Paghulagway ni Nephi diha sa tore sa tanaman ni Jerry Thompson

Agosto 24–30

Helaman 7–12

“Paghinumdom sa Ginoo”

Samtang magbasa ka sa Helaman 7–12, palandunga kon sa unsa nga paagi ang mga istorya ug mga baruganan niini nga mga kapitulo makapanalangin sa mga bata nga imong gitudloan. Ang mga ideya niini nga outline makadugang sa inspirasyon nga imong madawat.

Irekord ang Imong mga Impresyon

Dapita ang Pagpaambit

Pangutan-a ang mga bata unsa ang ilang nahibaloan mahitungod ni propeta Nephi, ang anak ni Helaman (tan-awa sa Helaman 7–12). Kon gikinahanglan, ipasabut ang kalainan tali niini nga propeta nga ginganlan og Nephi ug sa propeta nga ginganlan og Nephi sa sinugdanan sa Basahon ni Mormon.

Itudlo ang Doktrina: Mas Gagmay nga mga Bata

Helaman 7:20

Gusto sa Ginoo nga mahinumdom ko Kaniya.

Si Nephi naghunahuna giunsa sa iyang mga tawo pagpalayo gikan sa Dios ug paghikalimot Kaniya. Unsaon nimo pagtabang ang mga bata nga makat-on og mga pamaagi aron sila makahinumdom sa Langitnong Amahan ug ni Jesus?

Posible nga mga Kalihokan

• Ipaambit sa mga bata ang usa ka kasinatian dihang nalimtan nimo ang usa ka butang nga mahinungdanon. Pangutan-a sila kon nakasulay na ba sila nga naa silay nakalimtan. Basaha ang Helaman 7:20, ug ipasabut nga ang mga Nephite mipili nga kalimtan ang Dios. Gusto ni propeta Nephi nga makahinumdom sila sa Dios. Pagdala og mga hulagway sulod sa usa ka bag nga nagrepresentar og mga pamaagi nga ang mga bata makahinumdom sa Langitnong Amahan ug ni Jesus. Papulipuliha ang mga bata sa pagpili og mga hulagway ug magpaambit unsaon nga kita makahinumdom sa Dios matag adlaw.

• Tabangi ang mga bata sa pagkompleto sa pahina sa kalihokan niining semanaha.

Helaman 8:13–23

Ang mga propeta nagpamatuod ni Jesukristo.

Si Nephi mipamatuod nga si Jesukristo moabut, ug siya midapit sa iyang mga tawo sa paghinulsol ug pagsunod Kaniya. Gamita kini nga mga kapitulo sa pagtudlo sa mga bata nga ang mga propeta nagpamatuod ni Jesukristo.

Posible nga mga Kalihokan

• Ipakita ang usa ka hulagway ni Jesukristo, ug sultihi ang mga bata nga ang mga propeta sama ni Nephi nagdapit kanato sa pagsunod ni Jesus. Basaha ang mosunod nga mga pulong mahitungod sa mga propeta gikan sa Helaman 8:22: “Sila mipamatuod sa pag-anhi ni Kristo, ug nagpaabut, ug nagmaya diha sa iyang adlaw nga moabut.” Ipagkibahin sa mga bata ang usa ka butang nga gisulti sa atong buhing propeta mahitungod sa Manluluwas.

• Dungan nga manganta sa usa ka kanta mahitungod sa mga sugo, sama sa “Sunda ang Propeta” (Songbook sa mga Bata,58). Pilia ang usa ka mahinungdanon nga hugpong sa mga pulong gikan sa kanta, ug isulat ang usa ka pulong gikan sa hugpong sa mga pulong sa matag usa ka mga tunob nga gipamarka sa papel. Ipahimutang ang mga marka sa mga tunob diha sa salog nga magpadulong ngadto sa usa ka hulagway sa Manluluwas. Dapita ang mga bata sa pagsunod sa agianan sa marka sa mga tunob, ug tabangi sila sa pagbasa sa mga pulong.

Helaman 10:11–12

Akong sundon ang akong Langitnong Amahan.

Ang ehemplo ni Nephi sa pagkamasulondon makadasig sa mga bata nga imong gitudloan sa pagsunod sa Ginoo.

Posible nga mga Kalihokan

• Basaha ang Helaman 10:2, 11–12, ug tabangi ang mga bata nga makasabut nga si Nephi misunod sa Dios. Dapita ang mga bata nga ipa-aksyon ang gibuhat ni Nephi. Sama pananglit, hangyoa sila nga molakaw paingon ngadto sa usa ka bahin sa lawak (ingon og mamauli na sila), mohunong, molingi, ug molakaw paingon sa pikas nga bahin sa lawak (ingon og mamalik na sila aron motudlo sa mga tawo). Tabangi sila nga makakita nga si Nephi gusto nga mosunod sa Ginoo bisan tuod siya kinahanglang mobuhat og usa ka butang nga malisud.

• Tabangi ang mga bata nga makasabut nga usahay ang Langitnong Amahan gusto nga mobuhat kita og usa ka butang nga lahi kay sa ganahan nato nga buhaton, apan mahimo kita nga mosunod Kaniya sama sa gibuhat ni Nephi. Pagpaambit og mga pahayag sama sa “Usahay gusto ko nga masuko, apan gusto sa Langitnong Amahan nga ako mag … ,” ug tugoti ang mga bata nga motapos sa mga pahayag. Awhaga ang mga bata sa paghinumdom nga mohunong ug maghunahuna kon unsa ang gusto sa Langitnong Amahan nga ilang buhaton ug dayon mobuhat niini.

Itudlo ang Doktrina: Mas Dagko nga mga Bata

Helaman 7–11

Ako mahimong luwas sa espirituhanong paagi samtang mosunod ko sa propeta.

Si Presidente James E. Faust nagtudlo: “Ang atong kaluwasan nag-agad sa atong pagpatalinghug sa unsay gisulti [sa Presidente sa Simbahan] ug sa pagsunod sa iyang tambag” (“Continuous Revelation,” Ensign, Nob. 1989, 10).

Posible nga mga Kalihokan

• Dapita ang mga bata sa paghimo og lista diha sa pisara sa mga butang nga gibuhat sa propeta (tan-awa sa “Propeta,” Giya ngadto sa mga Kasulatan, scriptures.ChurchofJesusChrist.org). Tabangi sila sa pagsiksik sa Helaman 7:1–2, 27–29; 8:22–23; ug 10:3–4, 6–7 aron makita kon giunsa ni Nephi pagbuhat ang pipila ka mga butang nga anaa sa ilang lista. Kanus-a nato nakita ang atong propeta karon nga nagbuhat niining mga butanga? Ipaambit ang imong pagpamatuod bahin sa buhi nga propeta.

• Dungan nga magbasa sa Helaman 11:3–7 (o ribyuha ang “Kapitulo 39: Si Nephi Nakadawat og Dako nga Gahum,” Mga Sugilanon sa Ang Basahon ni Mormon, 108–10, o ang katugbang nga video diha sa ChurchofJesusChrist.org). Hangyoa ang mga bata sa pagpaminaw kon unsay nahitabo sa mga tawo nga wala maminaw sa propeta. Unsa ang mahimong mahitabo kon dili kita maminaw sa propeta? Sa unsang paagi kita mapanalanginan kon mosunod kita Kaniya? Ipakigbahin ang usa ka butang nga gitudlo sa atong propeta, ug awhaga ang mga bata sa pagsunod sa iyang mga pagtulun-an.

Helaman 7:20–21

Gusto sa Ginoo nga mahinumdom ko Kaniya.

Ang mga bata nga imong gitudloan makasinati og mga pagkalinga nga mahimong hinungdan nga makalimot sila sa Langitnong Amahan ug ni Jesukristo. Unsaon nimo pagdasig ang mga bata sa paggahin og panahon sa mga espirituhanon nga mga butang?

Posible nga mga Kalihokan

• Basaha og dungan ang Helaman 7:20–21, ug pangutan-a ang mga bata kon unsa ang ilang gihunahuna nga ipasabut sa pagkalimot sa Dios. Ipasabut nga ang pulong kalimtan mahimong mangahulugan usab nga “pagpasagad” o “pagbalewala.” Ipakita ang usa ka hulagway sa Manluluwas, ug dapita ang mga bata sa pagdrowing og mga butang nga tingali ilang gigahinan og daghan ra kaayo nga panahon nga mahimong hinungdan nga makalimot sila sa Ginoo. Ibutang ang ilang mga drowing sa atubangan sa hulagway ni Jesus. Hangyoa ang mga bata sa paghunahuna sa mga butang nga ilang mahimo matag adlaw sa paghinumdom sa Langitnong Amahan ug ni Jesus. Samtang mopaambit sila sa ilang mga hunahuna, tagsatagsaha pagkuha ang mga drowing hangtud nga makita ang hulagway sa Manluluwas.

• Dapita ang mga bata sa pagkompleto sa pahina sa kalihokan niining semanaha.

Helaman 10

Kon ako mamalandong sa mga pulong sa Dios, ako makadawat og pagpadayag.

Nahibalo ba ang mga bata nga imong gitudloan kon unsay kahulugan sa pagpalandong? Tabangi sila nga makasabut nga si Nephi napanalanginan og pagpadayag sa dihang namalandong siya sa mga butang nga gikapakita sa Ginoo kaniya.

Posible nga mga Kalihokan

• Tabangi ang mga bata nga makasabut kon unsay ipasabut sa pagpalandong (tan-awa sa “Pagpalandong,” Giya Ngadto sa mga Kasulatan, scriptures.ChurchofJesusChrist.org). Dapita sila sa paghunahuna og ubang mga pulong nga nagpasabut kon unsa ang kahulogan sa pagpamalandong. Dayon hangyoa sila sa pagbasa sa Helaman 10:1–3 ug pulihan ang pulong pagpamalandong sa mga pulong nga ilang gihunahuna. Unsa ang nahitabo sa dihang si Nephi namalandong sa mga kasulatan? (tan-awa sa Helaman 10:3–7). Ipaambit nila ang usa ka panahon sa dihang ikaw nakadawat og pagpadayag human mamalandong sa usa ka kasulatan o sa usa ka modernong adlaw nga pagpadayag o usa ka espiritwal nga kasinatian.

• Hatagi ang mga bata og igong panahon sa pagbasa sa Helaman 10, o dungan nga magbasa niini, ug awhaga sila sa pagpangita og bersikulo nga gusto nilang palandungon sa umaabot nga semana. Dapita sila sa pagsulat sa bersikulo nga ilang gipili sa usa ka papel o kard ug ibutang kini bisan asa aron sa magpahinumdom kanila sa pagpalandong niana nga bersikulo sa umaabut nga semana. Sa umaabut nga klase, hatagi sila og panahon sa pagpaambit kon unsay ilang nakat-unan samtang namalandong sila niana nga bersikulo.

Awhaga ang Pagkat-on diha sa Panimalay

Dapita ang mga bata sa pagpaambit ngadto sa ilang mga pamilya kon unsay ilang plano nga buhaton aron mahinumdom sa Langitnong Amahan ug ni Jesukristo kada adlaw. Mahimo usab nilang dapiton ang ilang mga pamilya nga moduyog kanila sa ilang tumong.

Pagpalambo sa Atong Pagtudlo

Ipaabut ang mga pagdapit nga nagtahud sa kabubut-on. Kon imong dapiton ang mga bata sa paglihok kon unsay imong gitudlo kanila, paghunahuna og mga pamaagi sa pagtahud sa ilang kabubut-on samtang ilang buhaton ang ilang nakat-unan. Sama pananglit, human sa leksyon mahitungod sa Manluluwas, mahimo kang mangutana, “Unsay inyong buhaton aron mahinumdom sa Manluluwas niining semanaha?”