jun awimq sa’ eq’la

Condado Daviess, Missouri

14–20 junio

Tzol’leb’ ut Sumwank 64–66

“Li Qaawa’ naxpatz’ li aamej, ut li k’a’uxlej li k’eek’o xch’ool”

Naq nakakawresi aawib’ re k’utuk, k’oxla chan ru naru nakawoksi laa k’a’uxl re xtenq’ankileb’ li kok’al rik’ineb’ li rajom ru. Chijultiko’q aawe naq naru nakawoksi a’ yaal b’ar wan reheb’ li kok’ k’anjel sa’ li tusleb’ aatin a’in reheb’ li kok’al toj ka’ch’ineb’ xyu’am malaj li ak ninqeb’.

Tz’iib’a li nakak’oxla

reetalil li wotzok

Xkanab’ankileb’ chi wotzok

Kanab’eb’ li junjunq chi kok’al chixchapb’al jun xjalam-uuch li Kolonel ut xyeeb’al k’a’ruhaq yookeb’ chixtzolb’al chirix a’an ut chirix lix evangelio.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 64:9–10

Li Jesukristo naxpatz’ we naq tinkuyeb’ xmaak li was wiitz’in.

K’a’ru li kok’ na’leb’ malaj kok’ k’anjel nachal sa’ laa k’a’uxl re xtenq’ankileb’ li kok’al chixtawb’al ru k’a’ru naraj naxye kuyuk maak? Naq yooqat chi aatinak chirix li kuyuk maak, jultika reheb’ li kok’al naq li kuyuk maak moko naraj ta naxye naq te’qakanab’ li qas qiitz’in chiqarahob’tesinkil.

Kok’ k’anjel naru chi b’aanumank

• Il ru li ch’ol aatin “tento raj teekuy eemaak cherib’il eerib’ ” (Tzol’leb’ ut Sumwank 64:9), ut patz’ reheb’ li kok’al k’a’ru naraj naxye xkuyb’al xmaak anihaq. Re xtenq’ankileb’ chixtawb’al ru, wotzeb’ junjunq kok’ eetalil. Tenq’aheb’ chixk’utb’esinkileb’ li eetalil a’an re xtzolb’al k’a’ru li kuyuk maak.

• Il ru Tzol’leb’ ut Sumwank 64:10 chi timil ut kanab’eb’ chixchapb’aleb’ li ruq’ rik’in junaq chik ch’ina al naq te’rab’i li aatin “tinkuy xmaak” ut “xkuyb’al xmaak.” Wotz lix nawom aach’ool chirix li tuqtuukilal ut li sahil ch’oolejil na’eek’aman naq neke’qakuy xmaak li qas qiitz’in.

• B’ichahomaq jun b’ich chirix li kuyuk maak, jo’ “Chinaatenq’a re tinkuyeb’ lix maak” (B’ichleb’aal choq’ reheb’ li Kok’al, 52). K’a’ru naxk’ut li b’ich a’an chirix xkuyb’al xmaakeb’ li qas qiitz’in?

Tzol’leb’ ut Sumwank 64:34

Naru tin’ab’inq chiru li Jesus rik’in li aamej ut li k’a’uxlej.

Li Qaawa’ kixk’ut chiruheb’ laj santil paab’anel naq re xk’ojob’ankil Sion tento te’xk’e re a’an li raameb’ ut lix k’a’uxleb’ chi k’eek’o xch’ooleb’. K’oxla chan ru taatenq’aheb’ li kok’al chixk’oxlankil k’a’ru naraj naxye a’an choq’ reheb’.

Kok’ k’anjel naru chi b’aanumank

• Il ru choq’ reheb’ li kok’al Tzol’leb’ ut Sumwank 64:34: “K’ehomaq reetal, li Qaawa’ naxpatz’ li aamej, ut li k’a’uxlej li k’eek’o xch’ool.” Yaab’asi k’iila sut li ch’ol aatin a’an, rik’in xk’utb’al xjayal laa waam ut laa jolom, ut kanab’eb’ li kok’al chixb’aanunkil ajwi’ a’an. Chan ru naru naqak’e li qaam ut li qak’a’uxleb’aal re li Kolonel? (Maare us raj xyeeb’al naq li aamej a’an li qeek’ahom ut li qarahom ut li qak’a’uxleb’aal a’an li k’a’ru naqak’oxla.)

• B’ichahomaq jun li b’ich li na’aatinak chirix li rahok ut xtaaqenkil li Kolonel, jo’ “Ninnaw naq raab’ilin” (B’ichleb’aal choq’ reheb’ li Kok’al, 42–43; a’ tz’aqal li rox raqal). Chan ru naqak’ut chiru li Kolonel naq naqara? Wotz li nakaweek’a chirix li Jesukristo.

Tzolʼlebʼ ut Sumwank 66

Li Qaawa’ naxnaw anihin laa’in ut nikinixra.

Laj William E. McLellin kiwan oob’ xpatz’om choq’ re li Qaawa’. Laj Jose Smith kixk’ul xsumenkileb’ a’an sa’ jun k’utb’esinb’il na’leb’, us ta ink’a’ kixnaw b’ar wankeb’ lix patz’om laj William. Li numsihom a’an naru nakatxtenq’a chixk’utb’al chiruheb’ li kok’al naq li Dios wan rilob’aal sa’ xb’eeneb’ a’an ut naq naru naxk’e xsumenkileb’ lix patz’om.

Kok’ k’anjel naru chi b’aanumank

• Seraq’i chan ru naq li Qaawa’ kixsumeheb’ xpatz’om laj William E. McLellin sa’ jun k’utb’esinb’il na’leb’ kik’ehe’ re laj Jose Smith (chi’ilmanq xjolomil Tzol’leb’ ut Sumwank 66). Ch’olob’ xyaalal naq li qaChoxahil Yuwa’ naxnaw qu ut naraj qatenq’ankil. Kanab’eb’ li kok’al chixwotzb’al chan ru neke’xnaw naq neke’rahe’ xb’aan li Dios.

• Il ru rik’ineb’ li kok’al Tzol’leb’ ut Sumwank 66:4. Seraq’i reheb’ junaq hoonal b’ar wi’ naq li Qaawa’ kixk’ut chawu li naraj a’an naq taab’aanu. Il wi’chik ru li raqal, a’b’an anajwan oksi xk’ab’a’ junaq li ch’ina al chi sa’. K’iilasuti rikin roksinkil xk’ab’a’eb’ li junjunq chi kok’al chi sa’.

  li Jesus rik’ineb’ kok’al

  Li Jesukristo nokoxra chi junjunqal.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 64:7–10

Li Qaawa’ naraj naq tinkuyeb’ xmaak chixjunil.

Jo’ nak’utman sa’eb’ li raqal a’in, choq’ reheb’ ajwi’ lix tzolom li Jesukristo ch’a’aj li kuyuk maak. K’oxla chan ru naru nakatenq’aheb’ li kok’al chixtawb’al ru lix taql li Qaawa’ re “xkuyb’aleb’ xmaak chixjunil.” (Ch’olob’ naq li kuyuk maak moko naraj ta naxye naq te’xkanab’ rib’ chi rahob’tesiik xb’aaneb’ jalan chik kristiaan, ut naq junelik tento te’xye re junaq nimla kristiaan neke’xnaw ru wi wan ani yoo chi rahob’tesink reheb’).

Kok’ k’anjel naru chi b’aanumank

• Kanab’eb’ li kok’al chixk’oxlankil naq xe’patz’man reheb’ naq te’xk’ut chiru junaq riitz’ineb’ chirix xkuyb’aleb’ xmaak li qas qiitz’in. Chan raj ru te’xb’aanu? Kanab’eb’ chirilb’al ru Tzol’leb’ ut Sumwank 64:7–10 sa’ ka’kab’il ut te’xtaw ch’ol aatin li naru neke’roksi re k’utuk. Naru ajwi’ neke’xtzol k’utuk chirib’ileb’ rib’.

• B’ichahomaq sa’ komonil “Chinaatenq’a re tinkuyeb’ lix maak”, (B’ichleb’aal choq’ reheb’ li Kok’al, 52). Chan ru nokoxtenq’a li qaChoxahil Yuwa’ chixkuyb’aleb’ xmaak li qas qiitz’in?

• K’oxla jun na’leb’ li naru naxtenq’aheb’ li kok’al chixtawb’al ru chan ru naq “nokotawasiik” wi ink’a’ nokokuyuk maak (raqal 8). Qayehaq, k’ut chiruheb’ jun li b’oolx nujenaq rik’in sulul malaj ch’och’; ut kanab’eb’ chixk’oxlankil naq anihaq kixk’ut li sulul chirixeb’. Chan ru naq wi ink’a’ nokokuyuk maak chanchan chik xk’uulankil li sulul ut xk’amb’al junelik qik’in? K’a’ut naq chaab’il raj wi’chik xtz’eqb’al li sulul? Tenq’aheb’ li kok’al chixk’oxlankileb’ jalan chik na’leb’ li tixk’ut x’aajelil ru li kuyuk maak.

Tzol’leb’ ut Sumwank 64:33–34

Li Qaawaʼ naxpatzʼ we “li aamej, ut li kʼaʼuxlej li kʼeekʼo xchʼool.”

Xwaklesinkil Sion—malaj tenq’ank re naq li Iglees taak’iiq—a’an “jun xnimal ru k’anjel.” Re xk’eeb’al chi uxmank, li Qaawa’ naraj naq taqak’e li qaam ut li k’a’uxlej chi k’eek’o xch’ool. Li wankeb’ Sion “junajeb’ xch’ool ut junajeb’ xk’a’uxl” (Moises 7:18).

Kok’ k’anjel naru chi b’aanumank

• K’ut chiruheb’ li kok’al junjunq k’a’aq re ru li naab’al xkok’ cha’aleb’, jo’ jun jorb’a-k’a’uxlej malaj jun li poop. Tenq’aheb’ chixk’oxlankileb’ jalan chik eetalil. Kanab’eb’ chirilb’al ru Tzol’leb’ ut Sumwank 64:33. K’a’ru naraj li Qaawa’ naq taqab’aanu re xtenq’ankil chixk’eeb’al chi uxmank li “xnimal ru xk’anjel”? B’ar wan li “k’a’ru ka’ch’in” li naru naqab’aanu re tenq’ank chixk’eeb’al chi uxmank li k’anjel a’in?

• Kanab’eb’ li kok’al chixb’aanunkil jun k’anjel b’ar wi’ na’ajman ru wiib’ li k’a’aq re ru, a’b’an k’e jun ajwi’ reheb’ (qayehaq, tz’iib’ak chiru li pizarron chi maak’a’ li tz’iib’leb’ malaj xsetb’al junaq hu chi maak’a’ li setleb’). K’e xb’oqb’aleb’ chirilb’al ru Tzol’leb’ ut Sumwank 64:34 ut te’xtaw li wiib’ chi k’a’aq re ru naxpatz’ li Qaawa’ qe. K’a’ut naq tento taqak’e li qaam ut li qak’a’uxleb’aal re li Qaawa’? Chan ru naqab’aanu a’an?

Tzolʼlebʼ ut Sumwank 65

Naru nintenq’an chixkawresinkil li ruchich’och’ re xk’ulb’al li Jesukristo.

Lix k’anjel li Iglees—li rawa’b’ejihom li Dios sa’ li ruchich’och’—a’an xkawresinkil li ruchich’och’ choq’ re lix k’ulunik wi’chik li Kolonel. Eb’ li kok’al nakatzoleb’ aajeleb’ ru sa’ li k’anjel a’an. K’a’ru naru taab’aanu re xtenq’ankileb’ chi tz’aqonk?

Kok’ k’anjel naru chi b’aanumank

• Jo’ tzoleb’aal malaj sa’ ka’kab’il ilomaq ru Tzol’leb’ ut Sumwank 65, ut ajlahomaq jarub’ sut tz’iib’anb’il li aatin “kawresihomaq.” K’a’ut naq naraj li Qaawa’ naq taqakawresi qib’? K’a’ru naru naqab’aanu re xkawresinkil qib’ ut xkawresinkil li ruchich’och’?

reetalil li tzolok

Xb’oqb’aleb’ chi tzolok sa’ kab’l

Tenq’aheb’ li kok’al chixtawb’al jun raqal sa’ Tzol’leb’ ut Sumwank 64–66 li taawulaq chiruheb’ ut li te’raj xwotzb’al rik’in junaq komon sa’ lix junkab’aleb’ malaj ramiiweb’.

Xchaab’ilob’resinkil li qak’utum

Tzol xk’eeb’al reetal li k’utb’esinb’il na’leb’. Naq yooqat chi tijok ut chixtz’ilb’al rixeb’ li loq’laj hu ut li tusleb’ aatin a’in, taak’e reetal naq te’wulaq li na’leb’ ut li musiq’aak chi yalaq jo’q’e ut chi yalaq b’ar—“maare naq yooqat chi xik sa’ laa trab’aaj, naq nakatk’anjelak sa’ laa wochoch, malaj naq nakat-aatinak rik’ineb’ laa junkab’al malaj eb’ laa wamiiw” (Li k’utuk jo’ li Kolonel, 12).

perel re kok’ k’anjel: naru nintaaqe li Jesukristo rik’in lin k’a’uxl ut li waam