laj Jose Smith najultikan aatin

4–10 octubre

Tzolʼlebʼ ut Sumwank 111–114

“Laa’in tintuqub’ chixjunil li k’a’aq re ru choq’ re lee chaab’ilal”

Li Hermana Cheryl A. Esplin, li kiwan choq’ xkab’ aj tenq’ aj k’ehol na’leb’ sa’ li Awa’b’ejil re li Tzoleb’aal reheb’ li Kok’al, kixk’ut naq tento “te’qatenq’a li qakok’al re naq li tzol’leb’ taa’ok sa’ li raameb’ toj reetal naq … taak’utunq sa’ lix na’leb’eb’ ut sa’ lix b’aanuhomeb’ chiru lix yu’ameb’ ” (“Enseñar a nuestros hijos a comprender,” Liahona, mayo 2012, 10).

Tz’iib’a li nakak’oxla

reetalil li wotzok

Xkanab’ankileb’ chi wotzok

Re xwaklesinkil xch’ooleb’ li kok’al chi wotzok, k’ameb’ junjunq k’a’aq re ru li wankeb’ rilom rik’in junaq na’leb’ xe’xtzol sa’ li xamaan xnume’. Kanab’eb’ chi aatinak chirixeb’ li k’a’ru najultiko’ reheb’ rik’ineb’ li k’a’aq re ru a’an.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 11:2, 10–11

Eb’ li k’a’aq re ru re li Dios naru neke’wan jo’ b’ihomal choq’ we.

Naq eb’ li kok’al neke’xtz’il rix li aatin b’ihomal, naru neke’xk’oxlaheb’ k’a’aq re ru jalan chiruheb’ li b’ihomal neke’yeeman sa’ Tzol’leb’ ut Sumwank 11:2, 10. Chan ru naru nakatenq’aheb’ chixraab’al li k’a’aq re ru re li Dios?

Kok’ k’anjel naru chi b’aanumank

• B’oqeb’ li kok’al chixyiib’ankil xjalam-uuch li k’a’ru nachal sa’ xk’a’uxleb’ naq neke’rab’i li aatin b’ihomal. Juntaq’eeta li k’a’aq re ru naril li ruchich’och’ jo’ b’ihomal rik’in li k’a’aq re ru naxra li Qaawa’ (chi’ilmanq Tzol’leb’ ut Sumwank 11:2, 10–11), jo’ lix tenamit, li seeb’il na’leb’, li tiikilal, ut lix sik’b’al ru li us.

• Tenq’aheb’ li kok’al chixtz’aqob’resinkil ru li perel re kok’ k’anjel re li xamaan a’in. K’a’ru naqatzol chirix li Jesus rik’in li naxra a’an? Chan ru naru nokowan mas wi’chik jo’ a’an?

Tzol’leb’ ut Sumwank 112:10

Li Qaawa’ tinixb’eresi chi uq’ej ut tixsumeheb’ lin tij.

Tzol’leb’ ut Sumwank 112:10 naru naxtenq’aheb’ li kok’al chixnimob’resinkil lix paab’aaleb’ chirix naq li Jesukristo tixb’eresiheb’ ut tixk’ameb’ xb’e chiru lix yu’ameb’.

Kok’ k’anjel naru chi b’aanumank

• Tenq’aheb’ li kok’al chixk’oxlankileb’ hoonal b’ar wi’ aajel ru xchapb’al ruq’ junaq li komon re li junkab’al, jo’ sa’ nume’k sa’ xyi junaq li b’e malaj re k’ojob’ank ch’oolej. Maare te’raj xk’utb’esinkil junjunqeb’ re li eetalil te’xwotz. Il ru Tzol’leb’ ut Sumwank 112:10. K’a’ut naq naqaj naq li Qaawa’ “tooxb’eresi chi quq’ ”?

• Lan li ru jun ch’ina al ut patz’ re naq taab’eeq sa’ li tzoleb’aal chi chapcho li ruq’ xb’aan anihaq chik. Seraq’i junaq numsihom b’ar wi’ laa’at kaweek’a naq li Qaawa’ katxb’eresi chawuq’.

  li Jesus rik’in jun ch’ina al ut lix na’

  Waklin ut b’een, xb’aan laj Simon Dewey

Tzol’leb’ ut Sumwank 112:11

Li Jesus naraj naq tinraheb’ chixjunil li kristiaan.

Tenq’aheb’ li kok’al chixnawb’al naq li Qaawa’ naraj naq te’qara chixjunileb’ li kristiaan, eb’ ajwi’ li ink’a’ useb’ xna’leb’ qik’in.

Kok’ k’anjel naru chi b’aanumank

• Naq yooqat chixwotzb’al li “Ch’ol 41: Li ch’a’ajkilal sa’ Kirtland” (Eb’ li Esilal sa’ li Tzol’leb’ ut Sumwank, 158–160), patz’ reheb’ li kok’al naq te’xyiib’ junaq aamej rik’ineb’ li ruq’ rajlal sut naq te’rab’i naq wan ani xb’aanu li us. Tenq’aheb’ chixtawb’al ru naq li Qaawa’ naraj naq te’qara chixjunileb’ li kristiaan, eb’ ajwi’ li maare neke’xsik’ ru li ink’a’ us.

• Yiib’ junaq uhej ra xch’ool chiru li pizarron ut patz’ reheb’ li kok’al chan ru naru naqak’ut qarahom chiruheb’ li kristiaan raheb’ xch’ool (chi’ilmanq Tzol’leb’ ut Sumwank 112:11). Naq yooqeb’ chixwotzb’al lix na’leb’eb’, jal ru li uhej ra xch’ool rik’in junaq sa xch’ool. Wotz lix nawom aach’ool chirix li wankilal nak’ulman rik’in xraab’aleb’ li qas qiitz’in. B’ichahomaq sa’ komonil jun li b’ich na’aatinak chirix li rahok, jo’ “Chiqara li qas qiitzʼin” (B’ichleb’aal choq’ reheb’ li Kok’al, 39).

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 112:10

Naru ninwan chi tuulan inch’ool ut tinsik’ xb’eresihom li Dios.

Li qaChoxahil Yuwa’ naraj naq taqatuulanob’resi qach’ool re naq a’an taaruuq chiqab’eresinkil. Tenq’aheb’ li kok’al chixtawb’al ru naq naru neke’xk’ut xtuulanil xch’ool chiru li Dios naq neke’tijok chiru a’an malaj naq neke’xk’ulub’a lix na’leb’.

Kok’ k’anjel naru chi b’aanumank

• Patz’ reheb’ li kok’al k’a’ru naraj naxye wank chi tuulan ch’oolej. (Naru neke’ril ru “Humildad” sa’ Leales a la Fe [103–104] wi ajb’il ru). Tenq’aheb’ chixk’oxlankileb’ aatin malaj ch’ol aatin li wankeb’ rilom rik’in li aatin “tuulanil ch’oolej,” ut b’oqeb’ chirilb’al ru Tzol’leb’ ut Sumwank 112:10. Te’roksiheb’ li aatin a’an sa’ xna’aj “tuulanil ch’oolej” sa’ li raqal. K’a’ut naq li qaChoxahil Yuwa’ naraj naq tuulanaq qach’ool? Re xtawb’al xkomon li na’leb’, eb’ li kok’al naru neke’rileb’ ru jalan chik raqal sa’eb’ li loq’laj hu li wankeb’ rub’el “Tuulan xch’ool” sa’ li K’utul Raqal reheb’ li Loq’laj Hu.

• Tz’iib’aheb’ li aatin wankeb’ sa’ Tzol’leb’ ut Sumwank 112:10 chiru li pizarron, ut patz’ reheb’ li kok’al naq te’xyaab’asi. Patz’ re jun ch’ina al naq tixjuch’ rub’el li osob’tesihom neke’yeechi’iman sa’ li raqal choq’ reheb’ li neke’xtuulanob’resi xch’ool. Waklesi xch’ooleb’ li kok’al chixwotzb’aleb’ resil hoonal b’ar wi’ xe’xsik’ chi tuulaneb’ xch’ool lix tenq’ li Qaawa’ ut xe’k’ame’ xb’e xb’aan a’an, jo’ junaq hoonal b’ar wi’ xe’sumeek lix tij.

Tzol’leb’ ut Sumwank 112:11

Li Jesus naraj naq tinraheb’ chixjunil li kristiaan.

Li Jesukristo a’an tz’aqal li chaab’il eetalil re xraab’aleb’ chixjunil, mas wi’chik li ke’lab’alink re. Laj Jose Smith kixkuy ajwi’ li rahob’tesiik xb’aaneb’ li ke’wan choq’ ramiiw. Tenq’aheb’ li kok’al chixnawb’al naq laa’o naru naqaraheb’ li qas qiitz’in jo’ ke’xb’aanu li Kolonel ut laj Jose Smith.

Kok’ k’anjel naru chi b’aanumank

• B’oqeb’ li kok’al chixk’eeb’aleb’ xhoonal chirib’ileb’ rib’ re rilb’al ru “Ch’ol 41: Li ch’a’ajkilal sa’ Kirtland” (Eb’ li Esilal sa’ li Tzol’leb’ ut Sumwank, 158–160). Ani kinimob’resink re li ch’a’ajkilal aran Kirtland? Ani kixyal xtuqub’ankileb’ li ch’a’ajkilal? Patz’ reheb’ li kok’al naq te’ril ru Tzol’leb’ ut Sumwank 112:11 ut te’aatinaq chirix k’a’ut naq aajel ru xraab’aleb’ chixjunil li kristiaan.

• K’a’ut naq aajel ru xraab’aleb’ li kristiaan li jalan xna’leb’eb’ chiru qana’leb’ laa’o? K’a’ut naq li qaChoxahil Yuwa’ kixk’e chaq qajalanil? K’a’ru naru naqab’aanu re naq “taanumtaaq li qarahom choq’ reheb’ chixjunil li winq,” choq’ reheb’ ajwi’ li jalan xna’leb’eb’ chiru qana’leb’ laa’o? B’icha rik’ineb’ li kok’al jun li b’ich chirix xraab’aleb’ li qas qiitz’in, jo’ “Aawikʼin tinbʼeeq laaʼin” (B’ichleb’aal choq’ reheb’ li Kok’al, 78–79).

• Tenq’aheb’ chixjultikankileb’ eetalil b’ar wi’ li Qaawa’ kixk’ut xrahom chiruheb’ li ke’rahob’tesink re (re xtawb’al jun, chi’ilmanq Lukas 23:34).

Tzol’leb’ ut Sumwank 112:12–15, 26

Eb’ li neke’jala xch’ool chi tz’aqal neke’wulak chixnawb’al ru li Jesukristo.

Li jalaak ch’oolej chiru li Jesukristo a’an jun k’anjel re chixjunil li yu’am, ut moko ka’ajwi’ ta na’ajman “xnawb’al ru lix k’ab’a’ ” (Tzol’leb’ ut Sumwank 112:26). Tenq’aheb’ li kok’al chixtawb’al ru chi us li naraj naxye xnawb’al tz’aqal ru li Kolonel.

Kok’ k’anjel naru chi b’aanumank

• Wotz rik’ineb’ li kok’al naq sa’ 1837, junjunqeb’ li apostol ke’ok chixka’pak’alinkil ru li profeet aj Jose Smith. K’a’ut naq aajel ru xtaaqenkil li profeet? (chi’ilmanq li raqal 15). Tenq’aheb’ li kok’al chixtz’iib’ankil li k’a’aq re ru kixye li Qaawa’ re laj Thomas B. Marsh naq wan chaq choq’ Awa’b’ej re lix Molameb’ li Kab’laju chi Apostol (chi’ilmanq Tzol’leb’ ut Sumwank 112:12–15). Rik’in roksinkil li xe’xtz’iib’a, aatinanqex chirix chan ru naru nokowulak chi jaalak chi us qach’ool chiru li Jesukristo.

• Patz’ reheb’ li kok’al k’a’ru naraj naxye choq’ reheb’ xyeeb’al naq naqanaw ru li Jesukristo, us ta ink’a’ naqanaw ru chi yaal (chi’ilmanq Tzol’leb’ ut Sumwank 112:26). K’a’ru naxk’ut chiqu li raqal 14 chirix li k’a’ru naru naqab’aanu re xnawb’al ru chi us? Tenq’aheb’ li kok’al chixtawb’al ru k’a’ru naraj naxye “taqapaqo li qakrus” (Lix Jaltesinkil ru li Santil Hu xb’aan laj Jose Smith, Mateo 16:25–26) malaj “xch’olaninkileb’ lix karneer.”

reetalil li tzolok

Xb’oqb’aleb’ chi tzolok sa’ kab’l

B’oqeb’ li kok’al chixk’osb’al ru li xe’xtzol sa’ li tzoleb’aal anajwan. Tenq’aheb’ chixtz’iib’ankil junaq ch’ina hu malaj chixyiib’ankil junaq jalam-uuch li tixjultika reheb’ li xe’xtzol re naq te’xwotz rik’ineb’ lix junkab’al.

Xchaab’ilob’resinkil li qak’utum

Eb’ li kok’al aj ajeb’ ru ut neke’tzolok chi k’iila paay ru. Eb’ li kok’al neke’xyal xsahil li tzolok rik’in jalan jalanq numsihom. Oksiheb’ kok’ k’anjel li te’tenq’anq reheb’ chireek’asinkileb’ rib’, chiroksinkileb’ chixjunil lix seeb’aleb’, ut chixyalb’al ak’il k’a’aq re ru. (Chi’ilmanq Li k’utuk jo’ li Kolonel, 25─26.)

perel re kok’ k’anjel: naru ninra li k’a’ re ru re li Qaawa’