’a te parau « rave ’ohipa nā te Atua » ? (’īrava 4). Mai te aha te huru te hō’ē rave ’ohipa nā te Atua ?

2 Korinetia 6:14–18.Nāhea tātou e pe’e ai i te parau a’o a Paulo ’ia « haere mai […] i rāpae’au mai roto mai [i te feiā parauti’a ’ore] ra, ’ia ta’a ’ē ’outou », ’a here ato’a ai ia rātou ’ati a’e ia tātou ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Aide moi, Père », Chants pour les enfants, 52.

Ha’amaita’i i tā tātou ha’api’ira’a

Fa’a’ohipa i te mau ha’api’ira’a tao’a. Tē vai nei te tahi mau mea o te ’evanelia, mai te Tāra’ehara, e mea fifi ’ia māramarama. E nehenehe e fa’a’ohipa i te tahi hōho’a ’aore rā te tahi tao’a e tauturu i tō ’outou ’utuāfare ’ia māramarama i te mau parau tumu tā ’outou e ’ite mai i roto i te mau pāpa’ira’a mo’a.

’Ia fa’afāriuhia tātou i te ’evanelia a te Mesia, nō te hōhonu ho’i o tō tātou tauira’a, ’ua parau roa Paulo ē, e « ta’ata ’āpī » tātou (2 Korinetia 5:17).