Nobōm̧ba 7–13

Hoseia 1–6; 10–14; Joel

“Inaaj Yokwe Er ilo Jouj”

Karuwaineneik jetōb eo n̄an pād ilo iien am̧ ekkatak bok in Hoseia im Joel. Je ņoot ko kōn ennaan ko an Jetōb ilo buruōm̧ im kōļmenļo̧kjeņ eo am̧.

Je En̄jake ko Rej Im̧we Eo

Bujen eo an Israel ippān Irooj ekar aikuj bwe en m̧wūlaļļo̧k im ļap meļeļein jon̄an Irooj ekar keidi n̄an juon m̧are. Bujen eo, āinwōt juon m̧are, ekoba kallim̧ur n̄an indeeo, kwaļo̧k en̄jake ko rej jeļm̧aeiki n̄an doon, kalōk mour ippān, m̧ool, im eļaptata, iakwe em̧ool. Kain wūjlepļo̧k rot in ekar itok jān kōtmene ko reļļap—ajāliklik ko rekaburomōjmōj kōn jab m̧ool n̄an eo rejetam̧. Jān Rikanaan Hoseia, Anij ekar kōmeļeļeik jet iaan ajāliklik ko me ri Israel ro rekar jelm̧ae kōn aer rube bujen ko aer. Im aeet ennaan eo an An ekar jab “Inaaj katajinenjeņ eok kōn am̧ jab m̧ool.” Ijjeļo̧k ekar ba “Inaaj bar karool tok eok” (lale Hoseia 2:14–15). “Inaaj pāleik eok ilo wānōk,” Irooj ekar ba (Hoseia 2:19). “Inaaj kōmour aer irļo̧k, Inaaj yokwe er ilo jouj” (Hoseia 14:4). En̄in ejja ennaan eo Ekar letok n̄an kōj rainin ilo ad kappukot n̄an mour kōn bujen ko kōn iakwe im wūjlepļo̧k.

Joel ekar kwaļo̧k ejja ennaan in wōt: “Ro̧o̧l n̄an Irooj ami Anij: bwe E jouj im tūriam̧, e rum̧wij An illu im eļap An yokwe, im Ej būrom̧ōj kōn jorrāān” (Joel 2:13). “Irooj enaaj juon jikin ko n̄an armej ro doon im juon oror e kajoor n̄an ro nejin Israel” (Joel 3:16). Ilo am̧ riiti Hoseia im Joel, kejokļo̧kjeņ kōn jem̧jerā eo am̧ make ippān Irooj. Ļōmņak kōn wāween An m̧ool im̧we eok n̄an m̧ool n̄an E.

Kōn tukaduin kōmeļeļe ko kōn Bok in Hoseia im Joel, lale “Hosea, ak Hosheaa” im “Joel” ilo Bible Dictionary.

Ļōmņak ko n̄an Ekkatak Jeje Ko Rekwojarjar Ippam̧ Make

Hoseia 1–3; 14

Irooj ej karuwaineneik eō aolep iien n̄an ro̧o̧l n̄an Ippān.

Kōrā eo pāleen Hoseia, etan Gomer, ekar jab m̧ool n̄an e, im Anij ekar keidi n̄an juon iien ekabūromōjmōj n̄an katakin Riisrael ro wāween aer en̄jake kōn er im bujen ko aer Ippān. Ilo am̧ riiti Hosea 1–3, kejōkļo̧kjeņ kōn wāween an Irooj kalim̧jōk jem̧jerā eo An ippān armej in bujen ro An. Kwomaron̄ kejokļo̧kjeņ kōn wāween ko me kwe, āinwōt ri Israel ro, remaron̄ jab m̧ool n̄an Irooj im wāween an kar jipan̄ tok eok. N̄an waanjon̄ak, ta eo Hoseia 2:14–23 im Hoseia14 rej katakin eok kōn iakwe im tūriam̧o an Irooj. Ewi wāween am̧ kwaļo̧k n̄an E iakwe im ettā eo am̧?

Bar lale DieterF. Uchtdorf, “Point of Safe Return,” Liahona, May 2007, 99–101.

Rijerawiwi Gomer, eo ej bōk jikin Riisrael ro, Irooj ekar leļo̧k n̄an er lo̧mo̧o̧r Kōmeļeļe jān Deb Minnard, licensed jān goodsalt.com

Hoseia 6:4–7; Joel 2:12–13

Wūjlepļo̧k n̄an Anij ej aikuj itok jān bōro, ejjab jān paaktokid.

Irooj ekar kakien armej ro An n̄an katok kōn menin mour ko. Ak men̄e armej ro ilo tōre ko an Hoseia rekar pokake kien eo, rekar kakkure kien ko relukkun aorōk (lale Hoseia 6:4–7). Ta eo kwoj ļōmņak ej meļeļe an Irooj “m̧ōņōņō kake m̧ool im jab katok wōt, im jeļā kōn Anij em̧m̧anļo̧k Ippa jān katok kijeek”? (Hoseia 6:6). Ta eo kwoj ļōmņak ej meļeļe naan in jim̧we n̄an erom̧ juon kōdo̧ ak maļawi in mejatoto? Ta eo jim̧we eo ad ej āinwōt? (lale Aiseia 48:18; 1Nipai 2:9–10).

Kwomaron̄ bar riiti Matu 9:10–13; 12:1–8 n̄an lale wāween an Rilo̧mo̧o̧r kar kōjerbal Hoseia 6:6 ilo iien kwaļo̧k naan eo An. Ewi wāween an eoon kein jipan̄ eok meļeļe naan ko an Hoseia?

N̄e jej riiti Joel 2:12–13, emaron̄ jipan̄ n̄an jeļā bwe kekōļ ak pote nuknuk an juon armej ilo manit kar juon kōkaļļe in būromōj ak liajļōļ (n̄an waajon̄ak, lale 2Kronikel 34:14–21,27). Ewi wāween an kekōļ būruōd oktak jān kekōļ nuknuk ko ad?

Bar lale Aiseia 1:11–17; Matu 23:23; 1Jon 3:17–18.

Joel2

“Inaaj lutōkļo̧k Aō jetōb ioon kanniōk otemjej.”

Ke Joel ekar kannaan kōn “raan in Irooj,” ekar kōmeļeļeiki āinwōt “juon raan in marok im jerata,” “eļap im e kanooj kaamijake” (Joel 2:1–2,11). Israel ekar jelm̧ae elōn̄ raan ko reļļap im kanooj kaamijak ilo bwebwenato, im armej in bujen ro an Anij renaaj jelm̧ae eļapļo̧k ilju im jekļaj. Ta eo ej im̧we eok kōn kapilōk eo Irooj ekar leļo̧k ilo Joel 2:12–17? Bar lale kōjeraam̧m̧an ko Ekar kallim̧ur kaki ilo Joel 2:18–32. Etke kōjeraam̧m̧an ko kar kallim̧ur kaki ilo verses 27–32 remaron̄ lukkuun aorōk ilo raan ko āinwōt kar kōmeļeļeiki ilo Joel2, ekoba raan kein?

Ta meļeļein ilo am̧ ļōmņak ilo an Irooj naaj “lutōkļo̧k jetōb eo [An] ioon kanniōk otemjej”? (Joel 2:28). Ewi wāween an kannaan ko ilo Joel 2:28–29 kūrm̧ool? (Lale Jerbal 2:1–21; Josep Smith—Bwebwenato 1:41.)

Kwomaron̄ kejokļo̧kjeņ kōn naan kein jān Būreejtōn RussellM. Nelson: “Ilo raan ko rej itok, enaaj maron̄ pen n̄an jo̧o̧r ilo jetōb ilo ad jab tōl, jineet, kaenōm̧m̧an, im bōk im̧we eo an Jetōb Kwojarjar” (“Revelesōn n̄an Kabun̄ eo, Revelesōn n̄an Mour ko Ad,” Liaona, Māe 2018,96). Etke revelesōn eaorōk n̄an kōmourruur jetōb ko ad? Ewi wāween am̧ maron̄ kōļapļo̧k maron̄ eo am̧ n̄an bōk revelesōn eo am̧ make?

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Hoseia 2:19–20.Irooj ekar kōjerbal waanjon̄ak eo kōn m̧are n̄an kōmeļeļeik jem̧jerā in bujen eo An ippān ri Israel (bar lale Unin Tōl eo n̄an Jeje Ko Rekwojarjar, “Bridegroom,” scriptures.ChurchofJesusChrist.org). Baam̧le eo am̧ emaron̄ kōmeļeļeik etke m̧are emaron̄ erom̧ juon waanjon̄ak em̧m̧an kōn bujen ko ad ippān Anij. Ewi wāween an Hoseia 2:19–20 ej jipan̄ kōj meļeļe wāween an Anij en̄jake kōn kōj? Ewi wāween ad m̧ool n̄an bujen ko ad Ippān?

Hoseia 10:12.Ajri ro remaron̄ lan̄lōn̄ ilo aer jin̄n̄aik juon kūļak im karōk wāween ko remaron̄ kappukot Irooj ilo kajjojo awa ilo juon raan.

Joel 2:12–13.N̄an jipan̄ baam̧le eo am̧ kōnono kōn Joel 2:12–13, kwomaron̄ likūt pijaan Jisōs ilo juon jait in juon ruum im naan eo jerawiwi ilo jait eo juon. Karuwaineneik ro uwaan baam̧le eo n̄an kajjojo kalimjōk naan eo ilo pepa eo innem kalimjōk Rilo̧mo̧o̧r ilo aer kwaļo̧k men ko remaron̄ jipan̄ kōj oktakļo̧k n̄an E “kōn aolepān [buruōd].” Rōjan̄ ro uwaan baam̧le eo n̄an ļōmņak kōn aolep m̧ōttan ko ilo mour ko aer, ekoba m̧akūtkūt ko, jerbal, jikuuļ, im jem̧jerā ko.

Joel 2:28–29.Emaron̄ ta meļeļein an Jetōb “[lutōk]” tok iood? Bolen kwomaron̄ kwaļo̧k kilen menin ilo am̧ lutōk juon dān innem keidi ippān juon būlil in dān.

N̄an ļōmņak ko reļļapļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Come unto Jesus,” Hymns, no.117.

Kōkm̧anm̧anļo̧k Ad Katakin

Katakin katak eo. “Jab kōjekdo̧o̧n juon iien em̧m̧an n̄an kobaiktok ajri ro n̄an ekkatak kōn katak eo an Jisōs Kraist. Iien kein rekanooj in jeja n̄an keidi kijejeto ko an eo rikōjdet. Eyring, “The Power of Teaching Doctrine,” Ensign, May 1999,74).

Come unto Me[Itok n̄an Eō], jān Kelly Pugh