Samuel the Lamanite on the Wall, ni Arnold Friberg

Agosto 31–Septyembre 6

Helaman 13–16

“Malipayon nga mga Balita sa Dako nga Hingpit nga Kalipay”

Pangandam sa pagtudlo pinaagi sa pagbasa sa Helaman 13–16 ug pagpamalandong kon unsa nga mga kalihokan ang labing maayo nga makatabang sa mga bata nga makat-on sa mga kamatuoran niini nga mga kapitulo.

Irekord ang Imong mga Impresyon

Dapita ang Pagpaambit

Ipakita ang usa ka hulagway ni Samuel ang Lamanite, ug dapita ang mga bata sa pagpakigbahin sa usa ka butang nga ilang nahibaloan mahitungod kaniya. Sama pananglit, mahimo ba sila nga maghisgot mahitungod sa istorya ni Samuel nga nagtudlo sa ibabaw sa paril o sa mga timailhan nga iyang gisulti nga makita sa panahon nga matawo si Jesus?

Itudlo ang Doktrina: Mas Gagmay nga mga Bata

Helaman 13:2–5

Ang Espiritu mahimong makigsulti sa atong mga kasingkasing.

Sa diha nga si Samuel ang Lamanite gisugo sa pagsangyaw ngadto sa mga Nephite, ang Langitnong Amahan mitabang kaniya nga masayud diha sa iyang kasingkasing kon unsa ang iyang kinahanglan nga isulti.

Posible nga mga Kalihokan

• Tudloi ang mga bata nga samtang kita makigsulti sa usag usa gamit ang mga pulong, ang Espiritu Santo makigsulti kanato pinaagi sa mga pagbati sa atong mga kasingkasing. Dapita sila sa pagbutang sa ilang mga kamot ibabaw sa ilang mga kasingkasing sa matag higayon nga imong basahon ang pulong nga “kasingkasing” diha sa Helaman 13:2–5. Tabangi sila sa pagdayandayan [decorate] sa giporma og kasingkasing nga mga piraso sa papel nga nag-ingon, “Ang Espiritu makigsulti kanako sa akong kasingkasing.”

• Sultihi ang mga bata nga kon sila mabunyagan ug makumpirmahan, makabaton sila sa gasa sa Espiritu Santo aron motabang nila nga mahibalo unsa ang gusto sa Langitnong Amahan nga ilang buhaton ug isulti. Tabangi sila sa paghunahuna sa mga butang nga mahimong isulti sa Espiritu Santo kanila, ug dapita sila sa pagpaambit kon unsay ilang mahimong buhaton aron makasunod sa Iyang mga pag-aghat.

Helaman 14:2–7, 20–25

Ang mga propeta nagtudlo mahitungod ni Jesukristo.

Ang asoy ni Samuel ang Lamanite usa ka dako nga kahigayonan sa pagtudlo sa mga bata nga ang tanang mga propeta nagtudlo mahitungod ni Jesukristo.

Posible nga mga Kalihokan

• Ipakita ang litrato ni Samuel ang Lamanite sa outline niining semanaha sa Dali, Sunod Kanako—Alang sa mga Indibidwal ug mga Pamilya, ug sultihi ang mga bata, sa yano nga mga pulong, mahitungod sa iyang kasinatian diha sa Helaman 13–16. Mahimo usab nimong gamiton ang “Kapitulo 40: Si Samuel ang Lamanite Nagsulti Mahitungod ni Jesukristo” (Mga Sugilanon sa Ang Basahon ni Mormon, 111–13, o ang katugbang nga video diha sa ChurchofJesusChrist.org). Tugoti ang mga bata sa pagpaambit sa mga butang nga ilang nahibaloan mahitungod ni Samuel ang Lamanite.

• Kantaha og dungan ang ikapito nga bersikulo sa “Mga Istorya sa Basahon ni Mormon” (Songbook sa mga Bata, 62). Pagpaambit og usa ka butang nga imong gidayeg bahin kang Samuel, ug tugoti ang mga bata sa pagpaambit kon unsay ilang ganahan bahin sa iyang istorya.

• Pagtago og mga hulagway sa palibut sa lawak nga nagrepresentar sa mga timailhan nga gipanagna ni Samuel sa Helaman 14:2–7 ug sa 20–25. Pagbasa og hugpong sa mga pulong nga naghulagway sa usa sa mga timailhan, ug hangyoa ang mga bata sa pagpangita sa hulagway niana nga timailhan. Ipasabut nga kini nga mga timailhan nakatabang sa mga Nephite nga masayud mahitungod ni Jesukristo. Ipamatuod nga, sama ni Samuel, ang tanang mga propeta nagpamatuod ni Jesukristo.

Ang propreta nagpontarya kanato ngadto ni Jesukristo.

Helaman 16:1–6

Ako mapanalanginan kon akong sundon ang propeta.

Ang Langitnong Amahan mihatag kanato og usa ka propeta aron motabang kanato nga masayud sa Iyang kabubut-on ug mosunod sa Iyang plano. Kita mapanalanginan samtang maminaw kita sa mga pulong sa propeta ug mosunod.

Posible nga mga Kalihokan

• Tabangi ang mga bata sa pagtukod og gamay nga paril gamit ang mga bloke o mga libro. Pinaagi sa paggamit og usa ka gamay nga dulaan o munyeka sa pagrepresentar ni Samuel, papulipuliha ang mga bata sa pagtabang ni Samuel sa pagkatkat sa paril aron magtudlo sa mga tawo bahin ni Jesukristo. (Tan-awa usab ang pahina sa kalihokan niining semanaha.) Pakigbahin og mga hugpong sa mga pulong gikan sa Helaman 16:1 ug 5 aron sa pagpasabut nga ang pipila ka mga tawo mituo kang Samuel ug nabunyagan. Paggamit og mga hugpong sa mga pulong diha sa Helaman 16:2 ug 6 aron ipakita nga ang uban wala motuo ug nasuko ni Samuel. Ipamatuod nga ang mga tawo kinsa mosunod sa propeta mapanalanginan.

• Ipakita ang usa ka hulagway sa Manluluwas, ug hangyoa ang usa ka bata sa pagrepresentar sa propeta ug sa paggiya sa ubang mga bata libot sa lawak samtang sila mokanta og pipila ka mga bersikulo sa “Sunda ang Propeta” (Songbook sa mga Bata, 58) o laing kanta bahin sa mga propeta. Dayon hangyoa ang bata nga nagrepresentar sa propeta sa paggiya sa mga bata ngadto sa hulagway sa Manluluwas. Ipamatuod nga kon mosunod kita sa propeta, siya modala kanato ngadto ni Jesukristo. Ipaambit ang pipila ka mga butang nga bag-ohay lang nga gitudlo sa atong propeta mahitungod ni Jesus. Unsaon nato pagsunod sa iyang tambag?

Itudlo ang Doktrina: Mas Dagko nga mga Bata

Helaman 13:2–4

Ang Espiritu mahimong makigsulti sa atong mga kasingkasing.

Sa umaabot nga panahon, ang mga bata nga imong gitudloan kinahanglang makat-on sa pagbuhat sa gibuhat ni Samuel: mopaambit sa mensahe nga gibutang sa Ginoo sa ilang mga kasingkasing.

Posible nga mga Kalihokan

• Pagpakita og hulagway ni Samuel ang Lamanite (sama nianang anaa sa Dali, Sunod Kanako—Alang sa mga Indibidwal ug mga Pamilya), ug pangutan-a ang mga bata kon giunsa ni Samuel pagkasayud unsay isulti samtang siya nagsangyaw gikan sa paril sa siyudad. Dapita sila sa pagpangita og tubag gikan sa Helaman 13:2–4. Paghisgut bahin sa panahon dihang ang Espiritu Santo mitabang kanimo nga masayud sa imong kasingkasing kon unsay gusto sa Dios nga imong buhaton o isulti. Hangyoa ang mga bata sa pagpaambit og bisan unsang susama nga mga kasinatian nga ilang nasinati.

• Ipakita ang usa ka litrato sa buhi nga propeta nga namulong sa Kinatibuk-ang Komperensya. Sultihi ang mga bata nga ang Dios mosulti sa propeta kon unsay isulti ngari kanato, sama nga Siya misulti kang Samuel kon unsay isulti ngadto sa mga Nephite. Paghisgot mong tanan mahitungod sa mga butang nga gisulti sa propeta nga nakadasig nimo ug sa mga bata.

Helaman 14:2–28

Ang mga propeta nagtudlo mahitungod ni Jesukristo.

Ang katuyoan sa mensahe ni Samuel mao ang pagpamatuod ni Jesukristo ug pagdapit sa mga tawo sa paghinulsol ug pagduol ngadto Kaniya. Mao ra gihapon kini ang mga buluhaton sa atong mga propeta karon.

Posible nga mga Kalihokan

• Dapita ang katunga sa klase sa pagbasa sa Helaman 14:2–6 ug pagdrowing og mga timailhan sa pagkatawo ni Jesus. Dapita ang katunga sa klase sa pagbasa sa Helaman 14:20–28 ug pagdrowing og mga timailhan sa pagkamatay ni Jesus. Dayon hangyoa ang matag grupo sa pagpaambit sa ilang gidrowing. Basaha og dungan ang Helaman 14:11–12, ug hangyoa ang mga bata sa pagpaminaw nganong si Samuel nanagna bahin niini nga mga timailhan. Unsaon nato pagkat-on mahitungod ni Jesukristo sa atong panahon?

• Ipasabut nga sama nga si Samuel ang Lamanite nagtudlo bahin ni Jesukristo, ang mga buhing propeta nagbuhat gihapon niana sa atong panahon. Pakigbahin og usa ka pamahayag gikan sa pinakabag-o nga mensahe sa komperensya diin ang buhing propeta mipamatuod ni Kristo. Hangyoa ang mga bata sa pagpaambit kon unsa ang gitudlo sa propeta kanila mahitungod ni Jesukristo.

Helaman 16:1–6

Ako mapanalanginan kon akong sundon ang propeta.

Ang Langitnong Amahan mihatag kanato og usa ka propeta aron motabang kanato nga masayud sa Iyang kabubut-on ug mosunod sa Iyang plano. Kita mapanalanginan samtang maminaw kita ug mosunod sa mga pulong sa buhing propeta.

Posible nga mga Kalihokan

• Basaha og kusog ang Helaman 16:1 ug 5, ug hangyoa ang mga bata sa pagbarug kon makadungog sila ug usa ka butang nga gihimo sa mga tawo sa diha nga sila mituo sa mga pulong ni Samuel. Dayon basaha ang mga bersikulo 2 ug 6, ug hangyoa ang mga bata sa paglingkod kon makadungog sila og usa ka butang nga gihimo sa mga tawo sa diha nga wala sila motuo. Unsaon nato pagpakita nga nagtuo kita sa mga pulong sa buhing propeta?

• Ipakita ang usa ka hulagway sa buhing propeta, ug hangyoa ang mga bata sa pagpaambit unsa ang ilang nahibaloan mahitungod kaniya. Ipaambit kon sa unsang paagi ikaw naningkamot sa pagsunod sa iyang mga pagtulun-an ug kon sa unsang paagi ang paghimo niini nakapanalangin kanimo.

Awhaga ang Pagkat-on diha sa Panimalay

Hangyoa ang mga bata sa pagkat-on mahitungod sa usa ka butang nga gisulti sa propeta ug ipaambit kini sa klase sa sunod semana.

Pagpalambo sa Atong Pagtudlo

Awhaga ang mga bata sa pagpangutana. “Paningkamuti nga makita [sa mga bata] ang mga pangutana isip mga oportunidad, dili nga makabalda o mga babag sa imong leksyon. … Ang ingon nga mga pangutana maghatag kanimo og bililhon nga mga panabut kon unsay gihunahuna sa mga bata, unsay ilang mga kabalaka, ug unsay ilang mga reaksyon sa mga butang nga ilang nakat-unan” (tan-awa usab sa Pagtudlo sumala sa Pamaagi sa Manluluwas, 25).