Every Knee Shall Bow, jān J. Kirk Richards

O̧kwōj 22–28

Sam Ko 102–103; 110; 116–119; 127–128; 135–139; 146–150

“Men Otemjej Ewōr Aer Menono Ren Nōbar Irooj”

Sam Ko 119:105 ej katakin bwe naan an Anij ej “juon meram n̄an [ami] iaļ.” Ilo am̧ riiti Sam Ko, rekooti naan ko im itia ko me reim̧we eok im jipan̄ kwaļo̧k iaļam̧ n̄an ippān Jemedwōj Ilan̄.

Je En̄jake ko Rej Im̧we Eok

Et eo ri Ju reminene kake kōn bok in Sam Ko ej juon naan ilo kajin Hibru meļeļein “nōbar.” Naan eo, Tehillim, ej bar iookļo̧k naan in “hallelujah” (meļeļein “nōbar Jeova” ak “nōbar Irooj”). Eļan̄n̄e kwar kāālet juon naan n̄an kobaik enaan eo eļap an Sam Ko, “nōbar” enaaj kelet eo eman. Jet iaan Sam Ko me ewōr ie kūr eo n̄an “nōbar Irooj” (lale eļaptata Sam Ko 146–50), im aolepeer remaron̄ im̧we juon en̄jake in kabun̄jar im nōbar. Sam Ko rej karuwaineneik kōj n̄an kejo̧kļo̧kjeņ kōn kajoor eo an Anij, kōn tūriam̧o̧ eo An, im kōn men ko rem̧m̧an Ekar kōm̧m̧ani. Jeban maron̄ kōļļāiki E kōn jabdewōt men kein, ak jemaron̄ nōbar kaki. Nōbar eo emaron̄ itok ilo elōn̄ jekjek ko ak elōn̄ kain armej ro—emaron̄ kitbuuj al, jar, ak kwaļo̧k naan in kam̧ool. Ej tōl n̄an wūjlepļo̧k em̧ūlaļ n̄an Irooj im n̄an ļoor katak ko An. Jekdo̧o̧n wāween “nōbar Irooj” eļap unin ilo mour eo am̧, kwomaron̄ lo eļap im̧we n̄an kōm̧m̧ane ilo am̧ riiti im kejo̧kļo̧kjeņ kōn Sam Ko.

Ļōmņak ko n̄an Ekkatak Jeje Ko Rekwojarjar Ippam̧ Make

Sam Ko 102–3; 116

Irooj emaron̄ kaeņōm̧m̧an eō ilo en̄taan ko aō.

Je wāween an Sam Ko 102:1–11 kōmeļeļeik en̄jake in ikūm̧kūm̧ ko im ajimakeke me ekkā an waļo̧k ilo iien en̄taan. Bolen kwar en̄jake en̄jake kein, im kōmeļeļe kein rej jipan̄ eok bwe en em̧m̧anļo̧k am̧ meļeļe. Ak eoon kein remaron̄ jipan̄ eok meļeļe en̄jake an ro jet rej en̄taan.

Ilo am̧ riiti Sam Ko 102:12–28; 103; 116, kappukot naan ko me rej lewaj lōke eo me kwomaron̄ “kūr n̄an etan Irooj” ilo iien mellijon̄ ko am̧ (Sam Ko 116:13). Kwomaron̄ kōņaan kōkaļļe, ak kwaļo̧k ippān ro jet naan ko me rej lewaj n̄an eok kōjatdikdik ilo E.

Bar lale Aisea 25:8; 2 Korint 1:3–7; Hibru 2:17–18; Alma 7:11–13; Evan A. Schmutz, “Anij Enaaj Kōm̧ōrāik Aolep Dānnin Kōmjaalal,” Liaona, Nob. 2016, 116–18.

Healing, jān J. Kirk Richards

Sam Ko 110; 118

Sam Ko remaron̄ jitōn̄ļo̧k n̄an Rilo̧mo̧o̧r.

Sam Ko epād ie eoon ko me rej jitōn̄ļo̧k mour im iien kwaļo̧k naan eo an Jisōs Kraist. Erkein rej jejjo iaan waanjon̄ak ko:

• Sam Ko 110:1–4 (lale Matu 22:41–45; Hibru 5:4–10; 6:20)

• Sam Ko 118:22 (lale Matu 21:42; Jerbal 4:10–11; 1 Piter 2:7)

• Sam Ko 118:25–26 (lale Matu 21:9)

Ta m̧ool ko me eoon kein rej katakin eok kōn Jisōs Kraist? Ewi wāween an m̧ool kein kōjeraam̧m̧an eok?

Ilo am̧ riiti Sam Ko ilo wiik in, wōnm̧aanļo̧k wōt im je eoon ko jet me rej katakin eok kōn Rilo̧mo̧o̧r. Komaron̄ bar riit im ron̄jake jet iaan al ko rem̧m̧an tata ippam̧ me ejipan̄eok ļōmņak kōn E.

Sam Ko 119

Naan ko an Anij enaaj dāpij wōt eō ilo iaļ eo An.

Sam in epād ie naan ko me rej keidi mour ko ad n̄an juon iaļan jepļaak n̄an ippān Jemedwōj Ilan̄. Ilo am̧ riiti, kappukot naan ko āinwōt etetal, iaļ, wāween, ne, im etal jān jikin n̄an jikin. Kejo̧kļo̧kjeņ kōn iaļan mour eo am̧ make—ijo kwaar, ijo kwoj pād kiiō, im iaļ ta eo kwoj etal ie ļo̧k. Ta eo kwoj ekkatak jān sam ko kōn jepļaak n̄an kapijuknen eo am̧? Ekkar n̄an sam ko, at aeo Anij ekar letok n̄an jipan̄ eok dāpdep wōt ilo iaļ in ejim̧we?

Kwomaron̄ itok limoum̧ n̄an jeļā bwe ilo Hibru, jinoin eoon ralitōk ilo Sam Ko 119 ej jino kōn leta ko jinoin ilo leta ko an Hibru. Eoon ko tok jet ralitōk rej jino kōn leta eo tok juon, im ko jet kōn jem̧ļo̧kin leta ko.

Bar lale Aiseia 42:16; 2 Nipai 31:17–21; Alma 7:19–20.

Sam Ko 134–36

Irooj eļapļo̧k an kajoor jān jabdewōt ekjab.

Lali un kane kar kwaļo̧ki ilo Sam Ko 135:15–18 kōn unin an juon menin bwebwe n̄an lōke anij ko reriab. Ta eo komaron̄ po n̄an lōke ilo ejja menin wōt n̄an ekjab ko me rej kōmeļeļe kaki ilo eoon kein?

Komaron̄ kōm̧m̧an juon laajrak in men ko rekajoor Irooj emaron̄ kōm̧m̧ani, āinwōt kōmeļeļeiki ilo Sam Ko 134–36. Ta men ko rekajoor Ekar kōm̧m̧ane n̄an eok?

Sam Ko 146–50

“Nōbar Irooj.”

Ilo am̧ riit sam ko āliktata kōn nōbar, ļōmņak kōn jet un ko me kwar nōbar Irooj kaki. Etke eaorōk n̄an nōbar E? Ta wāween ko komaron̄ nōbar E?

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Sam Ko 119:105.Bōlen baam̧le eo am̧ emaron̄ ejaake juon iaļ im etetal ie ļo̧k ibulōn̄ marok, ilo am̧ kōjerbal juon meram n̄an kwaļo̧k kajjieņ iaļam̧. Ilo am̧ etetal, komaron̄ kajjitōkin eok make kajjitōk ko āinwōt “Ta eo ilo mour ko ad ej āinwōt marok?” ak “Ewi wāween an naan an Anij āinwōt juon meram?” Al juon al kōn meram eo an Anij, āinwōt “Teach Me to Walk in the Light” (Children’s Songbook, 177), emaron̄ jipan̄ eok kōkajoorļo̧k pedped in katak ko me rej katakin ilo Sam Ko 119:105.

Sam Ko 127–28.Ta meļeļe n̄an Irooj n̄an jipan̄ kōj “kalōk m̧weo [m̧ōd]”? (Sam Ko 127:1). Ewi wāween an em̧m̧anļo̧k ad kobaik E ilo kijejeto ko ad n̄an ejaake juon em̧ eo ejim̧we im tiljek? N̄an jipan̄ baam̧le eo am̧ uwaake kajjitōk in, komaron̄ je ak jin̄aik wāween ko n̄an kōm̧m̧an bwe Irooj en m̧ōttan ļo̧k m̧weo im̧ōm̧. Ilo itulikin kajjojo m̧ōttan, ro uwaan baam̧le eo emaron̄ je ak jin̄aik wāween ko n̄an kōm̧m̧an bwe Irooj en m̧ōttanļo̧k m̧weo im̧ōm̧. Innem kwomaron̄ bajōļi ippān doon. Ta ko jet jej loi ilo sam ko me rej im̧we kōj n̄an etetal ilo iaļ ko an Irooj?

Sam Ko 139.Ālkin riit eoon ko 1–4, ro uwaan baam̧le eo remaron̄ kōnono kōn wāween aer jeļā bwe Anij ejeļā er (bar lale eoon ko 14–15, 23–24).

Sam Ko 146–50.Kwomaron̄ kūr baam̧le eo am̧ n̄an riiti jejjo eoon ko ilo Sam Ko 146–50 ilo am̧ kōļap ainikiem, kajjieon̄ kwaļo̧k en̄jake eo am̧ n̄an rijeje eo. Ewi wāween jemaron̄ kwaļo̧k ad nōbar n̄an Irooj? Ro uwaan baam̧le eo remaron̄ lan̄lōn̄ ilo aer je sam ko aer make n̄an nōbar im kwaļo̧ki ippān doon.

N̄an ļōmņak ko reļļapļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Teach Me to Walk in the Light,” Children’s Songbook, 177.

Kōkm̧anm̧anļo̧k Ad Katakin

Kōjerbal kein kanne ainikien ko. Ilo am̧ katakin baam̧le eo am̧, ļōmņak in ron̄jake kape in ainikien ko an jeje ko rekwojarjar, maron̄ lo ilo ChurchofJesusChrist.org ak ilo Gospel Library app. Ron̄jake sam ko emaron̄ lukkuun kajoor kōnke rekar aikuj bwe ren ba naan ko ilo aer kōļap ainikier.

“Kōm̧m̧an bwe in etal ilo iaļ in naan in kain̄i ko Am̧; bwe I m̧ōņōņō kake” (Sam Ko 119:35).