Woman, Why Weepest Thou? ni Mark R. Pugh

Hulyo 27–Agosto 2

Alma 39–42

“Ang Mahinungdanong Plano sa Kalipay”

Human sa mainampoong pagtuon sa Alma 39–42, pagplano og mga kalihokan aron pagtabang sa mga bata nga makakat-on. Mahimong makakita ka og mga ideya sa mga mosunod nga mga kalihokan nga mahimong ipahiangay sa bisan unsang edad nga grupo.

Irekord ang Imong mga Impresyon

Dapita ang Pagpaambit

Dapita ang matag bata sa pagbarug ug sa pagpaambit og usa ka butang mahitungod sa ebanghelyo nga bag-ohay lang nilang nakat-unan sa balay o sa simbahan.

Itudlo ang Doktrina: Mas Gagmay nga mga Bata

Alma 39:1, 10–11

Ako mahimong usa ka maayong ehemplo.

Si Alma miawhag kang Corianton sa pagkat-on sa mga maayong panig-ingnan sa iyang mga igsoong lalaki ug mipasidaan kang Corianton nga dili magpakahimong negatibo nga ehemplo alang sa uban.

Posible nga mga Kalihokan

• Ipasabut nga si Shiblon ug si Corianton managsoon ug nga si Shiblon usa ka maayong panig-ingnan alang ni Corianton. Dapita ang mga bata sa pagsubli niini nga pangutana uban kanimo: “Siya wala ba magpakita og maayo nga panig-ingnan alang kanimo?” (Alma 39:1). Hangyoa ang mga bata sa paghisgut og tawo kinsa usa ka maayo nga panig-ingnan alang kanila.

• Magdula o manganta og usa ka kanta diin ang mga bata mosunod o mosundog nimo, sama sa “Sunda Ko Ninyo” (Songbook sa mga Bata, 146). Tagai og higayon ang matag bata nga mahimong lider o panig-ingnan. Pangutan-a ang mga bata kon sa unsang paagi nga sila mahimong maayo nga panig-ingnan ngadto sa laing tawo.

• Pagpakita og mga hulagway ni Jesus nga naghimo og maayong mga butang, ug ipasabut nga Siya ang atong hingpit nga panig-ingnan. Ipasabut nga mahimo kita nga mga maayong ehemplo, sama ni Jesus kaniadto. Dapita ang mga bata sa pagdrowing og mga hulagway sa ilang kaugalingon nga naghatag og maayong mga ehemplo.

Alma 39:9, 13

Ang Langitnong Amahan ug si Jesukristo motabang kanako sa pagkorihir sa akong mga sayop.

Bisan kon ang gagmayng mga bata dili kinahanglang maghinulsol, ang paghisgut kanila mahitungod ni Corianton makatabang kanila nga makasabut unsa ang gipasabut sa paghinulsol.

Posible nga mga Kalihokan

• Sa walay paghisgot sa matang sa iyang mga sala, ipasabut nga si Corianton nakahimo og sayop nga pagpili. Unsa kaha ang atong ikasulti aron sa pagtabang kaniya? Basaha ngadto sa mga bata unsa ang gisulti ni Alma, amahan ni Corianton, ngadto niya: “Ikaw kinahanglan mohinulsol ug mobiya sa imong mga sala” (Alma 39:9). Sultihi sila nga ang “paghinulsol” nagpasabut nga kita mohangyo sa Langitnong Amahan ug ni Jesukristo sa pagpasaylo kanato ug sa pagtabang kanato sa pagtarung sa atong mga sayop ug nga human niana maningkamot kita nga mas mahisama Kanila.

• Hatagi ang usa ka bata og usa ka butang nga mabug-at nga iyang kuptan samtang ikaw mag-istorya mahitungod sa usa ka tawo kinsa nakabuhat og sayop ug mibati og kangil-ad. Sultihi ang mga bata nga kanang butanga sama ra sa dili maayong mga pagbati nga atong bation sa panahon nga kita makahimo og sayop. Kuhaa ang bug-at nga butang gikan sa bata samtang ikaw mopamatuod nga ang Langitnong Amahan ug si Jesukristo makakuha sa bug-at, dili maayo nga mga pagbati ug motabang kanato sa pagtarung sa atong kasaypanan kon kita maghinulsol. Panganta mong tanan og usa ka kanta mahitungod sa paghinulsol, sama sa “Repentance”(Children’s Songbook, 98).

Alma 40:23

Ako mabanhaw.

Tabangi ang mga bata nga magpaabut sa adlaw nga sila ug ang ilang mga minahal pagabanhawon.

Posible nga mga Kalihokan

• Samtang inyong basahon og kusog ang Alma 40:23, ipagamit sa mga bata ang pahina sa kalihokan sa semana aron sa pagtabang nga mahunahuna nila unsa ang gitudlo niini nga bersikulo. Dapita ang matag bata sa paggamit sa pahina sa kalihokan aron sa pagtudlo sa laing bata kon unsa ang pagkabanhaw.

• Pagpakita og usa ka hulagway sa nabanhaw nga Manluluwas, ug tudloi ang mga bata og kanta mahitungod sa Pagkabanhaw, sama sa “Nabuhi ba Gayud Pag-usab si Jesus?” o “Siya Nabanhaw” (Songbook sa mga Bata, 45; Mga Himno, nu. 118). Hunong sa matag karon ug unya aron ipasabut ang kahulogan ug kamahinungdanon sa mga pulong ug hugpong sa mga pulong.

• Pangutan-a ang mga bata kon aduna ba silay kaila nga namatay. Ipaambit ang imong pagpamatuod nga sa umaabut ang maong tawo ug ang tanan mabanhaw tungod ni Jesukristo. Kon gikinahanglan, gamita ang pahina sa kalihokan sa semana aron ipasabut kung unsa ang kahulugan sa mabanhaw.

  

  Mary and the Resurrected Lord, ni Harry Anderson

Itudlo ang Doktrina: Mas Dagko nga mga Bata

Alma 39:1, 10–11

Ako mahimong usa ka maayong ehemplo.

Ang tambag ni Alma ngadto ni Corianton makatabang sa mga bata nga makasabut sa kamahinungdanon sa pagsunod ug sa pagkamaayo nga mga ehemplo.

Posible nga mga Kalihokan

• Ipasabut nga ang anak nga lalaki ni Alma nga si Corianton nakahimo og usa ka seryoso nga sala sa panahon nga magsangyaw unta siya sa ebanghelyo. Basaha ang katunga nga bahin sa Alma 39:11 uban sa mga bata, ug hangyoa sila sa pagpaminaw kon sa unsang paagi nga ang sala ni Corianton nakaapekto sa mga Zoramite. Tabangi ang mga bata sa paghunahuna sa mga tawo kinsa mahimo nga naimpluwensya sa ilang mga lihok. Sa unsang paagi nga mahimo silang maayo nga ehemplo niining mga tawhana?

• Dungan nga magbasa sa Alma 39:1. Sa unsang paagi ang igsoon ni Corianton nga si Shiblon nahimong usa ka maayo nga ehemplo? Hangyoa ang mga bata sa pagpangita og dugang nga mga tubag niini nga pangutana diha sa Alma 38:2–4. Hisguti ang pipila ka maayong mga ehemplo sa imong kinabuhi, ug dapita ang mga bata sa pagbuhat sa ingon. Ipakita ang video nga “Lessons I Learned as a Boy” (ChurchofJesusChrist.org), ug pangutan-a ang mga bata kon sa unsang paagi ang mas magulang nga batang lalaki usa ka maayo nga ehemplo.

• Pagdala og ispat [flashlight] o hulagway sa adlaw, ug itandi ang kahayag ngadto sa gahum sa usa ka matarung nga ehemplo. Sama nga ang kahayag gikan sa ispat o sa adlaw makatabang kanato nga makakita og dalan nga kinahanglan atong sundon, ang usa ka matarung nga ehemplo magtudlo kanato unsay buhaton aron makasunod sa Langitnong Amahan. Pagpakigbahin og kasinatian sa dihang ang maayo nga ehemplo sa usa ka tawo nakatabang kanimo. Unsa man ang mahimo sa mga bata aron mahimong maayo nga ehemplo ngadto sa uban? Ipamatuod nga si Jesukristo mao ang atong hingpit nga ehemplo.

Alma 39:9–13

Ako makahinulsol kon ako makahimo og mga sayop.

Sama kanatong tanan, ang mga bata nga imong gitudloan makasala ug makahimo og mga sayop. Unsaon nimo pagdasig kanila nga “mobiya sa [ilang] mga sala” ug maghinulsol? (Alma 39:9).

Posible nga mga Kalihokan

• Hangyoa ang mga bata sa pagpaambit og kasinatian sa dihang nasakitan sila. Unsay ilang gihimo aron matabangan ang ilang samad nga mamaayo? Ipasabut nga ang sala makasamad sa atong mga espiritu, apan ang Manluluwas makaayo kanato kon kita maghinulsol.

• Hangyoa ang mga bata sa pagpangita sa hugpong sa mga pulong “mohinulsol ug mobiya sa imong mga sala” diha sa Alma 39:9, ug tabangi sila nga makasabut unsa ang gipasabut sa “mohinulsol” ug “mobiya”. Ipamatuod nga ang paghinulsol posible pinaagi ni Jesukristo ug sa Iyang Pag-ula. Basaha og dungan ang Alma 39:10–14 aron sa pagpangita sa ubang mga butang nga atong mahimo nga makatabang kanato nga maghinulsol ug maglikay sa sala.

Alma 40:6–7, 11–14, 21–23

Human sa kamatayon, ang atong mga espiritu moadto sa kalibutan sa mga espiritu hangtud moabut ang Pagkabanhaw ug Paghukom.

Natural lang nga maghunahuna kung unsa ang mahitabo kanato human kita mamatay. Ang mga pulong ni Alma makatabang sa mga bata sa pagpangita og dinasig nga mga tubag.

Posible nga mga Kalihokan

• Isulat ang kamatayon, kalibutan sa mga espiritu, pagkabanhaw, ug paghukom sa lain-lain nga mga piraso sa papel, ug ipapilit kini sa pisara nga dili magkasunod. Tabangi ang mga bata nga makasabut kon unsa ang gipasabut niana nga mga pulong. Basaha ang Alma 40:6–7, 11–14, ug 21–23 uban sa mga bata, ug hangyoa sila sa pagbutang sa mga pulong diha sa pisara sa husto nga pagkahan-ay.

• Paglista og mga pangutana diha sa pisara nga matubag sa Alma 40:6–7, 11–14, ug 21–23, ug dapita ang mga bata sa pagparespares sa matag pangutana ngadto sa mga bersikulo nga maoy makatubag niini. Sama pananglit, “Unsay mahitabo sa akong lawas kon ako mabanhaw na?” mahimong matubag sa Alma 40:23. Kon gikinahanglan, ipasabut ang lisud nga mga pulong ngadto sa mga bata samtang sila magbasa. Awhaga ang mga bata sa pagpakigbahin nganong sila mapasalamaton sa plano sa Langitnong Amahan.

Awhaga ang Pagkat-on diha sa Panimalay

Awhaga ang mga bata sa pagpasalamat sa usa ka sakop sa pamilya kinsa usa ka maayong ehemplo ngadto kanila ug sa paghunahuna og usa ka paagi nga sila mahimong maayong mga ehemplo niining semanaha.

Pagpalambo sa Atong Pagtudlo

Paggamit sa mga balatian [senses]. “Kadaghanan sa mga bata (ug mga hamtong) labing makakat-on kon maapil ang daghang mga balatian. Pangita og mga paagi sa pagtabang sa mga bata nga magamit ang ilang mga balatian sa pangtan-aw, pangdungog, ug panghikap samtang sila nagkat-on” (Pagtudlo Sumala sa Pamaagi sa Manluluwas, 25).