Lom̧alo eo E Būrōrō

Eprōļ 4–10

Exodus 14–17

“Kom̧win Tōt Wōt, im Lo Lo̧mo̧o̧r an Irooj”

Anij eaar kakien Moses bwe en je en̄jake in “kōn juon keememej ilo juon bok” n̄an Joshua (Exodus 17:14). Ejja āinwōt, je jetōbin en̄jake ko am renaaj jipan̄ kwe im ro kwoj iakwe er keememej em̧m̧an eo an Irooj.

Je En̄jake ko Rej Im̧we Eok

RiIsrael ro kar aujiid. Lom̧alo eo E Būrōrō ekar pād ilo turājet eo juon, im ritariņae ro an Pero raar pād ilo turājet eo juon. Aer diwōjļo̧k jen Ijipt, ekar āinwōt, juon mour ekadu. Ak Anij eaar wōr an juon ennaan n̄an riIsrael ro me E ekōņaan bwe ren keememej epepen ko: “Kom̧win jab lōļn̄on̄. … Bwe Jeova enaaj ire n̄an kom̧” (Exodus 14:13–14).

Jen tōre eo, ke armej ro an Anij raar aikuji tōmak im peran, ekkā aer oktakļo̧k n̄an bwebwenatooin lo̧mo̧o̧ren eo ekabwilōn̄lōn̄ an riIsrael ro. Ke Nipai eaar kōņaan im̧we ļōm̧anro jein, eaar ba, “Jen kajoor āinwōt Moses; bwe m̧ool eaar kōnono n̄an dān ko ilo Lom̧aļo Ekilmir im raar ajej ijeņ im ijeņ, im ro jemād raar tōpar tu rājet, jān jipo̧kwe, ioon āne em̧ōrā” (1 Nipai 4:2). Ke Limai eaar kōņaan bwe armej in jipo̧kwe ro an ren “kotak bōra[er], im m̧ōņōņō,” eaar kakeememej er kōn ejja bwebwenato in (Mosaia 7:19). Ke Alma eaar kōņaan kam̧ool n̄an lōm̧aro nejin kōn kajoor eo an Anij, eaar bar kwaļo̧k bwebwenato in (lale Alma 36:28). Im n̄e jej aikuj diwōjļo̧k—n̄e jej aikuj eļapļo̧k tōmak, n̄e jej aikuj in “tōt wōt, im lo lo̧mo̧o̧r an Jeova”—jemaron̄ keememej elmen an “Irooj kar lo̧mo̧o̧r riIsrael ro raan eo jen pein riIjipt ro” (Exodus 14:13, 30).

Ļōm̧ņak ko n̄an Ekkatak Jeje Ko Rekwojarjar Ippam̧ Make

Exodus 14

Ewōr an Anij kajoor n̄an kadiwōjļo̧k eō.

Ilo am riiti Exodus 14:1–10, lōmņake elmen an riIsrael ro kar en̄jake ke rej lo ritariņae ro an Pero epaaktok. Bōlen kwoj en̄jake bwe kwoj aikuji juon kabwilōn̄lōn̄ n̄an anjo̧ ilo juon iien epen kwoj jelm̧ae. Ta eo kwoj ekkatak jān Exodus 14:13–31 me emaron̄ jipan̄ eok lo lo̧mo̧o̧r eo an Anij ilo mour eo am? Ta eo kwaar ekkatak kōn wāween ko Anij ej letok lo̧mo̧o̧ren jān kapo? Kōļmenļo̧kjeņ elmen am lo An lo̧mo̧o̧ren ekajoor ilo mour eo am.

Bar lale Katak im Bujen Ko 8:2–3; L. Tom Perry, “Kajoor in Lo̧mo̧o̧ren eo,” Kweilo̧k eo Eļap, Eprōļ 2012; Bible Maps, no. 2, “Israel’s Exodus from Egypt and Entry into Canaan.”

Exodus 15:22–27

Irooj emaron̄ kōm̧m̧ani men ko remeo n̄an tōn̄al.

Ilo am riit ilo Exodus 15:22–27 kōn em̧akūt eo an riIsrael ro n̄an āneen kallim̧ur, ļōmņak kōn men ko ilo mour eo am me āinwōt n̄e raar “meeo” āinwōt dān ko in Mera. Ļōmņake kajjitōk kein ilaļ ilo am kōļmenļo̧kjeņ kōn eoon kein: Elmen an Irooj maron̄ kōmman bwe men ko remeeo ren tōn̄al ilo mour eo am? Ta en̄jake eo eaorōk ilo mour eo am? Kōm̧m̧an ta eoon 26 im 27 rej elmakwot kōn elmen an Irooj kōjeraam̧m̧an kōj n̄e jej ron̄jake Ainikien?

Exodus 15:23–27; 16:1–15; 17:1–7

Imaron̄ lōke Irooj, ilo iien ko reppen.

Ekapopo im pen kōnke riIsrael ro raar elotaan ak ba ņae n̄e jekjek ko aer rejino eppen, men̄e aolepen men ko Anij eaar kōm̧m̧ani n̄an er. Ak ilo am riiti Exodus 15:23–27; 16:1–15; 17:1–7, ļōmņake n̄e kwaar kōm̧m̧an ejja men kein wōt. Ta eo kwoj ekkatak jān en̄jake eo an riIsrael ro me emaron̄ jipan̄ kwe kadikļo̧k am elootaan im lōke wōt ilo Anij? N̄an waanjon̄ak, ta oktak ko kwoj keememeji kōn wāween an riIsrael ro kōm̧m̧an ilo iien ko reppen im wāween an Moses kar kōm̧m̧an? Ta eo eoon kein rej katakin eok kōn Anij?

Bar lale 1 Nipai 2:11–12; “Sin of Murmuring” (video), ChurchofJesusChrist.org.

Manna ko rej jān Anij n̄an naajdik riIsrael ro wōt, jej aikuj bar raan kajjojo naajdik mour in jetōb. Fresco jen Leopold Bruckner

Exodus 16

Ij aikuj kappukot raan kajjojo naajdik mour in jetōb eo.

Ewōr jetōbin katak ko jemaron̄ ekkatak jān kabwilōn̄lōn̄ eo an manna, loe ilo Exodus 16. Keememej laajrakin kōmeļeļe ko an riIsrael ro kar leļo̧k kōn wāween n̄an aiini, kōjerbali, im kōjparoki manna ko (lale Exodus 16:16, 19, 22–26). Ta eo kwoj loi ilo kōmeļeļe kein me rej jerbal n̄an kwe ilo am kappukot raan kajjojo naajdik mour in jetōb eo.

Bar lale Jon 6:31–35, 48–58 im video eo “Daily Bread: Pattern,” “Daily Bread: Experience,” and “Daily Bread: Change” (ChurchofJesusChrist.org).

Exodus 17:1–7

Jisōs Kraist ej aō ejm̧aan in mour in jetōb im dānnin mour.

Ļōmņak kōn Rilo̧mo̧o̧r ilo am riiti Exodus 17:1–7. Elmen an Jisōs Kraist āinwōt juon ejm̧aan n̄an kwe? (lale Sam Ko 62:6–7; Hilamōn 5:12). Elme An āinwōt dān? (lale Jon 4:10–14; 1 Korint 10:1–4; 1 Nipai 11:25).

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Exodus 14:13–22.Ro uwaan baam̧le eo am remaron̄ m̧ōņōņō in kajjieon̄ in “kōjepel” dān eo ilo juon booļ ak juon tab, āinwōt an kar Moses kōjepel Lom̧alo E Būrōrō. Jipan̄ er meļeļe bwe Lom̧alo eo E Būrōrō emaron̄ jab jepel n̄e ejako kajoor eo an Anij. Elmen ad lo kajoor eo an Anij ilo mour ko ad im mour ko an ro rūtto ro ad?

Exodus 15:1–21.Ālkin kijoone Lom̧alo eo E Būrōrō ekabwilōn̄lōn̄, riIsrael ro raar al juon al in nōbar āinwōt al eo an Moses, loe ilo Exodus 15:1–21. Āinwōt juon baam̧le, pukot eoon kein n̄an naan ko me rej kam̧ool kōn ta eo Anij eaar kōm̧m̧ane n̄an riIsrael ro im naan ko jet ewōr tokjeere. Innām ilo am al juon al me ej kakeememej baam̧le eo am̧ kōn ta eo Anij eaar kōm̧m̧ane n̄an kwe.

Exodus 16:1–5; 17:1–7.Riiti Exodus 16:1–5 im 17:1–7 maron̄ tōlļo̧k n̄an juon ekōnono kōn Rilo̧mo̧o̧r āinwōt bread in mour, āinwōt Dānnin Mour, im āinwōt ad Ejm̧aan. Elmen an bwebwenato kein kakeememej kōj kōn ta eo Jisōs Kraist ekar kōm̧m̧ane n̄an kōj? Āinwōt m̧ōttan ekōnono eo am, kwomaron̄ riiti Jon 4:10–14; 6:29–35, 48–51; Hilamōn 5:12; Katak im Bujen Ko 20:77, 79.

Exodus 17:8–16.Komaron̄ āinwōt bwebwenato eo an Aron im Hur kotak pein Moses im ekōnono elmen an kōkaļļe in ad rie ro em̧ōj an Anij kar kūr n̄an tōl kōj. Komaron̄ bar keidi waanjon̄ak eo an Aron im Hur ippānļo̧k an riIsrael ro’ elotaan ņae Moses (aolepen kōmeļeļe ko jebta 15–17). Ta jet iaan wāween ko jemaron̄ jipan̄ im rie ritōl ro ad? Ta kōjeraam̧m̧an ko rej itok n̄an kōj im ritōl ro ad ilo ad kōm̧m̧an āindein?

N̄an elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote:: “Dri Binmuur Israel,” Al, no. 6.

Kōkōm̧anm̧anļo̧k Am̧ Make Ekkatak

Kappukōt meļeļe ko am̧ make ilo jetōb. Ilo am make ekkatak im ekkatak an baam̧le, jab limiti eok n̄an eoon ko raorōk ilo laajrak in ekkata kein. Irooj ewōr an ennaan ko n̄an kwe ilo jebta kein me rej waļo̧k ijin. Jar n̄an kappukot im̧we.

Kōmeļeļe kōn Moses dipuk Lom̧alo eo E Būrōrō, jān Robert T. Barrett