Stap Yusum Tabu Miusik Taem Yu Stap Lanem Gospel

Blong stap singsing ol praemeri singsing mo ol hym i save blesem yu mo famli blong yu long plante wei. Olgeta aedia ia, oli save help blong yu yusum tabu miusik taem yu stap traehad blong lanem mo laef folem gospel.

• Lanem doktrin prinsipol. Lukaotem ol trutok we oli tijim insaed long ol singsing we yu stap singsing o lisin long ol. Hemia i save lidim yu blong toktok raon long ol trutok ia truaot long dei. Singsing o lisin long ol singsing blong Praemeri, o ol hym we oli stap tij abaot Jisas Kraes mo gospel blong Hem. Lisingud long ol defren wei we Tabu Spirit i stap yusum blong testifae abaot Sevya mo ol tijing blong Hem.

• Luksave paoa blong miusik. Blong stap singsing o stap lisin long ol singsing blong Praemeri i save stap olsem wan blesing long ol taem blong nid. Eksampol: blong singsing wan singsing i save mekem wan pikinini i stap kwaet long taem blong go long bed; i save givim glad taem famli blong yu i stap wok tugeta; i save leftemap tingting blong wan neba we i sik, o i save givim kamfot long wan we i harem se hem i wari.

• Serem sam eksperiens. Serem ol eksperiens blong yuwan o blong famli, we i go wetem ol mesej blong ol singsing ia. Mo tu, yu save serem ol skripja stori we oli go wetem.

• Stap mekem famli blong yu i kam tekpat moa. Bae famli blong yu i lanem moa aot long ol singsing ia sapos oli strong blong tekpat. Blong mekem ol memba blong famli oli tekpat, yu save invaetem wan pikinini we i bigwan blong i help blong tijim wan singsing long olgeta brata mo sista we oli moa yang, o i save invaetem ol pikinini blong tijim famli long wan singsing we oli bin lanem insaed long Praemeri. Mo tu, yu save letem ol memba blong famli oli kam, wan afta wan, blong lidim wan singsing.

• Fasin blong krietem samting. Yusum ol defren wei blong lanem tabu miusik olsem wan famli. Eksampol, yu save mekem ol aksen we oli go wetem ol toktok mo ol sentens insaed long wan singsing. O, wanwan i save gat taem blong kam aktem ol pat blong wan singsing, mo ol nara memba blong famli oli traem blong faenem nem blong singsing. Maet famli blong yu bae i laekem blong singsing long ol singsing wetem ol defren spid, o wetem ol defren kaen voes. Gospel Laebri ap mo Gospel blong Ol Pikinini ap, insaed long tufala ia, i gat ol odio rekoding mo ol vidio we oli save helpem yu blong lanem ol singsing. Maet bae yu mekem tu wan lis blong ol tabu miusik blong lisin long olgeta.

Blong gat moa aedia, luk long ol seksen ia: “Stap Yusum Miusik blong Tijim Doktrin” mo “Stap Helpem Ol Pikinini Oli Lanem mo Oli Tingbaot Ol Singsing blong Praemeri,” we yu save faenem insaed long “Instraksen blong Singsing Taem, mo Sakramen Miusik Presentesen blong Ol Pikinini” we oli stap long Kam Folem Mi—Blong Praemeri.