li loq’laj k’iche’

Loq’laj K’iche’, xb’aan laj Greg K. Olsen

4–10 enero

Jose Smith—Resilal 1:1–26

“Kiwil jun xaqal li saqen”

Naq yooqat chixtzolb’aleb’ li loq’laj hu, k’oxlaheb’ li kok’al nakatzoleb’. Rik’ineb’ li na’leb’ taak’ul, li Santil Musiq’ej naru nakatxmusiq’a chixnawb’al k’a’ru taak’ut sa’ li tzoleb’aal.

Tz’iib’a li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixwotzb’al k’a’ru neke’xnaw chirix laj Jose Smith ut chirix li tijok kixb’aanu sa’ li loq’laj k’iche’ (naru nakak’ut junaq xjalam-uuch li Xb’een K’utb’esink). Patz’ reheb’ k’a’ru neke’reek’a naq neke’rab’i naq li qaChoxahil Yuwa’ ut li Jesukristo ke’rula’ani laj Jose Smith. Wi ta laj Jose Smith taawulaq sa’ li tzoleb’aal, k’a’ raj ru taqapatz’ re chirix li k’a’ru kixnumsi?

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Jose Smith—Resilal 1:3–20

Laj Jose Smith kikawresiik re taawanq jo’ jun xprofeet li Dios.

Li tzolok chirix lix saajilal laj Jose Smith naru naxtenq’aheb’ li kok’al chixjuntaq’eetankileb’ rib’ rik’in a’an ut chixkawresinkileb’ rib’ re tzolok chirix li k’a’ru kixnumsi. Maare naru nakatenq’aheb’ chirilb’al chan ru kitenq’aak laj Jose xb’aan li k’a’ru kixnumsi chaq naq toj ka’ch’in re wulak jo’ jun xprofeet li Dios.

Kok’ k’anjel naru chi b’aanumank

• Kanab’ jun li ch’ina al chixchapb’al chi kutankil jun xjalam-uuch laj Jose Smith (chi’ilmanq Hu reheb’ li Jalam-uuch re li Evangelio, 87) naq yooqat chixwotzb’al junjunq na’leb’ chirix laj Jose li neke’tawman sa’ Jose Smith—Resilal 1:3–14 (chi’ilmanq ajwi’ “Ch’ol 1: Laj Jose Smith ut lix junkab’al,” Eb’ li Esilal sa’ li Tzol’leb’ ut Sumwank,” 6–8, malaj li video sa’ ChurchofJesusChrist.org). Tenq’aheb’ li kok’al chixjuntaq’eetankil lix junkab’al ut lix yu’am laj Jose rik’in li reheb’ a’an. Wotz lix nawom aach’ool chirix naq laj Jose kisik’e’ ru xb’aan li Dios ut naq kikawresiik re wulak jo’ jun profeet (chi’ilmanq “Eb’ li xyaab’ kuxej re li k’ojob’ank wi’chik: Lix junkab’al laj Jose Smith,” sa’ Kim, Taaqehin—Choq’ reheb’ li komon ut li junkab’al). Wi na’ajman ru, k’ut chiruheb’ li kok’al naq jun profeet a’an li na’aatinak sa’ xk’ab’a’ li Dios.

• K’e xb’oqb’al jun li saaj winq re li teep re naq taawulaq sa’ li tzoleb’aal, ut taawanq chanchan ta wi’ naq a’an laj Jose Smith. Kawresi junjunqeb’ li patz’om naru neke’roksi li kok’al, li sumenb’ileb’ sa’ Jose Smith—Resilal 1:3–20 (naru nakawotzeb’ li patz’om a’an rik’in li saaj winq chi rub’elaj.) Chirix a’an, kanab’ li saaj winq chixyaab’asinkil junjunq li tz’aqal raatin laj Jose Smith chirix li Xb’een K’utb’esink (qayehaq, Jose Smith—Resilal 1:25).

Jose Smith—Resilal 1:10–17

Lin Choxahil Yuwa’ narab’iheb’ ut naxsumeheb’ lin tij.

Li k’a’ru kixnumsi laj Jose Smith naru naxmusiq’aheb’ li kok’al chi tijok rik’in xpaab’ankil naq te’ab’iiq xb’aan li Dios.

Kok’ k’anjel naru chi b’aanumank

• Wotz rik’ineb’ li kok’al k’a’ruheb’ lix patz’om laj Jose Smith ke’wan (chi’ilmanq Jose Smith—Resilal 1:10). K’a’ru naru naqab’aanu rajlal sut naq neke’wan qapatz’om chirix li Dios? K’ut chiruheb’ jun li Santil Hu ut ch’olob’ chiruheb’ naq, chirix naq laj Jose kiril ru li Santil Hu, kixtzol naq naru “natz’aaman re li Dios” (Santiago 1:5; chi’ilmanq ajwi’ Hu reheb’ li Jalam-uuch re li Evangelio, 89). Ch’olob’ xyaalal naq naru neke’qaye li qapatz’om re li Dios sa’ li tijok.

• Seraq’i junaq aanumsihom b’ar wi’ xaweek’a xsachik aana’leb’, ut xapatz’ aatenq’ankil re li Dios ut xak’ul jun aasumenkil. Tenq’aheb’ li kok’al chixjultikankileb’ hoonal b’ar wi’ naq eb’ lix tij xe’sumeek. Naru ajwi’ taawotz li seraq’ wankeb’ sa’ li puktesinb’il hu re li Iglees b’ar wi’ naxye naq kisumeek xtij jun ch’ina al.

Jose Smith—Resilal 1:17–19

Laj Jose Smith kiril li qaChoxahil Yuwa’ ut li Jesukristo

Naru nakatenq’aheb’ li kok’al chixk’eeb’al xk’ojob’ankil lix nawomeb’ xch’ool chi kaw chirix li Xb’een K’utb’esink re laj Jose Smith. Wotz rik’ineb’ chan ru naq laa’at xataw xnawom aach’ool chirix li aajelil ru na’leb’ a’an.

Kok’ k’anjel naru chi b’aanumank

• K’ut xjalam-uuch li Xb’een K’utb’esink li natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al ut wotz rik’ineb’ aawaatin k’a’ru kik’ulman naq laj Jose kitijok. Kanab’eb’ li kok’al chixyiib’ankileb’ xjalam-uuch li seraq’.

• Kanab’eb’ li kok’al chixb’onb’al li perel re kok’ k’anjel re li xamaan a’in ut oksi a’an re xwotzb’al li seraq’ chirix li Xb’een K’utb’esink (chi’ilmanq ajwi’ “Ch’ol 2: Li Xb’een K’utb’esink re laj Jose Smith,” Eb’ li Esilal sa’ li Tzol’leb’ ut Sumwank, 9–12, malaj li video sa’ ChurchofJesusChrist.org).

• Il ru Jose Smith—Resilal 1:17, ut k’ut chiruheb’ li kok’al li aatin kixye li qaChoxahil Yuwa’ re laj Jose Smith.

reetalil li k‘utuk

Xk’utb’al li tzol’leb’: Kok’al ak ninqeb’

Jose Smith—Resilal 1:10–13

Li Dios naru naxsumeheb’ lin patz’om rik’ineb’ li loq’laj hu.

Laj Jose Smith kimusiq’aak xb’aan jun li raqal kiril ru sa’ li Santil Hu ut xb’aan a’an ki’ux li Xb’een K’utb’esink ut lix k’ojob’ankil wi’chik lix Iglees li Kristo. Tenq’aheb’ li kok’al chirilb’al chan ru naq xtzolb’aleb’ li loq’laj hu naru naxtenq’aheb’ chixtawb’al xsumenkileb’ lix musiq’ejil patz’om.

Kok’ k’anjel naru chi b’aanumank

• K’ut chiruheb’ li kok’al jalan jalanq chi hu (jo’ jun li nimla tasal hu malaj jun li hu re xtib’el wa) ut tenq’aheb’ chixk’oxlankileb’ li patz’om naru neke’xsume li hu a’an. Chirix a’an k’ut chiruheb’ jun loq’laj hu. K’a’ruheb’ li patz’om naru neke’xsume li hu a’in? Naru nakak’e reheb’ jo’ jun eetalil jun patz’om nasumeek sa’eb’ li loq’laj hu. Ilomaq ru sa’ komonil Jose Smith—Resilal 1:10–11 re xsik’b’aleb’ lix patz’om laj Jose Smith ut lix sumenkileb’ kixtaw sa’eb’ li loq’laj hu.

• Tenq’aheb’ li kok’al chixtawb’aleb’ aatin sa’ li raqal 12 li te’xch’olob’ chan ru naq rilb’al ru Santiago 1:5 kik’anjelak choq’ re laj Jose Smith. Wotz junaq aanumsihom rik’ineb’ li loq’laj hu—qayehaq, jun sutaq naq xawileb’ ru ut xataw jun xsumenkil laa patz’om. B’ichahomaq sa’ komonil “Tintzol, tink’oxla, tintijoq” (B’ichleb’aal choq’ reheb’ li Kok’al, 66).

Jose Smith—Resilal 1:10–19

Lin Choxahil Yuwa’ narab’iheb’ ut naxsumeheb’ lin tij.

Li Dios ak naxnaw chaq ru laj Jose Smith, ut naq laj Jose kitijok, ki’ab’iik xb’aan li Dios. Us ta lix numsihomeb’ li kok’al nakatzoleb’ jalan chiru li re laj Jose, naru nakatenq’aheb’ chireek’ankil naq neke’nawe’ ru ut neke’ab’iik xb’aan li Dios naq neke’tijok.

Kok’ k’anjel naru chi b’aanumank

• K’e xb’oqb’al jun reheb’ lix na’ xyuwa’ jun ch’ina al re naq taawanq chirix li tzoleb’aal ut naq tixsume xpatz’omeb’ li kok’al chi jar paay ru, jo’ rik’in xtaqlankil junaq ch’ina esil sa’ celular, jun b’oqok sa’ celular, xtz’iib’ankil junaq ch’ina hu, malaj xtaqlankil junaq aj k’amol esil. B’ar wankeb’ junjunq chan ru naq li qaChoxahil Yuwa’ nokoraatina? (chi’ilmanq “K’utb’esink, k’utb’esinb’il na’leb’,” K’utul Raqal reheb’ li Loq’laj Hu). Jo’ naxye Jose Smith—Resilal 1:16–19, chan ru naq li qaChoxahil Yuwa’ kixsume lix tij laj Jose Smith? Chan ru xsumeheb’ li qatij laa’o?

• B’ichahomaq sa’ komonil “Natijok jun ch’ina al” (B’ichleb’aal choq’ reheb’ li Kok’al, 6–7).

  ch’ina xqa’al natijok

  Li qaChoxahil Yuwa’ narab’iheb’ ut naxsumeheb’ li qatij.

Jose Smith—Resilal 1:14–19, 25

Li qaChoxahil Yuwaʼ ut li Jesukristo keʼxkʼut ribʼ chiru laj Jose Smith.

Chixjunileb’ li kok’al nakatzoleb’ neke’raj ru xnawom xch’ooleb’ chirix lix numsihom laj Jose Smith sa’ li loq’laj k’iche’. Chan ru naru nakatenq’aheb’ chixtawb’al malaj chixkawob’resinkil lix nawom xch’ooleb’?

Kok’ k’anjel naru chi b’aanumank

• Re rilb’al wi’chik ru li seraq’ chirix li Xb’een K’utb’esink, tz’iib’a chi k’osb’ileb’ ru li raqal re Jose Smith—Resilal 1:14–19 chiruheb’ kok’ setb’il hu. K’eheb’ li kok’ setb’il hu sa’ jun li sek’ ut kanab’eb’ li kok’al chirisinkileb’ chi junjunq ut chixk’eeb’aleb’ sa’ li pizarron chi tustuukeb’ ru.

• Kanab’eb’ li kok’al chixmutz’b’aleb’ li ru ut chixk’oxlankil chan raj ru wank jo’ laj Jose naq yooqat chirilb’al ru junjunq xcha’al Jose Smith—Resilal 1:14–17. Kanab’eb’ chixwotzb’al lix k’oxlahomeb’ ut reek’ahomeb’ chirix lix numsihom laj Jose.

• K’ut li video “Pide a Dios: La Primera Visión de José Smith” (ChurchofJesusChrist.org) ut kanab’eb’ li kok’al chixwotzb’al k’a’ruhaq xe’xtzol chirix lix k’utb’esinb’il matk’ laj Jose rik’in li qaChoxahil Yuwa’ ut li Jesukristo.

• Ilomaq ru sa’ komonil lix ch’olob’ahom laj Jose sa’ Jose Smith—Resilal 1:25. Kanab’eb’ li kok’al chixsik’b’aleb’ aatin malaj ch’ol aatin li neke’xk’utb’esi lix paab’aal laj Jose. Chan ru naru nokowan chi tiik chiru li Dios ut chiru lix nawom qach’ool naq wankeb’ chik kristiaan ink’a’ neke’xk’ulub’a a’an?

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixwotzb’al rik’in anihaq li seraq’ re li Xb’een K’utb’esink re laj Jose Smith—wi naru, rik’in anihaq maajun wa rab’ihom chaq. Li perel re kok’ k’anjel re li xamaan a’in naru naxtenq’aheb’ chixwotzb’al li seraq’.

Xchaab’ilob’resinkil li qak’utum

Waklesiheb’ xch’ool chi oxloq’ink. Re xjultikankil reheb’ li kok’al naq tento te’oxloq’inq, naru nakab’icha malaj nakatz’uyuyi jun li b’ich, nakak’ut junaq xjalam-uuch li Jesus, malaj ut, naru nakawoksi junaq eetalil rik’in li uq’ej li te’xnaw ru a’an.

perel re kok’ k’anjel: laj Jose Smith kiril li qaChoxahil Yuwa’ ut li Jesukristo