Siya Moagak Kanimo pinaagi sa Kamot, ni Sandra Rast

Pebrero 24–Marso 1

2 Nephi 26–30

“Usa ka Kahibulongan nga Buhat ug usa ka Katingalahan”

Sa dili pa ka mosugod sa pagplano og mga kalihokan sa pagkat-on alang sa mga bata sa imong klase, tun-i ang 2 Nephi 26–30. Makadapit kini sa Espiritu nga mogiya sa imong pagplano.

Irekord ang Imong mga Impresyon

Dapita ang Pagpaambit

Ipataas ang usa ka kopya sa Basahon ni Mormon, ug ipasabut nga nakita nang daan ni Nephi nga ang Basahon ni Mormon mahimong importante sa atong panahon. Hangyoa ang mga bata sa pagpaambit og usa ka butang nga ilang nakat-unan mahitungod sa Basahon ni Mormon karong tuiga.

Itudlo ang Doktrina: Mas Gagmay nga mga Bata

2 Nephi 26:33

Gusto ni Jesukristo nga ang tanan moduol ngadto Kaniya.

Si Nephi mipamatuod nga ang Manluluwas nahigugma sa tanan, bisan kinsa pa sila, ug midapit Siya kanilang tanan sa “pag-ambit sa iyang kaayo.”

Posible nga mga Kalihokan

• Pag-display og mga hulagway sa mga tawo nga gikan sa nagkalain-lain nga etniko [ethnic] ug kultural nga mga kahimtang (makakita ka og pipila diha sa mga magasin sa Simbahan). Hangyoa ang mga bata sa paghulagway og pipila ka mga detalye nga ilang nakita diha sa mga hulagway. Paklia ang mga kasulatan ngadto sa 2 Nephi 26:33 ug basaha ang, “Si [Jesukristo] nagdapit kanilang tanan sa pagduol ngadto kaniya.” Balika sa pagsulti kini nga mga pulong uban sa mga bata samtang imong itudlo ang matag hulagway. Dayon tudloa ang matag bata ug sultihi, “Si Jesukristo nagdapit kanimo sa pagduol ngadto Kaniya.” Unsay atong mahimo aron mopaduol ngadto sa Manluluwas?

• Kantaha uban sa mga bata ang usa ka kanta mahitungod sa paghigugma sa tanan nga mga tawo, sama sa “Mouban Ko Nimo” (Songbook sa mga Bata, 78–79). Hisguti ang mga pulong o hugpong sa mga pulong diha sa kanta nga imong gibati nga nakalig-on sa mensahe sa 2 Nephi 26:33.

2 Nephi 28:2; 30:6

Ang Basahon ni Mormon usa ka panalangin.

Ikonsiderar kon unsaon nimo sa pagtabang ang mga bata sa imong klase nga mobati nga ang Basahon ni Mormon “usa ka panalangin ngadto kanila gikan sa kamot sa Dios” (2 Nephi 30:6).

Posible nga mga Kalihokan

• Pakit-a ang mga bata og Basahon ni Mormon nga giputos sama sa usa ka gasa, ug sultihi sila nga usa ka bililhong butang ang anaa sa sulod. Pagunita sila sa gasa, ug hatagi og mga timailhan sa pagtabang kanila sa pagtag-an kon unsa kini; sama pananglit, usa kini ka butang nga gihatag sa Ginoo kanato, makatabang kini kanato nga motuo ni Jesukristo, ug uban pa. Basaha gikan sa 2 Nephi 30:6: “Kini usa ka panalangin ngadto kanila gikan sa kamot sa Dios.” Paablihi sa mga bata ang gasa, ug dayon ipasabut nga kinahanglan natong ablihan ang Basahon ni Mormon ug basahon kini aron madawat ang mga panalangin nga anaa niini.

• Basaha ang 2 Nephi 28:2 ngadto sa mga bata. Ipasabut nga nakita ni Nephi nga ang Basahon ni Mormon mahimong “mahinungdanon og bili” ngari kanato, nga nagpasabut nga kini motabang ug mopanalangin kanato. Sultihi ang mga bata nganong ang Basahon ni Mormon bililhon alang kanimo. Ipaambit ang imong paborito nga bersikulo o istorya gikan sa Basahon ni Mormon, ug dapita ang mga bata sa pagpaambit sa ilaha. Pagpakita og mga hulagway gikan sa Libro sa mga Hulagway sa Ebanghelyo aron sa paghatag kanila og mga ideya.

2 Nephi 28:30

Ang Langitnong Amahan motudlo kanako sa hinay-hinay.

Tingali makahunahuna ka og usa ka object lesson o kalihokan nga makatabang sa mga bata nga makita kon unsa ang gipasabut sa pagkat-on nga “pagtulun-an human sa usa ka pagtulun-an.” Ang mga sugyot sa ubos mahimong makaawhag og pipila ka mga ideya.

Posible nga mga Kalihokan

• Tabangi ang mga bata sa pagsulbad og usa ka yano nga puzzle o sa paghimo og usa ka butang gamit ang mga bloke. Hatagi sila og usa ka piraso sa puzzle o usa ka bloke matag higayon, ug samtang naghimo sila, ipasabut nga kini mao ang paagi nga motudlo kanato ang Langitnong Amahan—usa ka kamatuoran sa matag higayon. Unsay mahitabo kon kausahon nato og butang ang tanang piraso?

• Tudloi ang mga bata og usa ka kahanas pinaagi sa tinagsa nga lakang, sama sa pagbaligtos o pagdrowing og hulagway. Basaha gikan sa 2 Nephi 28:30: “Ako mopadayag ngadto sa mga katawhan og pagtulun-an human sa usa ka pagtulun-an, … diyutay dinhi ug diyutay didto.” Nganong ang Dios motudlo man kanato sa hinay-hinay?

Itudlo ang Doktrina: Mas Dagko nga mga Bata

2 Nephi 26:23–28, 33

Gusto ni Jesukristo nga ang tanan moduol ngadto Kaniya.

Tabangi ang mga bata nga mobati nga ang pagdapit sa pagduol ngadto kang Kristo gitumong ngadto kanila ug sa tanang katawhan.

Posible nga mga Kalihokan

• Hisguti uban sa mga bata ang mga panahon dihang midapit sila og mga higala o pamilya nga motambong sa usa ka espesyal nga kalihokan, sama sa pagsaulog sa adlawng natawhan. Unsay ilang gibuhat aron sa pag-awhag sa mga tawo nga motambong? Basaha uban sa mga bata ang 2 Nephi 26:23–28, 33, ug tabangi sila sa pagpangita kon unsa ang gidapit sa Ginoo nga atong buhaton. Hangyoa ang mga bata sa paghimo og kard o sulat nga nagdapit sa usa ka tawo sa pagduol ngadto ni Jesukristo. Awhaga sila sa paggamit og usa ka hugpong sa mga pulong gikan niini nga mga bersikulo diha sa ilang imbitasyon (kon gikinahanglan, pagsulat og pipila ka hugpong sa mga pulong diha sa pisara aron makatabang).

• Basaha ang 2 Nephi 26:33 uban sa mga bata, ug tabangi sila sa paghimo og lista kon kinsa, sumala niini nga bersikulo, ang gidapit sa “pag-ambit sa … kaayo [sa Ginoo].” (Mahimo nimong ipasabut nga “ang mga luog” mao kadtong dili motuo sa Dios.) Dapita sila sa pagdugang sa ilang kaugalingong mga ngalan ngadto sa lista. Unsaon nato sa pag-ambit sa kaayo sa Ginoo?

• Hisguti kadiyot uban sa mga bata kon sa unsang paagi ang mga bata sa tibuok kalibutan managlahi, ug pagpamatuod nga ang Ginoo nahigugma kanilang tanan (tan-awa sa 2 Nephi 26:24, 33). Dapita ang mga bata sa pagdrowing og hulagway ni Jesus nga kauban ang daghang managlahi nga mga bata.

2 Nephi 28:27–30

Ang Langitnong Amahan mopadayag sa kamatuoran “pagtulun-an human sa usa ka pagtulun-an.”

Mipahimangno si Nephi batok sa kinaiya nga wala na kita magkinahanglan og dugang nga kamatuoran gikan sa Dios. Tabangi ang mga bata nga masabtan ang pagkat-on sa ebanghelyo isip usa ka inanay, tibuok kinabuhi nga paningkamot.

Posible nga mga Kalihokan

• Pagpili og hugpong sa mga pulong gikan sa 2 Nephi 28:30, ug hangyoa ang usa ka bata sa pagsulat sa unang pulong diha sa pisara. Dayon hangyoa ang laing bata sa pagsulat sa sunod nga pulong, ug ipadayon kini hangtud nga ang tibuok hugpong sa mga pulong nasulat. Sa unsang paagi nga kini nga kalihokan susama sa paagi sa Dios sa paghatag kanato og kamatuoran?

• Tabangi ang mga bata sa pagbasa ug pagsabut sa 2 Nephi 28:27–30, nga mangita og mga tubag sa pangutana nga sama niini: Unsa ang gitudlo niini nga mga bersikulo mahitungod sa mga tawo kinsa nagtuo nga igo na ang kamatuoran nga anaa kanila ug wala na sila magkinahanglan og dugang pa? Hangyoa sila sa pagsugyot og mga paagi nga atong mapakita sa Ginoo nga gusto kitang makadawat og dugang nga kamatuoran gikan Kaniya.

2 Nephi 29:7–11

Ang Basahon ni Mormon ug ang Biblia magtambayayong.

Tungod kay kita adunay Biblia, ang mga tawo nagtuo nga ang Basahon ni Mormon wala na kinahanglana. Kini nga mga bersikulo makatabang sa mga bata nga makasabut, ug mapasabut sa uban, nganong mapasalamaton kita sa duha ka basahon sa kasulatan.

Posible nga mga Kalihokan

• Hatagi ang usa ka bata og kopya sa Basahon ni Mormon ug ang laing bata sa kopya sa Biblia. Pangutan-a sila kon sa unsang paagi nga magkasusama kini nga mga basahon ug sa unsang paagi nga kini managlahi. Pakit-a ang mga bata og mapa sa kalibutan, ug tabangi sila nga maparis ang matag basahon ngadto sa parte sa kalibutan nga gigikanan niini. Basaha ug hisguti ang 2 Nephi 29:8. Nganong gihatagan man kita sa Dios og duha ka “mga pagpamatuod” o mga basahon sa kasulatan nga nagtudlo kanato mahitungod Kaniya?

• Hangyoa ang mga bata sa paghunahuna nga ang usa ka higala misulti kanila nga, “Dili ko kinahanglang mobasa sa Basahon ni Mormon. Nakabasa na ko sa Biblia.” Basaha og dungan ang 2 Nephi 29:7–11, nga ipasabut ang mga pulong ug mga konsepto kon gikinahanglan. Dayon hangyoa sila sa pagpaambit og mga ideya kabahin sa unsay ilang isulti ngadto sa ilang higala.

Awhaga ang Pagkat-on diha sa Panimalay

Dapita ang mga bata sa pagpasabut ngadto sa ilang mga pamilya kon sa unsang paagi ang Biblia ug Basahon ni Mormon nagtambayayong sa pagpamatuod mahitungod kang Jesukristo.

Pagpalambo sa Atong Pagtudlo

Tutoki ang panginahanglan sa mga tawo, dili ang pagkompleto sa unsay anaa sa mga leksyon. Ang mga ideya niini nga outline mga sugyot lamang. Ayaw pagpanagana sa pagpahiangay niini ngadto sa mga panginahanglan ug mga abilidad sa mga bata nga imong tudloan.