M̧aaj 8–14

Katak im Bujen Ko 23–26

“Kōkajoorļo̧k Kabun̄ in”

Ilo am̧ m̧aanjabpopo n̄an katakin, ļōmņak kōn aitia in m̧akūtkūt ko ilo jim̧or “Ajri ro Reddikļo̧k” im “Ajri ro Rōrūttoļo̧k” jekjōn ko.

Je En̄jake ko Rej Im̧we Eok

Pija eo ej Bōk Jikin Kajjitōk n̄an Kwaļo̧ke

Kwaļo̧k juon pija in Emman Smith (lale unin tōl eo an wiik in ilo Ļoor Eō—N̄an Kajjojo Armej im Baam̧le ko). Kajjitōk ippān ajri ro n̄an kwaļo̧k ta eo rejeļā kōn e, ekoba men ko ekar m̧ōj aer katak ilo ekkatak Katak im Bujen Ko 25 wiik eo kiiō ej jem̧ļo̧kļo̧k. “Chapter 13: Joseph and Emma” (Doctrine and Covenants Stories, 51–55) emaron̄ jipan̄.

Katakin Katak ko: Ajri ro Reddikļo̧k

Katak im Bujen Ko 23:6; 26:1

Anij ekōņaan bwe in jar im ekkatak jān jeje ko rekwojarjar aolep raan.

Irooj eaar kapilōk ritōl ro m̧oktata im ro m̧ōttan Kabun̄ in n̄an jar (lale Katak im Bujen Ko 23:6) im ekkatak jeje ko rekwojarjar (lale Katak im Bujen Ko 26:1). Ekōjkan am̧ maron̄ jipan̄ ajri ro kōm̧m̧an bwe jar im jeje ko rekwojarjar ren m̧ōttan mour ko aer?

M̧akūtkūt ko Maron̄ Kōm̧m̧ani

• Riit n̄an ajri ro jān Katak im Bujen Ko 23:6, ijjino kōn “kwoj aikuj jar.” Jipan̄ er kile wāween ko im jikin ko roktak Irooj eaar ba jej aikuj jar ie. Kajjitōk ippāer n̄an jin̄aik juon pija in aer jar make ilo juon iaan wāween kein ak jikin kein.

• Eļan̄n̄e emenin aikuj, kōmeļeļeik n̄an ajri ro elmen kilen jar. Juon al kōn jar, āinwōt “I Pray in Faith” (Children’s Songbook, 14), emaron̄ jipan̄.

• Riit n̄an ajri ro, “kōmaatļo̧k iien ko amijel n̄an ekkatak jān jeje ko rekwōjarjar” (Katak im Bujen Ko 26:1). Jiron̄ er etke kwoj ekkatak jeje ko rekwojarjar. Jipan̄ er ļōmņak kōn wāween ko remaron̄ ekkatak jān jeje ko rekwojarjar, jekdo̧o̧n eļan̄n̄e rejjan̄in de maron̄ riit.

• Al ippān doon “Search, Ponder, and Pray” (Children’s Songbook, 109) ak bar juon al kōn jar im ekkatak jeje ko rekwojarjar. Jipan̄ ajri ro kūle kōjeraam̧m̧an ko kar kallim̧ur kaki ilo al eo. Jiron̄ er kōn en̄jake ko ilo jetōb kwar en̄jaki n̄e rej jar im riiti jeje ko rekwojarjar.

Katak im Bujen Ko 25:11–12

Jisōs ej iakwe “al ko an bōro.”

Irooj eaar ba bwe al in kabun̄-jar kwojarjar “ej kam̧ōņōņō n̄an e.” Jipan̄ ajri ro lo al āinwōt ejjab wōt n̄an baj m̧akūtkūt in kam̧ōņōņō ak barāinwōt juon wāween n̄an kabun̄-jar n̄an E.

M̧akūtkūt ko Maron̄ Kōm̧m̧ani

• Kajjitōk ippān kajjojo ajri n̄an kwaļok al in kabun̄-jar eo an em̧m̧an tata ak al ko an Kabun̄ in, im al jet iaer ippān doon. Riiti Katak im Bujen Ko 25:12 n̄an ajri ro, im kajjitōk ippāer n̄an pijaikļo̧k ekōjkan an Jemedwōj Ilan̄ im Jisōs Kraist en̄jake n̄e Rej ron̄jake ad al al kein.

• Katakin ajri ro juon al kōn al, eo āinwōt “Lift Up Your Voice and Sing” (Children’s Songbook, 252), ak juon lal kōn Jisōs Kraist, eo āinwōt “He Sent His Son” (Children’s Songbook, 34–35). Kajjitōk ippāer n̄an al al eo ippān baam̧le ko aer wiik in.

  

  Al ej juon wāween jemaron̄ kwaļo̧k ad iakwe n̄an Anij.

Katak im Bujen Ko 25:13, 15

Imaron̄ m̧aanjabpopo n̄an kōm̧m̧ani bujen ko rekwojarjar.

Ajri ro kwoj katakin er rej m̧aanjabpopo n̄an kōm̧m̧ane bujen eo aer im̧aan tata ippān Jemedwōj Ilan̄ n̄e rej peptaij. Ekōjkan am̧ maron̄ jipan̄ er lo ewi aorōk in bujen ko ad?

M̧akūtkūt ko Maron̄ Kōm̧m̧ani

• Riiti Katak im Bujen Ko 25:13 n̄an ajri ro. Kōmeļeļeik bwe naan eo “eddāp” ilo eoon in ej meļeļe in n̄an buuļ kedepdep n̄an juon men. N̄an jipan̄ er meļeļe, letok letak juon men eo epen, āinwōt juon dekā (ak em̧ool juon aen in depdep), ipeļaakin ruum̧ eo im kajjitōk ippān ajri ro n̄an buuļ depij men eo jon̄an wōt aer maron̄. Kōmeļeļeik bwe eddāp n̄an bujen ko ad ej meļeļe in depiji (ak kōjparok) kallim̧ur ko jej kōm̧m̧ani ippān Jemedwōj Ilan̄ im jamin kōtļo̧k (ak jamin ebbwer).

• Kōjerbal peij in m̧akūtkūt eo an wiik in n̄an katakin ajri ro kōn iien ko n̄e jej kōm̧m̧ani bujen ko ippān Jemedwōj Ilan̄. Riiti Katak im Bujen Ko 25:15, im kōmeļeļeik bwe “kūrawūn in weeppān” ej jutak kōn kōjeraam̧m̧an ko an bar jepļaakļo̧k n̄an mour ippān Anij, ad Kiin̄ in Lan̄.

Katakin Katak ko: Ajri ro Rerūttoļo̧k

Katak im Bujen Ko 23:3–7; 25:7

Jisōs ekōņaan bwe in kōkajoorļo̧k ro ipeļaakū.

Ke Kabun̄ in eaar m̧oktata ejaak, ekar jab kanooj lōn̄ ro uwaan. Irooj eaar kajjitōk ippān Armej ro Rekwojarjar n̄an kōļapļo̧k Kabun̄ in kōn kwaļo̧k gospel eo im kōkajoorļo̧k doon. Jemaron̄ kōm̧m̧an ejja āinwōt rainin.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kappukōt aolep waanjon̄ak ko kōn naan ko “kean̄ (kōketak)” im “kōketak” ilo Katak im Bujen Ko 23:3–7; 25:7. Jipan̄ er kōmeļeļeik naan kein. Ekōjkan an kōketak juon kōkajoorļo̧k er? Kajjitōk ippān ajri ro n̄an ikkure in kōm̧m̧an kōl kōn “kōketak” juon bōtaab kōm̧m̧ane kōn iakwe.

• Ekōjkan ad maron̄ kōm̧m̧ane em̧m̧anļo̧k ilo jerbal in kōkajoorļo̧k ro jet uwaan Kabun̄ in? N̄an kwaļo̧k pedped in katak in, leļo̧k n̄an juon ajri juon jerbal me ej aikuji elōn̄ rijippan̄ ro. Innām kajjitōk ippān ajri ro jet n̄an jipan̄, im ekōnono kōn ekōjkan an erōm̧pidodoļo̧k jerbal eo. Kwaļo̧k juon en̄jake me kwar kajoorļo̧k jān jerbal in jipan̄ eo an juon m̧ōttam̧ membōr in Kabun̄ in.

Katak im Bujen Ko 24:1, 8

Rilo̧mo̧o̧r eo emaron̄ kotakļo̧k eō “jān en̄taan ko [aō].”

Josep Smith eaar en̄taan elōn̄ mālijjon̄ ko, bōtaab eaar maron̄ in “ineem̧m̧an ilo en̄taan ko” kōnke Irooj eaar kallim̧ur bwe Enaaj kar iien otemjej pād ippān.

M̧akūtkūt ko Maron̄ Kōm̧m̧ani

• Jipan̄ ajri ro kōlaajrake ilo boot eo jet iaan kaen̄taanan ko ak kapan̄pan̄ ko me Josep Smith im Armej ro Rekwojarjar im̧aan tata jet raar jelm̧ai (lale “Chapter 11: More People Join the Church,” Doctrine and Covenants Stories, 46–47, ak pija in alooj eo eiookļo̧k ilo ChurchofJesusChrist.org). Innām kajjitōk ippāer n̄an kile ta eo Irooj eaar ba n̄an Josep kōn kaen̄taanan ko an ilo Katak im Bujen Ko 24:1, 8. Ekōjkan ad maron̄ kappukōt jipan̄ eo an Rilo̧mo̧o̧r eo n̄e ewōr juon ad iien epen?

• N̄an katakin ajri ro bwe jet iien jej aikuj in “ineem̧m̧an ilo en̄taan ko [ad],” komaron̄ kwaļo̧k pija in alooj eo “Continue in Patience” ilo (ChurchofJesusChrist.org). Kajjitōk ippān ajri ro n̄an ļōmņak kōn juon men eo rej lukkuun in kōņaan bōtaab aikuj in kōttare. Etke Irooj jet iien ej aikuji bwe jen aikuj in kijenmej ilo iien ko reppen ilo mour ko ad? Ekōjkan An kōm̧m̧an bwe jen jeļā E ej “pād [ippād]” ilo en̄taan ko ad?

Katak im Bujen Ko 25:13

Imaron̄ in “eddāp n̄an bujen ko” iaar kōm̧m̧ani.

Ejjab to ālkin an Emma Smith kar peptaij, Irooj eaar jiron̄ e, “Eddāp n̄an bujen ko me kwaar kōm̧m̧ani.” Ļōmņak kōn ekōjkan an kapilōk in maron̄ kōjeraam̧m̧an ajri ro kwoj katakin er.

M̧akūtkūt ko Maron̄ Kōm̧m̧ani

• Riiti ippān doon Katak im Bujen Ko 25:13, im kajjitōk ippān ajri ro ta meļeļe in eoon in n̄an “eddāp n̄an bujen ko” jaar kōm̧m̧ani. N̄an kwaļo̧k, letok letak men ko me buuļ lukōji ippān doon im kōm̧m̧an bwe ajri ro ren kajjieon̄ kōjepeļļo̧ki. Etke naan eo “eddāp” ej juon naan em̧m̧an n̄an kōmeļeļeik ekōjkan ad aikuj in en̄jake kōn bujen ko ad?

• Eļan̄n̄e emenin aikuj, etale ippān ajri ro bujen ko jej kōm̧m̧ani n̄e jej peptaij (lale Mosaia 18:8–10; Katak im Bujen Ko 20:37). Ta meļeļe in n̄an “eddāp” n̄an bujen kein?

• Etale ippān doon jet iaan ta eo kwojeļā kōn mour eo an Emma Smith (lale “Chapter 13: Joseph and Emma” [Doctrine and Covenants Stories, 51–55], ak pija in alooj eo an ilo ChurchofJesusChrist.org). Leļo̧k n̄an kajjojo ajri juon eoon ak ruo jān jekjōn 25, im kajjitōk ippāer n̄an kwaļo̧k ekōjkan an kapilōk eo an Irooj im ijjitōn̄ ko maron̄ kar jipan̄ Emma “Eddāp n̄an bujen ko” eaar kōm̧m̧ani. Ekōjkan ad maron̄ ļoor waanjon̄ak eo an?

Kōketak Ekkatak ilo M̧weo

Kajjitōk ippān ajri ro n̄an kāālet juon eoon em̧m̧an me kwar ekōnono kake ippān doon, je eoon in jipan̄ eo, im kwaļo̧ke ippān juon uwaan baam̧le eo ak juon m̧ōttam̧.

Kōkōm̧anm̧anļo̧k Ad Katakin

Rōjan̄ n̄an kautiej Jipan̄ ajri ro meļeļe bwe wāween eo eaorōk kōn kautiej ej ļōmņak kōn Jemedwōj Ilan̄ im Jisōs Kraist. Komaron̄ kakeememej er n̄an kautiej ilo aer al mera im ak in̄ūrn̄ūri juon al ak kwaļo̧k juon pija in Jisōs.