Ļōmņak ko n̄an Keememeji

Bujen Eo

Ilo aolepān Kallim̧ur M̧okta, enaaj ikutkut am̧ riiti naan eo bujen. Rainin ekkā ad ļōmņake bujen ko āinwōt kallim̧ur ko rekwojarjar ippān Anij, ak ilo tōre ko etto, bujen ko rekar jet m̧ōttan ko reaorōk ilo jem̧jerā ko an armej ro ippān doon. N̄an jokne im aer mour, armej ro rekar aikuj lōke doon, im bujen ko rekar juon wāween n̄an kapen lōke eo.

Kōn menin ke Anij ekar kōnono n̄an Noa, Ebream, ak Moses kōn bujen ko, E ekar karuwaineneik er n̄an deļon̄e juon jem̧jerā n̄an lōke E. Juon iaan waanjon̄ak ko eļap jeļā kake kōn bujen eo ilo Kallim̧ur M̧okta ej bujen eo me Anij ekar kōm̧m̧ane ippān Ebream im Serai—innem kōkāāl ippān ro bwijjier Isaac im Jekab (et eo juon etan ej Israel). Ekkā ad ņa etan bujen in an Ebream, men̄e ilo Kallim̧ur M̧okta kar jeļā kake āinwōt “bujen eo.” Kwonaaj loe bwe Kallim̧ur M̧okta ej pedped in bwebwenato eo an armej ro rekar watōk er make āinwōt rijolet ro an bujen in—armej in bujen.

Bujen eo an Ebream ej wōnm̧aanļo̧k wōt ilo an aorōk rainin, eļaptata n̄an Armej ro Rekwojarjar ilo Raan Ko Āliktata. Etke? Kōnke jej barāinwōt armej in bujen, men̄e ak jaab jej itok jān bwijjin Ebream, Isaac, im Jekab (lale Galetia 3:27–29). Kōn un in, eaorōk bwe jen meļeļe ta in bujen eo an Ebream im ekōjkan ad mour kake rainin.

Ta Bujen eo an Ebream?

Ebream ekar kōņaan “juon riļoor jim̧we” (Ebream 1:2), kōn menin Anij ekar karuwaineneiki n̄an juon bujen jem̧jerā. Ebream ekar jab e eo jinointata me ekar bōk ikdeleel in, im ekar jab e eo jinointata n̄an bōk bujen eo. Ekar kappukot “kōjeraam̧m̧an ko an ro [jemān]” (Ebream 1:2)—kōjeraam̧m̧an ko me kar litok jān bujen eo n̄an Adam im Iv im tokālik n̄an ro rekar kappukot kōjeraam̧m̧an ko ilo tiljek.

Bujen eo an Anij ippān Ebream ekar kallim̧ur kōn kōjeraam̧m̧an ko raiboojoj: juon jolet in āne, juon ineen eļap, maron̄ bōk kain̄i ko an priesthood, im juon et me naaj kautieje jān epepen ko rej itok. Ak jibadbad eo an bujen in ekar jab wōt kōn kōjeraam̧m̧an ko an Ebream im baam̧le eo an me renaaj bōke ak barāinwōt kōjeraam̧m̧an eo me renaaj erom̧ ajri ro nejin Anij. “Kwōnaaj men in kajeraam̧m̧an,” Anij ekar ba, “im kōn kwe nukun otemjej i laļ renaaj jeraam̧m̧an” (Jenesis 12:2–3).

Bujen in ekar ke leļo̧k n̄an Ebream, Serai, im ro bwijjier juon taitō eutiej ilubwiljin ajri ro nejin Anij? Kōn wōt jeļā in bwe ej juon menin eutiej n̄an kōjeraam̧m̧an ro jet. Baam̧le eo an Ebream renaaj kar “kotak jerbal in im Priesthood in n̄an aolep laļ,” kwaļo̧k “kōjeraam̧m̧an ko an Gospel eo, ko rej kōjeraam̧m̧an ko in lo̧mo̧o̧r, em̧ool mour indeeo” (Ebream 2:9, 11).

Bujen in ej kōjeraam̧m̧an eo me eto an Ebream kar kōttar e. Ālkin an kar bōke, Ebream ekar ba ilo buruōn, “Karejeram̧ eaar kanooj kijejeto kappukot Eok; kiiō em̧ōj aō lo Eok” (Ebream 2:12).

Menin kar taujin iiō ko remootļo̧k, ak bujen in em̧ōj an bar jepļaaktok ilo raan kein ad (lale 1 Nipai 22:8–12). Im kiiō ej kūrm̧ool ilo mour ko an armej ro an Anij. Ilo m̧ool, kūrm̧ool in bujen in ej juon wōnm̧aanļo̧k wōt ilo raan ko āliktata āinwōt an jerbal eo an Anij wōnm̧aanļo̧k wōt, kōjeraam̧m̧an baam̧le ko ilo aolepān laļ in, Im jabdewōt eo, āinwōt Ebream, ej kōņaan erom̧ juon rikaļoor jim̧we, jabdewōt eo ej kappukot Irooj ilo m̧ool, emaron̄ m̧ōttanļo̧k menin.

Ta Meļeļein Bujen eo an Ebream n̄an N̄a?

Kwoj juon ajri in bujen. Kwaar kōm̧m̧ane juon bujen ippān Anij ke kwaar peptaij. Kwoj kōkāāl bujen aolep iien ilo am̧ bōk m̧ōttan kwojkwoj eo. Im kwoj kōm̧m̧ani bujen ko rekwojarjar ilo tampeļ. Ippān doon, bujen ko rej kōm̧m̧an bwe kwon bōk koņaam̧ ilo bujen ko an Ebream, tarlep in ta eo me jej loe ilo kain̄i ko an tampeļ eo. Āinwōt an Būreejtōn Russell M. Nelson kar katakin, “Āliktata, ilo tampeļ eo ekwojarjar, jemaron̄ jolete kōjeraam̧m̧an ko an baam̧le eo n̄an indeeo, āinwōt kar kallim̧ur kaki n̄an Ebream, Isaac, im ro ineer.”¹

Kōn bujen im kain̄i kein, jej erom̧ armej ro an Anij (lale Exodus 6:7; Duteronomi 7:6; 26:18; Ezekiel 11:20). Jej oktak jān laļ eo me ej jepooļe kōj. Bujen ko rej kōm̧m̧an bwe jen m̧ool, im erom̧ rikaļoor ro an Jisōs Kraist me rej wūjlepļo̧k er make. “Bujen ko ad,” Būreejtōn Nelson ej kōmeļeļeiki, “rej liape kōj Ippān im letok n̄an kōj kajoor an Anij.”² Im ke Anij ekar kōjeraam̧m̧an armej ro An k An kajoor, ej kōn kūr im kōtmene ke renaaj kōjeraam̧m̧an ro jet—bwe renaaj “juon men in kajeraam̧m̧an” n̄an “aolep nokwe ko an laļ” (Ebream 2:9, 11).

Jeļā in elukkuun aorōk kar letok n̄an kōj kōn wōt Jepļaaktok eo an bujen eo an Ebream n̄an Rikanaan Josep Smith. Kōn menin n̄e kwoj riiti bujen ko ilo Kallim̧ur M̧okta, jab ļōmņak wōt kōn jem̧jerā eo an Anij ippān Ebream, Isaac, im Jekab. Ļōmņak barāinwōt kōn jem̧jerā eo An ippam̧. N̄e kwoj riiti kallim̧ur eo an kōn ineen eļap jeban maron̄ bwūni (lale Jenesis 28:14), jab ļōmņak wōt kōn jon̄an lōn̄in armej ro rainin rej ān̄inn̄in Ebream ro jemāer. Ļōmņak barāinwōt kōn kallim̧ur eo an Anij n̄an kwe kōn baam̧le ko indeeo im an orļo̧k n̄an indeeo (lale Katak im Bujen Ko 131:1–4; 132:20–24). N̄e kwoj riiti kallim̧ur eo an āneen jolet eo, jab ļōmņak wōt kōn āne eo kar kallim̧uri Ebream n̄an jolete. Ļōmņak kōn mejān kajjik eo an selestial an laļ in make—juon jolet kar kallim̧ur kake n̄an ro “ettā būrueir” ro rej “kōttar Irooj” (Matu 5:5; Sam Ko 37:9, 11; barāinwōt lale Katak im Bujen Ko 88:17–20). Im n̄e kwoj riiti kallim̧ur eo kōn armej in bujen ro an Anij renaaj kōjeraam̧m̧an “aolep nokwe ko an laļ” (Ebream 2:11), jab ļōmņak wōt kōn jerbal in kwaļo̧k naan eo an Ebream ak rikanaan ro me rej bwijjin. Ļōmņak barāinwōt kōn ta eo kwomaron̄ kōm̧m̧ane—āinwōt juon bujen rikaļoor an Jisōs Kraist—n̄an erom̧ juon kōjeraam̧m̧an n̄an baam̧le ko ipeļaakim̧.

Kakeememej ko

1. Russell M. Nelson, “Bujen Ko,” Liaona, Nob 2011, 88.

2. Russell M. Nelson, “Bōktok Kajoor eo an Jisōs Kraist ilo Mour ko Ad,” Liaona, Māe 2017, 41. Būreejtōn Linda K. Burton ekar ba: “Kōm̧m̧ani im kōjparok bujen ko ej meļeleļe in kālet n̄an wūjlepļo̧k kōj make n̄an Jemedwōj ilo Lan̄ im Jisōs Kraist. Ej juon kalim̧m̧ur n̄an ļoor Rilo̧mo̧o̧r” (“Kajoor, Lan̄lōn̄, im Iakwe n̄an Kōjparok Bujen,” Liaona, Nob. 2013, 111).