aj k’alom rik’ineb’ li b’oyx

Li xb’een tzol, xb’aan laj James Taylor Harwood

17–23 mayo

Tzol’leb’ ut Sumwank 51–57

“Jun mertoom xaqxo xch’ool, ut tiik, ut chaab’il xna’leb’ ”

Jo’ xtz’aqob’eb’ li na’leb’ neke’yeeman arin, li Musiq’ej naru naxhasb’a aawe naq taajayali aawib’ rik’in jalan chik na’leb’ sa’ Tzol’leb’ ut Sumwank 51:57 li maare aajelaq ru choq’ reheb’ li kok’al nakatzoleb’.

Tz’iib’a li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al li neke’raj xwotzb’al k’a’ruhaq yookeb’ chixtzolb’al chixchapb’al junaq li ajl sa’ jun li sek’ re rilb’al chan ru xtusulal naq te’aatinaq.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 51:9

Naru ninwan chi maak’a’ inb’alaq’.

Naab’aleb’ li kok’al toj ka’ch’ineb’ xyu’am yookeb’ chixtzolb’al k’a’ru naraj naxye xyeeb’al li yaal. K’oxla chan ru naru nakajultika lix aajelil ru li aatinak ut wank chi maak’a’ b’alaq’.

Kok’ k’anjel naru chi b’aanumank

• Il ru choq’ reheb’ li kok’al Tzol’leb’ ut Sumwank 51:9: “Ut li junjunq chi winq chik’anjelaq chi maak’a’ xb’alaq’ ” (chi’ilmanq ajwi’ Eb’ lix Raqalil li Paab’aal 1:13). Patz’ reheb’ li kok’al ma neke’xnaw k’a’ru naraj naxye wank chi maak’a’ li b’alaq’. Re xtenq’ankileb’ chixtawb’al ru chi us, k’uteb’ reetalil li wank chi maak’a’ li b’alaq’.

• Wotzeb’ kok’ seraq’ chirixeb’ kok’al li neke’xsik’ ru wank chi maak’a’eb’ xb’alaq’, jo’ xk’utb’al xyaalal naq xe’xb’aanu k’a’ruhaq ink’a’ us. Oksiheb’ jalam-uuch, malaj kok’ muñeek yiib’anb’ileb’ rik’in calcetin malaj rik’in hu re naq chaab’ilaqeb’ chi us li kok’ seraq’. Patz’ reheb’ li kok’al ma yookeb’ li kristiaan a’an chi wank chi maak’a’ li b’alaq’ malaj rik’in li b’alaq’.

• B’icha jun li b’ich rik’ineb’ li na’aatinak chirix xmaak’a’il li b’alaq’, jo’ “Saqaq aawu” (B’ichleb’aal choq’ reheb’ li Kok’al, 81). Wotz lix nawom aach’ool chirix k’a’ut naq aajel ru wank chi maak’a’ li b’alaq’.

Tzol’leb’ ut Sumwank 52:10; 53:3; 55:1

Li maatan re li Santil Musiq’ej nak’ulman rik’in li k’ehok uq’ej sa’ jolomej.

Sa’ Tzol’leb’ ut Sumwank 51–57 na’aatinak naab’al sut chirix xk’ulb’al li Santil Musiq’ej rik’in li k’ehok uq’ej sa’ jolomej. Naru nakawoksi a’an re xk’utb’al chiruheb’ li kok’al chirix li k’ojob’anb’il k’anjel a’an.

Kok’ k’anjel naru chi b’aanumank

• K’ut xjalam-uuch jun ch’ina al li yoo chi k’ojob’aak (chi’ilmanq li Hu reheb’ li Jalam-uuch re li Evangelio, 105). Kanab’eb’ li kok’al chixch’olob’ankil k’a’ru yoo chi k’ulmank sa’ li jalam-uuch. Kanab’eb’ chixpoq’b’al xsa’ li ruq’eb’ rajlal sut naq te’rab’i li ch’ol aatin “rik’in xk’eeb’al li uq’ej” naq yooqat chirilb’al ru jun malaj wiib’ oxib’ reheb’ li raqal a’in: Tzol’leb’ ut Sumwank 52:10; 53:3; 55:1.

• Seraq’i reheb’ li kok’al chirix li hoonal naq kak’ul li maatan re li Santil Musiq’ej rik’in xk’eeb’al li uq’ej chirix naq kikub’e aaha’. Tenq’aheb’ chireek’ankil xsahileb’ xch’ool chiroyb’eninkil li maatan a’an. Aatinan rik’ineb’ chan ru naru naqak’e xb’oqb’al li Musiq’ej sa’ li qayu’am.

• B’ichahomaq “Li Santil Musiq’ej” (B’ichleb’aal choq’ reheb’ li Kok’al, 56) malaj junaq chik b’ich chanchan a’an. Aatinan chirixeb’ li aatin ut ch’ol aatin li neke’k’utuk chirix li maatan re li Santil Musiq’ej.

  jun ch’ina al yoo chi k’ojob’aak

  Xjalam-uuch jun ch’ina al li yoo chi k’ojob’aak, xb’aan laj Dan Burr

Tzol’leb’ ut Sumwank 54:4–6

Junelik tento tintz’aqob’resi ruheb’ lin yeechi’ihom.

Laj Leman Copley ki’ok sa’ aatin re naq eb’ laj santil paab’anel aj Colesville, Nueva York te’wanq sa’ lix ch’och’ aran Ohio. A’b’anan, chirix naq eb’ laj santil paab’anel ke’wulak, a’an kixjal xk’a’uxl chirix li raatin ut kirisiheb’.

Kok’ k’anjel naru chi b’aanumank

• Seraq’i reheb’ li kok’al li ke’xk’ul laj santil paab’anel li ke’wulak chi wank sa’ lix ch’och’ laj Leman Copley (chi’ilmanq xjolomil Tzol’leb’ ut Sumwank 54; chi’ilmanq ajwi’ “Ch’ol 21: Jun k’utb’esinb’il na’leb’ re q’axonk Missouri,” Eb’ li Esilal sa’ li Tzol’leb’ ut Sumwank, 81–83). Tenq’aheb’ chixk’oxlankil k’a’ru ke’reek’a laj santil paab’anel naq laj Leman kixq’et lix yeechi’ihom.

• Set sa’ xyi jun ch’ina hu jo’ jun aamej ut k’e li junjunq jachal re wiib’eb’ kok’al. Kanab’eb’ chixjunajinkileb’ li kok’ hu re xyiib’ankil jun aamej. Kanab’eb’ li kok’al chixk’eeb’aleb’ xhoonal chirib’ileb’ rib’ chixchapb’al chi kutankil li kok’ setel hu. Tenq’aheb’ chixjuntaq’eetankil a’an rik’ineb’ li yeechi’ihom malaj sumwank neke’qab’aanu rik’in li Dios. Li Dios junelik tixtz’aqob’resi ru li naxyeechi’i sa’ li sumwank wi laa’o naqatz’aqob’resi ru li naqayeechi’i.

• Jultika reheb’ li kok’al naq sa’ xhoonalil lix kub’iha’eb’ te’xb’aanu sumwank, malaj yeechi’ihom, naq te’xpaab’eb’ lix taqlahom li Dios. Il ru choq’ reheb’ li naxye sa’ Tzol’leb’ ut Sumwank 54:6 chirix chan ru naq li Qaawa’ narosob’tesiheb’ li neke’xpaab’ lix sumwank.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 51:19; 55

Naru nawoksiheb’ li osob’tesihom ak xk’ehom we li Dios re rosob’tesinkileb’ li was wiitz’in.

Li Qaawa’ ak xk’ehomeb’ chaq qe chiqajunjunqal maatan ut osob’tesihom li naru neke’qoksi re xwaklesinkil li rawa’b’ejihom.

Kok’ k’anjel naru chi b’aanumank

• Muqeb’ sa’ li tzoleb’aal li aatin “tiik chi paab’ank,” “tiik xch’ool,” ut “chaab’il xna’leb’.” Kanab’eb’ li kok’al chixtawb’aleb’ li aatin a’an sa’ li tzoleb’aal ut chirix a’an te’xtaweb’ sa’ Tzol’leb’ ut Sumwank 51:19. Ilomaq ru sa’ komonil li raqal ut aatinanqex chirix k’a’ru naraj naxye wank jo’ mertoom. Wi na’ajman ru, ilomaq ru sa’ komonil li xb’een raqal re “Mertoom, mertoomil” sa’ li K’utul Raqal reheb’ li Loq’laj Hu.

• Seraq’i reheb’ li kok’al ani laj William W. Phelps, li kiwan jo’ aj tz’iib’ sa’ jun periodico, rub’elaj naq kirab’i li evangelio ut naq xko’o aran Kirtland. Kanab’eb’ li kok’al chirilb’al ru Tzol’leb’ ut Sumwank 55:1–4 ut te’xye k’a’ruheb’ li k’a’aq re ru kiraj li Dios naq tixb’aanu raj laj William. B’ar wan reheb’ li k’a’aq re ru a’an nak’anjelak ajwi’ choq’ qe, ut b’ar wan reheb’ a’an tz’aqal ka’ajwi’ re laj William xb’aan lix seeb’al? Kanab’eb’ li kok’al chixyeeb’al chirib’ileb’ rib’ b’ar wan lix seeb’aleb’ ut te’xye chan ru naq te’roksi li seeb’al a’an re k’anjelak chiru li Dios ut chiruheb’ li ralal xk’ajol a’an.

Tzol’leb’ ut Sumwank 52:14–19

Li Dios naxk’e jun k’utb’il eetalil li nikinixtenq’a re naq ink’a’ tinb’alaq’iiq.

Sa’eb’ li raqal a’in li Qaawa’ kixk’e jun k’utb’il eetalil “re naq ink’a’ toowanq chi b’alaq’inb’il” (Tzol’leb’ ut Sumwank 52:14) xb’aaneb’ aj b’alaq’il k’utunel ut b’alaq’il esil.

Kok’ k’anjel naru chi b’aanumank

• K’ut chiruheb’ li kok’al jun k’utb’il eetalil (jo’ jun k’amleb’ b’e re xyiib’ankil junaq t’ikr malaj xyiib’ankil k’a’ruhaq), ut aatinanqex chirix k’a’ut naq aajeleb’ ru li k’amleb’ b’e. Re xtenq’ankileb’ li kok’al chi tzolok chirix jun xk’amleb’ b’e li Qaawa’, tz’iib’aheb’ chiru li pizarron ch’ol aatin jo’eb’ a’in: Ani , a’an ajwi’ , Ani  taak’ehe’q , ut Ani , a’an moko  ta. Kanab’eb’ li kok’al chirilb’al ru Tzol’leb’ ut Sumwank 52:15–18 ut te’xnujob’resi li yamyo. K’a’ut naq jwal aajel ru li k’utb’il eetalil a’an choq’ qe? (chi’ilmanq li raqal 14, 19).

• Yiib’ junaq jalam-uuch ut kanab’eb’ li kok’al chixtaaqenkil li k’utb’il eetalil a’an re naq te’xyiib’ ajwi’ li jalam-uuch a’an. Chirix a’an, ilomaq sa’ komonil lix k’utb’il eetalil li Qaawa’ li natawman sa’ Tzol’leb’ ut Sumwank 52:14–19.

Tzolʼlebʼ ut Sumwank 54

Junelik tento tinwoxloq’iheb’ lin sumwank.

Us ta tento sa’ qab’een sa’ junjunqal li sumwank okenaqo wi’, li qatiikilal chixpaab’ankileb’ naru nak’anjelak sa’ xyu’ameb’ li qas qiitz’in. Li seraq’ chirix laj Leman Copley ut eb’ laj santil paab’anel re Colesville, Nueva York, naxk’utb’esi li yaal a’an.

Kok’ k’anjel naru chi b’aanumank

• Wotz rik’ineb’ li kok’al li kik’ulman naq eb’ laj santil paab’anel aj Colesville, Nueva York, ke’xk’ojob’ rib’ sa’ lix ch’och’ laj Leman Copley (chi’ilmanq li xjolomil Tzol’leb’ ut Sumwank 54; chi’ilmanq ajwi’ “Ch’ol 21: Jun k’utb’esinb’il na’leb’ re q’axonk Missouri,” Eb’ li Esilal sa’ li Tzol’leb’ ut Sumwank, 81–82). K’a’ raj ru kiqeek’a wi ta koowan chaq sa’ xyanqeb’ laj santil paab’anel a’an ut kiqab’i naq laj Leman kixq’et lix sumwank naq tixwotz lix ch’och’? K’a’ru naxk’ut chiqu li seraq’ a’in chirix xpaab’ankileb’ li qasumwank? Ilomaq ru sa’ komonil Tzol’leb’ ut Sumwank 54:6 b’ar wi’ na’aatinak chirix jun osob’tesihom naxk’e li Qaawa’ reheb’ li neke’xpaab’ lix sumwank.

• Jultika reheb’ li kok’al li sumwank ke’xb’aanu naq ke’kub’e xha’ (chi’ilmanq Mosiah 18:8–10). Tenq’aheb’ chixk’oxlankil chan ru naru neke’xpaab’ li sumwank a’an ut chirilb’al chan ru naq a’an tixkawresiheb’ re moqon te’xb’aanu xkomoneb’ chik li sumwank.

reetalil li tzolok

Xb’oqb’aleb’ chi tzolok sa’ kab’l

Wi nakak’e reetal naq xwulak chiruheb’ li kok’al junaq reheb’ li kok’ k’anjel, ye reheb’ naq naru neke’xb’aanu sa’ kab’l rik’ineb’ lix junkab’al.

Xchaab’ilob’resinkil li qak’utum

Yu’ami li nakak’ut. Wan xwankil li nakak’ut wi nakawotz xnawom aach’ool chirixeb’ li osob’tesihom neke’k’ulman sa’ xyu’aminkil li evangelio. Naq yooqat chixsik’b’aleb’ ru li na’leb’ li taak’ut chiruheb’ li kok’al, k’oxla chan ru naru nakayu’amiheb’ li na’leb’ a’an chi chaab’il wi’chik. (Chi’ilmanq ajwi’ Li k’utuk jo’ li Kolonel, 13–14.)

perel re kok’ k’anjel: jun sumwank a’an jun yeechi’ihom rik’in li Dios ut laa’in