One Day, One Night, and One Day, ni Jorge Cocco

Septyembre 7–13

3 Nephi 1–7

“Ihangad ang Imong Ulo ug Pagmaya”

Kon nagkinahanglan ka og dugang nga mga ideya samtang mangandam ka sa pagtudlo, tan-awa ang “Dugang nga mga Kapanguhaan alang sa Pagtudlo sa mga Bata” ug ang “Pagtubag sa mga Panginahanglan sa Mas Gagmay nga mga Bata” sa sinugdanan niini nga kapanguhaan.

Irekord ang Imong mga Impresyon

Dapita ang Pagpaambit

Dapita ang mga bata sa pagpaambit unsay ilang nahinumduman nga nakat-unan sa miaging semana mahitungod sa mga timailhan nga gisulti ni Samuel ang Lamanite nga makatabang aron ang mga tawo mahibalo nga natawo na si Jesus. Sultihi ang mga bata nga karong adlawa maghisgut sila sa mga tawo kinsa nakakita niadtong mga timailhan nga nahitabo.

Itudlo ang Doktrina: Mas Gagmay nga mga Bata

3 Nephi 1:4–15, 19–21

Usa ka bag-o nga bitoon misanag sa dihang natawo si Jesukristo.

Ang istorya diha sa Bag-ong Tugon bahin sa pagkatawo sa Manluluwas kabisado na kaayo, bisan sa mga bata. Kini nga semana maoy usa ka dakong kahigayunan sa pagtudlo sa mga bata sa imong klase mahitungod sa mga milagro nga nasaksihan sa mga Nephite sa dihang natawo si Jesus.

Posible nga mga Kalihokan

• Sa dili pa magklase, pagbutang og bitoon sa bongbong. Dapita ang mga bata sa pagpangita og usa ka butang sa bongbong nga sa kasaragan wala diha. Sultihi ang mga bata nga ang mga Nephite nakakita og bitoon sa langit dihang natawo si Jesus. I-summarize ang asoy diha sa 3 Nephi 1:4–15, ug 19–21. Mahimo usab nimong gamiton ang “Kapitulo 41: Ang Mga Timailhan sa Pagkatawo ni Kristo” (Mga Sugilanon sa Ang Basahon ni Mormon, 114–16, o ang katugbang nga video diha sa ChurchofJesusChrist.org).

• Ipakita sa mga bata ang usa ka litrato sa pagkatawo sa Manluluwas (tan-awa sa Libro sa mga Hulagway sa Ebanghelyo, nu. 30), ug kantaha ang usa ka paborito nga kanta sa Pasko, sama sa “Awit sa Pagkatawo” (Songbook sa mga Bata, 32). Tabangi ang mga bata aron makasabut nga ang mga Nephite layo kaayo gikan sa dapit diin natawo si Jesus, apan nasayud sila nga natawo Siya tungod sa mga timailhan nga ilang nakita. Ipamatuod nga bisan tuod wala kita makakita sa pagkatawo sa Manluluwas, ang Espiritu Santo makatabang kanato nga masayud nga ang mga istorya mahitungod niini sa mga kasulatan tinuod.

3 Nephi 1:20

Ang mga pulong sa mga propeta kanunay nga matuman.

Ang Ginoo misulti ngadto kang Nephi, “Ako [mopakita] ngadto sa kalibutan nga Ako motuman sa tanan ko nga gipamulong pinaagi sa ba-ba sa akong mga balaan nga propeta” (3 Nephi 1:13).

Posible nga mga Kalihokan

• Pagpakita og mga litrato nga naghulagway kon sa unsang paagi ang Dios nakigsulti pinaagi sa mga propeta, sama ni Noe (Libro sa mga Hulagway sa Ebanghelyo, nus. 7–8; tan-awa sa Genesis 6–7) ug Samuel ang Lamanite (Libro sa mga Hulagway sa Ebanghelyo, nu. 81; tan-awa sa Helaman 14:1–7). Dapita ang mga bata sa pagpaambit sa unsay ilang nahibaloan mahitungod niini nga mga istorya.

• Basaha ngadto sa mga bata ang 3 Nephi 1:20, ug ipaambit ang imong pagpamatuod nga ang mga pulong sa mga propeta kanunay nga matuman. Dapita ang mga bata sa pagpaminaw sa propeta sa sunod nga kinatibuk-ang komperensya.

3 Nephi 5:13

Makasunod ako ni Jesukristo.

Si Mormon namahayag, “Ako usa ka tinun-an ni Jesukristo.” Unsaon nimo pagtabang sa mga bata nga makita nila ang ilang mga kaugalingon isip mga disipulo usab?

Posible nga mga Kalihokan

• Basaha ang 3 Nephi 5:13, ug dapita ang mga bata sa pagsulti og usab sa hugpong sa mga pulong “Ako usa ka tinun-an ni Jesukristo.” Tudloi sila nga ang usa ka disipulo ni Jesukristo mosulay sa pagsunod Kaniya. Pagpaambit og pipila ka mga butang nga gibuhat ni Mormon aron mahisama ni Jesus, sama sa pagtudlo sa pulong sa Dios ug sa pagsunod sa mga sugo sa Dios (tan-awa sa 3 Nephi 5:13–18). Tabangi ang mga bata sa paghunahuna og mga paagi nga sila mahimong mga disipulo.

• Sa usa ka piraso nga papel, tabangi ang mga bata sa pagpasubay og lapis sa ilang kamot aron madrowing kini sa papel ug guntingon. Sulati og “Ako usa ka disipulo ni Jesukristo” ang usa ka bahin, ug dapita sila sa pagdrowing og usa ka butang nga mahimo nila aron mahimong usa ka disipulo sa pikas nga bahin sa papel (tingali kinahanglan nimo silang tabangan sa paghunahuna og mga ideya). Dungan nga manganta sa usa ka kanta mahitungod sa pagsunod sa Manluluwas, sama sa “Maninguha Kong Mahimong Mahisama Kang Jesus” (Songbook sa mga Bata, 40).

Itudlo ang Doktrina: Mas Dagko nga mga Bata

3 Nephi 1:4–21

Ang mga saad sa Dios, nga gihatag pinaagi sa Iyang mga propeta, kanunay nga matuman.

Ang asoy diha sa 3 Nephi 1:4–21 makatabang kanato sa pag-ugmad sa hugot nga pagtuo sa mga bata nga ang Dios kanunay nga motuman sa Iyang mga saad.

Posible nga mga Kalihokan

• Dapita ang mga bata sa pagkompara sa panagna ni Samuel ang Lamanite diha sa Helaman 14:1–7 ngadto sa katumanan niini diha sa 3 Nephi 1:19–21. Ipamatuod nga ang mga saad sa Dios nga gipamulong pinaagi sa Iyang mga propeta kanunay nga matuman.

• Basaha uban sa mga bata ang asoy nga makita diha sa 3 Nephi 1:4–10. Pangutan-a ang mga bata kon unsa kaha unta ang ilang bation kon usa sila sa mga tumutuo nga nagpuyo niadtong panahona. Dapita ang mga bata sa pagbasa sa nahabilin nga asoy diha sa mga bersikulo 11–15 ug sa pagsugyot og mga paagi sa pagkompleto niini nga kapahayag [sentence]: “Ang leksyon niini nga istorya mao nga …” Unsaon nato pagpakita sa atong pagsalig diha sa Dios kon kita nabalaka o nawad-an sa kadasig?

• Ipakigbahin ang usa ka butang nga gisaad kanato sa atong buhing propeta. Unsa ang atong buhaton aron sa pagpakita sa atong hugot nga pagtuo nga ang mga pulong sa propeta nagagikan sa Dios?

3 Nephi 2:11–12; 3:13–14, 24–26

Mas lig-on kita kon kita magkapundok.

Ang mga Nephite gikinahanglan nga magkapundok alang sa pisikal nga kaluwasan. Unsaon nimo pagtabang sa mga bata nga makasabut nga ang panagtigum uban sa matarung nga mga higala makahatag usab kanila og espiritwal nga kalig-on?

Posible nga mga Kalihokan

• Basaha uban sa mga bata ang mosunod nga mga bersikulo, ug dapita sila sa pagpangita sa mga rason ngano nga ang mga Nephite nagkapundok ug sa mga panalangin nga miabut kanila: 3 Nephi 2:11–12 and 3:13–14, 24–26. Nganong importante man kanato nga “magkapundok” karon diha sa atong mga pamilya ug sa simbahan? Sa unsang paagi nga ang pagpundok makahimo kanato nga mas lig-on sa espirituhanong paagi?

• Pagtudlo og leksyon gamit ang usa ka butang [object lesson] aron sa pagtudlo nga mas lig-on kita kon magkauban kay sa magkalagyo. Sama pananglit, dapita ang mga bata sa pagbali og usa ka lipak ug dayon usa ka bugkos nga mga lipak o paggisi og usa ka piraso nga papel ug dayon usa ka tapok nga papel. Sa unsang paagi nga kita mahisama sa mga lipak o sa papel? Sa unsa nga paagi kita makapalig-on sa usag usa kon kita magkapundok diha sa atong mga pamilya o sa simbahan?

• Ipasabut nga si Jesus nagpundok sa Iyang mga katawhan ngadto sa Simbahan karon pinaagi sa misyonaryo nga buhat (tan-awa sa 3 Nephi 5:24–26). Dapita ang usa ka full-time nga misyonaryo o usa ka misyonaryo sa ward sa pagpaambit og mga kasinatian nga nagpakita kon sa unsang paagi ang mga tawo nalig-on pinaagi sa pagpundok ngadto sa Simbahan.

3 Nephi 4:30–33; 5:12–26; 6:14; 7:15–26

Ako usa ka disipulo ni Jesukristo.

Unsaon nimo pagtabang sa mga bata nga makita nila ang ilang mga kaugalingon isip mga disipulo ni Jesukristo, sama sa gibuhat ni Mormon? (tan-awa sa 3 Nephi 5:13).

Posible nga mga Kalihokan

• Pagpakita og usa ka hulagway ni Mormon (sama sa Libro sa mga Hulagway sa Ebanghelyo, nu. 73). Dapita ang matag bata sa pagtuyok ug isulti pag-usab ang gisulti ni Mormon diha sa 3 Nephi 5:13: “Ako usa ka disipulo ni Jesukristo.” Unsa ang ipasabut sa mahimong usa ka disipulo ni Jesukristo? (tan-awa sa D&P 41:5).

• Bahina ang klase ngadto sa gagmay nga mga grupo, ug tahasi ang matag grupo sa pagbasa mahitungod sa usa sa mosunod nga mga ehemplo sa mga disipulo: ang nakabig nga mga Lamanite (tan-awa sa 3 Nephi 4:30–33; 6:14), Mormon (tan-awa sa 3 Nephi 5:12–26), ug Nephi (tan-awa sa 3 Nephi 7:15–26). Sa unsang paagi kining mga tawhana tinuod nga mga disipulo ni Jesukristo? Unsa ang atong mahimo aron makasunod sa ilang mga ehemplo?

Awhaga ang Pagkat-on diha sa Panimalay

Dapita ang mga bata sa paghunahuna og usa ka butang nga ilang buhaton karong semanaha aron mahimong mga disipulo ni Kristo. Dapita sila sa pagsulat niini ug sa pagpaambit niini uban sa ilang mga pamilya.

Pagpalambo sa Atong Pagtudlo

Pagpakita og usa ka kasulatan. Pagpili og usa ka bersikulo nga makahuluganon kanimo (o dapita ang mga bata sa pagpili og usa), ug ipakita kini sa inyong lawak klasehanan diin ang mga bata makakita niini kanunay. Mahimo nimong ipakita kini sulod sa pipila ka mga semana ug hisgutan kini og panagsa.