19–25 Aperila

Mataupu Faavae ma Feagaiga 41–44

“O A’u Tulafono e Pulea ai La’u Ekalesia”

I le taimi o au sauniuniga i lenei vaiaso, ia ua’i atu i uunaiga na e maua mai le Agaga. O le a le mea e te lagona e tatau ona aoaoina e tamaiti mai le Mataupu Faavae ma Feagaiga 41–44?

Tusi Faamaumau Ou Lagona Uunai

Valaaulia le Fefaasoaai

Togi atu se polo i se tamaitiiti, ma fai atu i le tamaitiiti e faasoa mai se poloaiga e tasi na te iloaina. Toe faauau le pasiina o le polo seia maua e tagata uma se avanoa e faasoa mai ai se mea.

Aoao atu le Aoaoga Faavae: Tamaiti Laiti

Mataupu Faavae ma Feagaiga 42:2

E mafai ona ou usitai i tulafono a le Atua.

Ao tuputupu ae le Ekalesia ma faapotopoto atu le au paia i Katelani, Ohaio, na faaalia mai e le Perofeta o Iosefa Samita mea na Ia ta’ua o Ana “tulafono” ma poloaiina le Au Paia ina ia “faalogo ma faafofoga ma usiusitai” i ai. E mafai faapefea ona e fesoasoani i tamaiti ia malamalama e faamanuiaina i tatou pe a tatou usiusitai?

Gaoioiga e Mafai Ona Fai

• Faitau le Mataupu Faavae ma Feagaiga 42:2, faamamafa atu i ai le upu “usiusitai. Tuu au i tamaiti ni nai vaaiga faigofie lea e filifili ai se tamaitiiti e usitai pe le usitai ai i se poloaiga po o se tulafono. Fai atu i tamaiti e faalogo ma le totoa ma ataata pe afai o le tagata o i le tala o usitai ae faaūū pe afai e le o usitai le tagata. Faasoa mai ni faamanuiaga na e maua pe afai na e usiusitai i tulafono a le Atua.

• Taaalo i se taaloga i le tuu atu i tamaiti se tulafono e mulimuli i ai. Mo se faataitaiga, e mafai ona e fai atu ia i latou e tatau ona sii o latou lima ina ia valaau i ai e tali mai i ni fesili. Ona tuu atu lea ia i latou e faataitai le usiusitai i le fesili atu i ai o ni fesili ma valaauina i latou o e sii o latou lima. O a ni tulafono na tuuina mai e le Atua ia i tatou?

• Faamaea le itulau o gaoioiga faatasi ma tamaiti, pe usu se pese e uiga i le usiusitai i tulafono a le Atua, e pei o le “Ou Te Fiaola i le Talalelei” (Tusipese a Tamaiti, 72). Tau atu i tamaiti le ala na aumaia ai e le usiusitai i tulafono a le Atua le fiafia ia te oe.

  

  Tatou te aoao i poloaiga a le Atua i le Peraimeri.

Mataupu Faavae ma Feagaiga 42:38

O loo ou auauna atu ia Iesu Keriso pe a ou auauna atu i isi.

E finagalo le Alii i Lana Au Paia e tausia i latou e matitiva ma e le tagolima. Fesoasoani i tamaiti ia malamalama a latou auauna atu i tagata, ua latou auauna atu foi i le Faaola.

Gaoioiga e Mafai Ona Fai

• Afai e i ai Iesu Keriso i la tatou vasega i le asō, o le a sa tatou tala e fai atu ia te Ia? E faapefea ona tatou taulimaina o Ia? Faaali atu se ata o le Faaola, ma faamatala atu aoaoga a le Faaola afai tatou te faaali atu le alofa i isi, ua tatou faaali atu foi le alofa ia te Ia. Fesoasoani i tamaiti e toe fai faatasi ma oe le fuaiupu 38, o nai upu i lea taimi ma lea taimi.

• Fesoasoani i tamaiti e mafaufau i auala e mafai ai ona latou auauna atu ia Iesu e ala i le auauna atu i isi. E mafai ona latou mauaina nisi manatu mai le vitio “Pass It On” (ChurchofJesusChrist.org) pe mai ata o le Faaola o loo fesoasoani atu i isi, e pei o ata o Ia o loo faamalolo i e mama’i po o le agalelei atu i tamaiti (tagai i le Tusi Ata a le Talalelei nu. 42, 47). Molimau atu faapea, pe a latou auauna atu i isi, ua latou auauna atu foi ia Iesu.

Mataupu Faavae ma Feagaiga 43:1–7

E taitai e le Alii Lana Ekalesia e ala mai i Lana perofeta.

E mafai ona e fesoasoani i tamaiti ia aloese mai le faaseseina i le aluga o o latou olaga i le aoao atu o i latou, ao latou laiti, i le mamanu a le Alii mo le taitaiina o Lana Ekalesia e ala mai i le perofeta soifua.

Gaoioiga e Mafai Ona Fai

• Faaali ni ata o ni tagata eseese, e aofia ai se ata o le perofeta o i ai nei. Faafaō i lalo ia ata, ma tuu atu i tamaiti e fuli auauai i luga ata seia latou mauaina le perofeta. Faamatala atu le aoaoga a le Alii lea ua na o le perofeta ua “tofi atu ia te outou na te mauaina poloaiga ma faaaliga mai [le Alii]” e taitaia le Ekalesia (Mataupu Faavae ma Feagaiga 43:2).

• Usu faatasi se pese e faatatau i perofeta, e pei o le fuaiupu mulimuli o le “Mulimuli i le Perofeta” (Tusipese a Tamaiti, 58). Faasoa atu lau molimau faapea o loo taitai e le perofeta le Ekalesia.

Aoao atu le Aoaoga Faavae: Tamaiti Matutua

Mataupu Faavae ma Feagaiga 41:5

O se soo o se tagata ua mauaina tulafono a le Atua ma usitai i ai.

Pe o iloa ea e tamaiti o loo e aoaoina le uiga o le avea ma se soo o Iesu Keriso? O le Mataupu Faavae ma Feagaiga 41:5 e mafai ona fesoasoani ia i latou ia malamalama ai i le auala ia avea ai ma soo sili ona lelei.

Gaoioiga e Mafai Ona Fai

• Tusi le Mataupu Faavae ma Feagaiga 41:5 i luga o se fasi pepa, tuu ni avanoa i le mea e tatau ona tuu ai le upu “soo”. Fai i tamaiti e faatutumu ia avanoa, tagai i le Mataupu Faavae ma Feagaiga 41:5 pe a latou manaomia se fesoasoani. O le a le uiga o le avea ma se soo o Iesu Keriso? Faasoa atu pe o faapefea ona e tauivi ina ia avea ma soo sili ona lelei o Keriso.

• A maea ona talanoaina le Mataupu Faavae ma Feagaiga 41:5, fai i tamaiti e mafaufau i tulafono ua tatou maua mai le Alii. Fai atu ia i latou e auauai i le faatinoina o le usiusitai i se tasi o na tulafono ao taumafai le vasega atoa e mate mai po o le a.

• Tuu atu ia tofu tagata o le vasega ma se fasi pepa, ma fai atu i ai e tusi ai i luga se tasi o auala e mafai ona latou avea ai ma se soo sili ona lelei. Fai atu i tamaiti taitoatasi e faasoa mai ni mea sa latou tusia, ona faapipii faatasi lea o fasi pepa e mamanu ai se filifili pepa.

Mataupu Faavae ma Feagaiga 42:61, 68

E faaali e le Atua le poto ia i latou o e ole atu.

E tuuina atu e tamaiti le tele o fesili ao latou tuputupu ae i lo latou malamalama e uiga i le lalolagi ma le talalelei. E mafai faapefea ona e faaaogaina le Mataupu Faavae ma Feagaiga 42:61, 68 e fesoasoani ia i latou ia iloa ai le auala e maua ai le poto mai le Alii?

Gaoioiga e Mafai Ona Fai

• Fai atu i tamaiti e fasoa atu ia te oe se mea na fesoasoani ia i latou ia lagona ai le toafilemu ma se mea na fesoasoani ia latou lagona ai le olioli. Fai atu ia i latou e faitau le Mataupu Faavae ma Feagaiga 42:61 ma vaavaai mo upu “filemu” ma le “olioli”. Fesoasoani i tamaiti e mafaufau i upumoni na faaali mai e le Atua lea e aumaia ia i latou le filemu ma le olioli.

• Faitau le Mataupu Faavae ma Feagaiga 42:61, 68 faatasi ma tamaiti, faamamafa atu le fasi fuaitau “faaaliga e faaopoopo i luga o lea faaaliga, lea malamalama e faaopoopo i luga o lea malamalama.” Faamalamalama atu e le faaalia atu e le Atua mea uma i le taimi e tasi; ae, Na te tuuina atu sina mea itiiti i lea taimi ma lea taimi. Faaali atu le auala o fausia ai se paso i lea mea itiiti ma lea mea itiiti, pe faaaoga se isi mea e talitutusa e fesoasoani ia malamalama ai tamaiti e uiga i lenei mataupu faavae. Faasoa atu se aafiaga i le taimi na e maua ai se faaaliga lea na faamanuiaina ai oe.

Mataupu Faavae ma Feagaiga 43:1–7

Ua na o le perofeta e mafai ona maua faaaliga mo le Ekalesia atoa.

Ao tuputupu ae tamaiti, atonu o le a latou feiloai i tagata o e mananao e taitaieseina i latou. E mafai faapefea ona e fesoasoani i tamaiti ina ia faatuatua i le mamanu a le Atua o taitaia ai Lana fanau e ala atu i Lana perofeta filifilia?

Gaoioiga e Mafai Ona Fai

• Fai atu i tamaiti e vaai faalemafaufau atu i se tagata o loo tu i luga i se sauniga molimau ma tau atu i le uarota na ia mauaina se faaaliga mo le Ekalesia (mo se faataitaiga, e le tatau ona tatou toe inuina le susu pe ua tatau ona faia a tatou sauniga faafaamanatuga i Aso Lua nai lo Aso Sa). Fai mai a ia e tatau ona tatou faalogo atu i mea na ia fai mai ai nai lo le perofeta. O le a se mea o le a sese ai lena mea? Fesoasoani i tamaiti e sue i le Mataupu Faavae ma Feagaiga 43:1–7 ia i loa ai pe faapefea ona tuuuina mai e le Alii poloaiga o Lana Ekalesia.

• Faaali atu se ata o le perofeta soifua, ma fai i tamaiti e faasoa mai se mea sa ia aoao atu talu ai nei. Afai latou te manaomia se fesoasoani, faaali se ata vitio pe faitau se fasi fuaitau mai se lauga o se konafesi aoao talu ai nei. Aisea o se faamanuiaga le i ai o se perofeta soifua i lenei taimi?

Fautuaina le Aoaoina i le Aiga

Fai atu i tamaiti e filifili se tulafono po o se poloaiga latou te lagona e tatau ona latou taulai i ai e uiga i le usiusitai i lenei vaiaso. Uunaia i latou e faasoa mai a latou sini ma o latou aiga.

Faaleleia o Lo Tatou Aoao Atu

Aoao atu tamaiti ia tusifaamaumau o latou lagona uunai. E oo lava foi i tamaiti e mafai ona latou aoaoina uiga masani o le faamauina o lagona faaleagaga. E mafai ona tusifaamaumau ia lagona uunai i le makaina lea o tusitusiga paia, tusi ia ata, pe fai ni faamatalaga faigofie i a latou tusitalaaga.