Li Kristo ut li saaj aj b’ihom, xb’aan laj Heinrich Hofmann

19–25 julio

Tzolʼlebʼ ut Sumwank 81–83

B’ar “k’eeb’il naab’al, naab’al li teneb’anb’il”

Chan ru naru neke’tenq’aak li kok’al nakatzoleb’ xb’aaneb’ li k’utb’esinb’il na’leb’ neke’tawman sa’ Tzol’leb’ ut Sumwank 81–83 chixb’aanunkil li chaab’il chirib’ileb’ rib’ sa’ junkab’al ut rik’ineb’ li ramiiw?

Tz’iib’a li nakak’oxla

Xkanab’ankileb’ chi wotzok

Kanab’eb’ li kok’al chi aatinak chirix k’a’ruhaq xe’xb’aanu chiru li xamaan a’in re xtenq’ankil anihaq. Chan ru naq li k’anjelak chiruheb’ li qas qiit’zin naru nokoxtenq’a chi wulak jo’ li Kolonel?

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 81:3

Tento tintijoq junelik.

Naq li Qaawa’ kixb’oq laj Frederick G. Williams jo’ aj tenq’ aj k’ehol na’leb’ re li profeet aj Jose Smith, kixye re naq taawanq chi “tiik chi paab’ank … sa’ tijok junelik.”

Kok’ k’anjel naru chi b’aanumank

• Il ru choq’ reheb’ li kok’al li na’leb’ kixk’e li Qaawa’ re wank chi “tiik chi paab’ank … sa’ tijok junelik, rik’in xyaab’ aakux ut sa’ laa ch’ool, chi k’utk’u ut aajunes” (Tzol’leb’ ut Sumwank 81:3). Ch’olob’ k’a’ru naraj naxye tijok sa’ ch’oolej ut wotz junaq aanumsihom laa’at. Tenq’aheb’ li kok’al chixk’oxlankileb’ hoonal b’ar wi’ ke’tijok “chi k’utk’u ut xjuneseb’.”

• K’ut chiruheb’ li kok’al chan ru li tijok. Jultika naq naru neke’xb’antioxi re li qaChoxahil Yuwa’ li rosob’tesinkileb’ ut naru neke’xpatz’ re li aajel ru choq’ reheb’. Jun li b’ich na’aatinak chirix li tijok, jo’ “B’antiox, at Yuwa’ ” (B’ichleb’aal choq’ reheb’ li Kok’al, 9), naru naxtenq’aheb’ li kok’al chixnawb’al k’a’ru te’xye sa’ lix tijeb’. K’e xhoonal chixjunjunqaleb’ re xkeeb’al junaq ch’ina tij.

• Kanab’eb’ li kok’al chixk’oxlankileb’ k’a’aq re ru li naru neke’xb’antioxi chiru li qaChoxahil Yuwa’, malaj naru neke’xtz’aama chiru. Kanab’eb’ chixyiib’ankileb’ xjalam-uuch li k’a’aq re ru a’an ut te’xk’ut sa’ li tzoleb’aal.

Tzolʼlebʼ ut Sumwank 81:5; 82:19

Naru nink’anjelak chiruheb’ li wankeb’ chinsutam.

Li qaChoxahil Yuwa’ naxnaw k’a’ru li rajomeb’ ru li ralal xk’ajol ut wan naq naroksiheb’ jalan chik kristiaan, jo’eb’ li kok’al nakatzoleb’, re naq te’tenq’anq chixtz’aqob’resinkil ru li k’a’ru aajel ru. Chan ru naru nakatenq’aheb’ li kok’al chixk’eeb’aleb’ reetal li rajomeb’ ru jalaneb’ chik kristiaan ut chi k’anjelak chiruheb’?

Kok’ k’anjel naru chi b’aanumank

• Il ru Tzol’leb’ ut Sumwank 81:5 choq’ reheb’ li kok’al ut tenq’aheb’ chixtawb’al ru li ch’ol aatin jo’ “k’e xtenq’ankileb’ li q’uneb’ xmetz’ew” ut “taqsi li uq’ej li nalukta.” Kanab’eb’ chixk’utb’esinkil chan ru naru naqab’aanu li naxpatz’ li Qaawa’ sa’ li raqal a’an. Oksiheb’ li jalam-uuch malaj video re xwotzb’aleb’ kok’ seraq’ b’ar wi’ li Jesukristo kik’anjelak chiruheb’ li ras riitz’in (chi’ilmanq Hu reheb’ li Jalam-uuch re li Evangelio, 41, 42, 46, 47, 55; biblevideos.ChurchofJesusChrist.org). Chan ru naru naqataaqe lix b’aanuhom li Kolonel naq kixtenq’aheb’ li ras riitz’in?

• B’ichahomaq li xkaa raqal re li b’ich “Ninnaw naq raab’ilin” (B’ichleb’aal choq’ reheb’ li Kok’al, 42–43) malaj junaq chik li b’ich na’aatinak chirix li k’anjelak chiruheb’ li qas qiitz’in. Seraq’i reheb’ chirix junaq hoonal b’ar wi’ anihaq xatxtenq’a chireek’ankil lix rahom li Kolonel naq xk’anjelak chawu.

• Il ru choq’ reheb’ li kok’al Tzol’leb’ ut Sumwank 82:19 rik’in xjultikankil li ch’ol aatin “li junjunq chi winq yooq chixsik’b’al xchaab’ilal li ras riitz’in.” Ch’olob’ naq a’an naraj naxye xb’aanunkil k’a’aq re ru re xtenq’ankil li qas qiitz’in, jo’ ajwi’ li qajunkab’al. Tenq’aheb’ li kok’al chixk’oxlankil chan ru naru neke’k’anjelak chiruheb’ li ras riitz’in chiru li xamaan a’in.

  

  Li Dios naxpatz’ qe naq took’anjelaq chiruheb’ li qas qiitz’in re naq taqak’ut qarahom choq’ re a’an.

Tzol’leb’ ut Sumwank 82:10

Li Dios naxyeechi’i wosob’tesinkil wi nin’ab’in chiru.

Naq yookeb’ chi k’iik, eb’ li kok’al maare te’xpatz’ k’a’ut naq li Dios naxk’e chaq qe naab’aleb’ li taqlahom. Naru nakatenq’aheb’ chixtawb’al ru naq a’an naxk’eheb’ chaq qe lix taqlahom re qosob’tesinkil.

Kok’ k’anjel naru chi b’aanumank

• Tenq’aheb’ li kok’al chixk’oxlankileb’ li taqlahom xk’ehomeb’ chaq qe li Dios (chi’ilmanq, jo’ eetalil, Exodo 20:4–17; Mateo 22:37–39; Tzol’leb’ ut Sumwank 89:5–17). Yiib’eb’ jalam-uuch chiru li pizarron li tixtenq’aheb’ li kok’al chixtawb’al ruheb’ li taqlahom a’an. K’eheb’ reetalil chan ru naq eb’ lix taqlahom li Dios naru nokohe’rosob’tesi ut neke’xkol qix.

• Il ru choq’ reheb’ li kok’al: “Laa’in, li Qaawa’, wankin chi teneb’anb’il naq nekeb’aanu li k’a’ru ninye” (Tzol’leb’ ut Sumwank 82:10). Kanab’eb’ chixk’iilasutinkil li ch’ol aatin a’an aawochb’een. K’oxla chan ru naru nakatenq’aheb’ chixjultikankil, jo’ xkanab’ankileb’ chixpoq’b’al xsa’ li ruq’eb’ sa’ xyeeb’al li ch’ol aatin. Ch’olob’ xyaalal naq wi naqapaab’eb’ lix taqlahom li Dios, a’an naxtz’aqob’resi ru li k’a’ru naxyeechi’i qe.

Xk’utb’al li tzol’leb’: Kok’al ak ninqeb’

Tzol’leb’ ut Sumwank 81:3

Naru nintijok “rik’in xyaab’ inkux ut sa’ lin ch’ool.”

Chan ru naru nakamusiq’aheb’ li kok’al chixsik’b’al li Qaawa’ “sa’ tijok junelik” naq wan rajomeb’ ru?

Kok’ k’anjel naru chi b’aanumank

• Kanab’ jun li ch’ina al chirilb’al ru Tzol’leb’ ut Sumwank 81:3, ut patz’ reheb’ chixjunileb’ k’a’ru naraj naxye tijok “sa’ laa ch’ool.” Wotz junaq aanumsihom b’ar wi’ laa’at xattijok rik’in xyaab’ aakux malaj sa’ laa ch’ool ut li Qaawa’ xatxtenq’a. Kanab’eb’ li kok’al chixwotzb’aleb’ lix numsihomeb’. Chan ru naq li tijok nokoxnach’ob’resi rik’in li qaChoxahil Yuwa’?

• Il ru malaj b’icha rik’ineb’ li kok’al jun li b’ich chirix li tijok, jo’ “Ma tijok xayal?” malaj “Tijok sa’ muqmu” (Eb’ li B’ich, 81, 79). Kanab’eb’ chixwotzb’al junaq li ch’ol aatin re li b’ich li naxtenq’aheb’ chixtawb’al ru k’a’ruhaq chirix li tijok. K’e xhoonaleb’ chi k’oxlak chirix li k’a’ru naru neke’xb’aanu re xchaab’ilob’resinkileb’ lix tij ut chirix a’an te’xtz’iib’a lix na’leb’eb’.

Tzol’leb’ ut Sumwank 81:5

Li Dios naraj naq tink’anjelaq chiruheb’ ut tinkawob’resiheb’ li wankeb’ rajom ru.

Tenq’aheb’ li kok’al chixtawb’al ru naq k’iila paay chan ru naru neke’k’anjelak rajlal kutan chiruheb’ li komon sa’ lix junkab’aleb’, eb’ li ramiiw, ut eb’ li rech kab’al.

Kok’ k’anjel naru chi b’aanumank

• Yiib’ xjalam-uucheb’ uq’ej ut xb’een aqej chiru li pizarron. Kanab’eb’ li kok’al chirilb’al ru Tzol’leb’ ut Sumwank 81:5 ut te’ril k’a’ru naxye li Qaawa’ chirixeb’ xcha’alil li tib’elej a’an. Aatinanqex chirix chan ru naq laa’at ut eb’ li kok’al eerilom chan ru naq jalaneb’ chik kristiaan neke’k’anjelak chirib’ileb’ rib’. Chan ru naru naqak’eheb’ reetal li kristiaan wankeb’ rajom ru sa’ li qasutam? Kanab’eb’ li kok’al chi k’anjelak chiru junaq kristiaan chiru li xamaan a’in. Re xtawb’al eena’leb’ chirix chan ru k’anjelak chiruheb’ qas qiitz’in, b’ichahomaq jun li b’ich li na’aatinak chirix a’an, jo’ “Ma chaab’il anajwan xinb’aanu arin?” (Eb’ li B’ich, 143).

• Kanab’eb’ li kok’al chixk’eeb’aleb’ xhoonal chirib’ileb’ rib’ chixtusb’aleb’ kok’ domino chi xaqxo, naq yooqeb’ chixyeeb’al chan ru naru neke’k’anjelak chiruheb’ li kristiaan. Kanab’ junaq reheb’ a’an chixtiikisinkil junaq li domino ut te’ril k’a’ru nak’ulman rik’ineb’ lix komon. Chan ru naq li qak’anjel naru naxb’aanu jo’ ajwi’ a’an rik’ineb’ li kristiaan wankeb’ sa’ qasutam? (Chi’ilmanq ajwi’ li video “Dominoes,” ChurchofJesusChrist.org.) Seraq’i naq xb’aan naq jun kristiaan kixb’aanu jun k’anjel choq’ aawe kiwakli aach’ool chixtenq’ankil ajwi’ junaq chik kristiaan.

Tzol’leb’ ut Sumwank 82:8–10

Li Dios naxyeechi’i wosob’tesinkil wi nin’ab’in chiru.

Naq eb’ li kok’al yooqeb’ chi kawuuk xch’ool chirixeb’ lix yeechi’ihom li Dios, wanqeb’ chik xch’ool chixpaab’ankileb’ lix taqlahom.

Kok’ k’anjel naru chi b’aanumank

• Kanab’eb’ li kok’al chixk’oxlankil naq jun reheb’ li ramiiw naxk’oxla naq mas naab’aleb’ li taqlahom naxke’ chaq qe li Dios. Kanab’eb’ chixtawb’al k’a’ruhaq sa’ Tzol’leb’ ut Sumwank 82:8–10 li naru naxtenq’aheb’ li ramiiw chixtawb’al ru k’a’ut naq li Dios naxk’eheb’ chaq qe lix taqlahom. Wotz chan ru naq eb’ lix taqlahom li Dios nakatrosob’tesi ut kanab’eb’ li kok’al chixwotzb’al ajwi’ lix na’leb’eb’ chirix a’an.

• Re xtenq’ankileb’ li kok’al chixtawb’aleb’ ru lix yeechi’ihom li Dios choq’ qe, k’eheb’ li kok’al sa’ oxib’ ch’uut ut k’e reheb’ li junjunq chi ch’uut eb’ li raqal a’in reheb’ li loq’laj hu re naq te’ril ru: Tzol’leb’ ut Sumwank 1:37–38; 82:10; 130:20–21. Kanab’eb’ chixwotzb’al li xe’xtzol chirixeb’ lix yeechi’ihom li qaChoxahil Yuwa’. Chan ru naq eb’ li osob’tesihom neke’qak’ul wankeb’ rilom rik’in naq noko’ab’in? Tenq’aheb’ li kok’al chixk’oxlankileb’ reetalil lix yu’ameb’ malaj sa’eb’ li loq’laj hu b’ar wi’ naq sa’ xk’ab’a’ li ab’ink ke’ux rosob’tesihom li Dios.

• Wotz junaq aanumsihom li tixch’olob’ xyaalaleb’ li na’leb’ neke’k’utman sa’ Tzol’leb’ ut Sumwank 82:8–10. Chan ru naq xatwulak chixkanab’ankil aawib’ sa’ ruq’ li Qaawa’ ut sa’ ruq’eb’ lix yeechi’ihom?

Xb’oqb’aleb’ chi tzolok sa’ kab’l

Kanab’eb’ li kok’al chixk’oxlankil chan raj ru taawulaq chiruheb’ k’anjelak chiru anihaq sa’ lix junkab’aleb’ chiru li xamaan a’in. Chiru li tzolok sa’ li xamaan chal re, kanab’eb’ chi aatinak chirix li xe’xb’aanu.

Xchaab’ilob’resinkil li qak’utum

Tenq’aheb’ li kok’al chi tzolok chi chaab’il. Li k’utuk moko ka’ajwi’ ta naraj naxye xk’utb’al li yaal. Naraj b’an ajwi’ naxye xtenq’ankileb’ li li qas qiitz’in chixchaab’ilob’resinkileb’ rib’ sa’ musiq’ej. Qayehaq, sa’ xna’aj ka’ajwi’ xyeeb’al reheb’ li kok’al chan ru te’k’anjelaq chiruheb’ li kristiaan, waklesi xch’ooleb’ chixtawb’aleb’ xna’leb’eb’ a’an.