Lix ch’och’ laj Martin Harris, xb’aan laj Al Rounds

22–28 febrero

Tzolʼlebʼ ut Sumwank 18–19

“Nim lix loq’aleb’ li aamej”

Patz’ re li qaChoxahil Yuwa’ naq tatxtenq’a chixtawb’aleb’ li na’leb’ sa’ Tzolʼlebʼ ut Sumwank 18–19 li tz’aqal te’wanq xyaalal choq’ reheb’ li kok’al.

Tz’iib’a li nakak’oxla

Xkanab’ankileb’ chi wotzok

Il ru Tzolʼlebʼ ut Sumwank 18:2 ut ch’olob’ naq li Musiq’ej kixtenq’a laj Oliver Cowdery chixnawb’al naq eb’ li loq’laj hu tz’aqal yaaleb’. Seraq’i reheb’ li kok’al chirix junaq hoonal b’ar wi’ naq li Musiq’ej kixch’olob’ xyaalal aawe naq eb’ li loq’laj hu tz’aqal yaaleb’. Kanab’eb’ chixwotzb’al xnumsihomeb’ b’ar wi’ xe’reek’a naq eb’ li loq’laj hu tz’aqal yaaleb’.

Xk’utb’al li tzol’leb’: Kok’al toj ka’ch’ineb’ xyu’am

Tzolʼlebʼ ut Sumwank 18:10–12

Li junjunq qe laa’o nim xloq’al sa’ rilob’aal li Dios.

Wi eb’ li kok’al neke’xnaw naq li qaChoxahil Yuwa’ naxraheb’ a’an—ut chixjunileb’ li ralal xk’ajol—neke’kawu xch’ooleb’ ut chaab’il wi’chik xch’ooleb’ rik’ineb’ li ras riitz’in.

Kok’ k’anjel naru chi b’aanumank

• Tenq’aheb’ li kok’al chixk’iilasutinkil aawochb’een Tzolʼlebʼ ut Sumwank 18:10 naab’al sut. Ch’olob’ naq li aatin “aamej” a’aneb’ chixjunileb’ li ralal xk’ajol li Dios. Ka’suti li raqal 10 rik’ineb’ li kok’al, a’b’an anajwan jal ru li aatin “aamej” rik’in xk’ab’a’eb’ li junjunq chi kok’al. (Chi’ilmanq ajwi’ li perel re kok’ k’anjel re li xamaan a’in.)

• Tenq’aheb’ li kok’al chixk’oxlankileb’ li k’a’aq re ru nim xloq’al choq’ reheb’ li kristiaan. Chirix a’an kanab’eb’ chixk’eeb’aleb’ xhoonal chirib’ileb’ rib’ re te’ril rib’ sa’ jun li lem, ut naq yooqeb’ chixb’aanunkil a’an, ye reheb’ li junjunq chi kok’al naq a’an jun ralal malaj jun xrab’in li Dios, ut naq nim xloq’al. Ch’olob’ xyaalal naq choq’ re li qaChoxahil Yuwa’, a’aneb’ ninqeb’ wi’chik xloq’al chiruheb’ chixjunil li k’a’aq re ru xe’xk’oxla.

Tzolʼlebʼ ut Sumwank 18:13–16.

Xwotzb’al li evangelio naxk’e sahil ch’oolejil.

Chan ru taamusiq’aheb’ li kok’al chixb’oqb’aleb’ li ras riitz’in chi chalk rik’in li Kristo ut chixyalb’al lix nimal sahil ch’oolejil?

Kok’ k’anjel naru chi b’aanumank

• Ye reheb’ li kok’al k’a’ruhaq li naxk’e xsahil aach’ool laa’at. Kanab’eb’ li junjunq chi kok’al chixyeeb’al aawe k’a’ru nak’ehok xsahil xch’ooleb’. Il ru Tzolʼlebʼ ut Sumwank 18:13, 16. K’a’ru nak’ehok xsahil xch’ool li Qaawa’? K’a’ru taak’ehoq xsahil qach’ool jo’ naxye a’an?

• B’ichahomaq sa’ komonil jun li b’ich na’aatinak chirix xjultikankil li evangelio, jo’ “Nawaj tinwanq choqʼ jun li misioneer” (B’ichleb’aal choq’ reheb’ li Kok’al, 90), ut tenq’aheb’ li kok’al chixk’oxlankil chan ru naru neke’xwotz li evangelio, sa’ li rochocheb’ ajwi’. Seraq’i junaq aanumsihom b’ar wi’ xawotz li evangelio ut kanab’eb’ li kok’al chixwotzb’al lix numsihomeb’ a’an.

Tzol’leb’ ut Sumwank 19:18–19, 23–24

Li Jesukristo ki’ab’in chiru li qaChoxahil Yuwa’, us ta naq jwal ch’a’aj a’an.

Li rajom li Kolonel re “ruk’b’al li k’ahil sek’, ut [ink’a’] xka’ch’inob’resinkil rib’ ” (raqal 18) a’an jun eetalil choq’ qe chiqajunil re ab’ink chiru li rajom li qaChoxahil Yuwa’. K’oxla chan ru naru nakawaklesi xch’ooleb’ li kok’al chixtaaqenkil lix b’aanuhom li Jesus.

Kok’ k’anjel naru chi b’aanumank

• K’ut jun xjalam-uuch li Jesukristo naq kixk’ul li rahilal sa’ Getsemani (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Kanab’eb’ li kok’al chixyeeb’al aawe k’a’ru neke’xnaw chirix li yoo chi k’ulmank sa’ li jalam-uuch. K’os ru rik’ineb’ laa waatin li kixye li Kolonel sa’ Tzolʼlebʼ ut Sumwank 19:18–19 chirix li rahilal kixk’ul. Aatinan chirix naq xnumsinkil rahilal sa’ xk’ab’a’eb’ li qamaak a’an li mas ch’a’aj li kixb’aanu junaq, a’b’an xb’aan naq li Jesus naxra lix Yuwa’ ut nokoxra laa’o, a’an ki’ab’in chiru li rajom li Dios. Chan ru naru noko’ab’in chiru li qaChoxahil Yuwa’?

• Tenq’aheb’ li kok’al chixk’oxlankileb’ eek’asink-ib’ li te’xk’am rib’ rik’ineb’ li ch’ol aatin wankeb’ sa’ Tzolʼlebʼ ut Sumwank 19:23. Yaab’asi li raqal naab’al sut naq yooqeb’ chireek’asinkil rib’. Tenq’aheb’ chixk’oxlankil chan ru naru nokotzolok chirix li Kristo ut naqab’i li raatin a’an.

Xk’utb’al li tzol’leb’: Kok’al ak ninqeb’

Tzolʼlebʼ ut Sumwank 18:10–12

Li junjunq qe laa’o nim xloq’al sa’ rilob’aal li Dios.

Naab’aleb’ li kristiaan neke’reek’a naq maak’a’eb’ xloq’al; wankeb’ chik xik’ neke’rileb’ li kristiaan jalaneb’ chiru a’an. Lix metz’eweb’ li aatin neke’tawman sa’ Tzolʼlebʼ ut Sumwank 18:10 naru naxjal qak’a’uxl chirix chan ru naqil qib’ laa’o ut eb’ li kristiaan wankeb’ chiqasutam.

Kok’ k’anjel naru chi b’aanumank

• Kanab’eb’ li kok’al chixtz’iib’ankileb’ lix k’ab’a’ chiru jun ch’ina setb’il hu ut numsiheb’ li kok’ setb’il hu sa’ li tzoleb’aal. Kanab’eb’ li kok’al chixtz’iib’ankil chiru li ch’ina setb’il hu xe’xk’ul k’a’ruhaq nawulak chiruheb’ chirix li kristiaan a’an. Waklesi xch’ooleb’ chi tz’iib’ak rik’in rahok ut q’unil ch’oolej. Chirix a’an tenq’aheb’ chirilb’al ru Tzolʼlebʼ ut Sumwank 18:10–12, ut kanab’eb’ chixwotzb’al li k’a’ru xe’xtzol chirix li nareek’a li Dios choq’ qe. Ch’olob’ naq chiqajunil nim qaloq’al choq’ re li Dios xb’aan naq laa’o li ralal xk’ajol.

• K’ut chiruheb’ li kok’al k’a’ruhaq q’axal nim xloq’al choq’ aawe. Chan ru naqileb’ li k’a’aq re ru ninqeb’ xloq’al choq’ qe? Kanab’ jun ch’ina al chirilb’al ru Tzolʼlebʼ ut Sumwank 18:10. Chan ru naru naqak’ut chiruheb’ li qas qiitz’in naq “nim xloq’al li raameb’ ” sa’ qilob’aal?

  

  Lix loq’al jun aamej, xb’aan li xLiz Lemon Swindle

Tzolʼlebʼ ut Sumwank 19: 16–19

Li Jesukristo kixk’ul li rahilal sa’ ink’ab’a’ laa’in.

Chan ru taak’am li musiq’ej re oxloq’ink sa’ li tzoleb’aal re naq li Santil Musiq’ej taaruuq chixch’olob’ankil chiruheb’ li kok’al naq li Jesukristo kixtoj lix tz’aq lix maakeb’?

Kok’ k’anjel naru chi b’aanumank

• Wotz li seraq’ chirix li Jesukristo naq kixk’ul rahilal sa’ xk’ab’a’eb’ li qamaak (chi’ilmanq “Ch’ol 51: Li Jesus naxnumsi rahilal sa’ li Awimq Getsemani,” Eb’ li Esilal sa’ li Ak’ Chaq’rab’, 129–132, malaj li video sa’ ChurchofJesusChrist.org). Kanab’eb’ li kok’al chixyeeb’al wi’chik li seraq’ rik’in li raatineb’ a’an, ut chirix a’an, kanab’eb’ chirilb’al chan ru naq li Kolonel kixch’olob’ li kixnumsi sa’ Tzolʼlebʼ ut Sumwank 19:16–19. K’a’ru naqatzol sa’eb’ li ch’olob’ahom naxk’e a’an?

• Kanab’eb’ li kok’al chixmutz’b’al li ruheb’ naq laa’at taayaab’asi Tzolʼlebʼ ut Sumwank 19:16–19, ut chixk’oxlankil li neke’reek’a choq’ re li Kolonel. Tenq’aheb’ li kok’al chixsik’b’al sa’ Eb’ li B’ich malaj sa’ li B’ichleb’aal choq’ reheb’ li Kok’al eb’ li b’ich li te’tenq’anq reheb’ chixyeeb’al li reek’ahomeb’ choq’ re li Jesukristo (che’ilmanq li tusleb’aal na’leb’ sa’eb’ li hu a’an). Kanab’eb’ chixb’ichankileb’ li b’ich xe’xsik’ ru ut chixwotzb’al lix nawom xch’ooleb’.

• Tenq’aheb’ li kok’al chixkanab’ankil sa’ xk’a’uxleb’ li rox xraqalil li paab’aal.

Tzolʼlebʼ ut Sumwank 19:26, 34–35, 38

Eb’ li rosob’tesihom li Dios mas ninqeb’ wi’chik chiruheb’ lix b’ihomal li ruchich’och’.

Li risinkil lix Hu laj Mormon chiru hu mas terto, ut laj Jose Smith moko kiru ta chixtojb’al. Li Qaawa’ kixpatz’ re laj Martin Harris naq “tixk’e jun jachal li k’a’ru re,” lix chaab’il ch’och’, re xtojb’al laj k’uub’anel hu (raqal 34). Qak’ulum xninqal osob’tesihom sa’ xk’ab’a’ lix mayej laj Martin Harris ut xkomoneb’ chik li kristiaan.

Kok’ k’anjel naru chi b’aanumank

• Tz’iib’aheb’ sa’ li pizarron patz’om jo’eb’ a’in re xtenq’ankileb’ li kok’al chixtawb’al ru Tzolʼlebʼ ut Sumwank 19:26, 34–35, 38: K’a’ru kixpatz’ li Qaawa’ re laj Martin Harris naq tixb’aanu? K’a’ut naq kixpatz’ re a’an? K’a’ru kixyeechi’i re wi tixb’aanu a’an? Kanab’eb’ li kok’al chixch’utub’ankileb’ rib’ sa’ ka’kab’il re xtawb’al xsumenkileb’ sa’eb’ li raqal a’an. Patz’ reheb’ k’a’ raj ru te’reek’a wi ta a’aneb’ laj Martin Harris.

• K’ut chiruheb’ li kok’al jun lix Hu laj Mormon ut ye reheb’ k’a’ruhaq mas nawulak chawu chirix a’an. Kanab’eb’ chixwotzb’al li neke’reek’a chirix a’an. Aatinan b’ayaq chirix lix mayej laj Martin Harris re naq lix Hu laj Mormon kiru chi isimank chiru hu (Eb’ li Esilal sa’ li Tzol’leb’ ut Sumwank, 33). K’a’ru kixye li Qaawa’ re laj Martin sa’ Tzolʼlebʼ ut Sumwank 19:38 li xatxtenq’a chi wank chi tiik ut chi paab’ank? Tenq’aheb’ li kok’al chixk’oxlankil k’a’ruhaq naru neke’xmayeja re ab’ink chiru li Dios ut xtenq’ankil sa’ lix k’anjel.

Xb’oqb’aleb’ chi tzolok sa’ kab’l

Kanab’eb’ li kok’al chixk’oxlankil anihaq li naru natenq’aak xb’aan li xe’xtzol sa’ Tzolʼlebʼ ut Sumwank 18 malaj 19; qayehaq, naq chiqajunil nim qaloq’al sa’ rilob’aal li Dios. Waklesi xch’ooleb’ chixk’uub’ankil chan ru te’xwotz li xe’xtzol rik’in li kristiaan a’an.

Xchaab’ilob’resinkil li qak’utum

Tenq’aheb’ li kok’al chixtzolb’aleb’ li loq’laj hu. Junjunqeb’ li kok’al neke’ch’a’ajko’ chiruheb’ rilb’aleb’ ru li loq’laj hu. Naru neke’xtenq’a rib’ wi neke’ril ru jun ajwi’ li raqal malaj li ch’ol aatin.