Moses im Wōjke eo Eruur, jān Harry Anderson

M̧aaj 21–27.

Exodus 1–6

“Iar Keememej Bujen Eo Aō”

Jino ekkatak eo am̧ kōn jar, im kajjitōk kōn jipan̄ n̄an lo ennaan ko ilo Exodus 1–6 me rejetjet n̄an mour eo am̧ im n̄an jerbal in jipan̄ eo am̧ ilo aelōn̄ in kiin̄ eo an Anij.

Je En̄jake ko Rej Im̧we Eok

Kajjitōk eo n̄an mour ilo Egypt ekar lukkuun in lo̧mo̧o̧ren baam̧le eo an Jekab. Bōtaab ālkin buki iiō ko, ro bwijjier raar pād ilo kōm̧akoko im kar kakkure er jān pero eo ekāāl “eo ear jab jeļā Josep” (Exodus 1:8). Ekar juon men eo iminene kake n̄an RiIsrael ro n̄an ļōmņak etke Anij ekar kōtļo̧k bwe menin en waļo̧k n̄an er, armej in bujen ro An. E ekar ke keememej bujen eo E ekar kōm̧m̧ane ippāer? Raar ke armej ro An wōt? E emaron̄ ke kar lo ewi jon̄an aer kar en̄taan?

Emaron̄ in wōr iien ko ke kwar en̄jake āinwōt kajjitōk ejja kajjitōk kein wōt. Komaron̄ ļōmņak, Anij ejeļā ke ta eo ij dibuki? E emaron̄ ke ron̄jake akweļap ko aō kōn jipan̄? Bwebwenato eo ilo Exodus kōn diwōjļo̧k eo an Israel jān Egypt ealikkar rej uwaake kain kajjitōk kein: Anij ekar jab meļo̧kļo̧k armej ro An. E ej keememej bujen ko An ippād im enaaj kakūrm̧ooli ilo iien im wāween ko An make (lale Katak im Bujen Ko 88:68). “Inaaj wiaik koṃ kōn Peiū eṃōj erḷọke,” E ej kean̄. “N̄a Jeova ami Anij, Eo ej kadiwōjḷọk koṃ jān iuṃwin ineek ko [ami]” (Exodus 6:6–7).

Kōn juon etale eo kōn bok in Exodus, lale “Exodus, book of” ilo Bible Dictionary eo.

Ļōm̧ņak ko n̄an Ekkatak Jeje Ko Rekwojarjar Ippam̧ Make

Exodus 1–2

Jisōs Kraist ej aō Rikadiwōjļo̧k.

Juon iaan unin kōnono ko raorōk tata ilo bok in Exodus ej bwe Anij ewōr an kajoor n̄an kanemkwoj armej ro An jān jerbal nana. Kōm̧akoko eo an RiIsrael ro āinwōt kar kōmeļeļeik ilo Exodus 1 maron̄ kar loe āinwōt juon kakōļļe in jipakwe eo jej aolep jelm̧ae kōnke kōn jerawiwi im mej (lale 2 Nipai 2:26–27; 9:10; Alma 36:28). Im Moses, rikadiwōjļo̧k eo an RiIsrael ro, maron̄ kar loe āinwōt juon jekjek, ak ribōk jikin, Jisōs Kraist (lale Duteronomi 18:18–19; 1 Nipai 22:20–21). Riiti Exodus 1–2 kōn keidi kein ilo kōļmenļo̧kjeņ. Komaron̄ kile, n̄an waanjon̄ak, bwe jim̧or Moses im Jisōs kar kōjparok erro jān mej āinwōt ajri ro reddik (lale Exodus 1:22–2:10; Matu 2:13–16) im bwe erro jim̧or kar joļo̧k iien ilo āne jem̧aden m̧okta jān aerro jino jerbal in karejar eo aerro (lale Exodus 2:15–22; Matu 4:1–2). Ta bar kōļmenļo̧kjeņ ko jet kwoj ekkatak jān Exodus kōn jipakwe eo ilo jetōb? kōn kadiwōjļo̧k eo an Rilo̧mo̧o̧r eo?

Lale barāinwōt D. Todd Christofferson, “Pinmuur,” Kweilo̧k eo Eļap, Māe 2013, 109–12.

Moses ilo Koba ko, © Providence Collection/licensed from goodsalt.com

Exodus 3–4

Anij ej leļo̧k kajoor n̄an ro E ej kūr n̄an kōm̧m̧ane jerbal eo An.

Rainin jejeļā Moses āinwōt juon rikanaan im ritōl eļap. Bōtaab Moses ekar jab loe e make ilo wāween jab eo ke Irooj ekar kūr e ilo jinoin. “Wōn N̄a,” Moses ekar ļōmņak, “bwe in ilo̧k n̄an ippān Pero?” (Exodus 3:11). Mekarta, Irooj, ekar jeļā wōn eo kar lukkuun Moses—im wōn eo emaron̄ kar erom. Ilo am̧ riiti Exodus 3–4, kile ekōjkan an Irooj kar kam̧ool n̄an Moses im kar uwaake n̄ūrbōktak ko an. Ta eo kwoj loe ilo jepta kein me remaron̄ im̧we eok n̄e kwoj en̄jake likjab? Ekōjkan an kar Irooj kōjeraam̧m̧an ro Rikarejeran kōn eļapļo̧k kajoor n̄an kōm̧anm̧an Ankilan (lale Moses 1:1–10, 24–39; 6:31–39, 47). N̄aat eo kwar lo an Anij kōm̧m̧ane jerbal eo An kōn kwe ak ro jet?

Kōn eļōn̄ļo̧k kōn mour eo im jerbal in karejar eo an Moses, lale “Moses” ilo Bible Dictionary ak Unin Tōl eo n̄an Jeje Ko Rekwojarjar.

Exodus 5–6

Jibadbad ko an Irooj renaaj kūrm̧ool ilo iien eo An make.

Men̄e Moses ekar peran ilo an kar etal im̧aan Pero, ejja āinwōt an kar Anij kakiene, im kar jiron̄ e n̄an kōtļo̧k RiIsrael ro, Pero ekar m̧akoko. Ilo m̧ool, ekar kōm̧m̧an an penļo̧k an RiIsrael ro mour. Moses im RiIsrael ro remaron̄ in kar ļōmņak etke men ko raar jab jerbal jekdo̧o̧n ke Moses ekar kōm̧m̧ane ta eo Anij ekar kajjitōk ippān n̄an kōm̧m̧ane (lale Exodus 5:22–23).

Kwonan̄in ke kar en̄jake am kar kōm̧anm̧an ankilan Anij bōtaab kar jab lo tōprak eo kwar kōtemen? Etale Exodus 6:1–8, kappukōt ta eo Irooj ekar ba n̄an jipan̄ Moses wōnm̧aanļo̧k wōt. Ekōjkan an Irooj kar jipan̄ eok kijin̄en̄e wōt ilo kōm̧anm̧an Ankilan?

Exodus 6:3

Wōn eo Jeova?

Jeova ej juon iaan āt ko etan Jisōs Kraist im keidi n̄an Rilo̧mo̧o̧r eo ilo mour eo m̧okta. Ilo Josep Smith Translation ej kalikkar bwe rikanaan ro Ebream, Aijōk, im Jekab raar jeļā kajjien Irooj kōn āt in (lale Exodus 6:3, footnote c). Ekkā wōt, n̄e naan eo “Irooj” ej waļo̧k ilo Kallim̧ur M̧okta, ej kōnono kōn Jeova. Ilo Exodus 3:13–15, taitōļ eo “N̄a E” ej barāinwōt juon naan n̄an Jeova (lale barāinwōt Katak im Bujen Ko 38:1; 39:1).

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Exodus 1–2.Jejjo kōrā ro raar kōm̧m̧ani jerbal ko raorōk ilo karōk eo an Anij n̄an karrūtoļo̧k juon rikadiwōjļo̧k n̄an RiIsrael ro. Āinwōt juon baam̧le, kom̧ maron̄ riit kōn rikōmour ro Shipra im Pua (Exodus 1:15–20); Jinen Moses, Jokebed , im lieo jein jatin, Miriam (Exodus 2:2–9; Bōnbōn 26:59); leddik eo nejin Pero (Exodus 2:5–6, 10); im lio pāleen Moses Zippora(Exodus 2:16–21). Ekōjkan an kōrā rein kar kwōnm̧aanļo̧k karōk eo an Anij? Ekōjkan an kar en̄jake ko aer kakeememej kōj kōn mijen eo an Jisōs Kraist? Kom̧ maron̄ ain pija ko pija in kōrā ro nukumi im rūtto ro im kwaļo̧k bwebwenato ko kōn er. Ekōjkan ad kar jeraam̧m̧an kōn kōrā ro rejim̧we? Ennaan eo an Būreejtōn Russell M. Nelson “Juon kajjitōk n̄an Sister ro Aō” (Kweilo̧k eo Eļap, Nob. 2015, 95–98) maron̄ kobaik n̄an iien ekōnono eo ami.

Exodus 3:1–6.Ke Moses ekar kepaakļo̧k wōjke eo ebwil, Irooj ekar jiron̄ e n̄an wutikļo̧k juuj ko an āinwōt juon kakōļļe in kautiej. Ekōjkan ad maron̄ kwaļo̧k kautiej n̄an jikin ko rekwojarjar? N̄an waanjon̄ak, ta eo jemaron̄ kōm̧m̧ane n̄an kōm̧m̧an bwe m̧weo im̧ōd en juon jikin ekwojarjar ijo Jetōb eo an Irooj emaron̄ jokwe ie? Ekōjkan ad maron̄ kwaļo̧k eļapļo̧k kautiej ilo bar jikin ko jet rekwojarjar?

Exodus 4:1–9.Irooj ekar leļo̧k n̄an Moses kajoor n̄an kōm̧m̧ane jilu kabwilōn̄lōn̄ ko āinwōt kakōļļe ko n̄an kwaļo̧k an ro nejin Israel bwe E ekar jilkinļo̧k Moses. Ta eo kakōļļe kein rej katakin katakin kōj kōn Jisōs Kraist?

Exodus 5:2.Ta eo emaron̄ in meļeļe in n̄an kōj n̄an “jeļā” Irooj? Ekōjkan ad jeļā E? (n̄an waanjon̄ak, lale Alma 22:15–18). Ekōjkan an jemjera eo ad Ippān jelet ikdeelel eo ad n̄an pokake E? (lale barāinwōt Jon 17:3; Mosaia 5:13).

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Reverence Is Love,” Children’s Songbook, 31.

Kōkōm̧anm̧anļo̧k Ad Katakin

Kōm̧m̧ane juon jōnōl in ekkatak. Komaron̄ loe bwe ejipan̄ n̄an kōjerbal juon jōnōļ ak bok in jeje n̄an je ļōmņak ko, aitia ko, kajjitōk ko, ak im̧we ko me rej itok ilo am̧ ekkatak.

Kar lo Moses ilo Koba ko jān Leddik eo Nejin Pero, jān George Soper