Iakwe Doon, jān Emma Donaldson Taylor

Jānwōde 24–30

Moses 7

“Irooj eaar Ņa Etan Armej ro An Zaion”

Ilo am̧ riiti im kejōkļo̧kjeņ kōn Moses 7, je im̧we ko am̧ ilo jetōb. Ilo am̧ kōm̧m̧ane menin, kwoj kwaļo̧k ke kwoj kaorōk tōl jān Irooj im bwe kwokōņaan bōk eļapļo̧k An tōl.

Je En̄jake ko Rej Im̧we Eok

Ilo bwebwenato, armej rekar kajjieon̄ bōk ta eo Inōk im armej ro an rekar tōpare: kalōk juon jukjuk in pād eo eaorōk ijo ejjeļo̧k jeram̧ōl im jorrāān ko ie. Āinwōt armej ro an Anij, jej kwaļo̧k ikdeleel in. Jej ņa etan ijin em̧ōj kalōke Zaion, im ekoba—n̄an bar kea kōn ro rej aikuj im kōm̧m̧an aenōm̧m̧an—kōm̧m̧an bujen ko, mour ippān doon ilo jim̧we, im erom̧ juon wōt ippān doon im ippān Jisōs Kraist, “Kiin̄ eo an Zaion” (Moses 7:53). Kōnke jerbal in ejaak Zaion ej wōnm̧aanļo̧k wōt ilo raan kein ad, elukkuun jipan̄ n̄an kajjtōk, Ekōjkan an kar Inōk im armej ro an kōm̧m̧ane menin? Ekōjkan aer kar erom̧ “juon wōt ilo bōro im juon wōt ilo ļōmņak” (Moses 7:18) jekdoon nana ko me kar jepool er kaki? Ilubwiljin aolep meļeļe ko Moses 7 ej letok n̄an kōj kōn Zaion, juon men eo im ealikkar n̄an Armej ro Rekwojarjar ilo Raan Ko Āliktata emaron̄ menin: Zaion ejjab wōt juon jikin—ej juon jekjek kōn bōro im jetōb. Zaion, āinwōt an Irooj kar katakin, ej “ro erreo burueer” (Katak im Bujen Ko 97:21). Kōn menin bōlen wāween eo em̧m̧antata n̄an kalōk Zaion ej n̄an jino ilo buruōm̧ im m̧weo im̧ōm̧ make.

Ļōm̧ņak ko n̄an Ekkatak Jeje Ko Rekwojarjar Ippam̧ Make

Moses 7:16–21, 27, 53, 62–69

Kijejeto ko an Inōk rej juon jon̄o̧k in kalōk Zaion ilo mour ko ad make.

Kōnke Moses 7 ej juon rekoot kōn ekōjkan an rikaļoor ro an Anij kar tōprak ilo aer kar kalōk Zaion, emaron̄ katakin im im̧we kōj rainin ilo ad kajjieon̄ kōm̧m̧ane ejja menin wōt. Ļōmņak in kōjerbal juon tābōļ rōt in n̄an rekoote ta eo kwoj ekkatak kōn Zaion jān Moses 7:16–21, 27, 53, 62–69.

Eoon	Ta eo kwoj ekkatak kōn Zaion?	Ta eo menin ej kwaļo̧k kōn kijejeto eo am̧ n̄an kalōk Zaion?
Eoon 7:18	Ta eo kwoj ekkatak kōn Zaion? Armej ro an Zaion rekar “juon wōt ilo bōro im juon wōt ilo ļōmņak.”	Ta eo menin ej kwaļo̧k kōn kijejeto eo am̧ n̄an kalōk Zaion? Jej aikuj ippān doon āinwōt baam̧le ko im āinwōt juon Kabun̄.
Eoon 7:21	Ta eo kwoj ekkatak kōn Zaion? “Ilo wōnm̧aanļo̧k in iien, [Zaion] kar bōklōn̄ļo̧k ilo lan̄.”	Ta eo menin ej kwaļo̧k kōn kijejeto eo am̧ n̄an kalōk Zaion? Kalōk Zaion ej juon jerbal ekar bōk jikin jidikļo̧k jidik.
Eoon	Ta eo kwoj ekkatak kōn Zaion?	Ta eo menin ej kwaļo̧k kōn kijejeto eo am̧ n̄an kalōk Zaion?
Eoon	Ta eo kwoj ekkatak kōn Zaion?	Ta eo menin ej kwaļo̧k kōn kijejeto eo am̧ n̄an kalōk Zaion?

Moses 7:18–19, 53

Armej ro an Anij rej aikuj kajjieon̄ erom̧ “juon wōt ilo bōro im juon wōt ilo ļōmņak.”

Moses 7:18–19 ej kōllaajrak m̧wil ko raorōk an armej ro Irooj ekar ņa etaer Zaion. Etke kwoj ļōmņak m̧wil kein remenin aikuj n̄an kalōk Zaion? Ekōjkan an Zaion, kar kōmeļeļeiki ilo jebta in, oktak jān kurup in ippān doon ko jet ak doulul ko jet ilo laļ in? Ilo am̧ kejōkļo̧kjeņ kōn kajjitōk in, kwomaron̄ ļōmņak kōn naan ko an Jisōs Kraist ilo eoon 53: “N̄aij Messaia, Kiin̄ eo an Zaion.” Ta meļeļein n̄an bōk Jisōs Kraist āinwōt juon ad Kiin̄? Ekōjkan An jipan̄ kōj kōļapļo̧k m̧wil ko an Zaion?

Barāinwōt lale Pilipai 2:1–5; 4 Nipai 1:15–18; Katak im Bujen Ko 97:21; 105:5.

Jej aikuj kajjieon̄ n̄an erom̧ “juon wōt ilo bōro im juon wōt ilo ļōmņak” (Moses 7:18).

Moses 7:21, 23–24, 27, 69

Ta eo ekar waļo̧k n̄an jikin eo an Inōk?

Naan ko “bōklōn̄ļo̧k” (Moses 7:21, 23), “kotaklōn̄ļo̧k” (Moses 7:24), “weaaklōn̄ļo̧k” (Moses 7:27), im “jako” (Moses 7:69) rej kōnono kōn Zaion im armej ro an Inōk ke rekar oktak n̄an mour in jab wabanban im weaaklōn̄ļo̧k. Armej ro rekar oktak “rekar oktak bwe ren jab en̄jake metak ak mej” āinwōt mour in wabanban (Unin Tōl Eo N̄an Jeje ko Rekwojarjar, “Translated Beings,” “Zion,” scriptures.ChurchofJesusChrist.org; barāinwōt 3 Nipai 28:4–9, 15–18, 39–40).

Moses 7:28–69

Anij ej jan̄ kōn ajri ro Nejin.

Jet armej rej lo Anij āinwōt juon armej eo ettoļo̧k eo ejjeļo̧k an en̄jake in būrom̧ōj kōn ta ko rej waļo̧k n̄an kōj. Ak Inōk ekar lo ilo juon visōn eo me Anij ekar jan̄ kōn ajri ro Nejin. Ilo am̧ riiti Moses 7:28–40, kappukot unin an Anij jan̄. Ilo aolepān visōn eo an Inōk, kar kōmeļeļeiki ilo Moses 7:41–69, ta kam̧ool ko kwoj loe ke Anij elukkuun “tūriam̧o im juoj indeeo”? (Moses 7:30; lale eoon ko 43, 47, im 62 n̄an waanjon̄ak ko).

Moses 7:62

Ilo raan ko āliktata Anij enaaj aiintok An rikāālet.

Eoon 62 ej kōmeļeļeik m̧akūtkūt ko ilo raan ko āliktata. Ļōmņak kōn kain jentōj rōt in emaron̄ ta meļeļein: “wānōk I naaj jilkinlaļļo̧k jān lan̄,” “m̧ool I naaj jilkinļo̧k jān laļ,” “wānōk im m̧ool I naaj kōm̧m̧an bwe ren pooke laļ āinwōt juon ibwijleplep.” Ta eo jentōj kein rej katakin eok kōn jerbal eo an Anij ilo raan ko āliktata?

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Moses 7:18–19.N̄an jipan̄ ro uwaan baam̧le ko loļo̧kjeņ kōn ta meļeļein n̄an erom̧ “juon wōt ilo bōro,” bōlen kwomaron̄ kōm̧m̧an juon peba jekjek in menono im m̧wijiti n̄an m̧ōttan in bajjōļ, en bwe n̄an kajjojo ro uwaan baam̧le eo n̄an kajjo mōttan bajjōļ. Ro uwaan baam̧le eo remaron̄ je etaer ioon m̧ōttan bajjōļ ko innem jerbal ippān doon n̄an kakobaik jeje in menono eo ippān doon. Ilo an dedeļo̧k bajjōļ eo kwomaron̄ kōnono kōn men ko em̧m̧an ippam̧ kōn kajjojo uwaan baam̧le eo am̧?

Moses 7:28–31, 35.Ta eo jej ekkatak kōn Anij jān eoon kein?

Moses 7:32.Etke Anij ej letok anemkwoj? Ta eo jemaron̄ ba n̄an juon eo ej en̄jake bwe kien ko an Anij ej kōm̧m̧an jon̄an anemkwoj eo ad? Riiti 2 Nipai 2:25–27 emaron̄ kobatok ilo ekkōnono in.

Moses 7:59–67.Ilo an baam̧le eo am̧ riiti Moses 7:59–67, kajjieon̄ kōm̧m̧an ak je men ko Irooj ej ba n̄an Inōk kōn raan ko āliktata—n̄an waanjon̄ak, ke Anij enaaj “aintok ro [An] rikāālet” (eoon 62) im bwe naaj wōr “en̄taan reļļap ilubwiljin ro renana” (eoon 66). Ekōjkan an wōr ad tōmak im kōjatdikdik jekdo̧o̧n nana ko ilo raan ko āliktata? Āinwōt m̧ōttanļo̧k ekkōnono in, ļōmņak kōn naan kein jān Elder Ronald A. Rasband: “Peran, ro jeiū im jatū. Aaet, jej mour ilo raan ko aliktata, bōtaab ilo ad pād wōt ilo iaļen bujen eo, jej jab aikuj in mijak. Ij kōjeraam̧m̧an kom̧ bwe ilo ami kōm̧m̧ane, kom̧ jāmin lōļn̄o̧n̄ ilo iien ko im jej mour ie im lōļn̄o̧n̄ kōn ta ko im̧aan. Ij kōjeraam̧m̧an kom̧ n̄an kālet n̄an jutak ilo jikin ko rekwojarjar, im jab m̧akūtkūt. Ij kōjeraam̧m̧an kom̧ n̄an tōmak ilo kallim̧ur ko an Jisōs Kraist, bwe Emour im bwe Ej lale kōj, kea kake kōj im jutak iturid” (“Kom̧win Jab Lōļn̄o̧n̄,” Liaona, Nob. 2018, 21).

N̄an ļōmņak ko reļļapļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar Elmakote: “Ewōr Aibujuij Ibelakin,” Al, peij 34.

Kōkōm̧anm̧anļo̧k Ad Ekkatak

Kwon lale. N̄e kwoj lukkuun lale ta eo ej waļo̧k ilo mour ko an ajri ro nejum̧, kwonaaj lo iien katakin ko rem̧m̧an. Kakobaba ko an armej ro nejūm̧ im kajjitōk ko aer ilo juon raan emaron̄ juon kōkaļļe in iien katakin ko rem̧m̧an. (Lale Katakin ilo Wāween eo an Rilo̧mo̧o̧r, 16.)

Jikin eo an Zaion ekar oktak n̄an Jab Wabanban, jān Del Parson