Harvest Time in France, mai vei James Taylor Harwood

18–24 ni Janueri

Vunau kei na Veiyalayalati 3–5

“Na Noqu Cakacaka Ena Vakayacori Ga”

Ni ko vulica na Vunau kei na Veiyalayalati 3–5, o na rawa ni ciqoma na veivakauqeti ena ka e gadrevi me ra kila na gone o vakavulica. Na itaviqaravi eso ena ituvatuva oqo sa rawa ni soli vakasama talega vei iko.

Vola na Veika o Vakauqeti Kina

Sureta na Veiwasei

Vakaraitaka na iyaloyalo kei Josefa Simici ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, ka vukei ira na gone me ra wasea na ka era kila ena italanoa e umani kina. Vukei ira me ra vakananuma na italanoa ni nona vakayalia o Martin Harris na imatai ni vica na draunipepa ni ivakadewa ni iVola i Momani (raica na “Wase 4: Matini Erisi kei na Draunipepa ka Yali,” Na iTukutuku ena Vunau kei na Veiyalayalati, 18–21; se na Saints, 1:51–56).

Vakavulica na iVunau: Gone Sobu

Vunau kei na Veiyalayalati 3:7–10

Au rawa ni digitaka na dodonu ni ra saga na tani meu caka cala.

Vukei ira na gone me ra vulica na na ka a vulica o Josefa Simici: ke ra vakararavi vua na Tamada Vakalomalagi, o Koya ena “tiko kei [ira] ena veigauna kecega ni [nodra] leqa” (Vunau kei na Veiyalayalati 3:8).

iTaviqaravi e Rawa ni Caka

• Railesuva na italanoa kei Martin Harris kei na draunipepa volai e a yali (raica na iTalanoa ni Vunau kei na Veiyalayalati, 18–21, se na kena vidio ena ChurchofJesusChrist.org). Wasea vata kei ira na gone na ituvaki eso era na rawa ni temaki kina me ra cakava e dua na ka era kila ni sega ni dodonu. E rawa vakacava ni vukei keda na Tamada Vakalomalagi me da digitaka na dodonu? (raica na Vunau kei na Veiyalayalati 3:8).

  

  Martin Harris, mai vei Lewis A. Ramsey

• Wilika na veivosa oqo mai na Vunau kei na Veiyalayalati 3:8: “Ke a qai dodoka yani na ligana ka tokoni iko.” Sureti ira na gone mera tucake ka dodoka na ligadra ena gauna o wilika tale kina na malanivosa oya Wasea vata kei ira eso na sala e rawa ni dodoka kina na ligana na Turaga me vukei ira ni ra saga na tani me vakacalai ira. Me ra qai veivukevuke ena dodoki ni ligadra ka me ra qai veiwasei taka na sala tale eso e dodoka kina na ligana na Turaga me vukei keda.

Vunau kei na Veiyalayalati 4

Sa gadrevi au na Turaga meu cakava na Nona cakacaka.

Sa rawa ni ra “vakaitavi ena cakacaka ni Kalou” na gone (Vunau kei na Veiyalayalati 4:2) ena vuqa na sala, ka rawa ni ra vakavakarau oqo ena ikuri ni madigi ki na nodra veisiga ni mataka.

iTaviqaravi e Rawa ni Caka

• Wilika na Vunau kei na Veiyalayalati 4:1 vei ira na gone. Kauta mai eso na iyaloyalo e vakaraitaka na cakacaka “veivakurabuitaki” ni Kalou ena gauna daidai (vaka na iyaloyalo ni daukaulotu, valetabu, kei na iVola i Momani). Me ra qai veivukevuke na gone ena kena digitaki e dua na iyaloyalo ka me ra veitalanoataka talega. Wasea na vuna e veivakurabuitaki kina vei iko na cakacaka ni Turaga.

• Vukei ira na gone me ra vakasamataka na ivukivuki eso se droinitaka na iyaloyalo e tukuni tiko ena malanivosa “qaravi koya ena yalomudou taucoko, igu, vakasama kei na kaukauwa” (Vunau kei na Veiyalayalati 4:2). Wasea e dua na ivakaraitaki ni tamata o kila ni qarava vakaoqo na Kalou.

• Lagata vata e dua na sere ni cakacaka vakaulotu, vaka na “I Want to Be a Missionary NowChildren’s Songbook,168). Veitalanoataka na ka e vakavulica na sere ena sala eda rawa ni vukea kina na Kalou ena qaravi ni Nona cakacaka.

Vunau kei na Veiyalayalati 5:10

Eda sa ciqoma na vosa ni Kalou mai vei Joseph Smith.

E rawa vakacava mo vukei ira na gone me ra vaqaqacotaka na nodra ivakadinadina ni sa vakatavulica na vosa ni Kalou o Josefa Simici kei na parofita tale eso?

iTaviqaravi e Rawa ni Caka

• Vunitaka na iyaloyalo kei Josefa Simici ena dua na vanua ena rumu (raica na Gospel Art Book, naba 87). Wilika na Vunau kei na Veiyalayalati 5:10, ka sureti ira na gone me ra vakaraica na iyaloyalo me kilai kina o cei e vakaibalebaletaki tiko ena vosa “iko”. Wasea na nomu ivakadinadina ni da sa ciqoma na vosa ni Kalou mai vei Josefa Simici.

• Vakaraitaka vei ira na gone na ilavelave eso ni iVola i Momani kei na Vunau kei na Veiyalayalati. Vakamacalataka ni sa solia vei keda na Kalou na ivolanikalou oqo mai vei Josefa Simici. Wasea eso na nomu tikina talei mai na veivola oqo, ka wasea na vuna o vakavinavinakataki ira kina.

Vakavulica na iVunau: Gone Qase Cake

Vunau kei na Veiyalayalati 3:5–10; 5:21–22

E sa dodonu meu kauwai vakalevu ena kena vakamarautaka na Kalou mai na nodra vakamarautaki na tani.

Ni ra vulica na gone na ka e a sotava o Josefa Simici ena kena yali na draunipepa eso ni vakadewa ni iVola i Momani, sa rawa ni ra vakauqeti me ra yalodina tikoga ena gauna era temaki kina mai vei ira tale eso me ra talaidredre.

iTaviqaravi e Rawa ni Caka

• Ena vica na siga ki liu, sureta e dua na gone me vakavakarau mai ki na kalasi me wasea na italanoa ni nodrau vakayalia o Josefa Simici kei Martin Harris na matai ni vica na draunipepa ni vakadewa ni iVola i Momani (raica na Tukutuku ena Vunau kei na Veiyalayalati, 18–21; se Saints, 1:51–56). Wilika vata na Vunau kei na Veiyalayalati 3:5–8; 5:21–22, ka raica na veivakalougatataki e na basika mai ni da dinata tikoga na Kalou.

• Solia vei ira na gone na gauna me ra vakasamataka na ituvaki ena rairai saga kina e dua na itokani me ra cakava e dua na ka tawadodonu. Sureti ira me ra raica e dua na wase ni vosa ena Vunau kei na Veiyalayalati 3:5–8; 5:21–22 e rawa ni vukei ira ena ituvaki vakaoya. Dramataka eso na ivakaraitaki.

Vunau kei na Veiyalayalati 4

Sa gadrevi au na Turaga meu cakava na Nona cakacaka.

Na Vunau kei na Veiyalayalati 4 e rawa ni vakauqeta na gone me ra tiki ni “cakacaka veivakurabuitaki” ni Turaga (tikina 1).

iTaviqaravi e Rawa ni Caka

• Vola ena papa Qarava na Kalou. Sureti ira na gone me ra vaqaqara ena Vunau kei na Veiyalayalati 4 ka cakava e dua na ituvatuva ni veika era sa vulica me baleta na ibalebale ni qaravi Kalou. Kerea me ra vakuria na ituvatuva ena veika era sa vulica mai na sere “I Will Be Valiant” (Children’s Songbook, 162) se dua tale na sere ni qaravi Kalou.

• Kauta mai na iyaya eso (se iyaloyalo ni iyaya) ena rairai vakayagataka e dua me cakacaka kina ena dua na were. E vukei keda vakacava na veiyaya oqo? Vukei ira na gone me ra raica na veika ena Vunau kei na Veiyalayalati 4:5–6 e rawa ni vakataka na iyaya eso ni qarava na cakacaka ni Kalou.

• Sureti ira na daukaulotu tudei se tabanalevu me ra wasea e dua na ka mai na Vunau kei na Veiyalayalati 4 e sa vakauqeti ira mera cakava na cakacaka ni Kalou. Na cava eda rawa ni cakava me da vukea kina na cakacaka ni Kalou?

Vunau kei na Veiyalayalati 5:1–7, 11, 16, 23–24

Sa rawa niu dua na ivakadinadina ni sa dina na iVola i Momani.

A yalataki vei Martin Harris ni sa rawa vua me dua vei ira na ivakadinadina ni peleti koula kevaka e yalodina. Eda na sega ni raica na peleti me vakataki Martin, ia eda rawa ni ciqoma e dua na ivakadinadina vakayalo ni iVola i Momani. O rawa vakacava ni vukea na gone mera taracake ka wasea na nodra ivakadinadina ni iVola i Momani?

iTaviqaravi e Rawa ni Caka

• Vola na taro eso vakaoqo ena papa, ka vukei ira na gone me ra raica na isau ni taro ena Vunau kei na Veiyalayalati 5:1–3, 7, 11: Na cava e a gadreva o Martin Harris me kila? O cei e rawa ni vakaraitaka kina o Josefa Simici na peleti koula? Cava na vuna ena rairai sega ni rauta kina me rawai e dua na tamata ni sa dina na iVola iMomani ena nona raica walega na peleti?

• Tarogi ira na gone na cava mada na vakadinadina kei na vuna e bibi kina na vakadinadina. Na cava a gadrevi me cakava o Martin Harris me dua kina vei ira na vakadinadina ni peleti koula? (raica na Vunau kei na Veiyalayalati 5:23–24). E dina ga ni da se sega ni raica na peleti, na cava eda rawa ni cakava me da vakadinadina ni iVola i Momani? (raica na Vunau kei na Veiyalayalati 5:16; Moronai 10:3–5).

Vakauqeta na Vuli e Vale

Vakayaloqaqataki ira na gone me ra vola na nodra ivakadinadina me baleta na iVola i Momani ka wasea vua e dua era kila.

Vakatoroicaketaki Noda Veivakavulici

Moica na itaviqaravi eso me okati ira na vakaleqai tu. Na vakamatautaki lailai ni itaviqaravi eso e rawa ni vakadeitaka ni ra sa rawa ni vuli kece mai kina na gone. Dua na kena ivakaraitaki, ke sa vakaturi ena itaviqaravi me vakaraitaki e dua na iyaloyalo, sa rawa ni o lagata e dua na sere me sosomitaka me okati ira na gone e vakaleqai tu na nodra rai.