eb’ li karneer neke’xtaaqe li Jesus

Sutq’iik sa’ ochoch, xb’aan laj Yongsung Kim

12–18 julio

Tzolʼlebʼ ut Sumwank 77–80

“Laa’in tink’am eeb’e cheru”

Naq yooqat chixtzolb’al Tzol’leb’ ut Sumwank 77–80, sik’eb’ ch’ol aatin malaj raqal li naru neke’xtenq’aheb’ li kok’al chixtawb’aleb’ ru li na’leb’ re li evangelio. Miwiib’an aach’ool chixwotzb’aleb’ li raqal taataweb’, us ta ink’a’ wankeb’ sa’ li kok’ k’anjel wankeb’ arin.

Tz’iib’a li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixyeeb’al junjunqeb’ k’a’aq re ru neke’b’antioxin wi’. K’a’ru neke’xb’aanu a’an ut eb’ lix junkab’al re xk’utb’al chiru li qaChoxahil Yuwa’ naq neke’xb’antioxiheb’ li rosob’tesihom?

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sujmwank 77:2

Li Dios kixyo’ob’tesiheb’ chixjunil li wankeb’ xyu’am sa’ li ruchich’och’.

Li tzolok chirixeb’ li k’a’aq re ru kixyo’ob’tesi li Dios naru naxtenq’aheb’ li kok’al chireek’ankil lix rahom a’an choq’ reheb’.

Kok’ k’anjel naru chi b’aanumank

• K’uteb’ xjalam-uucheb’ k’iila xul chiruheb’ li kok’al, eb’ ajwi’ li kok’ xul ut eb’ li ninqi xik’anel xul. Naq yooqat chirilb’aleb’ li aatin “xul,” “li k’a’ru naxjukuki rib’,” ut “xik’anel xul rub’el choxa” wankeb’ sa’ Tzol’leb’ ut Sumwank 77:2, kanab’eb’ chixk’utb’aleb’ li jalam-uuch wankeb’ rilom rik’ineb’. Ch’olob’ xyaalal naq li Dios kixyo’ob’tesi chixjunileb’ li xul a’an xb’aan naq nokoxra ut naraj naq sahaq qach’ool (chi’ilmanq ajwi’ Tzol’leb’ ut Sumwank 59:16–20).

• B’icha rik’ineb’ li kok’al jun li b’ich li na’aatinak chirixeb’ lix yo’ob’tesihom li Dios, jo’ “Raab’ilin xb’aan li Dios sa’ choxa” (B’ichleb’aal choq’ reheb’ li Kok’al, 16–17). Patz’ reheb’ chan ru naq neke’reek’a lix rahom li Dios rik’in li nayeeman sa’ li b’ich.

  peepem sa’ xb’een jun utz’u’uj

  Li Dios kixyo’ob’tesi li ruchich’och’ ut chixjunil li k’a’ru wan chi sa’.

Tzol’leb’ ut Sumwank 78:6

Naru ninwotz li k’a’ru wan we rik’ineb’ li was wiitz’in.

Li qaChoxahil Yuwa’ naraj naq taqawotzeb’ li qosob’tesinkil chiqib’il qib’ re naq “juntaq’eetaqo sa’ li ruchich’och’il k’a’aq re ru” ut sa’eb’ li “choxahil k’a’aq re ru” (raqal 6).

Kok’ k’anjel naru chi b’aanumank

• Re xk’utb’al k’a’ru naraj naxye wank chi “juntaq’eet sa’ li ruchich’och’il k’a’aq re ru” (raqal 6), k’e reheb’ junjunq li kok’al xjalam-uucheb’ kristiaan wankeb’ rajom ru (jo’ kristiaan wankeb’ xtz’okajik, xtiq’ilal, malaj xke). Chirix a’an k’e reheb’ jun siir chik li kok’al k’a’aq re ru li naru neke’tenq’an (jo’ li tzakemq, jun li b’ak’leb’ tiq’il, malaj jun li isb’). Kanab’eb’ li kok’al a’an chixwotzb’al k’a’ru wan reheb’ re xtenq’ankileb’ li kristiaan wankeb’ sa’ li jalam-uuch. Kanab’eb’ ajwi’ xkomoneb’ chik li kok’al chi wotzok. Tenq’aheb’ chixtawb’al ru naq li qaChoxahil Yuwa’ naraj naq chixjunileb’ li ralal xk’ajol te’xtaw li k’a’ru aajel ru choq’ reheb’. Re a’an, a’an naxpatz’ qe chi kok’ aj xsa’ naq taqawotz li k’a’ru wan qe rik’ineb’ li qas qiitz’in.

• Il ru choq’ reheb’ li kok’al li ch’ol aatin wankeb’ rub’eleb’ li wiib’ chi jalam-uuch wankeb’ sa’ xtiklajik li “Ch’ol 28: Li Profeet aj Jose naxik Missouri wi’chik” (Eb’ li Esilal sa’ li Tzol’leb’ ut Sumwank, 108). Kanab’eb’ chixk’oxlankil naq yookeb’ chixtenq’ankil anihaq chixyiib’ankil jun ochoch, chixwotzb’al tzakemq, malaj chi k’anjelak chiru anihaq. K’a’ru naqeek’a rajlal sut naq nokotenq’an malaj naq naqawotz k’a’ruhaq? Tenq’aheb’ li kok’al chixk’oxlankileb’ k’a’aq re ru naxwotz li Jesukristo qik’in.

Tzol’leb’ ut Sumwank 78:18

Li Jesukristo tinixb’eresi.

Wi naqakanab’ qib’ chi b’eresiik xb’aan li Qaawa’, naru “chi wank xsahil qach’ool,” us ta “ink’a’ nokoru chixkuyb’al chixjunil li k’a’aq re ru anajwan” (raqal 18).

Kok’ k’anjel naru chi b’aanumank

• Kanab’eb’ li kok’al chixwotzb’aleb’ resil hoonal b’ar wi’ xe’wan jo’ aj k’amol b’e, jo’ li wank chi uub’ej sa’ jun li tzol malaj xb’eresinkil li b’ich. K’a’ru naxb’aanu jun aj k’amol b’e? K’ut jun xjalam-uuch li Kolonel naq yooqat chirilb’al ru li ch’ol aatin a’in sa’ Tzol’leb’ ut Sumwank 78:18: “Chiwanq xsahil eech’ool, xb’aan naq laa’in tink’am eeb’e.” Oksi li perel re kok’ k’anjel re li xamaan a’in re xtenq’ankileb’ li kok’al chixk’oxlankil chan ru naru naqataaqe li Kolonel.

• K’e xb’oqb’aleb’ chixtaaqenkil li Jesus ut k’ameb’ xb’e chi b’eek sa’ li tzoleb’aal ut taak’am jun xjalam-uuch a’an. B’ichahomaq ajwi’ jun li b’ich na’aatinak chirix xtaaqenkil li Jesukriso, jo’ “Chinwanq raj jo’ li Jesus” malaj “Tinsik’ ru li us” (B’ichleb’aal choq’ reheb’ li Kok’al, 40–41, 82–83). Kanab’eb’ li kok’al chixk’eeb’aleb’ xhoonal chirib’ileb’ rib’ chixchapb’al li jalam-uuch ut chixk’amb’aleb’ xb’e lix komoneb’.

reetalil li k‘utuk

Xk’utb’al li tzol’leb’: Kok’al ak ninqeb’

Tzolʼlebʼ ut Sumwank 77

Naru nink’ul xsumenkileb’ lin patz’om chirixeb’ li loq’laj hu.

Xk’utb’al chiruheb’ li kok’al chan ru naq laj Jose Smith kixsik’ xsumenkileb’ lix patz’om naru naxtenq’aheb’ chixnawb’al naq li qaChoxahil Yuwa’ tixsumeheb’ rajlal sut naq te’xsik’ lix b’eresihom. K’oxla xwotzb’aleb’ aanumsihom laa’at b’ar wi’ xak’ul xsumenkileb’ laa patz’om.

Kok’ k’anjel naru chi b’aanumank

• Il ru choq’ reheb’ li kok’al li ch’ol aatin wan rub’eleb’ li oxib’ chi jalam-uuch wankeb’ sa’ li “Ch’ol 27: Li Profeet ink’a’ naxkanab’ lix k’anjel us ta wan li rahob’tesink” (Eb’ li Esilal sa’ li Tzol’leb’ ut Sumwank, 104). Patz’ reheb’, ma wan junaq hoonal b’ar wi’ ink’a’ neke’xtaw ru k’a’ruhaq sa’eb’ li loq’laj hu, jo’ laj Jose. Kanab’eb’ chixwotzb’al lix numsihomeb’. K’a’ru kixb’aanu laj Jose re xtawb’al xsumenkileb’ lix patz’om? Seraq’i reheb’ li kok’al junaq hoonal b’ar wi’ li qaChoxahil Yuwa’ xatxtenq’a chixtawb’al ru k’a’ruhaq natawman sa’ li loq’laj hu.

• Maare taawulaq chiruheb’ li kok’al rilb’al ru junjunq li raqal sa’ li hu Apokalipsis, chirixeb’ li ke’wan wi’ xpatz’om laj Jose Smith. Chirix a’an naru neke’ril sa’ Tzol’leb’ ut Sumwank 77 k’a’ru kiraj li Qaawa’ naq tixtaw ru. Sik’eb’ ru junjunqeb’ li raqal li nakak’oxla naq wan xyaalal.

Tzol’leb’ ut Sumwank 78:3–7

Naru nintenq’an “chixwaklesinkil li na’leb’ ” re li Jesukristo.

Sa’ li tasal 78, li Qaawa’ kixk’e ch’olob’ahom choq’ reheb’ naab’al laj jolominel sa’ li Iglees, li taak’anjelaq raj re “xwaklesinkil li na’leb’ ” re li Qaawa’ (raqal 4). Tenq’aheb’ li kok’al chixk’oxlankil k’a’ru lix k’anjeleb’ sa’ xwaklesinkil lix na’leb’ li Qaawa’.

Kok’ k’anjel naru chi b’aanumank

• Kanab’eb’ li kok’al chirilb’al ru Tzol’leb’ ut Sumwank 78:4. K’a’ru li “na’leb’ ” li “k’ulub’anb’il qab’aan” naq nakub’e qaha’? Waklesi xch’ooleb’ chixtawb’aleb’ li raqal sa’eb’ li loq’laj hu jo’eb’ a’in, re naq te’xtaw xsumenkil li patz’om: Mosiah 18:8–10; Tzol’leb’ ut Sumwank 20:37; Moises 1:39.

• Ch’olob’ chiruheb’ li kok’al naq laj Newel K. Whitney a’an chaq aj eechal re jun li k’ayib’aal ut naq li Qaawa’ kixpatz’ re a’an ut reheb’ chik xkomon li winq naq te’roksi xcha’al lix tumineb’ re tenq’ank chixtojb’al lix k’anjel li Qaawa’ (chi’ilmanq Tzol’leb’ ut Sumwank 63:42–43). Kanab’eb’ chirilb’al ru Tzol’leb’ ut Sumwank 78:3–7 ut te’xsik’ k’a’ut naq kipatz’man a’an reheb’ li winq a’an. K’a’ raj ru kiqeek’a wi ta qe laa’o kipatz’e’ li k’a’ru kipatz’e’ re laj Newel? Tenq’aheb’ chixk’oxlankil chan ru naq eb’ li kristiaan neke’tenq’an sa’ lix k’anjel li Qaawa’ sa’eb’ li kutan a’in, jo’ xtojb’al li lajetqil ut xmayej li kuyuk sa’, k’anjelak sa’eb’ li b’oqb’il k’anjel, ut wan chik xkomon.

Tzol’leb’ ut Sumwank 78:19

Tento tink’ul “chixjunil li k’a’aq re ru rik’in b’antioxink.”

Naab’al sut, li Qaawa’ nokorosob’tesi chi mas wi’chik wi naqak’ut qab’antioxihom xb’aan li k’a’ru ak xk’ehom qe. Chan ru naru nakatenq’aheb’ li kok’al nakatzoleb’ chireek’ankil xb’antioxihomeb’ xb’aan li rosob’tesinkileb’?

Kok’ k’anjel naru chi b’aanumank

• Kanab’eb’ li kok’al chirilb’al ru Tzol’leb’ ut Sumwank 78:19 ut te’xtaw k’a’ru naxyeechi’i li Qaawa’ reheb’ li neke’b’antioxin. Tenq’aheb’ li kok’al chixtawb’al ru k’a’ru naraj naxye “jun cient sutaq,” maare rik’in xk’utb’al junaq k’a’aq re ru ka’ch’in ut chirix a’an jun cient chik k’a’aq re ru jo’ ajwi’ a’an.

• B’ichahomaq jun li b’ich chirix li b’antioxink, jo “B’antiox re li qaYuwa’ ” (B’ichleb’aal choq’ reheb’ li Kok’al, 15). K’e xhoonaleb’ li kok’al re naq te’xtz’iib’a jun xtusulal li k’a’aq re ru li neke’b’antioxin wi’. Waklesi xch’ooleb’ chixtz’iib’ankil chixjunil li naru chiruheb’ sa’ li hoonal taak’e reheb’.

reetalil li tzolok

Xb’oqb’aleb’ chi tzolok sa’ kab’l

K’oxla raatinankileb’ lix na’ xyuwa’eb’ li kok’al ut xyeeb’al junaq li patz’om reheb’ li naru neke’xye reheb’ lix kok’al chirix k’a’ruhaq xe’xtzol sa’ li tzoleb’aal.

Xchaab’ilob’resinkil li qak’utum

Ch’olob’ xyaalaleb’ li osob’tesihom yeechi’inb’il. Rajlal sut naq nakak’e xb’oqb’aleb’ li kok’al re li Tzoleb’aal reheb’ li Kok’al chixyu’aminkil junaq na’leb’, aatinan chirix li yeechi’ihom li naxk’e li Dios reheb’ li neke’xyu’ami li na’leb’ a’an. Jun reetalil li yeechi’ihom li naru nakawotz natawman sa’ Tzol’leb’ ut Sumwank 78:19. (Chi’ilmanq ajwi’ Li k’utuk jo’ li Kolonel, 35.)

perel re kok’ k’anjel: li Jesukristo tinixb’eresi