Tā fakatātaaʻi ʻo ʻIlaisa heʻene fakahaaʻi ki heʻene tamaioʻeikí ʻa e ngaahi saliote afí, © Review & Herald Publishing/laiseni mei he goodsalt.com

Siulai 4–10

2 Ngaahi Tuʻi 2–7

“ʻOku ʻI Ai ha Palōfita ʻi ʻIsileli”

ʻI hoʻo lau e folofolá, ʻe tākiekina koe ʻe he Laumālie Māʻoniʻoní ki ha ngaahi kupuʻi lea pe potufolofola pau. Fakakaukau ke hiki e ʻuhinga ʻoku mahuʻingamālie ai kiate koe ʻa e ngaahi potufolofola ko iá.

Lekooti e Ngaahi Ongo ʻOkú ke Maʻú

Ko e misiona tefito ʻo ha palōfita ko e akoʻi mo e fakamoʻoni ki he Fakamoʻui ko Sīsū Kalaisí. Neongo ia, ʻoku ʻikai ke kau ʻi he lekooti ki he palōfita ko ʻIlaisá ha konga lahi ʻo ʻene akonakí pe fakamoʻoní. ʻOku ʻasi ʻi he lekōtí e ngaahi mana ne fakahoko ʻe ʻIlaisá, ʻo kau ai hono fokotuʻu hake ʻo ha kiʻi tamasiʻí mei he maté (vakai, 2 Ngaahi Tuʻi 4:18–37), fafanga ʻaki ha fuʻu kakai tokolahi ha kihiʻi meʻakai (vakai, 2 Ngaahi Tuʻi 4:42–44), mo hono fakamoʻui ha tangata kilia (vakai, 2 Ngaahi Tuʻi 5:1–14). Neongo ʻoku ʻikai ke tau maʻu ha ngaahi lea ʻa ʻIlaisa ʻo fakamoʻoni kia Kalaisi, ka ʻoku tau maʻu mei hono kotoa e ngāue fakafaifekau ʻa ʻIlaisá ha fakamoʻoni mālohi ʻo e foaki moʻui, lehilehiʻi, mo e mālohi ʻo e faifatongia fakamoʻui ʻa e ʻEikí. ʻOku lahi ʻaupito ha ngaahi meʻa pehē ʻi heʻetau moʻuí ʻi he meʻa ʻoku tau fakatokangaʻí. Ke mamataʻi kinautolú, ʻe fie maʻu ke tau kumi ki he mana ne fekumi ki ai ʻa ʻIlaisa he taimi naʻá ne lotua ai ʻene tamaioʻeiki kei talavou naʻe ilifiá, “ʻE [ʻEiki], ʻoku ou kole kiate koe, ke ke fakaʻā ʻa hono matá, koeʻuhí ke ne mamata” (2 Ngaahi Tuʻi 6:17).

Ke ma‘u ha fakamatala lahi ange fekauʻaki mo e 2 Ngaahi Tuʻi, vakai, “Tohi ʻo e Ngaahi Tuʻí” ʻi he Fakahinohino ki he Ngaahi Folofolá.

Ngaahi Fakakaukau ki Hono Ako Fakatāutaha ʻo e Folofolá

2 Ngaahi Tuʻi 2–6

ʻE lava ke fakahoko ʻe he ʻOtuá ha ngaahi mana ʻi heʻeku moʻuí.

ʻOku faʻa tokoni e ngaahi maná ke tau ikunaʻi ai e ngaahi faingataʻa ʻo e moʻui fakamatelié—ʻi he taimi ʻo ʻIlaisá naʻe fie maʻu ʻe he kelekele kakaá ha vai maʻa mo ha toki naʻe mole ke toe maʻu mai (vakai, 2 Ngaahi Tuʻi 2:19–22; 6:4–7). ʻOku toe hanga foki ʻe he ngaahi maná ʻo fakatafoki hotau lotó ki he ʻEikí mo akoʻi kiate kitautolu ha ngaahi lēsoni fakalaumālie. ʻI hoʻo lau ʻa e 2 Ngaahi Tuʻi 2–6, fakakaukau ke ke ʻai ha lisi ʻo e ngaahi mana ʻokú ke ʻiló, mo fakalaulauloto ki he ngaahi lēsoni fakalaumālie ʻokú ke ako mei he mana takitaha. Ko e hā ʻoku akoʻi ʻe he ngaahi mana ko ʻení ʻo kau ki he ʻEikí mo e meʻa te Ne lava ʻo fai ki hoʻo moʻuí?

Vakai foki, 2 Nifai 26:12–13; 27: 23; Molomona 9:7–21; Molonai 7:35–37; Donald L. Hallstrom, “Kuo Ngata Nai e Ngaahi ʻAho ʻo e Maná?” Liahona,Nōvema 2017, 60–63.

2 Ngaahi Tuʻi 4:8–17; 7:1–16

ʻE fakahoko e ngaahi folofola ʻa e ʻEikí ʻo fakafou ʻi Heʻene kau palōfitá.

Hangē ko hono lekooti ʻi he 2 Ngaahi Tuʻi 4:8–17; 7:1–16, naʻe ueʻi fakalaumālie ʻe he ʻEikí ʻa ʻIlaisa ke kikite ʻo kau ki he ngaahi meʻa ʻe hokó—ngaahi meʻa ʻoku hangē mei he vakai ʻa e niʻihi kehé he ʻikai ke lava ia ʻo hoko. ʻI hoʻo lau ʻa e ngaahi veesi ko ʻení, fakakaukau ki he anga hoʻo fakafeangai ki he folofola ʻa e ʻEikí ʻoku ʻomi mei Heʻene palōfitá he kuonga ní. Ko e hā ha ngaahi akonaki, kikite, pe talaʻofa kuó ke fanongo mei he kau palōfita moʻuí? Ko e hā ʻokú ke fai ke ngāue ai ʻi he tui ki he ngaahi talaʻofa ko ʻení?

Vakai foki, 2 Nīfai 29:6Tokāteline mo e Ngaahi Fuakava 1:37–38.

2 Ngaahi Tuʻi 5

ʻE lava ke fakamoʻui au ʻe Sīsū Kalaisi ʻo kapau te u loto-fakatōkilalo mo talangofua.

ʻOku ʻi ai e taimi ʻe niʻihi ʻoku faingofua ange ke maʻu ha ʻuhinga fakatāutaha ʻi he folofolá ʻi he taimi ʻokú ke fakafehoanaki ai ha ngaahi meʻa fakatuʻasino ʻi he talanoá mo e ngaahi meʻa fakalaumālié. Hangē ko ʻení, lolotonga hono lau ʻa e 2 Ngaahi Tuʻi 5, mahalo te ke fakahoa e kilia ʻo Neamaní ki ha pole fakalaumālie ʻokú ke fefaʻuhi mo ia. Pea hangē pē ko Neamaní, mahalo naʻá ke ʻamanaki ʻe hanga ʻe he ʻEikí ʻo “fai ha meʻa lahi” (veesi 13) ke tokoniʻi koe. Ko e hā ʻokú ke ako mei he aʻusia ʻa Neamaní? ʻI hoʻo moʻuí, ko e hā ha faleʻi faingofua ʻoku faitatau mo e “kaukau, pea te ke maʻá”?

Fakatokangaʻi hono uesia ʻe he aʻusia ʻa Neamaní ʻene tui ki he ʻOtua ʻo ʻIsilelí (vakai, veesi 15). Ko e hā ha ngaahi aʻusia kuó ne fakamālohia hoʻo tui ki he ʻOtuá?

Vakai foki, Luke 4:27; 1 Pita 5:5–7; ʻAlamā 37:3–7; ʻEta 12:27; L. Whitney Clayton, “Ko e Meʻa Kotoa pē Te Ne Fekau Kiate Kimoutolú, Fai Ia,” Liahona, Mē 2017, 97–99; ChurchofJesusChrist.org.

2 Ngaahi Tuʻi 6:8–23

“Ko kinautolu ʻoku kau mai kiate kitauá ʻoku tokolahi ʻiate kinautolu ʻoku kau kiate kinautolú.”

Kuo ke ongoʻi taulōfuʻu mo manavahē nai ʻo hangē ko e tamaioʻeiki kei talavou ʻa ʻIlaisá, “Ko e hā te ta faí?” (vakai, 2 Ngaahi Tuʻi 6:8–23). Ko e hā ʻokú ne ueʻi fakalaumālie koe fekauʻaki mo e tali ʻa ʻIlaisá? ʻOku liliu fēfē ʻe he fakamatala ko ʻení e anga hoʻo fakakaukau ki ho ngaahi ʻahiʻahí, ngaahi fatongiá, pe ngaahi ngāue ʻoku fai ʻi he ongoongoleleí?

ʻI hoʻo fakalaulaulotó, fakakaukau ki he ngaahi lea ʻa Palesiteni Henelī B. ʻAealingí: “Hangē pē ko e tamaioʻeiki ʻa ʻIlaisá, ʻoku tokolahi ange a kinautolu ʻoku mou kaú ʻiate kinautolu ʻoku nau fakafepakiʻi kimoutolú. ʻOku ʻi ai ha niʻihi ʻoku mou kau ʻoku ʻikai ke lava e mata fakamatelié ʻo sio ki ai. ʻE tokoniʻi kimoutolu ʻe he ʻEikí pea ʻe ʻi ai e taimi te ne ui mai ha niʻihi kehe ke tuʻu fakataha mo kimoutolu” (“ʻA Kimoutolu ʻOku Fai ʻa e Ngāué,” Liahona, Nōvema 2008, 58).

Vakai foki, Saame 121Tokāteline mo e Ngaahi Fuakava 84:88

Ngaahi Fakakaukau ki Hono Ako Fakafāmili ʻo e Folofolá mo e Efiafi ʻi ʻApí

2 Ngaahi Tuʻi 2:1–14.Fakakaukau ange ki he kakai naʻa nau mamata ki hono “toʻo” ʻe ʻIlaisa e pulupulu ʻo ʻIlaisiā (pe koté—ko ha fakataipe ia ʻo hono uiuiʻi fakaepalōfitá). Naʻe uesia fēfē ʻe he meʻá ni e anga ʻo ʻenau fakafeangai ki he ngāue fakafaifekau ʻa ʻIlaisá? Vakai foki, 2 Ngaahi Tuʻi 19:19 Mahalo ʻe lava ke taufetongi e kau mēmipa ʻo e fāmilí ʻi hono tui ha “pulupulu” mo fakamoʻoni ki he ngaahi founga kuo nau mamata ai ki hono poupouʻi mo fakamālohia ʻe he ʻEikí ʻa kinautolu kuo ui ke ngāue ʻi Hono Siasí.

2 Ngaahi Tuʻi 4.Te ke lava ʻo fakaafeʻi e kau mēmipa ʻo e fāmilí ke nau lau ha taha ʻo e ngaahi mana ʻi he 2 Ngaahi Tuʻi 4 (vakai, veesi 1–7, 14–17, 32–35, 38–41, 42–44) pea hiki ha kiʻi tokoni ke lava ai e kau mēmipa ʻo e fāmilí ʻo mateʻi e mana ʻokú ne fakamatalaʻí. Ko e hā ʻoku tau ako mei he ʻEikí mo ʻEne ngaahi maná mei he vahe ko ʻení? Ko e hā ha ngaahi mana—lalahi pe iiki—kuo tau mātā ʻi heʻetau moʻuí?

2 Ngaahi Tuʻi 5:1–15.ʻI hoʻo lau e ngaahi veesí ni mo fakalaulauloto ki he meʻa faingofua ne fekau kia Neamani ke ne faí, fakakaukau ki ha fanga kiʻi meʻa faingofua ʻoku kole mai hotau palōfitá ke tau fai. Ko e hā ha founga ʻe muimui lelei ange ai hotau fāmilí ki heʻene faleʻí?

2 Ngaahi Tuʻi 5:20–27ʻE ʻaonga fēfē kia Kehasi hono lau e “Faitotonú mo e Angatonú” ʻi he Ki Hono Fakamālohia ʻo e Toʻu Tupú? (peesi 19). ʻOku uesia fēfē kitautolu ʻe he ʻikai ke faitotonú? ʻOku tāpuekina fēfē kitautolu ʻi heʻetau faitotonú?

2 Ngaahi Tuʻi 6:13–17.Mahalo ʻe fiefia e kau mēmipa ʻo e fāmilí ʻi hano tā ha fakatātā ʻo e meʻa ne hoko kia ʻIlaisa mo ʻene tamaioʻeikí ʻoku fakamatalaʻi ʻi he ngaahi veesi ko ʻení. ʻE tokoniʻi fēfē kitautolu ʻe he ngaahi veesi ko ʻení ʻi he taimi ʻoku tau ongoʻi liʻekina pe lomekina aí?

Ke maʻu ha ngaahi fakakaukau lahi ange ki hono akoʻi ʻo e fānaú, vakai, lēsoni ʻo e uike ní ʻi he Haʻu, ʻo Muimui ʻIate Au—Maʻá e Palaimelí.

Hiva ʻoku fokotuʻu atú: “ʻE Fānau ko e ʻOtuá ē,” Ngaahi Himi, fika 190.

Fakatupulaki ʻo ʻEtau Founga Akoʻí

Poupouʻi ʻa e ʻeke fehuʻí. ʻOku fakahaaʻi mai ʻe he ngaahi fehuʻi ʻa e fānaú ʻa ʻenau mateuteu ke akó. Kapau ʻoku ʻikai ke ke ʻilo ʻa e ngaahi tali ki heʻenau fehuʻí, mou kumi fakataha ʻa e talí. (Vakai, Faiako ʻi he Founga ʻa e Fakamoʻuí, 25–26.)

Fakatātā ʻo Neamaní ʻi hono fakamoʻui mei he kiliá, tā ʻe Paul Mann