Na Soqoni ni Keba, mai vei Worthington Whittredge

3–9 ni Me

Vunau kei na Veiyalayalati 46–48

“Dou Vakasaqara Vagumatua na iSolisoli Uasivi Duadua”

Vakasamataki ira na gone o vakavulica ni ko wilika na Vunau kei na Veiyalayalati 46–48. Raica na “Sotavi ni Nodra Gagadre na Gone Sobu” ena itekivu ni ivurevure oqo me baleta na ikuri ni vakasama eso me taurivaki.

Vola na Veika o Vakauqeti Kina

Sureta na Veiwasei

Sureti ira na gone mera droinitaka eso na iyaloyalo ni veika era a vulica ena lesoni ni macawa sa oti se na kena mai vale. Solia vei ira na veivakananumi eso kevaka e gadrevi. Mo qai laivi ira mera talanoataka na nodra iyaloyalo.

Vakavulica na iVunau: Gone Sobu

Vunau kei na Veiyalayalati 46:2–6

Au rawa ni vukei ira na tani mera vakila ni ra taleitaki e valenilotu.

O keda kece sara, oka kina o ira na gone, eda vinakata me da taleitaki ka ciqomi. O na vakayagataka vakacava na veitikina oqo me vukei ira na gone mera vukei ira na tani me vakila ni ra taleitaki e valenilotu?

iTaviqaravi e Rawa ni Caka

• Wilika i cake na Vunau kei na veiyalayalati na 46:5 , ka tukuna vei ira na gone ena nomu vosa ga na ibalebale ni tikina oqo. Vakaraitaka na kedra iyaloyalo na tamata mai na veiyasai vuravura. Tarogi ira na gone se ocei vei ira na tamata oqo e vinakata na Tamada Vakalomalagi me da sureti ira kina noda soqoni ni Lotu. Vukei ira na gone mera vakatovotovotaka me sureti iko se vakai ira me lako mai ki na dua na soqoni ni Lotu se na itaviqaravi.

• Sureti ira na gone mera raitayaloyalotaka ni dua na itokani e lako tiko mai ki valenilotu ena imatai ni gauna. Vukei ira mera vakasamataka eso na sala era na rawa ni vukea kina nodra itokani me vakila ni ra taleitaki. Mera vakatovotovotaka na cava era na kaya se cakava kevaka era raica e dua na itokani ni curu yani ki na loma ni valenilotu se rumunivuli ena imatai ni gauna.

Vunau kei na Veiyalayalati 46:13–26

Sa vakalougatataki au na Tamada Vakalomalagi ena Nona isolisoli eso.

O ira yadua na gone o vakavulica era luvena tagane se yalewa na Tamada Vakalomalagi, ka sa vakalougatataki ira tu oKoya ena veisolisoli vakayalo.

iTaviqaravi e Rawa ni Caka

• Vakayagataka na Vunau kei na Veiyalayalati 46:13–26 se “Wase 20: Na iSolisoli ni Yalo” (iTalanoa Eso ena Vunau kei na Veiyalayalati, 77–80) mo vakamacalataka kina vei ira na gone eso na isolisoli sa solia tu na Tamada Vakalomalagi vei keda ena Nona Yalotabu kei na vuna e solia mai kina oKoya. Kevaka e rawa, vakaraitaka na iyaya se iyaloyalo eso ka matataka na isolisoli yadua. Cegu vagauna mo taroga vei ira na gone na sala cava e rawa ni vakalougatataka kina e dua na isolisoli eso oqo.

• Solia vua e dua na gone e dua na ka e rawa ni wasei, me vaka e dua na tiki ni madrai se rua na iyaya ni vakatatalo. Kerea na gone oqori me wasea na ka o sa soli vua vata kei na dua tale na lewe ni kalasi. Vakamacalataka ni Tamada Vakalomalagi e solia vei keda na isolisoli eso, ka vinakata oKoya meda vakayagataka mera vukei kina na tani. Tukuna vei ira na gone me baleta e dua na gauna o a vakalougatataki kina baleta ni a wasea e dua na nona isolisoli vakayalo.

Vakavulica na iVunau: Gone Qase Cake

Vunau kei na Veiyalayalati 46:8–26

Sa solia vei au na Tamada Vakalomalagi na isolisoli vakayalo eso me vakalougatataki ira na tani.

Na isolisoli e vakamacalataki ena Vunau kei na Veiyalayalati 46—kei na vuqa na veisolisoli vakayalo tale eso—sa mai vua na Kalou ena Yalo Tabu. E rawa ni o vukei ira na gone mera kila na isolisoli eso sa soli vei ira—kei na so tale era rawa ni vasaqara—ni o ni vulica vata na Vunau kei na Veiyalayalati 46 .

iTaviqaravi e Rawa ni Caka

• Vola ena tiki ni pepa eso na isolisoli vakayalo e kunei ena Vunau kei na Veiyalayalati 46:13–26 kei na Yavu ni Vakabauta 1:7, ka vunia wavoki ena loma ni rumu. Sureti ira yadua na gone mera raica e dua vei ira na pepa, ka vaqara ena veitikina ena ivolanikalou na vanua e cavuti kina na isolisoli o ya. Qai wilika vata na Vunau kei na Veiyalayalati 46:8–9, 12. Na cava e solia kina vei keda na Tamada Vakalomalagi na isolisoli vakayalo eso?

• Vukei ira na gone mera vola ena vava ni volavola na isolisoli ni Yalo Tabu eso e tukuni tiko ena Vunau kei na Veiyalayalati 46. Ni volai na isolisoli yadua, veivosakitaka na sala e rawa ni vakayagataki kina na isolisoli o ya me vakalougatataki ira na tani. Na ivakamacala ena “Wase 20: Na iSolisoli ni Yalo” (iTalanoa Eso ena Vunau kei na Veiyalayalati, 77–80) e rawa ni veivuke. Tukuna vei ira na gone ni sa tiko yadua vei ira na isolisoli vakayalo eso. Vakauqeti ira mera kerea na Tamada Vakalomalagi me vukei ira mera kila na nodra isolisoli kei na sala era rawa ni vakayagataka kina me vukei ira na tani.

Vunau kei na Veiyalayalati 47:1, 3

Au rawa ni vola na kequ itukutuku.

Na Turaga e a kacivi Joni Witima me maroroya e dua na itukutuku makawa ni Lotu. Nikua eda sa vakalougatataki vakalevu ena vuku ni itukutuku makawa ni Lotu ka sa maroroi tu ena veiyabaki sa oti.

iTaviqaravi e Rawa ni Caka

• Wilika vata na Vunau kei na Veiyalayalati 47:1, 3, ka kerei ira na gone mera vakaraica na veika a vinakata na Turaga me cakava o Joni Witima. Na cava na ibalebale ni vosa na “dau vola” ena tikina e 3? Eda vakalougatataki vakacava ena noda kila me baleta na itukutuku makawa ni Lotu?

• Kevaka e tiko nodra ivolaniveisiga na gone o vakavulica, kerei ira mera talanoataka na veika era dau vola ena nodra ivolaniveisiga. Era na taleitaka beka na gone me rogoca e dua na italanoa mai na nomu ivolaniveisiga ni gone se mai na nona e dua na qase e liu.

• Vakaraitaka vei ira na gone na sala eso era na rawa ni dau maroroya kina e veigauna na itukutuku makawa ni nodra bula. Me ivakaraitaki, e rawa ni ra vola ena dua na ivola, kumuna vata na iyaloyalo eso ena dua na ivola, taipataka ena dua na kompiuta, se cakava na kena katokatoni ni vakarorogo se yaloyalo. Vukei ira na gone me vola na veika vinaka mera okata ena kedra itukutuku makawa vakai ira, me vakataka na nodra ivakadinadina baleti Jisu Karisito. Sureti ira na gone mera cakava e dua na ivakatakilakila se ivolakabi me kau i vale vata kei na so na vakasama oqo me vakananuma vei ira mera vola na kedra itukutuku makawa.

  

  Na ivolaniveisiga e sa dua na sala eda rawa kina ni maroroya e dua na itukutuku makawa.

Vunau kei na Veiyalayalati 48:1–4

Au rawa ni vukei ira na tani ena noqu wasea na ka sa soli vei au.

Na Turaga a vakauqeti ira na Yalododonu mai Oaio me vukei ira na Yalododonu tale eso ena nodra wasea na nodra vanua kei na nodra ilavo. E rawa vakacava mo vakayagataka na veitikina oqo me vukei ira na gone me raica na sala mera wasea kina vei ira na tani na veika sa solia vei ira na Kalou?

iTaviqaravi e Rawa ni Caka

• Vakaraitaka vei ira na gone e dua na mape kei Niu Ioka kei Oaio (raica na ituvatuva ni Epereli 12–18 ena Lako Mai, Mo Muri Au—Me Baleti Ira na Tamata Yadua kei na Matavuvale). Vakamacalataka ni a vakarota na Turaga vei ira na Yalododonu e Niu Ioka, kei na so tale na vanua mera soqoni yani ki Oaio, ia e vuqa vei ira a sega ni rauta na ilavo e tu vei ira mera tara e dua na vale ni ra a yaco yani. Vukei ira na gone mera kunea ena Vunau kei na Veiyalayalati 48:1–4 na ka a kerea na Turaga vei ira na Yalododonu mai Oaio me cakava mera veivuke kina. Tarogi ira na gone na veika era na vinakata me cakava mera veivuke kina kevaka era a bula tu mai Oaio ena gauna oqori. Na cava e sa soli tu vei keda nikua ka rawa ni da vakayagataka me vukei ira kina na tani? Me dua na kena ivakaraitaki, raica na “The Coat” (vidio, ChurchofJesusChrist.org).

• Wilika vata na Vunau kei na Veiyalayalati 48:4 , ka sureti ira na gone mera vakaraica e dua na ka a kerea na Turaga vei ira na Yalododonu mera cakava me vukea na Nona cakacaka. Vakamacalataka ni maroroi ilavo ena rawa kina vei ira mera voli qele ka tara e dua na valetabu ena dua na siga. Na cava e rawa meda vakabulai lavo kina me rawa ni da vukea na cakacaka ni Turaga? Vakaraitaka na vidio “First Things First” (ChurchofJesusChrist.org), ka veivosakitaka na sala era a vakayacora kina na gone ena vidio na ivakaro ni Turaga mera vakabula ilavo.

Vakauqeta na Vuli e Vale

Vakauqeti ira na gone mera tarogi ira nodra lewe ni matavuvale me baleta e dua na isolisoli vakayalo era vakila ni sa soli vei ira. Vakauqeti ira talega na gone mera dau masu ka vakasaqara e dua na isolisoli ni Yalo Tabu era na vinakata mera taracake.

Vakatorocaketaki Noda Veivakavulici

Vukei ira na gone mera vuli mai na ivolanikalou. Era na rairai sega ni wiliwili vinaka sara na gone sobu, ia o se rawa tikoga ni vukei ira me vuli mai na ivolanikalou. Me ivakaraitaki, e rawa ni o wilika e dua na yatuvosa ka sureti ira mera tucake se laveta na ligadra ni ra rogoca e dua na vosa se malanivosa vakatabakidua.