laj Moroni naxk’ut rib’ chiru laj Jose Smith

A’an kinixb’oq rik’in ink’ab’a’, xb’aan laj Michael Malm

11–17 enero

Tzol’leb’ ut Sumwank 2; Jose Smith—Resilal 1:27–65

“Lix ch’ooleb’ li alal k’ajolb’ej te’sutq’iiq rik’ineb’ lix yuwa’ ”

Re xtikib’ankil lix kawresinkil aawib’, il ru Tzol’leb’ ut Sumwank 2 ut Jose Smith—Resilal 1:27–65. Li na’leb’ sa’ li tusleb’ aatin a’in naru tate’xtenq’a chixk’utb’aleb’ li yaalil na’leb’ neke’tawman sa’eb’ li raqal a’in.

Tz’iib’a li nakak’oxla

reetalil li wotzok

Xkanab’ankileb’ chi wotzok

Naru nakatikib’ li tzolok rik’in xkanab’ankileb’ li kok’al chixwotzb’al k’a’ru neke’xnaw chirix li rula’anihom li anjel Moroni rik’in laj Jose Smith.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Jose Smith—Resilal 1:27–54

Li qaChoxahil Yuwa’ kixb’oq laj Jose Smith re naq tixtenq’a chixb’aanunkil lix k’anjel.

Lix b’antioxihomeb’ li kok’al choq’ re li profeet aj Jose Smith naru naniman naq yooqeb’ chi tzolok chirix li k’anjel kib’oqe’ xb’aan li Dios chixb’aanunkil.

Kok’ k’anjel naru chi b’aanumank

• K’ut jun xjalam-uuch laj Moroni naq kirula’ani laj Jose Smith (chi’ilmanq Hu reheb’ li Jalam-uuch re li Evangelio, 91). Kanab’eb’ li kok’al chixyeeb’al aawe k’a’ru neke’ril sa’ li jalam-uuch. Ye chi k’osb’il ru li seraq’ chirix li rula’anihom laj Moroni rik’in laj Jose. Wi na’ajman ru, il sa’ Jose Smith—Resilal 1:27–54 ut “Ch’ol 3: Li anjel Moroni ut eb’ li perel ch’iich oor” (Eb’ li Esilal sa’ li Tzol’leb’ ut Sumwank, 13–17). Kanab’eb’ li kok’al chixk’oxlankil naq a’aneb’ laj Jose Smith sa’ jalan jalanq xcha’alil li seraq’, re naq te’xq’alu li ruq’eb’ chanchan naq yookeb’ chi tijok, te’b’eeq chanchan naq yookeb’ chi taqe’k sa’ li tzuul Kumorah, ut chi jo’kan.

• Il ru Jose Smith—Resilal 1:33 chi kaw ut kanab’eb’ li kok’al chi xaqliik naq te’rab’i li ch’ol aatin “li Dios wan jun li k’anjel tixk’e chinb’aanu.” K’a’ru kiraj li Dios naq laj Jose tixb’aanu? K’a’ru naxpatz’ qe a’an naq taqab’aanu? Kanab’eb’ li kok’al chixyiib’ankileb’ xjalam-uuch li k’a’ru naraj li Dios naq te’xb’aanu, jo’ li tijok, k’anjelak chiruheb’ ras riitz’in, malaj rilb’aleb’ ru li loq’laj hu.

Tzolʼlebʼ ut Sumwank 2

Laj Elias li profeet kixk’e xwankil laj Jose Smith re xtz’apb’aleb’ sa’ junajil li junkab’al.

Li tzolok chirix li wankilal re tz’apok sa’ junajil li kik’ojob’aak wi’chik rik’in laj Jose Smith naru naxtenq’aheb’ li kok’al chixraab’al li osob’tesiik re wank sa’ junkab’al chi junelik.

Kok’ k’anjel naru chi b’aanumank

• Tenq’aheb’ li kok’al chixyeeb’al xk’ab’a’ laj “Elias li profeet” wiib’ oxib’ sutaq. Kanab’eb’ chirab’inkil lix k’ab’a’ naq yooqat chirilb’al ru Tzol’leb’ ut Sumwank 2:1. Ch’olob’ naq a’aneb’ li aatin kixye laj Moroni re laj Jose Smith ut naq neke’xk’ut naq laj Elias li profeet taachalq chixk’ojob’ankil wi’chik lix wankilal li tijonelil. Chirix chik a’an, laj Elias li profeet kixk’utb’esi rib’ chiru laj Jose sa’ li Santil Ochoch re Kirtland ut kixk’e re a’an li wankilal re xtz’apb’aleb’ li junkab’al sa’ junajil.

• Kanab’eb’ li kok’al chixyeeb’al aawe k’a’ru nawulak chiruheb’ chirix lix junkab’aleb’. K’ut xjalam-uuch jun junkab’al sa’ li santil ochoch—laa junkab’al laa’at wi naru (malaj chi’ilmanq Hu reheb’ li Jalam-uuch re li Evangelio, 120). Ch’olob’ xyaalal naq li qaChoxahil Yuwa’ naraj naq eb’ li junkab’al te’wanq sa’ junajil chi junelik, ut a’an jun reheb’ xyaalal naq naxk’eheb’ chaq qe li santil ochoch.

• B’ichahomaq sa’ komonil “Taaruuq toowanq aran saʼ choxa” (B’ichleb’aal choq’ reheb’ li Kok’al, 98). K’a’ru naxye li b’ich a’in li naru naqab’aanu re toowanq rik’in li qajunkab’al chi junelik?

Tzolʼlebʼ ut Sumwank 2

Li tzolok chirixeb’ lin xe’ intoon naru naxk’e xsahil inch’ool.

Eb’ li kok’al toj ka’ch’ineb’ xyu’am naru ajwi’ neke’raj xnawb’al chirix li resilal li junkab’al ut naru neke’reek’a li sahil ch’oolejil naxk’e.

Kok’ k’anjel naru chi b’aanumank

• K’e xb’oqb’al jun reheb’ li xna’ xyuwa’ jun li ch’ina al re taawulaq sa’ li tzoleb’aal ut tixwotz jun seraq’ chirix jun reheb’ lix xe’ xtoon (ut chixk’utaq jun xjalam-uuch wi wan). Aatinan chirix li sahil ch’oolejil nakaweek’a naq nakasik’ esil chirix li resilal laa junkab’al.

• K’e reheb’ li junjunq chi kok’al jun aamej setb’il chiru hu. Tenq’aheb’ chixtz’iib’ankil lix k’ab’a’eb’ ut “Ninyeechi’i xjultikankileb’ lin xe’ intoon” chiru a’an. Il ru Tzol’leb’ ut Sumwank 2:2 ut ch’olob’ naq laj Elias li profeet kik’ulun chixsutq’isinkil li qaam rik’ineb’ li qaxe’ qatoon.

reetalil li k‘utuk

Xk’utb’al li tzol’leb’: Kok’al ak ninqeb’

Jose Smith—Resilal 1:28–29

Naru nintijok re tink’ul xk’uyb’al inmaak.

Eb’ li kok’al nakatzoleb’ wan naq te’reek’a naq “wan tojb’a-maak sa’ xb’eeneb’ xb’aan lix q’unal xmetz’eweb’ ut lix majelaleb’ ” (Jose Smith—Resilal 1:29) jo’ kireek’a laj Jose. Tenq’aheb’ chixtawb’al ru naq naru neke’xsik’ li qaChoxahil Yuwa’ re xpatz’b’al xkuyb’aleb’ xmaak.

Kok’ k’anjel naru chi b’aanumank

• Il ru rik’ineb’ li kok’al Jose Smith—Resilal 1:29. K’a’ru kireek’a laj Jose Smith chirixeb’ lix majelal? K’a’ru kixb’aanu rik’in a’an? K’a’ru naru naqatzol rik’in lix b’aanuhom laj Jose li tooxtenq’a naq nawan qamajelal? Patz’ reheb’ li kok’al k’a’ru neke’reek’a rik’in xnawb’al naq laj Jose kib’oqe’ xb’aan li Dios us ta moko tz’aqal ta re ru.

• K’a’ut naq aajel ru xk’oxlankil “chan ru naq wanko chiru li Dios”? (Jose Smith—Resilal 1:29). Ye reheb’ li kok’al k’a’ru nakab’aanu laa’at rajlal sut naq nakapatz’ aawib’ chirix chan ru naq wankat chiru li Dios.

Jose Smith—Resilal 1:30–54

Laj Jose Smith kib’oqe’ xb’aan li Dios re xb’aanunkil jun k’anjel aajel ru.

Li xtzolb’al li esil kixk’e laj Moroni re laj Jose Smith naru naxtenq’aheb’ li kok’al chixkawob’resinkil lix nawom xch’ooleb’ chirix lix loq’laj b’oqb’il k’anjel laj Jose.

Kok’ k’anjel naru chi b’aanumank

• Kanab’eb’ li kok’al chixk’utb’esinkil malaj chixyiib’ankileb’ xjalam-uuch li k’a’ru kik’ulman jo’ yeeb’il sa’ Jose Smith—Resilal 1:30–54, jo’ naq laj Moroni kixk’utb’esi rib’ chiru laj Jose (eb’ li raqal 30–47), naq laj Jose ki’aatinak rik’in lix yuwa’ (eb’ li raqal 48–50), ut naq laj Jose kixtaweb’ li perel ch’iich (eb’ li raqal 51–54). K’a’ru naqatzol sa’ li seraq’ a’in chirix li k’anjel kib’oqe’ chixb’aanunkil laj Jose?

• Il ru rik’ineb’ li kok’al Jose Smith—Resilal 1:33–35 ut kanab’eb’ chirab’inkil li kiraj laj Moroni naq tixnaw laj Jose chirix li k’anjel kib’oqe’ chixb’aanunkil. Chan ru naq noko’osob’tesiik sa’ xk’ab’a’ naq laj Jose Smith kixb’aanu li k’anjel re xjaltesinkil ru lix Hu laj Mormon? K’e xb’oqb’aleb’ li kok’al chirilb’al ru lix Hu laj Mormon chi kok’ aj xsa’.

Tzolʼlebʼ ut Sumwank 2

Li qaChoxahil Yuwa’ naraj naq eb’ li junkab’al te’tz’ape’q sa’ junajil sa’ li santil ochoch.

Laj Moroni kixye re laj Jose Smith naq laj Elias li profeet taachalq “chixk’utb’esinkil … li Tijonelil” (raqal 1). A’an li wankilal re li tijonelil re tz’apok sa’ junajil li najunajink reheb’ li junkab’al chi junelik q’e kutan, ut rik’in a’an naru naqak’ul li k’ojob’anb’il k’anjel choq’ reheb’ li qaxe’ qatoon sa’ li santil ochoch.

Kok’ k’anjel naru chi b’aanumank

• Kanab’eb’ li kok’al chirilb’al ru li profeetil aatin li natawman sa’ Tzol’leb’ ut Sumwank 2:1. Kanab’eb’ chixsik’b’al ani tixtaqla chaq li Qaawa’ sa’ roso’jikeb’ li kutan ut k’a’ru tixk’utb’esi li kristiaan a’an. K’ut jun xjalam-uuch laj Elias li profeet sa’ li Santil Ochoch re Kirtland (chi’ilmanq Hu reheb’ li Jalam-uuch re li Evangelio, 95) ut ch’olob’ chan ru naq kitz’aqlok ru li profeetil aatin a’an 13 chihab’ chik chirix li rula’anihom laj Moroni (ch’ilmanq Tzol’leb’ ut Sumwank 110:13–15).

• Ch’olob’ naq laj Elias li profeet kixk’ojob’ wi’chik lix laawil li tijonelil li neke’tz’ape’ wi’ li junkab’al sa’ junajil chi junelik q’e kutan. K’uteb’ k’a’aq re ru li naru naxtenq’aheb’ li kok’al chixtawb’al ru k’a’ru naraj naxye xtz’apb’al sa’ junajil k’a’ruhaq, jo’ jun li laat malaj jun li b’oolx wan xtz’apb’al. Chan ru naq eb’ li k’a’aq re ru a’an naru nokohe’xtenq’a chixtawb’al ru k’a’ru naraj naxye naq jun junkab’al natz’ape’ sa’ junajil?

• K’ut jun xjalam-uuch jun santil ochoch ut tenq’aheb’ li kok’al chixyeeb’al xk’ab’a’ junjunqeb’ li k’a’a’q re ru neke’qab’aanu sa’eb’ li santil ochoch. Ch’olob’ naq li kub’iha’ jo’ ruuchileb’ li kamenaq, li junelik sumlaak, ut li tz’ape’k sa’ junajil jo’ junkab’al sa’ li santil ochoch neke’b’aanuman sa’ xk’ab’a’ lix laawil li tijonelil kixk’ojob’ wi’chik laj Elias li profeet.

• K’e xb’oqb’al junaq li saaj ixq malaj jun saaj winq re li teep re naq tixwotz jun xnumsihom b’ar wi’ kixtaw xk’ab’a’ junaq xxe’ xtoon ut kikub’e xha’ jo’ ruuchil a’an sa’ li santil ochoch.

  Santil Ochoch re Palmyra Nueva York

  Eb’ li junkab’al neke’tz’ape’ sa’ junajil sa’ li santil ochoch xb’aan li wankilal kik’ojob’aak wi’chik xb’aan laj Elias li profeet.

reetalil li tzolok

Xb’oqb’aleb’ chi tzolok sa’ kab’l

Waklesi xch’ooleb’ li kok’al chixpatz’b’al reheb’ li xna’ xyuwa’ naq te’xwotz jun seraq’ reheb’ chirix jun reheb’ lix xe’ xtooneb’ malaj te’xtenq’a chixkawresinkil jun xtib’el wa jwal nawulak chiruheb’ lix xe’ xtooneb’ ut te’xwa’ sa’ komonil.

Xchaab’ilob’resinkil li qak’utum

Tenq’aheb’ li kok’al toj ka’ch’ineb’ xyu’am chi tzolok sa’eb’ li loq’laj hu. Re xtenq’ankileb’ li kok’al toj ka’ch’ineb’ xyu’am chi tzolok sa’eb’ li loq’laj hu, k’e aach’ool chixch’olob’ankil jun ajwi’ li raqal malaj jun ajwi’ li ch’ol aatin aajel ru. Naru nakakanab’eb’ li kok’al chi xaqliik malaj chixtaqsinkil li ruq’ naq te’rab’i li aatin a’an malaj li ch’ol aatin. (Chi’ilmanq Li k’utuk jo’ li Kolonel, 21).

perel re kok’ k’anjel: naru ninb’aanu li resilal lin junkab’al