li nima’ Missouri

Li xam chire li nima’ Missouri, xb’aan laj Bryan Mark Taylor

31 mayo–6 junio

Tzol’leb’ ut Sumwank 60–62

“Chixjunil li tz’ejwalej wan sa’ wuq’ ”

Jultikaq aawe naq li tz’aqal xkawresinkil aawib’ re xk’utb’al Tzol’leb’ ut Sumwank 60–62 a’an li tzolok nakab’aanu aajunes ut sa’ aajunkab’al chirixeb’ li tasal a’in.

Tz’iib’a li nakak’oxla

reetalil li wotzok

Xkanab’ankileb’ chi wotzok

Kanab’eb’ li junjunq chi kok’al chixwotzb’al k’a’ruhaq xe’xtzol sa’eb’ li loq’laj hu chiru li xamaan xnume’, malaj sa’ li tzoleb’aal reheb’ li kok’al sa’ li domingo xnume’. Chirix naq li junjunq chi kok’al ak x’aatinak, kanab’ jun chik li ch’ina al chixk’osb’al ru li xye.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzolʼlebʼ ut Sumwank 60:4; 61:1–2, 36; 62:1

Eb’ li loq’laj hu neke’xk’ut chiwu chirix li Jesukristo.

Sa’ Tzol’leb’ ut Sumwank 60–62 natawman li na’leb’ li naru naxtenq’aheb’ li kok’al chixtawb’al ru ani li Jesukristo ut chixnimob’resinkil lix rahomeb’ choq’ re a’an.

Kok’ k’anjel naru chi b’aanumank

• K’ut jun xjalam-uuch li Jesukristo ut chirix a’an kanab’eb’ li kok’al chixyeeb’al k’a’ut naq neke’xra li Jesus. Sik’eb’ ru junjunq li ch’ol aatin sa’ Tzol’leb’ ut Sumwank 60–62 li neke’xk’ut chawu laa’at chirix li Kolonel ut wotz rik’ineb’ li kok’al (chi’ilmanq, jo’ eetalil, Tzol’leb’ ut Sumwank 60:4; 61:1–2, 36; 62:1). Tenq’aheb’ li kok’al chixka’sutinkileb’ li ch’ol aatin aawik’in. Wotz li k’a’ru nakaweek’a chirix li Jesukristo.

• K’uteb’ junjunq xjalam-uuch lix k’anjel li Jesus sa’ ruchich’och’ (chi’ilmanq Hu reheb’ li Jalam-uuch re li Evangelio, 34–61). Kanab’eb’ li kok’al chatenq’ankil chixch’olob’ankil k’a’ru yoo li Jesus sa’ li junjunq chi jalam-uuch. Chan ru naq a’an naxk’ut lix rahom choq’ reheb’ li ralal xk’ajol li qaChoxahil Yuwa’? Wotz rik’ineb’ jun reheb’ li raqal mas nawulak chawu sa’eb’ li loq’laj hu li na’aatinak chirix li Jesus.

• B’icha rochb’eeneb’ li kok’al “Chinwanq raj jo’ li Jesus” (B’ichleb’aal choq’ reheb’ li Kok’al, 40–41; chi’ilmanq ajwi’ li video sa’ ChurchofJesusChrist.org). Naq yooqex chixb’ichankileb’ li na’leb’ re chan ru wank jo’ li Jesus, kanab’omaq b’ichank junq sutaq ut kanab’eb’ li kok’al chixtz’aqob’resinkil ru li ch’ol aatin “Naru ninwan jo’ li Jesus naq …”

  li Kolonel waklijenaq chi yo’yo

  A’in aj-e naq xinchal, xb’aan laj Yongsung Kim

Tzol’leb’ ut sumwank 62:3

Li Jesukristo naraj naq tinwotz lix evangelio.

Mas nawulak chiruheb’ li kok’al xwotzb’al li neke’xnaw rik’ineb’ li ras riitz’in. Tenq’aheb’ chixtawb’al ru naq rajlal sut naq neke’xwotz li neke’xnaw chirix li evangelio, li qaChoxahil Yuwa’ nasaho’ xch’ool rikineb’ a’an.

Kok’ k’anjel naru chi b’aanumank

• Ch’olob’ naq li Qaawa’ kixpatz’ re li profeet aj Jose Smith ut xkomoneb’ chik aj jolominel sa’ li Iglees naq te’elq chaq Kirtland, Ohio, ut te’xik aran Jackson, Missouri. Kixye reheb’ naq te’xjultika li evangelio sa’ lix xikikeb’ ut ajwi’ sa’ lix q’ajikeb’ sa’ kab’l. Il ru Tzol’leb’ ut Sumwank 62:3, ut kanab’eb’ li kok’al chirab’inkil k’a’ru ke’xb’aanu li misioneer li kisaho’ wi’ xch’ool li Qaawa’. Ch’olob’ xyaalal naq li Qaawa’ nasaho’ xch’ool qik’in rajlal sut naq naqawotz li evangelio rik’ineb’ li qas qiitz’in.

• Tenq’aheb’ li kok’al chixyiib’ankileb’ kok’ placa li tixk’utb’esi naq neke’raj wank jo’ misioneer re li Iglees. Kanab’eb’ chixk’eeb’aleb’ li placa chiruheb’ lix t’ikr ut te’xwotz lix nawom xch’ooleb’ chirib’ileb’ rib’ re xtzolb’al xb’aanunkil.

• B’ichahomaq sa’ komonil jun li b’ich na’aatinak chirix xwotzb’al li evangelio, jo’ “Nawaj tinwanq choq’ jun li misioneer” (B’ichleb’aal choq’ reheb’ li Kok’al, 90). Tenq’aheb’ li kok’al chixk’oxlankil k’a’ raj ru te’xye wi ta jun ramiiweb’ tixpatz’ reheb’ k’a’ru mas nawulak chiruheb’ chirix li Jesukristo ut chirix lix Iglees. Kanab’eb’ chixyiib’ankileb’ xjalam-uuch li k’a’ru nawulak chiruheb’ chirix lix evangelio li Kristo.

reetalil li k‘utuk

Xk’utb’al li tzol’leb’: Kok’al ak ninqeb’

Tzolʼlebʼ ut Sumwank 60:7, 13; 62:3, 9

Naru ninte xtz’uumal li we re xwotzb’al lix evangelio li Jesukristo.

Lix nawom xch’ool jun ch’ina al nim xwankil jo’ jun xnawom xch’ool li ak nim chik, xb’aan naq lix wankilal li xnawom ch’oolej moko nachal ta xb’aan jarub’ chihab’ wan re chi moko li xnumsihom li kristiaan, a’b’an rik’in li Santil Musiq’ej. Tenq’aheb’ li kok’al chixkawob’resinkil xch’ooleb’ re naq te’xte xtz’uumal reheb’ ut te’xwotz rik’ineb’ li ras riitz’in li k’a’ru neke’xnaw naq tz’aqal yaal.

Kok’ k’anjel naru chi b’aanumank

• K’a’ru li osob’tesihom kixyeechi’i li Qaawa’ sa’ Tzol’leb’ ut Sumwank 60:7; 62:3, 9 choq’ reheb’ li ani te’wotzoq re lix evangelio? Chan ru naq neke’osob’tesiik li qas qiitz’in naq laa’o naqawotz li evangelio? K’oxla xwotzb’al junaq aanumsihom sa’ xwotzb’al li evangelio—k’a’ru li osob’tesihom ke’chal xb’aan li yalok q’e a’an? Kanab’eb’ li kok’al chixwotzb’al junaq xnumsihomeb’ a’an. Naru ajwi’ teeeb’icha junaq li b’ich li na’aatinak chirix li k’anjel re xjultikankil li evangelio, jo’ “Chexxik rik’in paab’aal” (Eb’ li B’ich, 169), ut tex’aatinaq chirixeb’ li osob’tesihom neke’yeeman aran.

• Tenq’aheb’ li kok’al chixk’utb’esinkileb’ hoonal b’ar wi’ naru neke’xwotz li evangelio rik’ineb’ li ramiiw. Qayehaq, k’a’ raj ru te’xye wi ta anihaq tixpatz’ reheb’ k’a’ut naq neke’xik sa’ li iglees? Malaj ut k’a’ raj ru te’xb’aanu wi ta jun ramiiweb’ taaril naq wan jun xmatq’ab’eb’ re BLU malaj naq yookeb’ chirilb’al ru lix Hu laj Mormon, ut te’patz’inq raj? K’a’ raj ru te’xye?

Tzolʼlebʼ ut Sumwank 60:7; 61:1–2, 36; 62:1

Li Qaawa’ wan xch’ool chixkuyb’al inmaak wi ninjal ink’a’uxl.

Laj Jose Smith ut xkomoneb’ chik laj jolominel sa’ li Iglees moko tz’aqaleb’ ta re ru. Wan naq ke’xwech’i rib’ ut ki’oso’ royb’enihomeb’ (chi’ilmanq “Ezra Booth ut Isaac Morley,” Revelaciones en Contexto, 142). A’b’anan, li Qaawa’ kiruxtaanaheb’ ru ut junelik kixyeechi’ xkuyb’aleb’ xmaak wi neke’xjal xk’a’uxl.

Kok’ k’anjel naru chi b’aanumank

• Il ru rik’ineb’ li kok’al Tzol’leb’ ut Sumwank 60:7; 61:2, ut kanab’eb’ chixtawb’aleb’ aatin li wan rilomeb’ chirib’ileb’ rib’ sa’eb’ li raqal. Jultika reheb’ li kok’al naq eb’ li k’utb’esinb’il na’leb’ a’an ke’k’eeman re laj Jose Smith ut re xkomoneb’ chik laj jolominel sa’ li Iglees. K’a’ru kiraj li Qaawa’ naq te’xnaw? K’a’ru naqatzol sa’eb’ li raqal a’an chirix li nareek’a li Qaawa’ chiqix rajlal sut naq naqab’aanu k’a’ru ink’a’ us?

• Tz’iib’a Chan ru li Jesukristo? chiru li pizarron. Ilomaq ru sa’ komonil Tzol’leb’ ut Sumwank 61:1–2, 36; 62:1, ut tz’iib’a junaq xtusulal xsumenkil li patz’om a’an li te’xtaw li kok’al sa’eb’ li raqal a’an. Chan ru naq li k’a’ru tz’iib’anb’il chiru li pizarron nokoxtenq’a chixtawb’al ru k’a’ut naq li Kolonel wan xch’ool chixkuyb’al qamaak? Chan ru naru naqab’aanu lix b’aanuhom a’an?

Tzol’leb’ ut Sumwank 60:5; 61:22; 62:5–8

Li Qaawa’ naraj naq tinwoksi li xtaql inch’ool ut lix Musiq’ re xsik’b’al ru li k’a’ru us.

Chan ru naru nakawoksiheb’ li raqal a’an re xk’utb’al chiruheb’ li kok’al chan ru naq li Qaawa’ naxtenq’aheb’ chixsik’b’al ru li k’a’ru us?

Kok’ k’anjel naru chi b’aanumank

• Kanab’eb’ li kok’al chi aatinak chirix junaq hoonal b’ar wi’ tento xe’xsik’ ru xb’aanunkil k’a’ruhaq. Chan ru naq xe’xsik’ ru k’a’ru xb’aanunkil? Ilomaq ru sa’ komonil Tzol’leb’ ut Sumwank 62:5, 7–8 ut sik’omaq k’a’ru kixye li Qaawa’ reheb’ li misioneer li ak elkeb’ chaq re Missouri re xik Kirtland, Ohio. K’a’ru tento ke’xsik’ ru xb’aanunkil sa’ lix b’eenikeb’? Kʼaʼru xk’ehom qe li Qaawa’ re qatenq’ankil chi sik’ok-u? Ye reheb’ li kok’al chan ru naq laa’at nakawoksi lix b’eresihom li Musiq’ej ut laa k’a’uxl re sik’ok-u.

• K’eheb’ li kok’al sa’ oxib’ chi ch’uut ut kanab’eb’ li junjunq chi ch’uut chirilb’al ru jun reheb’ li raqal a’in, b’ar wi’ naq li Qaawa’ kixtoch’ xch’ooleb’ junjunq li misioneer chirix chan ru te’xb’aanu lix mision: Tzol’leb’ ut Sumwank 60:5; 61:22; 62:5. K’a’ru naqil sa’ li na’leb’ kixk’e li Qaawa’ sa’eb’ li raqal a’an? K’a’ut naq jo’q’ehaq us roksinkil li qak’a’uxl sa’ xna’aj royb’eninkil xna’leb’ li Dios sa’ chixjunil li k’a’aq re ru?

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixtzolb’al rik’in junaq komon sa’ lix junkab’aleb’ chan ru xwotzb’al li evangelio. Qayehaq, naru neke’xwotz k’a’ruhaq xe’xtzol sa’ li Tzoleb’aal reheb’ li Kok’al.

Xchaab’ilob’resinkil li qak’utum

Wotz lix nawom aach’ool sa’ li tzoleb’aal. Li xwotzb’al lix nawom aach’ool chi kok’ aj xsa’ tixtenq’aheb’ li kok’al chixtawb’aleb’ xnawomeb’ xch’ool. Jun xnawom ch’oolej moko xninqal ta na’leb’ naraj jo’ a’in: “Ninnaw naq li qaChoxahil Yuwa’ nekexxra chi junjunqalex” malaj “Sa naweek’a naq nintzolok chirix li Jesukristo.”

perel re kok’ k’anjel: naru ninwotz li evangelio