Third Nephi: These Twelve Whom I Have Chosen, ni Gary L. Kapp

Septyembre 21–27

3 Nephi 12–16

“Ako mao ang Balaod, ug ang Kahayag”

Samtang magtuon ka sa 3 Nephi 12–16, pangitaa ang mga kamatuoran nga mahimong makahuluganon sa mga bata nga imong tudloan. Kini nga outline nagsugyot og pipila ka mga kamatuoran, apan ang Espiritu mahimong motultol kanimo ngadto sa uban pa.

Irekord ang Imong mga Impresyon

Dapita ang Pagpaambit

Ipasa libot sa klase ang usa ka hulagway ni Jesus. Papulipuliha ang mga bata sa paggunit sa hulagway ug sa pagpaambit og usa ka butang nga gitudlo ni Jesus, sama sa butang nga ilang nakat-unan sa panimalay karong semanaha.

Itudlo ang Doktrina: Mas Gagmay nga mga Bata

3 Nephi 12:14–16

Mahimo akong maayong ehemplo ngadto sa uban.

Usahay ang mga bata dili makaamgo kon unsa ka dakong panalangin ang mahimo sa ilang mga ehemplo ngadto sa uban. Gamita kini nga mga bersikulo sa pagdasig kanila sa pagpadan-ag sa ilang kahayag.

Posible nga mga Kalihokan

• Sulithi ang mga bata nga ang 3 Nephi 12:14–16 mahitungod kanila, ug dayon basaha kini og kusog. Sa matag higayon nga mabasa nimo ang “kamo” o “inyo,” itudlo ang mga bata, ug hangyoa sila sa pagtudlo ngadto sa ilang mga kaugalingon.

• Ipakita sa mga bata ang usa ka flashlight, ug dapita ang usa kanila sa pagpasiga niini. Ipasabut nga kon mosunod kita sa Manluluwas, sama ra kini sa pagpasiga og suga nga makatabang sa uban aron mosunod usab Kaniya. Dayon tabuni o tagoi ang suga, ug hangyoa ang mga bata sa pagngalan og pipila ka mga butang nga ilang mahimo aron mahimong maayo nga ehemplo ngadto sa uban. Sa matag higayon nga ila ning buhaton, tugoti sila sa pagkuha sa tabon sa suga (tan-awa usab ang pahina sa kalihokan niining semanaha).

• Manganta og dungan og usa ka kanta nga makadasig sa mga bata sa pagpadan-ag sama sa suga, sama sa “Dan-ag” o “Sama Ko sa usa ka Bitoon” (Songbook sa mga Bata, 96, 84). Sultihi ang mga bata mahitungod sa kahayag nga imong nakita diha kanila dihang mihimo sila og “maayong mga buhat,” ug ipasabut kon sa unsa nga paagi ang ilang kahayag ug mga ehemplo nakatabang sa uban ug nakadasig nimo sa pagbuhat usab og mga maayong buhat.

3 Nephi 14:7

Ang Langitnong Amahan motubag sa akong mga pag-ampo.

Kini nga bersikulo makatabang sa mga bata nga makasabut nga ang Dios maminaw ug motubag sa ilang mga pag-ampo.

Posible nga mga Kalihokan

• Samtang imong basahon ang 3 Nephi 14:7, dapita ang mga bata sa paghimo og mga aksyon nga magrepresentar sa matag usa sa mga imbitasyon sa Manluluwas dinhi niini nga bersikulo. Sama pananglit, mahimong iisa nila ang ilang mga kamot (mangutana), magporma og antipara sa ilang mga kamot (mangita), o magpakaaron-ingnon nga nanuktok (manuktok). Tabangi ang mga bata sa paghunahuna sa mga butang nga ilang masulti ug mapangutana sa ilang mga pag-ampo. Ipasabut nga mahimo natong sultihan ang Langitnong Amahan sa bisan unsa, ug Siya maminaw tungod kay gihigugma kita Niya.

• Dapita ang mga bata sa pagpakita kanimo kon unsaon nila ang ilang mga kamot, mga mata, ug ulo kon mag-ampo sila. Gamita ang kanta sama sa “Iduko ang Atong Ulo” aron sa pagtabang (Songbook sa mga Bata, 18). Kinsa ang atong kaistorya kon mag-ampo ta? Ihatag ang imong pagpamatuod nga ang Langitnong Amahan motubag sa atong mga pag-ampo.

3 Nephi 14:24–27

Gusto sa Manluluwas nga maminaw ko ug mobuhat kon unsa ang Iyang gitudlo.

Ang pagpaminaw lamang sa mga pulong sa Manluluwas dili igo. Kadto lamang nga nagsunod sa Iyang mga pagtulun-an ang makasugakod sa mga bagyo sa kinabuhi.

Posible nga mga Kalihokan

• Manganta og dungan sa “Ang Tawong Maalam ug ang Tawong Walay Kaalam” (Songbook sa mga Bata, 132), o basaha ang 3 Nephi 14:24–27. Tabangi ang mga bata nga ipuli ang ilang mga ngalan sa “ang maalamon nga tawo” samtang manganta sila. Nganong ang balay sa maalamon nga tawo nagpabilin man nga nagbarog panahon sa bagyo? Ribyuha ang bersikulo 24 aron sa pagpasabut pag-ayo nga siya nakadungog ug mibuhat sa gisulti sa Manluluwas.

• Pakit-a ang mga bata og usa ka bato ug gamay nga balas. Hangyoa sila nga itudlo ang bato kon imong ihulagway ang usa ka pagpili sa pagsunod sa Manluluwas ug itudlo nila ang balas kon imong ihulagway ang pagpili sa dili pagsunod Kaniya. Ipamatuod nga kon kita mobuhat sa gisulti sa Manluluwas, lig-on kita sama sa usa ka balay nga gitukod ibabaw sa bato.

Itudlo ang Doktrina: Mas Dagko nga mga Bata

3 Nephi 12:6

Kinahanglan nga gutumon ako ug uhawon sa pagkamatarung.

Ang tanan makasabut sa kagutom ug kauhaw; ang Maluluwas namulong niini nga mga pagbati aron sa pagtudlo kanato kon unsay angay natong bation mahitungod sa pagpangita sa pagkamatarung.

Posible nga mga Kalihokan

• Sa pamaagi nga dili madunggan sa ubang mga bata, hangyoa ang usa ka bata sa pagpakaaron-ingnon nga nagkaon o nag-inom, ug ipatag-an sa ubang mga bata kon unsa ang iyang gibuhat. Unsa may atong bation kon makakaon kita og maayong pagkaon o makainom og limpyo nga tubig? Unsaon man nato pag-alima sa atong mga espiritu? Dapita ang mga bata sa pagbasa sa 3 Nephi 12:6 aron masayud kon unsa nga butang ang gusto sa Manluluwas nga kita mobati og “[ka]gutom ug [ka]uhaw.” Unsaon nato pagpakita nga gusto nato ang pagkamatarung sama kadako sa atong gusto sa pagkaon ug mainom?

• Pagdala og mga litrato sa pagkaon ug mainom, ug sulati ang matag usa niini og mga pakisayran sa kasulatan sama sa Salmo 119:103; Juan 6:35; 2 Nephi 32:3; Enos 1:4; o 3 Nephi 20:8. Hangyoa ang mga bata sa pagbasa sa mga tudling ug sa paghulagway unsa ang gitudlo niini mahitungod sa unsay atong buhaton aron mapakita nga gigutom ug giuhaw kita sa pagkamatarung. Pagpaambit og mga kasinatian diin gibati nimo nga “napuno ka sa Espiritu Santo,” ug dapita ang mga bata sa pagpaambit sa ilang mga kasinatian.

3 Nephi 13:1–8, 16–18

Kinahanglang mobuhat ko og maayo nga mga butang alang sa husto nga mga rason.

Kini nga mga bersikulo nagpasabut nga ang maayong mga buhat dili pa igo—ang atong mga buhat kinahanglan nga dinasig sa gugma alang sa Dios ug sa tinguha nga moalagad Kaniya.

Posible nga mga Kalihokan

• Hangyoa ang mga bata sa pagsiksik sa 3 Nephi 13:1–4, 5–8, o 16–18 ug ipalista ang mga maayong buhat nga gihisgutan niini nga mga bersikulo (ipasabot nga ang paghatag og “mga limos” mao ang paghatag ngadto sa mga kabus). Nganong misulti man ang Manluluwas nga dili mosunod sa ubang mga tawo nga naghimo niining mga butanga?

• Hatagi ang matag bata og usa ka piraso nga papel nga gisulatan og usa ka matarung nga buhat (o pahunahunaa sila sa ilang kaugalingong mga ehemplo). Hangyoa sila sa paghunahuna og maayong mga rason ug dili maayo nga mga rason sa pagbuhat niadtong mga butanga. Awhaga sila sa pagbuhat kanunay og maayo nga mga butang alang sa husto nga mga rason.

3 Nephi 14:21–27; 15:1

Ang espiritwal nga kaluwasan magagikan sa pagpaminaw ug pagbuhat sa unsay gitudlo sa Manluluwas.

“Ulan” ug “mga baha” moabut kanatong tanan niining kinabuhia, apan makalingkawas kita sa mga pagsulay kon maminaw ug mobuhat kita sa unsay gitudlo ni Jesus.

Posible nga mga Kalihokan

• Isip usa ka klase, basaha ang 3 Nephi 14:21–27 ug 15:1, ug hangyoa ang mga bata sa pagbarug sa matag higayon nga basahon nimo ang pulong “mobuhat.” Ngano nga gihatagan man sa Manluluwas og gibug-aton ang pagbuhat sa Iyang mga pulong, dili lang ang pagpaminaw ug paghinumdom? Dapita ang mga bata sa pagdrowing og hulagway sa mga bersikulo 24–25 ug isulat sa bato ang “Jesus” ug usa ka butang nga gitudlo ni Jesus nga atong buhaton. Dungan nga manganta sa “Ang tawong Maalam ug ang Tawong walay Kaalam” (Songbook sa mga Bata, 132).

• Dapita ang mga bata sa pagbarug, ug hangyoa sila sa paghunahuna nga ang usa nila ka tiil nagrepresentar sa pagpaminaw sa mga pulong sa Manluluwas ug ang pikas nagrepresentar sa pagbuhat niini. Dapita sila sa pagpataas sa “pagbuhat” nga tiil ug magtimbang gamit ang “pagpaminaw” nga tiil. Unsa ang mahitabo kon adunay kusog nga hangin nga mohuros sa lawak? Gamita kini nga ehemplo aron sa pagpakita kon ngano nga mas luwas ang pagbuhat sa unsay gisulti sa Manluluwas ug dili kay maminaw lang sa Iyang mga pulong.

Awhaga ang Pagkat-on diha sa Panimalay

Dapita ang mga bata sa pagpili og usa ka butang nga ilang nakat-unan mahitungod sa mga pagtulun-an ni Jesus sa atong panahon ug sa paghukom kon unsaon nila pagbuhat niini. Sa unsang paagi ang ilang mga binuhatan makatabang kanila nga mahimong kahayag sa ilang mga pamilya ug mga kahigalaan?

Pagpalambo sa Atong Pagtudlo

Ipahiangay ang mga kalihokan aron matubag ang mga panginahanglan. Ayaw og hunahunaa kini nga mga outline isip mga instruksyon nga kinahanglan gayud nimong sundon. Hinoon, gamita kini isip tinubdan sa mga ideya aron sa pagdasig sa imong kaugalingong inspirasyon samtang mamalandong ka sa mga panginahanglan sa mga bata nga imong gitudloan. Sa ubang mga sitwasyon, tingali madasig ka sa pagpahiangay sa usa ka kalihokan alang sa mas gagmayng mga bata aron sa pagtudlo sa mas dagkong mga bata, o mahimo usab nga imo kining balibalihon.