Reetalil li hu tz’iib’anb’il chi uq’ej re lix Hu laj Mormon.

1–7 febrero

Tzol’leb’ ut Sumwank 10–11

“Re taaruuq tat-elq jo’ aj q’axonel-u”

Il ru rik’in tijok Tzol’leb’ ut Sumwank 10–11, ut tz’il rix chan ru naru nakatenq’aheb’ li kok’al chixtawb’al ruheb’ li yaal neke’tawman sa’eb’ li tasal a’an. Li na’leb’ wan sa’ li tusleb’ aatin a’in—reheb’ li kok’al toj ka’ch’ineb’ xyu’am jo’ ajwi’ reheb’ li kok’al ak ninqeb’— naru nakate’xtenq’a.

Tz’iib’a li nakak’oxla

Xkanab’ankileb’ chi wotzok

Kanab’eb’ li kok’al chixwotzb’al li najultiko’ reheb’ chirix li tzolok xnume’ chirix laj Martin Harris ut eb’ li perel sachenaqeb’ re xjaltesinkil ru lix Hu laj Mormon. Wotz k’a’ruhaq li ink’a’ najultiko’ reheb’ a’an. Naru nakawil ru li “Ch’ol 4: Laj Martin Harris ut eb’ li perel sachenaqeb’ ” (Eb’ li Esilal sa’ li Tzol’leb’ ut Sumwank, 18–21).

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 10:5

Wi nintijok junelik, lin Choxahil Yuwa’ tinrosob’tesi.

Wan naq eb’ li kok’al te’xk’oxla naq ka’ajwi’ naru neke’tijok sa’ jun ajwi’ hoonal ut na’ajej, ut ka’ajwi’ naq neke’xwiq’ib’ rib’ malaj ka’ajwi’ naq neke’xmutz’ li ru. Chan ru naru nakatenq’aheb’ chixtzolb’al chan ru na’ux li “tijok junelik”?

Kok’ k’anjel naru chi b’aanumank

• K’uteb’ xjalam-uuch k’a’aq re ru neke’qab’aanu junelik, jo’ li wa’ak, li wark, malaj li b’atz’unk. Chan ru naq nokohe’xtenq’a li k’a’aq re ru a’in? K’ut xjalam-uuch jun ch’ina al yoo chi tijok naq yooqat chirilb’al ru choq’ reheb’ li kok’al li aatin “chattijoq junelik” sa’ Tzol’leb’ ut Sumwank 10:5 Kanab’eb’ li kok’al chixka’sutinkileb’ li aatin a’an naab’al sut. Chan ru nokoxtenq’a li tijok junelik?

• Oksi li perel re kok’ k’anjel re li xamaan a’in re xtenq’ankileb’ li kok’al chixk’oxlankileb’ k’iila na’ajej ut hoonal b’ar wi’ naru na’uxman li tijok.

• Kanab’eb’ li kok’al chiyiib’ankileb’ xjalam-uucheb’ a’an malaj lix junkab’aleb’ naq yookeb’ chi tijok sa’ jalan jalanq hoonal ut na’ajej, jo’ sa’ li iglees, rub’elaj xik sa’ li eskweel, malaj sa’ xhoonalil li wark. Ch’olob’ naq li tijok junelik naru natawman ru jo’ li tijok chi kok’ aj xsa’ chiru chixjunil li kutan. Chan ru naru nokotijok naq wanko rik’ineb’ jalaneb’ chik kristiaan, jo’ sa’ li eskweel malaj rik’ineb’ li qamiiw?

  

  Li Qaawa’ tooxtenq’a wi nokotijok.

Tzolʼlebʼ ut Sumwank 11:12–13

Li Santil Musiq’ej nikinixk’am chixb’aanunkil li us.

Us ta toj kok’eb’, eb’ li kok’al naru neke’xtikib’ xk’eeb’al reetal jo’q’e neke’aatinaak xb’aan li Musiq’ej.

Kok’ k’anjel naru chi b’aanumank

• Muq jun li pook, ut jun xjalam-uuch xnaq’ uhej sa xch’ool sa’ junaq na’ajej re li tzoleb’aal. Kanab’eb’ li kok’al chixtawb’aleb’. Il ru Tzol’leb’ ut Sumwank 11:13 ut tenq’aheb’ li kok’al chixk’eeb’aleb’ reetal li aatin wankeb’ rilom rik’ineb’ li k’a’aq re ru xe’xtaw. K’a’ru neke’xk’ut chiqu li aatin a’an chirix chan ru naq li Musiq’ej nokoxtenq’a?

• K’e reheb’ li kok’al naab’al paay ru hoonal b’ar wi’ naq ki’ajman ru naq te’xsik’ ru li us malaj li ink’a’ us— jo’ xsik’b’al ru xyeeb’al li yaal malaj tik’ti’ik, malaj xsik’b’al ru wank rik’in rahok malaj sa’ josq’il. Chan ru naru naqanaw k’a’ru li us? Ilomaq ru sa’ komonil Tzol’leb’ ut Sumwank 11:12 ut ch’olob’ xyaalal naq li Santil Musiq’ej tooxtenq’a chixsik’b’al ru li k’a’ru us wi naqab’i.

• B’ichahomaq jun li b’ich na’aatinak chirix lix b’eresihom li Santil Musiq’ej, jo’ “Ab’i, ab’i” (B’ichleb’aal choq’ reheb’ li Kok’al, 142). Patz’ reheb’ li kok’al k’a’ru naxk’ut li b’ich chiruheb’ chirix chan ru nokoxtenq’a li Santil Musiq’ej.

Xk’utb’al li tzol’leb’: Kok’al ak ninqeb’

Tzol’leb’ ut Sumwank 10:5

Wi nintijok junelik, naru ninkuy xnumsinkileb’ li raalehom laj Satanas.

Naru nakatenq’aheb’ li kok’al chixtawb’al ru naq li tijok chi kok’ aj xsa’ naxk’e qawankilal re xkuyb’al li aaleek.

Kok’ k’anjel naru chi b’aanumank

• Tz’iib’aheb’ aatin malaj ch’ol aatin wankeb’ sa’ Tzol’leb’ ut Sumwank 10:5 chiru kok’ setb’il hu ut kanab’eb’ li kok’al chixtusb’aleb’ ru. Waklesi xch’ooleb’ chixsik’b’al li raqal wi neke’raj xtenq’. Jo’ naxye li raqal a’an, k’a’ru li osob’tesihom naqak’ul wi nokotijok junelik? Chan ru nokoxtenq’a chixjultikankil li tijok chiru chixjunil li kutan, mas wi’chik naq noko’aaleek chixb’aanunkil k’a’ruhaq ink’a’ us?

• Kanab’eb’ li kok’al chixyiib’ankil jun xtusulal junjunqeb’ li hoonal ut na’ajej b’ar wi’ naru nokotijok. Re naq te’xtaw xkomon xna’leb’eb’, waklesi xch’ooleb’ chi sik’ok sa’ Alma 34:17–27.

• Tenq’aheb’ li kok’al chixyiib’ankil jun ch’ina esil chiru hu malaj jalam-uuch li tixjultika reheb’ li tijok junelik. K’e xb’oqb’aleb’ chixt’uyub’ankil li esil chiru hu sa’ kab’l b’ar wi’ te’ruuq chirilb’al chi kok’ aj xsa’.

Tzolʼlebʼ ut Sumwank 11:12–13

Li Santil Musiq’ej nikinixk’am chixb’aanunkil li us.

Eb’ li kok’al wan naq neke’xpatz’ chan ru na’eek’aman lix b’eresihom li Santil Musiq’ej. Naru nakawoksi Tzol’leb’ ut Sumwank 11 re xk’utb’al chiruheb’ li kok’al chan ru xk’eeb’al reetal “li Musiq’ej a’an li nak’amok b’e chixb’aanunkil li chaab’il” (raqal 12).

Kok’ k’anjel naru chi b’aanumank

• Tenq’aheb’ li kok’al chixtz’iib’ankil xk’ab’a’eb’ li kristiaan li neke’xsik’ naq neke’raj ru xtenq’ malaj naq wan junaq xpatz’omeb’. K’a’ut naq naqakanab’ qib’ sa’ ruq’eb’ xtenq’ li kristiaan a’an? Kanab’eb’ chirilb’al ru Tzol’leb’ ut Sumwank 11:12 ut te’xsik’ li k’a’ru kiyehe’ re laj Hyrum naq tixkanab’ wi’ rib’. K’a’ru naqatzol sa’ li raqal a’an chirix k’a’ut naq tento taqakanab’ qib’ sa’ ruq’ xb’eresihom li Santil Musiq’ej?

• Patz’ reheb’ li kok’al k’a’ raj ru te’xye re junaq ramiiweb’ li naraj xnawb’al k’a’ru neke’reek’a naq neke’aatinaak xb’aan li Santil Musiq’ej. Kanab’eb’ chirilb’al ru Tzol’leb’ ut Sumwank 11:12–13 re naq te’xtaweb’ junjunq li sumehom.

• Wotz rik’ineb’ li kok’al junjunq aanumsihom b’ar wi’ naq li Santil Musiq’ej xatxk’am chixb’aanunkil li us. Kanab’eb’ chixtz’ilb’al rixeb’ li hoonal b’ar wi’ xe’xk’ul ajwi’ a’an ut chirix a’an te’xwotz, wi neke’raj. Ch’olob’ xyaalal naq li qaChoxahil Yuwa’ naraj qab’eresinkil rik’in li Santil Musiq’ej. Waklesi xch’ooleb’ li kok’al chixk’eeb’al reetal chiru li xamaan chal re li hoonal b’ar wi’ te’reek’a li ch’olob’anb’il sa’ Tzol’leb’ ut Sumwank 11:12–13.

Tzolʼlebʼ ut Sumwank 11:21, 26

Tento tinnaw ru li evangelio re xtenq’ankileb’ li was wiitz’in chixtawb’al li yaal.

Eb’ li kok’al nakatzoleb’ te’wanq naab’al xhoonaleb’ re xwotzb’al li evangelio. Eb’ li raqal a’in naru te’xk’ut chiruheb’ chan ru te’xkawresi rib’ choq’ reheb’ li hoonal a’an.

Kok’ k’anjel naru chi b’aanumank

• Kanab’eb’ li kok’al chixk’utb’esinkil chan raj ru te’aatinaq chirix li evangelio rik’in anihaq maajun wa rab’ihom chaq. Qayehaq, chan raj ru te’xsumeheb’ li patz’om chirix lix Hu laj Mormon? Chan raj ru te’xch’olob’ ani li Jesukristo? Il ru rik’ineb’ a’an Tzol’leb’ ut Sumwank 11:21, 26. K’a’ru kixye li Qaawa’ re laj Hyrum Smith naq aajel ru xb’aanunkil re naq taaruuq tixk’ut li evangelio? K’a’ru naraj naxye “xtawb’al” li raatin li Dios ut chan ru naru naqab’aanu a’an? Chan ru “naqak’uula” li raatin li Dios sa’ qach’ool?

• Kanab’eb’ li kok’al chixwotzb’al jun li raqal nawulak chiruheb’ sa’eb’ li loq’laj hu ut te’xch’olob’ k’a’ut naq nawulak chiruheb’. Kanab’eb’ chi aatinak chirix chan ru naq neke’osob’tesiik lix yu’ameb’ xb’aaneb’ li loq’laj hu ut k’a’ru li yookeb’ chixb’aanunkil re xtzolb’al li raatin li Dios sa’ kab’l. Waklesi xch’ooleb’ chirilb’al ru li raatin li Dios chi kok’ aj xsa’.

• B’ichahomaq sa’ komonil jun li b’ich na’aatinak chirix xwotzb’al li evangelio, jo’ “Nawaj tinwanq choq’ jun li misioneer” (B’ichleb’aal choq’ reheb’ li Kok’al, 90). K’a’ru naxk’ut chiqu li b’ich a’an chirix chan ru naru nokowan jo’ misioneer rajlal kutan?

• Wotz junaq na’leb’ re “Juventud de Israel” xb’aan li Awa’b’ej Russell M. Nelson ut li Hermana Wendy W. Nelson (ch’utam choq’ reheb’ li saaj chiru chixjunil li ruchich’och’, 3 junio, 2018, ChurchofJesusChrist.org) re xmusiq’ankileb’ li kok’al chixwotzb’al li evangelio re tenq’ank sa’ xch’utub’ankileb’ li ralal xk’ajol li Dios.

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chi aatinak rik’in junaq komon sa’eb’ lix junkab’al chirix k’a’ruhaq xe’xtzol sa’ Tzol’leb’ ut Sumwank 10 malaj 11 chiru li kutan a’in. Qayehaq, naru neke’xwotz chan ru neke’xk’uub’ li tijok junelik.

Xchaab’ilob’resinkil li qak’utum

Sik’ li k’utb’esinb’il na’leb’ wulaj wulaj. Naq yooqat chixkawresinkil aawib’ re k’utuk, tijon ut tz’il rixeb’ li loq’laj hu chiru li xamaan. Taak’e reetal naq li Musiq’ej “tixkutanob’resi laa k’a’uxl” (Tzol’leb’ ut Sumwank 11:13). Eb’ li na’leb’ chirix chan ru tatk’utuq naru neke’wulak sa’ laa k’a’uxl yalaq jo’q’e ut yalaq b’ar—maare naq yooqat chi xik sa’ laa trab’aaj, naq nakab’aanu laa k’anjel sa’ kab’l, malaj naq nakat-aatinak rik’ineb’ jalan chik kristiaan.