For Unto Us a Child Is Born [Bwe N̄an Kōj E Ļotak Nin̄nin̄], jān Simon Dewey

Tijem̧ba 19–25

Kūrijm̧ōj

“Jaar Kattar E, im Enaaj Lo̧mo̧o̧red”

Ilo season in Kūrim̧ōj in, ļōmņak kōn wāween an Kallim̧ur M̧okta kar kōkajoorļo̧k naan in kam̧ool eo am̧ kōn Jisōs Kraist ilo aolep iiō eo.

Je En̄jake ko Rej Im̧we Eok

Kallim̧ur M̧okta ej bōktok jetōbin kijerjer in kōttar. Ilo wāween eo, ej āinwōt ļo̧k season in Kūrijm̧ōj. Jino ippān Adam im Iv, petriak ro, rikanaan ro, rikōm̧m̧an poem, im armej ro ilo Kallim̧ur M̧okta rekar erreim̧aanļo̧k n̄an raan ko rem̧m̧anļo̧k, obrak kōn kōjatdikdik n̄an kōkāāl mour im bōk lo̧mo̧o̧r jān Messaia eo. Im Riisreal ro rekar emakijkij aer aikuj kōjatdikdik eo—men̄e rekar pād ilo kam̧akoko ilo Ijipt ak Babilon ak pād ilo kam̧akoko kōn bōd im ineļap ko aer make. Aolep men kein, rikanaan ro rekar kakeememej er bwe juon Messaia, juon Rilo̧mo̧o̧r, enaaj itok “im kapeļļo̧k m̧ōn kalbuuj n̄an ro re lokjak” (Aiseia 61:1).

Kōjatdikdik eo ekar jino alikkar ke Jisōs Kraist ekar ļotak ilo Bethlehem. Rilo̧mo̧o̧r eo ekajoor an Israel ekar ļotak ilo m̧ōn menin mour im ekar babu ilo jikin m̧ōn̄ā an kidu (lale Luk 2:7). Ak Ekar jab Rilo̧mo̧o̧r wōt an Riisrael ro Etto. Ekar itok bwe en lo̧mo̧o̧ren eok—n̄an ineek am̧ liajlo̧ļ, n̄an kōmeraik būrum̧ōj ko am̧, n̄an kakinejnej E kōn bōd ko ad, bwe en kāājmour kōj kōn depetpet ko An (lale Aiseia 53:4–5). En̄in ej unin an Kūrijm̧ōj lukkuun obrak kōn lan̄lōn̄ eo me jej kōttar kōn kōtmene n̄an rainin. Messaia ekar itok elōn̄ļo̧k jān 2,000 iiō ko rem̧ootļo̧k, im E ej wōnm̧aanļo̧k wōt n̄an itok n̄an mour ko ad aolep iien jej kappukot E.

Ļōmņak ko n̄an Ekkatak Jeje Ko Rekwojarjar Ippam̧ Make

Ij lan̄lōn̄ ilo Ripinmuur eo aō.

Kūrijm̧ōj ej bar meļeļein juon jijen ekam̧ōņōņō kōnke lan̄lōn̄ eo me Jisōs Kraist ej bōktok n̄an laļ in. Barāinwōt armej ro me rejjab kabun̄jar n̄an Jisōs āinwōt Nejin Anij remaron̄ bar en̄jake m̧ōņōņō ilo Kūrijm̧ōj. Kejōkļo̧kjeņ kake lan̄lōn̄ eo kwoj en̄jake kōn Jemedwōj Ilan̄ ekar jilkintok Eo Nejin.

Bukwi iiō ko m̧okta jān an kar Rilo̧mo̧o̧r ļotak, rikanaan ro an Kallim̧ur M̧okta rekar bar en̄jake lan̄lōn̄ ilo aer kar kōnono kōn itok eo an Messaia. Riiti jet iaan eoon kein rej elaajrak, im ļōmņak kōn etke ren kar lukkuun aorōk n̄an ro me rej mijeļo̧k wōt mijen eo an Rilo̧mo̧o̧r: Sam Ko 35:9; Aiseia 25:8–9; 44:21–24; 51:11; Zepanaia 3:14–20; Moses 5:5–11. Etke eoon kein raorōk n̄an eok?

Barāinwōt lale RussellM. Nelson, “Lan̄lōn̄ im Mour ilo Jetōb,” Ensign ak Liaona, Nob. 2016, 81–84.

Kōkaļļe ko remaron̄ jipan̄ n̄a keememej Jisōs Kraist.

Elōn̄ iaan iminene ak manit ko me rej iookļo̧k Kūrijm̧ōj me emaron̄ letok kōkaļļe ko eļap meļeļeir me ej kajitļo̧k kōj n̄an Kraist. Kein kainōknōk jekjekin iju ko rej jutak kōn meram in iju eo me ekar kōmeram bon̄ in ļotak eo an Jisōs (lale Matu 2:2). Rial ro remaron̄ kakeememej kōj kōn enjeļ ro me rekar waļo̧k n̄an rilale sip ro (lale Luk 2:13–14). Ilo am̧ ekkatak Kallim̧ur M̧okta ilo iiō in, bolen kwomaron̄ kile jet kōkaļļe ko an Rilo̧mo̧o̧r. Jejjo iaer rej elaajrak ijin ilaļ. Ļōmņak in ekkatak men kein im rekoote ta eo kwoj katakin kōn E.

• Lamb (Jenesis 22:8; Exodus 12:5; 1Piter 1:18–20).

• Pilawā (Exodus 16:4, 12–21,31; Duteronomi 8:3; Jon 6:30–40).

• Dān (Exodus 17:1–6; Jeremaia 2:13; Ezekiel 47:1–12; Jon 4:7–14).

• Jedpānit Bronze eo (Bōnbōn 21:4–9; Jon 3:14–15).

• (1Samuel 2:2; 2Samuel 22:2–3; Sam Ko 118:22–23; Aiseia 28:16; Epesōs 2:20).

• Ra (Aiseia 11:1–2; Jeremaia 23:5; 33:15).

• Meram (Sam Ko 27:1; Aiseia 9:2; 60:19; Maika 7:8; Jon 8:12).

Ta kōkaļļe ko jet, eoon ko, im bwebwenato ko me kwoj loi ilo jeje ko rekwojarjar me rej kam̧ool kōn Jisōs Kraist?

Bar lale 2Nipai 11:4; Mosaia 3:14–15; Moses 6:63; “Types or Symbols of Christ,” ilo Unin Tōl eo N̄an Jeje Ko Rekwojarjar, “Jesus Christ,” scriptures.ChurchofJesusChrist.org.

“Naaj ņa etan Aibojooj.”

Etan Jisōs Kraist ej itok kōn elōn̄ et ko rokkotaktak im taitōļ ko. Ta taitōļ ko kwoj kappukoti ilo eoon kein rej ellaajrak? Sam Ko 23:1; 83:18; Aiseia 7:14; 9:6; 12:2; 63:16; Amos 4:13; Zekaraia 14:16; Moses 7:53. Ta taitōļ ko jet me kwomaron̄ bar ļōmņak kaki? Kwomaron̄ bar m̧ōņōņō in kōlaajrake taitōļ ko an Jisōs Kraist me kwoj loe ilo al in jar ko an Kūrijm̧ōj. Ewi wāween an kajjojo taitōļ jelet wāween eo kwoj ļōmņak kake E?

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Iminene ak manit in Kūrijm̧ōj emaron̄ mije ļo̧k Jisōs Kraist.Baam̧le ko an RiIsrael ro ekar wōr aer iminene ak manit, āinwōt Kwojkwoj in Kijone im bar kwojkwoj ak Kōjota ko jet, me rekar kajet buruōer im aer ļōmņak n̄an Irooj (lale Exodus12). Ta iminene ak manit eo me baam̧le eo am̧ ewōr ippāer ilo iien Kūrijm̧ōj me enaaj jipan̄ eok mije wōt Jisōs Kraist? Ta iminene ak manit ko kwoj aikuj jeļā kake jān menmenbwij eo am̧? Kwomaron̄ ļōmņak n̄an kōmeļeļe āinwōt juon baam̧le kōn jet iminene ak manit kwokōņaan jino kōm̧m̧ane. Jet ļōmņak ko remaron̄ kobaik jipan̄ juon armej kōn aikuj ko an (n̄an ļōmņak ko, lale ComeuntoChrist.org/light-the-world), ej karuwaineneik juon m̧ōttan n̄an alooje Nokon in Kūrijm̧ōj eo an Būreejtōnji eo Kein Kajuon ippam̧ (broadcasts.ChurchofJesusChrist.org), je juon am̧ make al in Kūrijm̧ōj, ak kappukot wāween eo emejādik n̄an kwaļo̧k ennaan eo kōn ļotak eo an Kraist.

“The Christ Child: A Nativity Story.”Ewi wāween am̧ jipan̄ ro uwaan baam̧le eo en̄jake aorōkin im lan̄lōn̄ kōn ļotak eo an Kraist? Kwomaron̄ alooje pija eo “The Christ Child: A Nativity Story” (ChurchofJesusChrist.org) ak riiti ippān doon Matu 1:18–25; 2:1–12; Luk 1:26–38; 2:1–20. Kajjojo baam̧le remaron̄ kālet juon armej jān pija in alooj ak bwebwenato ko ilo bok ko rekwojarjar im kwaļo̧k wāween an armej eo kar en̄jake kōn Rilo̧mo̧o̧r. Ro uwaan baam̧le eo remaron̄ kwaļo̧k en̄jake ko aer make kōn E.

Kappukot Rilo̧mo̧o̧r ilo Kallim̧ur M̧okta.Ilo am̧ kōppopo n̄an ekkatak mour eo an Jisōs Kraist ilo Kallim̧ur M̧okta iiō in tok, ļōmņak in etale ippān baam̧le ta eo rekar ekkatak kōn E ilo iiō in ilo Kallim̧ur M̧okta. Kwomaron̄ etali ko em̧ōj kōlaajraki ilo bok in im jabdewōt note ko jān am̧ make ekkatak n̄an jipan̄ eok keemmej ta eo kwar ekkatak kake. Ajri ro reddik remaron̄ eddōkļo̧k jān aer lale Old Testament Stories ak pija ko ilo bok in. Ta kanaan ko ak bwebwenato ko rekar ļap meļeļeier n̄an kōj? Ta eo jekar ekkatak kōn Rilo̧mo̧o̧r?

N̄an ļōmņak ko reļļapļo̧k kōn katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “OLittle Town of Bethlehem,” Hymns, no.208.

Kōkm̧anm̧anļo̧k Ad Katakin

Ron̄jake ro uwaan baam̧le eo am̧. “Ron̄jake ej juon jerbal in iakwe. Emenin aikuj bwe jen kea eļapļo̧k kōn ta eo ilo buruōn bar juon armej ijjeļo̧k ta eo epād em̧ōj karōke ak kōlaajrake. … Ilo am̧ kanooj leļo̧k am̧ n̄an ennaan ko an [ro uwaan baam̧le eo] ko me kar kōnono kaki ak jab kōnono kaki, enaaj em̧m̧anļo̧k am̧ meļeļe aikuj ko aer, abōņōņō ko aer, im ikdeleel ko aer. Jetōb eo enaaj jipan̄ eok jeļā wāween am̧ katakin er” (Teaching in the Savior’s Way, 34).

The Nativity[Pija Rej Kwaļo̧k Ļotak an Jisōs Kraist], jān N.C. Wyeth