Si Abinadi sa Atubangan ni Haring Noah, ni Andrew Bosley

Mayo 4–10

Mosiah 11–17

“Usa ka Kahayag … Nga Dili Gayud Mahimo nga Mongitngit”

Pamalandong ug pag-ampo aron masayud kon unsaon nimo paggamit ang istorya ni Abinadi ug ang iyang mga pagtulun-an diha sa Mosiah 11–17 aron matabangan ang mga bata nga imong gitudloan. Irekord ang mga impresyon nga imong nadawat.

Irekord ang Imong mga Impresyon

Dapita ang Pagpaambit

Hangyoa ang mga bata sa pagpaambit sa unsay ilang nahibaloan mahitungod sa istorya ni Abinadi ug Haring Noah. Ang hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya makatabang.

Itudlo ang Doktrina: Mas Gagmay nga mga Bata

Mosiah 11–13; 17

Makapanalipod ako sa kamatuoran, bisan kon mag-inusara akong mohimo niini.

Si Abinadi ug si Alma nagmaisugon sa pagpanalipod sa kamatuoran. Unsaon nimo sa paggamit niini nga istorya aron sa pag-ugmad sa kaisug sa mga bata sa mga higayon nga tingali kinahanglan nilang panalipdan ang ilang mga gituohan?

Posible nga mga Kalihokan

• I-summarize ang istorya ni Abinadi, Haring Noah, ug ni Alma nga makita diha sa Mosiah 11–13 ug 17. Mahimo usab nimong gamiton ang “Kapitulo 14: Si Abinadi ug si Haring Noah” (Mga Sugilanon sa Basahon ni Mormon, 38-42). Dapita ang mga bata nga i-aksyon ang istorya, nga hatagan sila og turno nga modala sa lain-laing tahas.

• Pagmartsa nga magpundo uban sa mga bata samtang manganta sila og usa ka kanta nga makadasig og kaisug, sama sa “Magmaisugon ko” (Songbook sa mga Bata, 85). Basaha og dungan ang mga pulong sa kanta, ug tabangi ang mga bata sa pagtino kon unsa ang buhaton sa maisugon o walay kahadlok nga tawo. Pagpili og pipila ka mga bersikulo gikan sa Mosiah 11–13 ug 17 nga basahon ngadto sa mga bata aron sa pagpakita kon sa unsang paagi si Abinadi ug Alma nagmaisugon (sama pananglit, tan-awa sa Mosiah 13:1–4, 9).

Mosiah 12:33–36; 13:11–24

Kinahanglang mosunod ko sa Napulo ka mga Sugo.

Ang mga pari ni Haring Noah nasayud sa mga sugo apan wala mosunod niini. Ang mga pulong ni Abinadi makatabang sa mga bata nga makasabut sa kaimportante sa pagsunod sa mga sugo.

Posible nga mga Kalihokan

• Dapita ang mga bata sa pag-ihap hangtud sa 10. O hatagi sila og 10 ka ginumerohan nga mga piraso sa papel ug ipabutang nila sa saktong han-ay ang mga papel. Ipasabut nga ang Langitnong Amahan mihatag kanato sa Napulo ka mga Sugo aron sa pagtabang kanato nga mobalik sa pagpuyo uban Kaniya. Tabangi ang mga bata sa pag-recite uban kanimo sa pipila sa Napulo ka mga Sugo gikan sa Mosiah 12:33–36 ug 13:11–24.

• Pagpakita og hulagway ni Moises uban sa Napulo ka mga Sugo (sama sa Libro sa mga Hulagway sa Ebanghelyo, nu. 14), ug ipasabut sa daklit kon sa unsang paagi nadawat ni Moises ang mga sugo gikan sa Dios (tan-awa sa Exodo 19–20). Dayon pagpakita og hulagway ni Abinadi (tan-awa ang outline niini nga semana sa Dali, Sunod Kanako—Alang sa mga Indibidwal ug mga Pamilya), ug sultihi ang mga bata nga gipahinumduman ni Abinadi si Haring Noah ug ang iyang mga pari kabahin sa Napulo ka mga Sugo. Pagpili og pipila sa mga sugo gikan sa Mosiah 12:33–36 ug 13:11–24 nga imong gibati nga importante gayud alang sa mga bata nga imong gitudloan, ug hisguti uban kanila ang mga panalangin nga moabut tungod sa pagsunod niadto nga mga sugo.

• Kantaha og dungan ang usa ka kanta mahitungod sa mga sugo, sama sa “Sunda ang Kasugoan” (Songbook sa mga Bata, 68–69). Nganong sundon nato ang mga sugo?

Mosiah 14:5; 15:7–9

Ang mga propeta walay kahadlok nga nagpamatuod mahitungod ni Jesukristo.

Si Abinadi mitudlo ni Haring Noah ug sa ubang tawo mahitungod ni Jesukristo, bisan kon kini delikado. Sa unsang paagi ang istorya ni Abinadi makapalig-on sa mga pagpamatuod sa mga bata mahitungod sa mga propeta?

Posible nga mga Kalihokan

• Ipaambit sa mga bata ang pipila sa mga butang nga gitudlo ni Abinadi mahitungod ni Jesukristo diha sa Mosiah 14:5 ug 15:7–9. Tabangi ang mga bata nga makasabut nga gusto ni Abinadi nga si Haring Noah ug ang iyang katawhan mosunod ni Jesus aron sila magmalipayon. Sa atong panahon, ang buhi nga mga propeta nagtudlo kanato mahitungod sa Manluluwas. Pagbasa og usa ka kinutlo gikan sa kinatibuk-ang komperensya, o pagpaambit og usa ka video clip sa usa sa buhi nga mga propeta nga mipaambit sa iyang pagpamatuod mahitungod ni Jesukristo (sama pananglit, tan-awa ang mga video sa ChurchofJesusChrist.org).

• Pagpakita o pagdrowing og mga hulagway sa mga kadena, bilanggoan, ug kalayo. Tudloi ang mga bata nga si Abinadi andam nga magpahigot, masulod sa bilanggoan, ug gani masunog sa kalayo aron sa pagpaambit sa iyang pagpamatuod mahitungod ni Jesukristo. Bisan tuod dili gayud tingali kita mag-atubang niini nga mga kakuyaw, unsaon nato nga mahimong magmaisugon sama ni Abinadi sa pagpaambit sa atong mga pagpamatuod pinaagi sa atong mga pulong ug sa atong mga pagpili?

Itudlo ang Doktrina: Mas Dagko nga mga Bata

Mosiah 11–13; 17

Mahimo akong manalipod sa matarung, bisan kon mag-inusara akong mohimo niini.

Unsaon nimo pag-andam ang mga bata nga imong gitudloan nga maisugong manalipud sa matarung, bisan kon mag-inusara silang mobuhat niini?

Posible nga mga Kalihokan

• Dapita ang mga bata sa pagdrowing og mga hulagway sa lain-laing bahin sa istorya ni Abinadi, Haring Noah, ug ni Alma nga makita diha sa Mosiah 11–13 ug 17. Tabangi sila sa paggamit sa ilang mga hulagway sa pagsaysay og usab sa istorya, o gamita ang “Kapitulo 14: Si Abinadi ug si Haring Noah” (Mga Sugilanon sa Basahon ni Mormon, 38–42). Giunsa ni Abinadi ug Alma sa pagpanalipod sa matarung? Nganong wala man manalipod sa matarung si Haring Noah? (tan-awa sa Mosiah 17:11–12). Tabangi ang mga bata sa paghunahuna sa mga panahon sa dihang nanalipod sila sa matarung.

• Tabangi ang mga bata sa paghunahuna og mga sitwasyon diin mahimo silang manalipod sa matarung, ug dapita sila sa pagdrama-drama sa pipila niini nga mga sitwasyon. Sama pananglit, unsay ilang mahimo kon dunay mosulay sa pagpatan-aw kanila og dili angay nga salida o kon ang ilang mga higala dili gusto nga paapilon sa ilang dula ang usa ka tawo?

• Sa unsang paagi si Presidente Thomas S. Monson sama kang Abinadi?

Mosiah 12:33–36; 13:11–24

Kinahanglang mosunod ko sa Napulo ka mga Sugo.

Si Abinadi mitudlo ni Haring Noah ug sa iyang dautang mga pari mahitungod sa Napulo ka mga Sugo. Nakasabut ba ang mga bata nga imong gitudloan nganong kinahanglan kitang mohigugma ug mosunod sa mga sugo sa Dios?

Posible nga mga Kalihokan

• I-assign ang matag bata sa pagbasa sa usa sa mga sugo diha sa Mosiah 12:35 ug 13:11–24. Tabangi ang mga bata sa paghunahuna og mamugnaong mga paagi sa pagtabang sa usag usa nga mahinumduman ang matag sugo (sama sa naggaray [rhyme] nga hugpong sa mga pulong, usa ka aksyon, o sugpong sa sinugdanang titik sa mga pulong [acronym]). Hatagi ang mga bata og mga piraso sa papel nga giporma og kasingkasing, ug dapita sila sa pagsulat og usa o sobra pa sa Napulo ka mga Sugo diha sa ilang mga kasingkasing (tan-awa sa Mosiah 13:11)—tingali usa ka sugo nga gibati nila nga kinahanglan silang mas maningkamot sa pagsunod.

• Kantaha og dungan ang usa ka kanta mahitungod sa mga sugo, sama sa “Sunda ang Kasugoan” (Songbook sa mga Bata, 68–69). Unsa nga mga panalangin ang nagagikan sa pagtuman sa mga sugo?

Ang mga kasulatan nagtudlo kanato sa mga sugo sa Dios.

Mosiah 14:6; 16:4–9

Kon makasala ko, mawala ko; tungod ni Jesukristo, mahimo ko nga makit-an.

Aron motudlo mahitungod ni Jesukristo, gikutlo ni Abinadi si propeta Isaias, kinsa mitandi kanato ngadto sa nawala nga karnero. Unsaon nimo paggamit niini nga pagtandi aron sa pagtudlo sa mga bata mahitungod sa Manluluwas?

Posible nga mga Kalihokan

• Dapita ang mga bata sa pagpaambit og mga kasinatian sa dihang nawad-an sila og usa ka butang o sila mismo ang nawala. Unsa ang ilang gibati? Unsay ilang gihimo? Basaha og dungan ang Mosiah 14:6 ug 16:4–9. Sa unsang paagi kita usahay “nangasaag” gikan sa Dios? Sa unsang paagi si Jesukristo motabang kanato nga makabalik?

• Dapita ang mga bata sa paghanduraw og pundok sa mga karnero. Unsa ang pipila ka rason nganong ang usa sa mga karnero tingali mawala? Ilista diha sa pisara ang ilang mga tubag. Sa unsang paagi kita sama sa karnero nga nahisalaag? Unsa kaha ang bation sa Langitnong Amahan kon kita “makit-an” pinaagi sa paghinulsol ug sa Pag-ula sa Manluluwas? (tan-awa ang D&P 18:10–13). Ipaambit ang imong pagpamatuod mahitungod sa Manluluwas ug sa paghinulsol.

Awhaga ang Pagkat-on diha sa Panimalay

Dapita ang mga bata sa paghangyo sa mga sakop sa ilang pamilya sa pagpaambit og mga kasinatian diin sila nanalipod sa kamatuoran, o awhaga ang mga bata sa pagpaambit sa ilang kaugalingong mga kasinatian.

Pagpalambo sa Atong Pagtudlo

Ang pagbalik-balik usa ka yawe sa pagkat-on. Ang mga bata makabenepisyo sa pagpaminaw sa baruganan sa ebanghelyo o sa paghimo sa kalihokan og sobra sa kausa. Sulayi ang pagbalik-balik sa mga kalihokan sa lain-laing mga paagi.