Man we Bae I Mared I Stap Kam, i kam long Elizabeth Gibbons

15–21 Novemba

Doktrin mo Ol Kavenan 133–134

“Yufala I Mas Rere From Taem Ia we Man we Bae I Mared I Kam”

Tingting long ol nid blong ol pikinini we yu stap tijim—tugeta, olgeta we oli stap stadi mo lanem samting long hom, mo olgeta we oli no stap mekem hemia. ?Olsem wanem yu save helpem olgeta blong tijim wanwan long olgeta abaot ol samting we oli stap lanem?

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Soem wan pikja we yu jes yusum long wan Praemeri lesen i no longtaem i pas, mo invaetem ol pikinini blong serem wanem we oli tingbaot aot long lesen ia.

Tijim Doktrin: Ol Smol Pikinini

Doktrin mo Ol Kavenan 133:19–21, 25

Jisas Kraes bae i kambak bakegen.

Long seksen 33, Lod i tokbaot Seken Kaming mo i stap invaetem ol pipol blong Hem blong rere from taem blong glori ia. ?Olsem wanem yu save helpem ol pikinini blong lukluk i go long kambak blong Sevya?

Samfala Aktiviti we Yu Save Mekem

• Haedem wan pikja blong Seken Kaming blong Sevya biaen long wan klos, olsem se klos ia i wan keten (bae yu yusum pikja we i stap long aotlaen blong wik ia insaed long Kam Folem Mi—Blong Wanwan Man, Woman mo Famli o insaed long Gospel Art Buk, namba 66). Invaetem ol pikinini blong oli kam, wan afta wan, blong muvum “keten” i go long saed mo priten se oli stap lukluk i go aotsaed tru long wan windo. Askem olgeta blong serem olsem wanem bae oli filim sapos oli lukluk i go aotsaed long windo mo luk Jisas i stap aot long heven i kamdaon. Ridim sentens ia: “yufala i go, yufala i go mitim hem” (ves 19), mo helpem ol pikinini blong ripitim sentens ia.

• Andanit long jea blong wanwan pikinini, haedem wan pikja we i soem wan samting we yumi save mekem blong rere from Seken Kaming blong Jisas Kraes (olsem, ridim ol skripja, serem gospel, o givim seves long ol famli blong yumi). Letem ol pikinini oli faenem ol pikja, mo oli tokbaot olsem wanem we, taem yumi mekem olgeta samting ia, i stap helpem yumi blong rere blong mitim Sevya taem we bae Hem i kambak.

• Singsing wan singsing abaot Seken Kaming, olsem “When He Comes Again” (Children’s Songbook, 82–83). Serem lav ia blong yu long Sevya mo ol filing we yu gat abaot kambak blong Hem long wol ia. Invaetem ol pikinini blong oli serem ol filing blong olgeta.

Doktrin mo Ol Kavenan 133:52–53

Jisas Kraes i gat lav mo i kaen.

Olgeta ves ia oli tokbaot sam long ol plante wei we Lod i bin soem “bigfala lav mo kaen fasin” long ol pipol blong Hem. ?Wanem nao yu save mekem blong helpem ol pikinini blong oli filim lav ia we Sevya i gat long olgeta?

Samfala Aktiviti we Yu Save Mekem

• Soem wan pikja wan pikja we i soem se Jisas i gat lav mo i kaen (luk long Gospel Art Buk, namba 42, 47). Invaetem ol pikinini blong serem sam narafala samting we oli save se Jisas i bin mekem blong soem lav blong Hem mo kaen fasin blong Hem. Ridim sentens ia: “bae oli tokbaot bigfala lav mo kaen fasin blong Lod blong olgeta” (ves 52), mo helpem ol pikinini blong tingting long sam wei we oli save talem ol narawan abaot lav blong Sevya.

• Singsing wan singsing abaot lav blong Sevya, olsem “Jesus Is Our Loving Friend” (Children’s Songbook, 58). Serem testemoni blong yu long wei we Sevya i bin soem lav we Hem i gat long yu.

Doktrin mo Ol Kavenan 134:5

Lod i wantem mi blong mi obei long loa.

Ol yangfala pikinini oli gat ol rul blong folem long haos, long skul, mo long eni nara ples. Yu save helpem olgeta blong andastanem se Lod i wantem yumi blong folem ol rul mo ol loa insaed long komuniti mo nesen blong yumi.

Samfala Aktiviti we Yu Save Mekem

• Invaetem ol pikinini blong plei long wan simpol gem, be oli no folem eni rul, mo afta, mekem olgeta oli plei long sem gem ia, be wetem ol rul. ?Olsem wanem ol rul oli helpem yumi? Talemaot tangkyu blong yu from ol loa blong kantri.

• Helpem ol pikinini blong ripitim namba twelef toktok blong bilif. Tokbaot bigwan ol ki toktok olsem, “stap obei, stap givim ona, mo stap sapotem,” mo tokbaot, wetem ol pikinini, mining blong ol toktok ia. Talem long olgeta from wanem nao hem i impoten blong obei ol loa.

Stap Tijim Doktrin: Ol Bigfala Pikinini

Doktrin mo Ol Kavenan 133:4–5, 14–15

Lod i wantem mi blong mi klin.

Doktrin mo Ol Kavenan 133 i save helpem ol pikinini blong andastanem olsem wanem blong oli kipim olgeta i klin long ol paoa blong wol raon long olgeta.

Samfala Aktiviti we Yu Save Mekem

• Invaetem ol pikinini blong ridim “Babel, Babilon” insaed long Gaed long Ol Skripja (olskripja.ChurchofJesusChrist.org) blong faenemaot wanem i Babilon, mo wanem nao hem i ripresentem. Afta, ridim tugeta Doktrin mo Ol Kavenan 133:4–5, 14–15. ?Hem i minim wanem blong “Yufala i aot long Babilon”? (Vesves 5). ?Wanem nao sam ples mo situesen we Lod i wantem yumi blong stap longwe long ol? ?Wanem nao yumi save mekem blong stap longwe long olgeta?

• Putum wan saen long wan saed blong rum, we i talem se: “Saeon,” mo putum wan nara saen long nara saed we i talem: “Babilon.” Long sam longfala pis pepa, raetem ol toktok we oli kamaot long Doktrin mo Ol Kavenan 133:4–5, 14–15 we i tokbaot Saeon o Babilon (olsem “nogud,” “klin,” o “fasin blong prapa spolem”), mo invaetem ol pikinini blong putum wanwan pis pepa andanit long stret saen.

Doktrin mo Ol Kavenan 133:19–25, 46–52

Jisas bae i rul long wol ia.

Elda D. Todd Christofferson i bin talem: “Hem i impoten olgeta, blong mekem wol i rere from Seken Kaming blong Lod Jisas Kraes” (“Stap Rere from Kambak blong Lod,”   Liahona, Mei 2019, 81). Tingting long olsem wanem bae yu helpem ol pikinini blong oli andastanem wei we oli save tekpat long wok ia we i impoten tumas?

Samfala Aktiviti we Yu Save Mekem

• Soem pikja long aotlaen blong wik ia long Kam Folem Mi—Blong Wanwan Man, Woman mo Famli, mo invaetem ol pikinini blong mekem wan lis blong ol samting we oli save abaot Seken Kaming blong Jisas Kraes. Afta, yusum Doktrin mo Ol Kavenan 133:19–25, 46–52, mo invaetem olgeta blong ademap sam samting long lis blong olgeta. Serem testemoni blong yu se Seken Kaming bae i wan dei blong glad blong olgeta we oli stret mo gud.

• Blong helpem ol pikinini blong andastanem ves 19, toktok long olgeta abaot wei we wan woman we bae i mared, bae i rere from mared blong hem (maet wan we i jes mared i save help wetem storian ia). ?Long wanem wei nao yumi olsem woman ia we i rere blong mared i stap rere se “Man we bae i Mared bae i kam,” we Hem i Jisas Kraes? Sapos yu ting se hemia i save help, wetem ol pikinini, luklukbak long parabol blong ol ten yang gel (luk long Matiu 25:1–13). ?From wanem hem i impoten blong rere from Seken Kaming blong Sevya? ?Wanem nao yumi save mekem naoia blong rere?

Doktrin mo Ol Kavenan 134:1–2

Lod i wantem mi blong mi obei long loa.

I nomata se i gat ol defren kaen gavman raon long wol, Lod i wantem yumi blong “mas sapotem mo respektem ol wanwan gavman we oli stap long ples we [yumi] stap long hem” (Doktrin mo Ol Kavenan 134:5).

Samfala Aktiviti we Yu Save Mekem

• Invaetem ol pikinini blong mekem wan lis blong ol rul mo ol loa we oli stap obei long ol. ?Bae laef i olsem wanem sapos i no gat eniwan long ol loa ia? Ridim Doktrin mo Ol Kavenan 134:1–2 wetem ol pikinini, mo semtaem, helpem olgeta blong andastanem eni toktok o sentens we oli no save andastanem. ?From wanem nao Lod i wantem yumi blong gat ol gavman mo ol loa?

• Raetem wanwan toktok o sentens we i stap long namba leven mo twelef toktok blong bilif long wan seperet pis pepa. Miksim ol pepa, mo askem ol pikinini blong wok tugeta blong putum olgeta i stap long raet oda. ?Olsem wanem nao yumi soem se yumi bilivim wanem we ol toktok blong bilif ia oli stap tijim?

Stap Leftemap Tingting blong Lanem Samting long Hom

Givim wan kwestin long wanwan pikinini blong hem i go askem long wan memba blong famli long hom. Eksampol: sapos yufala i bin lanem abaot Seken Kaming blong Sevya, wan pikinini i save askem: “?Wanem nao yumi save mekem blong rere blong Jisas i kambak bakegen?”

Stap Kam Antap long Fasin blong Yumi blong Stap Tij

Lukaot blong andastanem ol pikinini we yu stap tijim. Yu save ol pikinini we yu stap tijim. Ol aedia insaed long aotlaen ia, maet i nid blong oli jenisim blong i folem ol stret nid blong olgeta. Blong helpem yu, yu save lukluk long evri aktiviti we oli putum long lis insaed long aotlaen ia, i no jes olgeta we i blong yia grup blong ol pikinini we yu stap tijim. (Luk long Teaching in the Savior’s Way, 7.)