laj Jose Smith naxk’ul li Tijonelil re Melkisedek

K’ojob’ank wi’chik, xb’aan li xLiz Lemon Swindle

26 julio–1 agosto

Tzolʼlebʼ ut Sumwank 84

“Li wankilal re choxahilal”

Naq yooqat chirilb’al ru Tzol’leb’ ut Sumwank 84, k’a’ruheb’ li yaal nakaweek’a naq taach’olob’ chiruheb’ li kok’al nakatzoleb’? Tz’iib’aheb’ li na’leb’ taak’ul rik’in li Santil Musiq’ej.

Tz’iib’a li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixyeeb’al k’a’ru neke’xnaw chirix li tijonelil. Naru nakak’ut xjalam-uuch jun kristiaan li yoo chixk’ulb’al jun rosob’tesinkil rik’in lix wankilal li tijonelil, jo’eb’ li neke’tawman sa’ li Hu reheb’ li Jalam-uuch re li Evangelio, 103–110, ut taapatz’ reheb’ li kok’al chan ru naq li tijonelil narosob’tesiheb’ li junkab’al.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 84:19–22, 26–27

Li tijonelil a’an xwankil li Dios.

Ma neke’xnaw li kok’al k’a’ruheb’ li rajb’al li tijonelil? Sa’ Tzol’leb’ ut Sumwank 84, li Qaawa’ naxk’utb’esi jun reheb’ li rajb’al: qatenq’ankil chi q’ajk rik’in li qaChoxahil Yuwa’. (Re xnawb’al xkomon na’leb’ chirix li tijonelil, chi’ilmanq Temas del Evangelio, “Sacerdocio,” topics.ChurchofJesusChrist.org.)

Kok’ k’anjel naru chi b’aanumank

• Il ru Tzol’leb’ ut Sumwank 84:20, ut kanab’eb’ li kok’al chi xaqliik naq te’rab’i li aatin “k’ojob’anb’il k’anjel.” Re xtenq’ankileb’ chixtawb’al ru k’a’ru li k’ojob’anb’il k’anjel, k’uteb’ xjalam-uuch junjunqeb’ li k’ojob’anb’il k’anjel re li tijonelil, jo’ li neke’tawman sa’ li Hu reheb’ li Jalam-uuch re li Evangelio, 103–108, ut kanab’eb’ chixch’olob’ankil li neke’ril sa’ li junjunq chi jalam-uuch (chi’ilmanq ajwi’ li K’utul Raqal reheb’ li Loq’laj Hu, “K’ojob’anb’il k’anjel”). Ch’olob’ naq li qaChoxahil Yuwa’ kixk’eheb’ chaq qe li k’ojob’anb’il k’anjel a’an re qatenq’ankil chi q’ajk rik’in a’an.

• Kanab’eb’ li kok’al chixb’onb’al li perel re kok’ k’anjel. Naq yooqeb’ chixb’aanunkil, ch’olob’eb’ li jalan jalanq chi k’ojob’anb’il k’anjel re li tijonelil neke’k’utman sa’ li perel ut k’a’ut naq nakab’antioxiheb’ a’an.

Tzol’leb’ ut Sumwank 84:77

Laa’in ramiiw li Jesus naq nintaaqe.

Chan ru naru nakatenq’aheb’ li kok’al chixnawb’al naq li Kolonel nokoxra, mas wi’chik chiru li nokoxra junaq qamiiw?

Kok’ k’anjel naru chi b’aanumank

• K’ut junaq xjalam-uuch li Kolonel naq yooqat chirilb’al ru Tzol’leb’ ut Sumwank 84:77. Kanab’eb’ li kok’al chixk’utb’al chi ru’uj ruq’eb’ lix jalam-uuch li Kolonel rajlal sut naq te’rab’i li aatin “ex raab’ilex inb’aan.” Ch’olob’ naq junelik naq naqayal xpaab’ankileb’ li taqlahom, naqak’ut chiru li Jesus naq naqara. Ch’olob’ k’a’ru naraj naxye choq’ aawe naq li Jesus a’an laa wamiiw.

• Tenq’aheb’ li kok’al chixyeeb’aleb’ k’a’aq re ru naru neke’xb’aanu re xk’utb’al naq neke’xra li ramiiweb’. K’a’ru kixb’aanu li Jesus re xk’utb’al chiqu naq a’an li qamiiw? K’a’ru naru naqab’aanu re xk’utb’al chiru li Kolonel naq laa’o li ramiiw? B’ichahomaq sa’ komonil jun li b’ich li na’aatinak chirix li Jesus, jo’ “Li Jesus narahok qe” (B’ichleb’aal choq’ reheb’ li Kok’al, 37).

Tzol’leb’ ut Sumwank 84:88

Li qaChoxahil Yuwa’ naxtenq’aheb’ lix misioneer.

Maare chaab’il xk’oxlankil li wank jo’ misioneer sa’ jun kutan, maare ajwi’ xiwxiw choq’ reheb’ junjunq li kok’al. Li raqal Tzol’leb’ ut Sumwank 84:88 naru naxk’ut chiruheb’ chan ru naq li qaChoxahil Yuwa’ naxtenq’aheb’ li ani naxtaqlaheb’ chixjultikankil lix evangelio.

Kok’ k’anjel naru chi b’aanumank

• Tenq’aheb’ li kok’al chixk’oxlankil li misioneer neke’xnaweb’ ru. Ye reheb’ naq li qaChoxahil Yuwa’ xb’aanuhom jun chaab’il yeechi’ihom choq’ reheb’ li misioneer a’an. Il ru Tzol’leb’ ut Sumwank 84:88, ut tenq’aheb’ li kok’al chixk’oxlankil li k’anjel li wankeb’ rilom rik’ineb’ li yeechi’ihom wankeb’ sa’ li raqal a’an. Wotz rik’ineb’ resil junaq hoonal b’ar wi’ xatk’anjelak chiru li Qaawa’ ut xaweek’a naq a’an wan aawik’in, jo’ ch’olob’anb’il sa’ li raqal 88.

• Wotz’ li seraq’ chirix li ch’ina al aj kaahib’ chihab’ xyu’am li natawman sa’ li raatin li Elder Takashi Wada “Xtzekankil xsahil li raatin li Kristo” (Jolomil ch’utub’aj-ib’ re abril 2019). Tenq’a li junjunq chi kok’al chixk’oxlankil k’a’ruhaq li naru naxye re xwotzb’al lix nawom xch’ool rik’in anihaq— jo’ xwotzb’al jun xraqalil li paab’aal. Kanab’ li junjunq chi kok’al chixk’utb’esinkil naq chanchan ta wi’ yookeb’ chixwotzb’al li evangelio rik’in junaq ramiiw. Ch’olob’ xyaalal naq li qaChoxahil Yuwa’ nokoxtenq’a chixnawb’al k’a’ru tento taqaye naq noko’aatinak rik’ineb’ li kristiaan chirix li evangelio.

reetalil li k‘utuk

Xk’utb’al li tzol’leb’: Kok’al ak ninqeb’

Tzolʼlebʼ ut Sumwank 84:4–5, 18–28, 30

Eb’ li k’ojob’anb’il k’anjel re li tijonelil nikine’xtenq’a chixkawresinkil wib’ chi wank wi’chik rik’in lin Choxahil Yuwa’.

Naq yooqeb’ chi k’iik, eb’ li kok’al naru neke’tz’aqon sa’eb’ li k’ojob’anb’il k’anjel re li tijonelil, jo’ li kub’iha’ ut li k’ojob’aak sa’ li santil ochoch jo’ ruuchileb’ li kristiaan kamenaqeb’. Chan ru naru nakatenq’aheb’ chixtawb’aleb’ ru li rajb’al ut lix wankilal li k’ojob’anb’il k’anjel re li tijonelil?

Kok’ k’anjel naru chi b’aanumank

• Tz’iib’a Tijonelil re Aaron ut Tijonelil re Melkisedek chiru li pizarron. Ilomaq ru sa’ komonil Tzol’leb’ ut Sumwank 84:18, 26–28, 30, ut tenq’aheb’ li kok’al chixyeeb’aleb’ li yaal neke’xtzol sa’eb’ li raqal a’an chirix li Tijonelil re Aaron. Chirix a’an ilomaq ru sa’ komonil Tzol’leb’ ut Sumwank 84:18–25, ut aatinanqex chirixeb’ li yaal re li Tijonelil re Melkisedek.

• Kanab’eb’ li kok’al chixyeeb’al k’a’ruheb’ li k’ojob’anb’il k’ankel li ak xe’tz’aqon wi’ malaj li xe’wan wi’ jo’ aj yehol nawom, jo’eb’ li kub’iha’, k’ojob’ank, osob’tesink rik’in li tijonelil, malaj li loq’laj wa’ak. Kanab’eb’ chixwotzb’al lix numsihomeb’ rik’ineb’ li k’ojob’anb’il k’anjel a’an. Ilomaq ru sa’ komonil Tzol’leb’ ut Sumwank 84:20 (tenq’aheb’ chixtawb’aleb’ ru li aatin li ink’a’ neke’xnaw ru). K’a’ut naq li Qaawa’ nokoxb’oq chi tz’aqonk sa’eb’ li k’ojob’anb’il k’anjel? Chan ru nokoxtenq’a li tijonelil chi q’ajk rik’in li qaChoxahil Yuwa’?

  eb’ li kok’al neke’tz’aqon sa’ li loq’laj wa’ak

  Eb’ li k’ojob’anb’il k’anjel nokohe’xtenq’a chixjultikankileb’ li yeechi’ink naqab’aanu rik’in li Dios.

• Yiib’ jun jorb’a-k’a’uxlej rik’in xjalam-uuch jun santil ochoch. Il ru rik’ineb’ li kok’al Tzol’leb’ ut Sumwank 84:5, ut k’e xb’oqb’aleb’ chirab’inkil k’a’ru kixpatz’ li Qaawa’ reheb’ laj santil paab’anel naq te’xkab’la. K’e reheb’ li junjunq chi kok’al jun xcha’al li jorb’a-k’a’uxlej ut kanab’eb’ chixwotzb’al k’a’ruhaq naru neke’xb’aanu re xkawresinkil rib’eb’ re ok sa’ li santil ochoch.

Tzol’leb’ ut Sumwank 84:64–72, 81–88

Li Qaawa’ naxkoleb’ rix ut naxtiqib’eb’ li misioneer rik’in wankilal.

Sa’eb’ li raqal a’an wankeb’ li yeechi’ihom kixk’e li Qaawa’ choq’ reheb’ li ani naxb’oqeb’ chixjultikankil lix evangelio. Eb’ li yeechi’ihom a’an naru ajwi’ naxmusiq’aheb’ li kok’al naq yooqeb’ chixwotzb’al lix evangelio li Jesukristo.

Kok’ k’anjel naru chi b’aanumank

• K’eheb’ li kok’al sa’ ka’kab’il ut kanab’eb’ chirilb’al ru junjunqeb’ li raqal sa’ Tzol’leb’ ut Sumwank 84:64–72, 81–88. Kanab’eb’ chixsik’b’aleb’ lix yeechi’ihom li Qaawa’ choq’ reheb’ li neke’wotzok re lix evangelio. Kanab’eb’ chixwotzb’al sa’ li tzoleb’aal li k’a’ru xe’xtzol. Tenq’aheb’ li kok’al chixk’oxlankileb’ kristiaan neke’xnaweb’ ru malaj kristiaan sa’eb’ li loq’laj hu li ke’xk’ul xtenq’ankil naq ke’xjultika li evangelio (jo’ laj Samuel aj Lamanita [chi’ilmanq Helaman 13:2–4; 16:6–7] malaj laj Ammon [chi’ilmanq Alma 17:32–38]). Wotz junaq aanumsihom b’ar wi’ xaweek’a lix tenq’ li Qaawa’ naq nakatk’anjelak chiru.

• K’ameb’ kok’ sek’ re uk’ak malaj jalaneb’ chik kok’ sek’ sa’ li tzoleb’aal. Tz’iib’a chiru kok’ setb’il hu chan ru naq eb’ li kok’al naru neke’wan jo’ misioneer anajwan ut k’e jun li ch’ina setb’il hu sa’ li junjunq chi kok’ sek’. Junajiheb’ li kok’ sek’ chiru li tz’ak chi chunchuukeb’. Kanab’eb’ li kok’al chixk’eeb’aleb’ xhoonal chirib’ileb’ rib’ re xkutb’al junaq ch’ina k’a’aq re ru chi sa’ junaq reheb’ li ch’ina sek’ ut chirix a’an te’xk’utb’esi li naxye li ch’ina hu wan sa’ li sek’ a’an. Chan ru naru nokoxtenq’a li qaChoxahil Yuwa’ chixwotzb’al li evangelio rik’ineb’ li qas qiitz’in, us ta ch’a’aj malaj wan li qaxiw?

• Tenq’aheb’ li kok’al chirilb’al naq chiqajunilo laa’o komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, b’antiox re li k’anjel re xjultikankil li evangelio—maare laa’o kootzole’ xb’aaneb’ li misioneer, maare eb’ li qana’ qayuwa’, malaj eb’ li qaxe’ qatoon. Seraq’i reheb’ li kok’al chan ru naq eb’ li misioneer xate’xtenq’a laa’at malaj eb’ laa xe’ aatoon re xk’ulb’al li evangelio, Kanab’eb’ li kok’al chixwotzb’al lix numsihomeb’ jo’ ajwi’ a’an. Waklesi xch’ooleb’ re naq te’xpatz’ reheb’ lix na’ xyuwa’ chan ru naq li xb’een komon re li Iglees sa’ lix junkab’aleb’ kixtzol li evangelio.

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixb’aanunkil k’a’ruhaq chiru li xamaan a’in re xwotzb’al li evangelio re anihaq sa’ li rochocheb’ malaj rik’in junaq ramiiweb’. Waklesi xch’ooleb’ re naq te’xpatz’ xtenq’ re li qaChoxahil Yuwa’ ut naq te’xk’e xch’ool chixk’eeb’al reetal li tixb’aanu a’an re xtenq’ankileb’.

Xchaab’ilob’resinkil li qak’utum

Oksiheb’ li junxaqalil. “Lix k’ihaleb’ li kok’al (ut eb’ li ak ninqeb’) neke’tzolok chi us wi neke’roksi lix junxaqalileb’. Sik’ chan ru naru nakatenq’aheb’ li kok’al rik’in li ilok, rik’in li ab’ink, ut rik’in li ch’e’ok naq yookeb’ chi tzolok” (Li k’utuk jo’ li Kolonel, 25).

perel re kok’ k’anjel: li tijonelil a’an lix wankilal li Dios