li Jesukristo

19–25 abril

Tzolʼlebʼ ut Sumwank 41–44

“Inchaq’rab’ re xjolominkil lin iglees”

Naq yooqat chixkawresinkil aawib’ chiru li xamaan a’in, k’e aach’ool chixk’eeb’aleb’ reetal li na’leb’ taak’ul rik’in li Musiq’ej. K’a’ru nakaweek’a naq neke’raj ru xtzolb’al li kok’al sa’ Tzol’leb’ ut Sumwank 41–44?

Tz’iib’a li nakak’oxla

reetalil li wotzok

Xkanab’ankileb’ chi wotzok

Kut jun li b’olotz’ re jun ch’ina al ut kanab’ chixwotzb’al jun taqlahom naxnaw ru. Numsihomaq li b’olotz’ toj reetal naq chixjunileb’ te’wanq xhoonal chixwotzb’al k’a’ruhaq.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 42:2

Naru ninpaab’eb’ lix chaq’rab’ li Dios.

Naq yoo chaq chi k’iik li Iglees ut eb’ li komon ke’xch’utub’ rib’ aran Kirtland, Ohio, li Qaawa’ kixk’utb’esi chiru li Profeet aj Jose Smith li kixk’ab’a’i a’an lix “chaq’rab’ ” ut kixye reheb’ laj santil paab’anel “chex’ab’inq ut ab’ihomaq ut paab’omaq.” Chan ru naru nakatenq’aheb’ li kok’al chixtawb’al ru naq noko’osob’tesiik wi nokopaab’an?

Kok’ k’anjel naru chi b’aanumank

• Il ru Tzol’leb’ ut Sumwank 42:2 ut jultika chi us li aatin “paab’omaq.” K’e reheb’ li kok’al junjunqeb’ li eetalil b’ar wi’ naq jun ch’ina al kixsik’ ru xpaab’ankil malaj xq’etb’al jun li chaq’rab’ malaj jun tusulal. K’e xb’oqb’aleb’ chi ab’ink chi us ut te’se’eq lix naq’ ru wi li kristiaan sa’ li seraq’ napaab’an ut te’josq’o’q lix naq’ ru wi li kristiaan naq’etok. Wotzeb’ li osob’tesihom aak’ulum laa’at xb’aan xpaab’ankileb’ lix chaq’rab’ li Dios.

• B’aanu jun li b’atz’unk rik’ineb’ li kok’al, b’ar wi’ taak’e reheb’ jun tusulal te’xtaaqe. Qayehaq, naru nakaye reheb’ naq tento te’xtaqsi li ruq’ ut te’royb’eni naq te’k’eemanq xhoonal re xsumenkileb’ li patz’om. Re rilb’al naq neke’ab’in, oksiheb’ li patz’om rik’ineb’ ut k’eheb’ xhoonal li te’xtaqsi li ruq’. K’a’ru li chaq’rab’ xk’ehom qe li Dios?

• Tz’aqob’resi ru li perel re kok’ k’anjel rik’ineb’ li kok’al malaj b’ichahomaq jun li b’ich na’aatinak chirix xpaab’ankileb’ lix chaq’rab’ li Dios, jo’ “Tinpaab’ li evangelio” (B’ichleb’aal choq’ reheb’ li Kok’al, 72). Ye reheb’ li kok’al chan ru naq xpaab’ankileb’ lix chaq’rab’ li Dios naxk’e xsahil aach’ool.

  li tzolok sa’ li Tzoleb’aal reheb’ li Kok’al

  Neke’qatzol lix taqlahom li Dios sa’ li Tzoleb’aal reheb’ li Kok’al.

Tzol’leb’ ut Sumwank 42:38

Nink’anjelak chiru li Jesukristo naq nink’anjelak chiruheb’ li was wiitz’in.

Li Qaawa’ naraj naq eb’ lix santil paab’anel te’rileb’ li neb’a’ ut li wankeb’ rajom ru. Tenq’aheb’ li kok’al chixtawb’al ru naq, sa’ li k’anjelak chiruheb’ li kristiaan wankeb’ rajom ru, neke’k’anjelak ajwi’ chiru li Kolonel.

Kok’ k’anjel naru chi b’aanumank

• Wi li Jesukristo wan raj sa’ li qatzoleb’aal anajwan, k’a’ raj ru taqaye re? Chan raj ru li qawanjik rik’in? K’ut jun xjalam-uuch li Kolonel ut ch’olob’ naq li Jesus kixk’ut naq, wi naqak’ut qarahom chiruheb’ li qas qiitz’in, naqak’ut ajwi’ qarahom chiru a’an. Tenq’aheb’ li kok’al chixka’sutinkil li raqal 38 aawik’in, chi junjunq li aatin.

• Tenq’aheb’ li kok’al chixk’oxlankil chan ru naru neke’k’anjelak chiru li Kolonel naq neke’k’anjelak chiruheb’ li ras riitz’in. Naru neke’xtaw xna’leb’eb’ sa’eb’ li jalam-uuch b’ar wi’ li Kolonel yoo chixtenq’ankileb’ li kristiaan, jo’ xjalam-uuch a’an naq naxk’irtesiheb’ li yaj malaj naq nawan rik’in chaab’ilal rik’ineb’ li kok’al (chi’ilmanq Hu reheb’ li Jalam-uuch re li Evangelio, 42, 47). Ch’olob’ xyaalal naq wi eb’ a’an neke’k’anjelak chiruheb’ li ras riitz’in, yookeb’ ajwi’ chi k’anjelak chiru li Jesus.

Tzol’leb’ ut Sumwank 43:1–7

Li Qaawa’ naxb’eresi lix Iglees rik’ineb’ lix profeet.

Naru nakatenq’aheb’ li kok’al re naq ink’a’ te’b’alaq’iiq chiru lix yu’ameb’, rik’in xk’utb’al chiruheb’, naq toj ka’ch’ineb’ xyu’am, chan ru naq li Qaawa’ naxb’eresi lix Iglees rik’ineb’ lix yo’yookil profeet.

Kok’ k’anjel naru chi b’aanumank

• K’ut chiruheb’ xjalam-uuch jalan jalanq kristiaan, jo’ ajwi’ jun xjalam-uuch li profeet wan anajwan. K’eheb’ li jalam-uuch chi xulxu sa’ xb’een li meex ut kanab’eb’ li kok’al chixb’alq’usinkileb’ chi junjunqal toj reetal naq te’xtaw li profeet. Ch’olob’ lix k’utum li Qaawa’ naq ka’ajwi’ li profeet “xinxaqab’ choq’ eere re xk’ulb’al li taqlahom ut k’utb’esinb’il na’leb’ sa’ wuq’ ” re xb’eresinkil li Iglees (Tzol’leb’ ut Sumwank 43:2).

• B’ichahomaq sa’ komonil jun li b’ich na’aatinak chirixeb’ li profeet, jo’ “Jun li profeet” (B’ichleb’aal choq’ reheb’ li Kok’al, 58). Wotz lix nawom aach’ool chirix naq li profeet naxb’eresi li Iglees.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 41:5

Jun tzolom a’an li naxk’ul lix chaq’rab’ li Dios ut na’ab’in chiru.

Ma neke’xnaw li kok’al nakatzoleb’ k’a’ru naraj naxye wank jo’ xtzolom li Jesukristo? Tzol’leb’ ut Sumwank 41:5 naru naxtenq’aheb’ chixtawb’al ru chan ru wank chi chaab’il jo’ tzolom.

Kok’ k’anjel naru chi b’aanumank

• Tz’iib’a Tzol’leb’ ut Sumwank 41:5 chiru jun perel li hu, rik’in xkanab’ankileb’ xyanq b’ar wi’ wan raj li aatin “tzolom.” Kanab’eb’ li kok’al chixtz’aqob’resinkileb’ ru li yamyo ut te’xsik’ sa’ Tzol’leb’ ut Sumwank 41:5 wi neke’raj xtenq’. K’a’ru naraj naxye wank jo’ xtzolom li Jesukristo? Wotz chan ru naq laa’at yookat chixyalb’al aaq’e chi chaab’ilo’k jo’ xtzolom li Kristo.

• Chirix aatinak chirix Tzol’leb’ ut Sumwank 41:5, kanab’eb’ li kok’al chixk’oxlankileb’ li chaq’rab’ xk’ehom qe li Qaawa’. Kanab’eb’ chixk’eeb’aleb’ xhoonal chirib’ileb’ rib’ re xk’utb’esinkil naq neke’xpaab’ jun reheb’ li chaq’rab’ a’an ut lix komoneb’ li kok’al te’xyal xq’ehinkil k’a’ru a’an.

• K’e reheb’ li junjunq chi komon sa’ li tzoleb’aal jun setel li hu ut kanab’eb’ chixtz’iib’ankil chiru jun na’leb’ naru neke’xb’aanu re chaab’ilo’k jo’ tzolom. Kanab’eb’ li junjunq chi kok’al chixwotzb’al li k’a’ru xe’xtz’iib’a ut chirix a’an letz’eb’ li setb’il hu re xyiib’ankil jun kadeenil hu.

Tzolʼlebʼ ut Sumwank 42:61, 68

Li Dios naxk’utb’esi lix chaab’il na’leb’ reheb’ li neke’patz’ok re.

Naab’al li patz’om neke’xb’aanu li kok’al naq yookeb’ chi k’iik sa’ xnawomeb’ chirix li ruchich’och’ ut li evangelio. Chan ru naru nakawoksi Tzol’leb’ ut Sumwank 42:61, 68 re xtenq’ankileb’ chixnawb’al chan ru naru neke’xk’ul xchaab’il na’leb’ rik’in li Qaawa’?

Kok’ k’anjel naru chi b’aanumank

• Kanab’eb’ li kok’al chixwotzb’al aawik’in k’a’ruhaq li natenq’ank reheb’ chireek’ankil tuqtuukilal ut k’a’ruhaq li natenq’ank reheb’ chireek’ankil sahil ch’oolejil. Kanab’eb’ chirilb’al ru Tzol’leb’ ut Sumwank 42:61 re xsik’b’aleb’ li aatin “tuqtuukil” ut “sahil ch’oolejil.” Tenq’aheb’ chixk’oxlankileb’ li yaal xk’utb’esihom li Dios li naxk’e xtuqtuukilaleb’ ut xsahileb’ xch’ool.

• Il ru Tzol’leb’ ut Sumwank 42:61, 68 rik’ineb’ li kok’al, rik’in xjultikankil li ch’ol aatin “chi tasal tasal li k’utb’esinb’il na’leb’, chi tasal tasal eenawom.” Ch’olob’ naq li Dios ink’a’ naxk’utb’esi chixjunil sa’ jun ajwi’ li hoonal; naxk’e b’an chaq qe chi b’ayatq sa’ jalan jalanq hoonal. K’ut chan ru naq jun li jorb’a-k’a’uxlej nayiib’aman chi b’ayatq malaj oksi k’a’ruhaq jo’ a’an re xtenq’ankileb’ li kok’al chixtawb’al ru li na’leb’ a’an. Wotz jun aanumsihom b’ar wi’ laa’at xak’ul k’utb’esinb’il na’leb’ li xatrosob’tesi.

Tzol’leb’ ut Sumwank 43:1–7

Ka’ajwi’ li profeet naru naxk’ul li k’utb’esinb’il na’leb’ choq’ re chixjunil li Iglees.

Naq eb’ li kok’al yooqeb’ chi k’iik, maare te’xnaweb’ ru kristiaan li te’raj xjalinkileb’ xb’e. Chan ru naru nakatenq’aheb’ li kok’al chixkanab’ankil rib’ chiru lix na’leb’ li Dios naq naxb’eresi lix Iglees rik’in li profeet sik’b’il ru?

Kok’ k’anjel naru chi b’aanumank

• Kanab’eb’ li kok’al chixk’oxlankil naq jun kristiaan nawakli sa’ li ch’utam re xwotzb’al xnawom ch’oolej ut naxye sa’ li teep naq kixk’ul li k’utb’esinb’il na’leb’ choq’ re li Iglees (qayehaq, naq ink’a’ chik taquk’ li leech malaj naq tento taqatikib’ xb’aanunkil li ch’utam re li loq’laj wa’ak sa’ li kutan martes sa’ xna’aj domingo.) Li kristiaan a’an naxye ajwi’ naq tento taqab’i li k’a’ru naxye a’an sa’ xna’aj rab’inkil li profeet. K’a’ru li ink’a’ us rik’in a’an? Tenq’aheb’ li kok’al chi sik’ok sa’ Tzol’leb’ ut Sumwank 43:1–7 re xtawb’al chan ru naq li Qaawa’ naxk’eheb’ lix taqlahom choq’ re lix Iglees.

• K’ut jun xjalam-uuch li yo’yookil profeet ut kanab’eb’ li kok’al chixwotzb’al k’a’ruhaq kixk’ut a’an toje’. Wi neke’raj xtenq’, k’ut b’ayaq li video malaj il ru jun raqal reheb’ li aatin xyeeman sa’ li jolomil ch’utub’aj-ib’ toje’ xnume’. K’a’ut naq a’an jun osob’tesihom naq wan jun li yo’yookil profeet sa’eb’ li kutan a’in?

reetalil li tzolok

Xb’oqb’aleb’ chi tzolok sa’ kab’l

Kanab’eb’ li kok’al chixsik’b’al ru junaq li chaq’rab’ malaj jun li taqlahom li neke’reek’a naq tento te’xjayali rib’ chixpaab’ankil chiru li xamaan a’in. Waklesiheb’ xch’ool chixwotzb’al lix jayalihomeb’ rik’in lix junkab’aleb’.

Xchaab’ilob’resinkil li qak’utum

K’ut chiruheb’ li kok’al xtz’iib’ankil li neke’xk’oxla. Eb’ li kok’al naru neke’xk’aytesi rib’ chixtz’iib’ankil li musiq’ejil na’leb’ neke’xk’oxla. Re naq te’xtz’iib’a li neke’xk’oxla, naru neke’xjuch’eb’ lix loq’laj hu, neke’xyiib’eb’ xjalam-uuch, malaj neke’xtz’iib’aheb’ kok’ na’leb’ sa’ jun li hu wan wi’ resil lix yu’ameb’.

perel re kok’ k’anjel: sa inch’ool naq nin’ab’in chiru li Dios