Independence, Missouri, xb’aan laj Al Rounds

24–30 mayo

Tzol’leb’ ut Sumwank 58–59

“K’eeb’ilaqeb’ rib’ chi anchaleb’ xch’ool sa’ jun chaab’il k’anjel”

Naq yooqat chirilb’al ru Tzol’leb’ ut Sumwank 58–59, tz’iib’aheb’ li na’leb’ nakak’ul. Eb’ li na’leb’ a’an naru nakate’xtenq’a chixk’uub’ankil chan ru taak’ut chiruheb’ li kok’al li tzol’leb’ li xatzol. Naru ajwi’ nakataweb’ aana’leb’ sa’ li tusleb’ aatin re li tzol’leb’ sa’ Kim, Taaqehin—Choq’ reheb’ li komon ut li junkab’al, malaj sa’eb’ li taqlanb’il hu re li Iglees.

Tz’iib’a li nakak’oxla

Xkanab’ankileb’ chi wotzok

Kanab’eb’ junjunqeb’ li kok’al chixwotzb’al k’a’ruhaq xe’xb’aanu chiru li xamaan re tzolok sa’eb’ li loq’laj hu.

Xk’utb’al li tzol’leb’: Kok’al toj ka’ch’ineb’ xyu’am

Tzolʼlebʼ ut Sumwank 58:27–28

Li qaChoxahil Yuwa’ kixk’e chaq inwankil re sik’ok-u.

Tenq’aheb’ li kok’al chixnawb’al naq li qaChoxahil Yuwa’ naraj naq taqasik’ ru li k’a’ru us li tixk’e xsahil qach’ool sa’ li qayu’am ut sa’ xyu’ameb’ li qas qiitz’in.

Kok’ k’anjel naru chi b’aanumank

• Ileb’ ru ch’ol aatin sa’ Tzol’leb’ ut Sumwank 58:27–28 re xtenq’ankileb’ li kok’al chixtawb’al ru naq naru neke’xsik’ ru xb’aanunkil li us. K’e xjalam-uuch junaq uhej sa xch’ool sa’ li tzoleb’aal ut jun chik ra xch’ool sa’ xjunpak’al chik. K’a’ru naqeek’a rajlal sut naq naqasik’ ru xb’aanunkil li us? Seraq’i wiib’ oxib’ eetalil b’ar wi’ wan jun chaab’il ut jun ink’a’ chaab’il sik’ok-u. Chirix xseraq’inkil li junjunq chi eetalil ut li junjunq chi sik’ok-u, kanab’eb’ li kok’al chi xaqliik chixk’atq li uhej sa xch’ool wi li sik’ok-u chaab’il malaj chixk’atq li uhej ra xch’ool wi li sik’ok-u ink’a’ chaab’il.

• K’ut chiruheb’ li kok’al jun sek’ chi crayon jalan jalanqeb’ xb’onol. K’ut chiruheb’ jun xkab’ li sek’ b’ar wi’ wanq jun ajwi’ li crayon. Patz’ reheb’ b’ar wan reheb’ li sek’ taawulaq raj chiruheb’ roksinkil. K’a’ut? Ch’olob’ naq li wankilal re sik’ok-u a’an jun rosob’tesihom li qaChoxahil Yuwa’. Ch’olob’ naq li qaChoxahil Yuwa’ ut li Jesukristo nokohe’xra ut neke’raj naq taqasik’ ru li k’a’ru us.

• Seraq’i reheb’ li kok’al chirix junaq hoonal b’ar wi’ xasik’ ru k’a’ruhaq chaab’il ut ch’olob’ k’a’ru xaweek’a chirix a’an. Kanab’eb’ chixyiib’ankil junaq xjalam-uuch laa seraq’ malaj re junaq xseraq’eb’ a’an. Kanab’eb’ chixk’utb’al lix jalam-uuch sa’ li tzoleb’aal ut te’xye k’a’ru xe’xtzol sa’ li seraq’.

Tzol’leb’ ut Sumwank 59:7

Lin Choxahil Yuwa’ naraj naq tinb’antioxinq.

Chan ru naru nakatenq’aheb’ li kok’al chixtawb’al ru lix aajelil ru xb’antioxinkileb’ li osob’tesihom naxk’e li Dios reheb’?

Kok’ k’anjel naru chi b’aanumank

• Ye reheb’ li kok’al k’a’ruhaq li nakab’antioxi laa’at, ut kanab’eb’ chi aatinak chirixeb’ li k’a’aq re ru neke’xb’antioxi a’an. Ilomaq ru Tzol’leb’ ut Sumwank 59:7, ut tenq’aheb’ li kok’al chixk’oxlankil chan ru naru neke’xk’ut xb’antioxihomeb’ chiru li qaChoxahil Yuwa’ xb’aaneb’ li rosob’tesinkileb’. K’a’ raj ru taaruuq te’xyiib’ re te’xk’am sa’ kab’l li tixjultika reheb’ naq tento te’b’antioxinq chiru li qaChoxahil Yuwa’ xb’aaneb’ li rosob’tesinkileb’?

• B’ichahomaq sa’ komonil jun li b’ich na’aatinak chirix li b’antioxink, jo’ “Xb’aan xkawilal li qoq li quq’ ” (B’ichleb’aal choq’ reheb’ li Kok’al, 18). Kanab’eb’ li kok’al chixjalb’al raatinul li b’ich rik’ineb’ xk’ab’a’ k’a’aq re ru neke’b’antioxin wi’.

• Kanab’eb’ chixyiib’ankileb’ xjalam-uuch li k’a’aq re ru neke’b’antioxin wi’.

Tzol’leb’ ut Sumwank 59:9–12

Li hilob’aal kutan a’an lix kutankil li Qaawa’.

Naq nakach’olob’ li sahil ch’oolejil nakataw laa’at sa’ roxloq’inkil li hilob’aal kutan, naru nakatenq’aheb’ li kok’al chirilb’al jo’ jun kutan b’ar wi’ naqaloq’oni li Qaawa’.

Kok’ k’anjel naru chi b’aanumank

• K’ameb’ jalam-uuch malaj k’a’aq re ru li neke’reetali li k’a’ru chaab’il naru nab’aanuman sa’ li domingo re xloq’oninkil li Qaawa’ ut reek’ankil sahil ch’oolej. Neke’tawman junjunq na’leb’ sa’ Tzol’leb’ ut Sumwank 59:9–12 ut “Roxloq’inkil li hilob’aal kutan” (Choq’ re Xkawilaleb’ li Saaj, 30–31). Qayehaq, re reetalinkil li loq’laj wa’ak, naru nakak’ut li jalam-uuch 108 sa’ li Hu reheb’ li Jalam-uuch re li Evangelio malaj jun li ch’ina sek’ re li ha’ malaj jun ch’uyul li kaxlan wa. Chan ru naq eb’ li k’a’aq re ru a’an nokohe’xtenq’a chi nach’ok rik’in li qaChoxahil Yuwa’ ut rik’in li Jesukristo sa’ li hilob’aal kutan?

• Tz’aqob’resi ru li perel re kok’ k’anjel re li xamaan a’in rochb’eeneb’ li kok’al re xk’eeb’aleb’ xna’leb’ re naq loq’aq li hilob’aal kutan choq’ reheb’.

  

  Tz’aqonk sa’ li loq’laj wa’ak nokoxtenq’a chiroxloq’inkil li hilob’aal kutan.

Xk’utb’al li tzol’leb’: Kok’al ak ninqeb’

Tzol’leb’ ut Sumwank 58:27–28

Li xtaql ch’oolej a’an li wankilal wan qe re sik’ok-u.

Li Dios xk’ehom chaq qe li wankilal re sik’ok-u ut rik’in li wankilal a’an naru “taqak’e chi uxliik naab’al li tiikilal” (raqal 27). Chan ru naru nakatenq’aheb’ li kok’al nakatzoleb’ chirilb’al naq us ta wan li maa’usilal sa’ li ruchich’och’, “wan wankilal rik’ineb’ ” re “xb’aanunkil li chaab’il”? (raqal 28).

Kok’ k’anjel naru chi b’aanumank

• K’ut chiruheb’ li kok’al jun setel li hu li tz’iib’anb’ilaq li aatin sik’ok-u chiru, ut chi junpak’al chik tz’iib’anb’ilaq li aatin li k’a’ru nak’ulman. Ch’olob’ naq xb’aan li naqasik’ ru xb’aanunkil wan k’a’ru nak’ulman malaj nachal yal xb’aan li k’a’ru naqab’aanu. Patz’ re junaq ch’ina al naq tixtaqsi chi kutankil li setb’il hu re xk’utb’al naq sa’ xtaqsinkil, wan sa’ ruq’ li sik’ok-u jo’ ajwi’ li k’a’ru nak’ulman xb’aan a’an. Patz’ re jun ch’ina al chirilb’al ru Tzolʼlebʼ ut Sumwank 58:27–28. K’a’ru naru naqasik’ ru xb’aanunkil re “taqak’e chi uxliik naab’al li tiikilal” malaj li tixk’am chaq naab’al li k’a’aq re ru chaab’il? (raqal 27). Jo’q’e hoonal qasik’om ru li k’a’ru chaab’il li kixk’am chaq chaab’il k’a’aq re ru malaj kirosob’tesiheb’ li qas qiitz’in?

• Tz’iib’aheb’ ch’ol aatin re Tzol’leb’ ut Sumwank 58:27–28 chiruheb’ kok’ setb’il hu ut jek’i reheb’ li kok’al. Kanab’eb’ chirilb’aleb’ ru chi ch’anch’o ut te’k’oxlaq chirixeb’. Kanab’eb’ chi chunlaak chi tustu jo’ chanru xtusulaleb’ li ch’ol aatin sa’eb’ li raqal 27–28 ut te’aatinaq chirib’ileb’ rib’ chirix li xe’xtzol. K’a’ru li raatin li Qaawa’ wan sa’ li raqal a’an choq’ qe?

• B’ichahomaq jun li b’ich li na’aatinak chirix li sik’ok-u, jo’ “Sik’ li us” (Eb’ li B’ich, 151). Oksiheb’ patz’om li tixtenq’aheb’ li kok’al chi k’oxlak chirix raatinul li b’ich—qayehaq, Ani natenq’an qe chixsik’b’al ru li k’a’ru us? Ani na’aalenk qe chixsik’b’al ru li k’a’ru ink’a’ us? K’a’ru nakaweek’a naq nakasik’ ru li k’a’ru us?

Tzol’leb’ ut Sumwank 59:9–16

Li hilob’aal kutan a’an lix kutankil li Qaawa’.

Li Qaawa’ kixye naq li roxloq’inkil li hilob’aal kutan nokoxtenq’a “chixk’uulankil qib’ chi maak’a’ qatz’ajnil xb’aan li ruchich’och’ ” (Tzol’leb’ ut Sumwank 59:9). Chan ru naru nakatenq’aheb’ li kok’al nakatzoleb’ chiroxloq’inkil li hilob’aal kutan ut xk’ojob’ankil a’an jo’ reetalil lix rahomeb’ choq’ re li qaChoxahil Yuwa’ ut li Jesukristo?

Kok’ k’anjel naru chi b’aanumank

• Kanab’eb’ li kok’al chirilb’al ru Tzol’leb’ ut Sumwank 59:9–16 sa’ ka’kab’il ut ye reheb’ naq te’xtz’iib’a k’a’ruhaq neke’xtzol chirix li hilob’aal kutan chixk’atqeb’ li junjunq chi raqal. Chirix wiib’ oxib’ k’asal, kanab’eb’ li junq sumal chixwotzb’al li xe’xtz’iib’a. K’a’ru taqab’aanu chik chi chaab’il sa’ li hilob’aal kutan xb’aan li k’a’ru xqatzol?

• Kawresi jun li ch’ina b’atz’unk b’ar wi’ eb’ li kok’al te’xk’uliheb’ li ch’ol aatin re Tzol’leb’ ut Sumwank 59:9–16 rik’in li raqal b’ar wi’ neke’tawman. Sik’eb’ ru ch’ol aatin li neke’xk’ut k’a’ru naraj li Qaawa’ naq taqab’aanu sa’ li hilob’aal kutan. Aatinanqex chirixeb’ li ch’ol aatin li neke’aatinak chirix lix kutankil li Qaawa’ ut chan ru naru nokonach’ok rik’in a’an.

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chi aatinak rik’ineb’ lix junkab’al chirix k’a’ruhaq naru neke’xb’aanu re xsantob’resinkil li hilob’aal kutan.

Xchaab’ilob’resinkil li qak’utum

Tenq’aheb’ li kok’al chixnawb’al naq ninqeb’ lix wankilal. Maare junjunqeb’ li kok’al te’reek’a naq moko te’ruuq ta chixtzolb’al li evangelio xjuneseb’ rib’. Ye reheb’ naq li Santil Musiq’ej tixtenq’aheb’ chi tzolok.