Minerva Teichert (1888–1976), Moroni: The Last Nephite, 1949–1951, lana diha sa masonite, 34¾ x 47 ka pulgada. Brigham Young University Museum of Art, 1969

Disyembre 7–13

Moroni 7–9

“Unta nga si Kristo Mobayaw Kanimo”

Ang mainampoon nga pagtuon sa Moroni 7–9 modapit sa impluwensya sa Espiritu Santo. Siya motabang kanimo nga makasabut sa mga panginahanglan sa mga bata sa imong klase.

Irekord ang Imong mga Impresyon

Dapita ang Pagpaambit

Pahinumdumi ang mga bata mahitungod sa usa ka butang nga imong gidapit nga ilang buhaton atol sa leksyon sa miaging semana o usa ka butang nga tingali ilang nakat-onan uban sa ilang mga pamilya niining semanaha. Hangyoa sila sa pagpakigbahin unsa ang ilang nakat-unan.

Itudlo ang Doktrina: Mas Gagmay nga mga Bata

Moroni 7:33

Kon ako adunay hugot nga pagtuo, mahimo nako ang bisan unsa nga gikinahanglang ipabuhat sa Dios kanako.

Ang mga bata kinsa adunay hugot nga pagtuo ni Jesukristo ug pagsalig sa Iyang gahum makahimo og mahinungdanong mga butang sa panahon nga sila nangalagad Kaniya.

Posible nga mga Kalihokan

• Basaha ang Moroni 7:33, ug dapita ang mga bata sa pagtindog kon makadungog sila sa mga pulong nga “hugot nga pagtuo.” Ipasabut nga atong mapakita ang atong hugot nga pagtuo kang Jesukristo kon magsunod kita sa Iyang mga sugo. Tabangi ang mga bata sa paghimo og lista diha sa pisara sa pipila ka mga butang nga gusto ni Jesus nga ilang buhaton, sama sa pagsunod sa ilang mga ginikanan o sa pagsulti sa kamatuoran. Ipamatuod nga ang atong hugot nga pagtuo ni Jesukristo makatabang kanato sa pagsunod sa mga sugo.

• Ipakita ang pipila ka mga litrato nga naghulagway sa usa ka tawo gikan sa Basahon ni Mormon (o sa ubang mga basahon sa kasulatan) nga nagtuman og usa ka butang tungod kay siya adunay hugot nga pagtuo ni Jesukristo (tan-awa, sama pananglit sa, Libro sa mga Hulagway sa Ebanghelyo, nu. 19, 70, 78, 81). Tabangi ang mga bata sa pagsulti sa istorya nga gihulagway diha sa litrato. Sultihi sila nga tungod kay kining mga tawhana adunay hugot nga pagtuo ni Jesukristo, sila gihatagan og gahum sa pagbuhat unsa ang Iyang gikinahanglan nga ipabuhat nila.

Moroni 7:41

Ang pagtuo kang Jesukristo makahatag kanako og paglaum.

Adunay daghang mga tawo sa kalibutan kinsa mibati nga wala na silay paglaum. Unsaon nimo pagtabang sa mga bata nga imong gitudloan nga makakita og paglaum diha ni Jesukristo?

Posible nga mga Kalihokan

• Basaha ug ipasabut ang Moroni 7:41 ngadto sa mga bata, ug hangyoa sila sa pag-isa sa ilang mga kamot kon makadungog sila og usa ka butang nga gisulti ni Mormon nga kinahanglan kita adunay paglaum. Sultihi ang mga bata mahitungod sa paglaum nga imong gibati tungod ni Jesukristo.

• Hangyoa ang mga bata sa paghunahuna og usa ka tawo nga ilang nailhan kinsa nagkalisud sa usa ka butang. Dapita ang mga bata sa pagdrowing og usa ka hulagway sa tawo nga makapahinumdom kaniya sa pagbaton og palaum ni Jesukristo.

Moroni 7:47

“Ang gugma nga putli mao ang tiunay nga gugma ni Kristo.”

Unsang mga kasinatian sa imong kinabuhi nga mahimong makatabang sa mga bata nga makat-on nga magmabination sa uban ug sa pagtagad kanila uban sa gugma?

Posible nga mga Kalihokan

• Hangyoa ang mga bata sa pagsubli niini nga hugpong sa mga pulong dungan nimo: “Ang gugma nga putli mao ang tiunay nga gugma ni Kristo” (Moroni 7:47). Tabangi ang mga bata sa paghunahuna og mga paagi nga gipakita ni Jesukristo ang gugma ngadto sa uban (tingali makatabang ang mga hulagway, sama sa Libro sa mga Hulagway sa Ebanghelyo, nu. 55, 83, 84). Sa unsang paagi Siya nagpakita og gugma ngari kanato? Kinsa ang atong pakitaan og gugma sama sa gibuhat ni Jesus?

• Dapita ang mga bata sa pagdrowing og mga hulagway sa ilang kaugalingon nga nagpakita og gugma ngadto sa usa ka tawo. Isugyot nga ilang ibutang ang ilang hulagway sa dapit diin kini makapahinumdom kanila sa paghigugma sa uban sama sa gibuhat ni Jesus.

Itudlo ang Doktrina: Mas Dagko nga mga Bata

Moroni 7:21–22, 25, 33

Mapanalanginan ko kon aduna akoy hugot nga pagtuo ni Jesukristo.

Gusto ni Mormon nga masayud ang mga tawo nga ang mga milagro wala mohunong sa dihang natapos ang yutan-ong pangalagad sa Manluluwas. Hangtud aduna kitay hugot nga pagtuo ni Jesukristo, makahimo kita, uban sa Iyang tabang, sa pagbuhat sa bisan unsa nga gikinahanglan Niya nga ipabuhat kanato—lakip na sa mga milagroso nga mga butang.

Posible nga mga Kalihokan

• Tabangi ang mga bata sa paglista diha sa pisara sa pipila ka “maayo nga [mga] butang” nga atong nadawat pinaagi sa ebanghelyo ni Jesukristo, sama sa pag-angkon og mahangturong mga pamilya, pagbalik ngadto sa Langitnong Amahan, ug mapasaylo sa atong mga sala. Dayon dapita ang mga bata sa pagbasa sa Moroni 7:21–22 ug 25, mangita kon sa unsang paagi kita makadawat niining maayong mga butang. Sa unsang paagi kita makapakita sa atong hugot nga pagtuo ni Jesukristo ug sa Iyang mga saad?

• Basaha ang Moroni 7:33 ngadto sa mga bata, ug hangyoa sila sa pagpaminaw alang sa unsa ang atong mahimo kon kita adunay hugot nga pagtuo ni Jesukristo. Kon angay, ipaambit ang imong mga kasinatian sa dihang ang hugot nga pagtuo nakatabang kanimo sa pagbuhat unsa ang gusto sa Dios nga buhaton nimo. Tabangi ang mga bata sa paghunahuna ug sa pagpaambit og mga ehemplo gikan sa ilang mga kinabuhi. Sa unsang paagi ang hugot nga pagtuo diha ni Kristo nakahimo og kausaban niini nga mga ehemplo?

Moroni 7:40–41; 9:25–26

Ako makaangkon og paglaum diha kang Jesukristo, bisan sa panahon sa mga malisud nga mga pagsulay.

Si Mormon ug si Moroni nag-atubang og makapawala sa kadasig nga mga kahimtang, apan nakakita sila og paglaum diha sa Manluluwas nga si Jesukristo. Unsaon nimo pagtabang ang mga bata nga makakita og paglaum diha ni Kristo kon sila mawad-an og kadasig?

Posible nga mga Kalihokan

• Tabangi ang mga bata sa paglista og pipila ka mga problema nga tingali makapahimo sa mga tawo nga mawad-an og kadasig o mawad-an og paglaum. Dapita ang mga bata sa pagbasa sa Moroni 7:40–41 ug 9:25–26, mangita sa usa ka butang nga tingali makatabang sa usa ka tawo nga nawad-an og kadasig. Sultihi sila giunsa ni Jesukristo ug sa Iyang ebanghelyo pagtabang nimo atol sa malisud nga mga panahon.

• Dapita ang mga bata sa pagsulat og usa ka mensahe ngadto sa usa ka tawo kinsa mibati nga nawad-an og paglaum aron tabangan siya nga makakita og paglaum diha ni Kristo, sama sa gibuhat ni Mormon alang sa iyang anak diha sa Moroni 9:25–26. Awhaga ang mga bata sa paggamit sa mga pulong ug hugpong sa mga pulong gikan niini nga mga bersikulo diha sa ilang mga mensahe.

• Pun-a sa tubig ang usa ka sihag nga sudlanan, ug hulgi kini og duha ka mga butang—usa nga molutaw ug usa nga mounlod. Ikompara ang naglutaw nga butang ngadto sa tawo nga adunay paglaum diha ni Kristo. Dungan nga magbasa sa Moroni 9:25. Sa unsang paagi si Kristo “mobayaw [kanato]” kon mag-atubang kita og malisud nga mga pagsulay? Tabangi ang mga bata sa paghunahuna og mga paagi nga sila makahupot sa Manluluwas ug sa Iyang makapadasig nga mga pagtulun-an “sa [ilang] hunahuna sa kahangturan.”

Moroni 7:45–48

“Ang gugma nga putli mao ang tiunay nga gugma ni Kristo.”

Ang pag-ugmad sa gasa sa gugma nga putli usa ka tumong nga magpadayon sa tibuok kinabuhi. Unsaon nimo pagdasig ang mga bata nga magtinguha sa gugma nga putli ni Kristo?

Posible nga mga Kalihokan

• Dapita ang mga bata sa pagpaambit kon unsay ilang pagsabut sa mga pulong “gugma nga putli”. Dayon dapita ang usa sa mga bata sa pagbasa sa Moroni 7:45. (Kon ang pipila ka mga pulong niini nga bersikulo malisud sabton, tabangi ang mga bata sa pagpangita niini sa diksyonaryo.) Hangyoa ang mga bata sa paghisgut sa mga tawo nga nailhan nila nga mga maayong ehemplo sa gugma nga putli. Nganong ang gugma nga putli gitawag man nga “ang gugma nga putli ni Kristo”? (Moroni 7:47). Unsa ang gitudlo sa bersikulo 48 kanato mahitungod kon unsaon nga mapuno kita sa gugma nga putli? Awhaga ang matag bata sa pag-ampo alang sa gugma nga putli niining semanaha ug sa pagpangita og mga paagi nga makapakita og gugma nga putli ngadto sa uban.

• Tabangi ang mga bata sa paghunahuna og mga paagi nga gipakita ni Jesus ang gugma nga putli (tan-awa, sama pananglit sa, Lucas 23:34; Juan 8:1–11; Ether 12:33–34). Unsaon nato pagsunod sa Iyang ehemplo?

• Hangyoa ang mga bata sa pagsulat og mga ngalan sa mga tawo nga kaila nila diha sa mga piraso nga papel ug ibutang kini sa usa ka gamay nga bag o sudlanan. Dapita sila sa pagdala sa ilang sudlanan ngadto sa ilang balay, magpili og usa ka ngalan gikan niini kada adlaw, ug magbuhat og usa ka butang nga makapakita og gugma alang niana nga tawo. Sa umaabut nga leskyon, dapita sila sa pagpaambit sa ilang mga kasinatian sa pagserbisyo niini nga mga tawo.

Awhaga ang Pagkat-on diha sa Panimalay

Awhaga ang mga bata sa paghunahuna og usa ka tawo nga tingali nagtinguha og mas dakong pagtuo o paglaum diha ni Jesukristo. Dapita ang mga bata sa pagpaambit niana nga tawo og usa ka butang nga ilang nakat-unan sa klase karong adlawa.

Pagpalambo sa Atong Pagtudlo

I-awhag ang balaang pagtahud. Usa ka importante nga aspeto sa balaang pagtahud mao ang paghunahuna sa Langitnong Amahan ug ni Jesukristo. Mahimo nimong pahinumduman ang mga bata nga magbaton og balaang pagtahud pinaagi sa hinay nga pagkanta o paglaylay og usa ka awit o sa pagpakita og hulagway ni Jesus.