li oob’ tuq’ixq li wankeb’ xna’leb’

Chalk re li B’eelomej, xb’aan li xElizabeth Gibbons

15–21 noviembre

Tzol’leb’ ut Sumwank 133–134

“Kawresihomaq eerib’ choq’ re lix k’ulunik li B’eelomej”

K’oxla li rajomeb’ ru li kok’al—li neke’tzolok sa’eb’ li rochoch jo’ ajwi’ li ink’a’ neke’tzolok aran. Chan ru naru nakatenq’aheb’ chixk’utb’al chirib’ileb’ rib’ li k’a’ru yookeb’ chixtzolb’al?

Tz’iib’a li nakak’oxla

reetalil li wotzok

Xkanab’ankileb’ chi wotzok

K’ut jun jalam-uuch li xawoksi toje’ sa’ li Tzoleb’aal reheb’ li Kok’al, ut patz’ reheb’ li kok’al naq te’xwotz k’a’ruhaq najultiko’ reheb’ chirix a’an.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 133:19–21, 25

Li Jesukristo taak’ulunq wi’chik.

Sa’ li tasal 133, li Qaawa’ naxye resil li xkab’ xk’ulunik ut naxpatz’ re lix tenamit naq te’xkawresi rib’ choq’ re li hoonal a’an. Chan ru naru nakatenq’aheb’ li kok’al chiroyb’eninkil chi saheb’ xch’ool lix k’ulunik li Kolonel?

Kok’ k’anjel naru chi b’aanumank

• Muq rub’el li junjunq chi chunleb’aal jun jalam-uuch li taareetali k’a’ruhaq naru naqab’aanu re xkawresinkil qib’ choq’ re li xkab’ xk’ulunik li Jesukristo (jo’ rilb’aleb’ ru li loq’laj hu, xwotzb’al li evangelio, malaj k’anjelak chiru li qajunkab’al). Kanab’eb’ li kok’al chixtawb’aleb’ li jalam-uuch ut chi aatinak chirix chan ru naq eb’ li k’a’aq re ru a’an nokohe’xtenq’a chixkawresinkil qib’ re xk’ulb’al li Kolonel naq taak’ulunq chaq.

• B’ichahomaq sa’ komonil jun li b’ich na’aatinak chirix li xkab’ xk’ulunik li Qaawa’, jo’ “Naq taakʼulunq li Kolonel” (B’ichleb’aal choq’ reheb’ li Kok’al, 46). Wotz’ laa rahom choq’ re li Kolonel ut laa week’ahom chirix li xkab’ xk’ulunik sa’ li ruchich’och’. Patz’ reheb’ li kok’al naq te’xwotz ajwi’ li reek’ahomeb’.

Tzol’leb’ ut Sumwank 133:52–53

Li Jesukristo a’an aj rahonel ut chaab’il xch’ool.

Eb’ li raqal a’in neke’xch’olob’ junjunq reheb’ li k’iila paay chi na’leb’ re chan ru naq li Qaawa’ naxk’ut lix “chaab’ilal lix ch’ool aj rahonel” chiru lix tenamit. K’a’ru naru nakab’aanu re xtenq’ankileb’ li kok’al chireek’ankil lix rahom li Kolonel choq’ reheb’?

Kok’ k’anjel naru chi b’aanumank

• K’ut jun jalam-uuch li tixk’utb’esi naq li Jesus a’an aj rahonel ut chaab’il xch’ool (chi’ilmanq li Hu reheb’ li Jalam-uuch re li Evangelio, 42, 47). Patz’ reheb’ li kok’al naq te’xwotz jalan chik k’a’aq re ru naxb’aanu li Jesus re xk’utb’al lix rahom ut lix chaab’ilal. Yaab’asi li ch’ol aatin “te’xye resil li chaab’ilal ch’oolej aj rahonel re lix Qaawa’eb’ ” (raqal 52), ut tenq’aheb’ li kok’al chixk’oxlankil chan ru naru neke’aatinak rik’ineb’ jalan chik kristiaan chirix lix rahom li Kolonel.

• B’ichahomaq jun li b’ich li na’aatinak chirix lix rahom li Kolonel, jo’ “Li Jesus narahok qe” (B’ichleb’aal choq’ reheb’ li Kok’al, 37). Wotz lix nawom aach’ool chirix chan ru naq li Kolonel naxk’ut lix rahom aawe laa’at.

Tzol’leb’ ut Sumwank 134:5

Li Qaawa’ naraj naq tinpaab’ li chaq’rab’.

Eb’ li kok’al toj ka’ch’ineb’ xyu’am tento te’xtaaqe lix tusulal wank sa’ kab’l, sa’ li eskweel, ut xkomoneb’ chik li na’ajej. Naru nakatenq’aheb’ chixtawb’al ru naq li Qaawa’ naroyb’eni naq te’qataaqe lix tusulal ut lix chaq’rab’ li qak’aleb’aal ut li qatenamit.

Kok’ k’anjel naru chi b’aanumank

• Patz’ reheb’ li kok’al naq te’xb’aanu junaq li b’atz’unk chi maak’a’ xtusulal ut chirix a’an te’xb’aanu junaq li wan xtusulal. Chan ru nokohe’xtenq’a li tusulal? Wotz laa b’antioxihom chirixeb’ li chaq’rab’ re laa tenamit.

• Tenq’aheb’ li kok’al chixka’sutinkil lix kab’lajuhil lix raqalil li paab’aal. Ch’olob’eb’ li aatin aajeleb’ ru, jo’ “xpaab’ankil, roxloq’inkil, ut xwaklesinkil,” ut aatinan rik’ineb’ li kok’al chirix li naraj neke’xye li aatin a’an. Wotz rik’ineb’ k’a’ut naq aajel ru xpaab’ankil lix chaq’rab’il li tenamit.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 133:4–5, 14–15

Li Qaawa’ naraj naq saqaq wu.

Li tasal Tzol’leb’ ut Sumwank 133 naru natenq’an re naq eb’ li kok’al te’xtaw ru chan ru te’wanq chi saqeb’ ru chiru lix k’a’uxl li ruchich’och’ wan sa’ xsutameb’.

Kok’ k’anjel naru chi b’aanumank

• Patz’ reheb’ li kok’al naq te’ril xch’olob’ankil li aatin “Babel, Babilonia” sa’ li K’utul Raqal reheb’ li Loq’laj Hu, ut te’xsik’ k’a’ru a’an Babilonia ut k’a’ru naareetali. Chirix a’an ilomaq ru Tzol’leb’ ut Sumwank 133:4–5, 14–15 sa’ komonil. K’a’ru naraj naxye “Elenqex chaq Babilonia”? (raqal 5). B’ar wankeb’ junjunq reheb’ li na’ajej ut hoonal li naraj li Qaawa’ naq taqanajtob’resi wi’ qib’? K’a’ru naru naqab’aanu re xnajtob’resinkil qib’ chiruheb’?

• K’e jun li nimla hu li tixye “Sion” sa’ junpak’al re li tzoleb’aal ut jun chik li tixye “Babilonia” junpak’al chik. Tz’iib’a chiruheb’ kok’ setb’il hu aatin re Tzol’leb’ ut Sumwank 133:4–5, 14–15 li te’xch’olob’ maare Sion malaj Babilonia (jo’ “maa’usilal,” “ch’ajb’ilaqex,” malaj “sache’k”), ut patz’ reheb’ li kok’al naq te’xk’eheb’ rub’eleb’ li ninqi hu a’ yaal k’a’ru naxch’olob’.

Tzol’leb’ ut Sumwank 133:19–25, 46–52

Li Jesus taa’awa’b’ejinq sa’ xb’een li ruchich’och’.

Li Elder D. Todd Christofferson kixye, “Q’axal aajel ru xkawresinkil li ruchich’och’ choq’ re li xkab’ xk’ulunik li Qaawa’ Jesukristo” (“Xkawresinkil qib’ choq’ re lix sutq’ijik li Qaawa’,” Jolomil ch’utub’aj-ib’ re abril 2019). Chan ru taatenq’aheb’ li kok’al chixtawb’al ru chan ru naru neke’tz’aqon sa’ li aajelil ru k’anjel a’in?

Kok’ k’anjel naru chi b’aanumank

• K’ut li jalam-uuch natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut patz’ reheb’ li kok’al naq te’xtz’iib’a li k’a’aq re ru neke’xnaw chirix li xkab’ xk’ulunik li Jesukristo. Chirix a’an, kanab’eb’ chixtz’iib’ankil xkomon jo’ chanru naxye Tzol’leb’ ut Sumwank 133:19–25, 46–52. Wotz lix nawom aach’ool chirix naq li xkab’ xk’ulunik li Qaawa’ a’anaq jun kutan re sahil ch’oolejil choq’ reheb’ li tiik xch’ool.

• Re xtenq’ankileb’ li kok’al chixtawb’al ru li raqal 19, aatinaheb’ chirix chan ru naq li ixaqilb’ej naxkawresi lix sumlajik (maare ani toje’ xsumla naru natenq’an sa’ li seraq’ik a’an). Chan ru naq laa’o chanchano jun ixaqilb’ej li naxkawresi rib’ choq’ “re lix k’ulunik li B’eelomej,” a’ li Jesukristo? Wi nakak’oxla naq naru natenq’an, il ru rik’ineb’ li kok’al li jaljookil ru aatin reheb’ li lajeeb’ chi tuq’ixq (chi’ilmanq Mateo 25:1–13). K’a’ut naq aajel ru xkawresinkil qib’ choq’ re li xkab’ xk’ulunik li Kolonel? K’a’ru naru naqab’aanu anajwan re xkawresinkil qib’?

Tzol’leb’ ut Sumwank 134:1–2

Li Qaawa’ naraj naq tinpaab’ li chaq’rab’.

Us ta wankeb’ jalan jalanq paay chi jolomil tenamit sa’ xb’een li ruchich’och’, li Qaawa’ naraj naq “te’qaxaqab’ xwankil ut te’qapaab’ lix jolomil li tenamit li wanko wi’ ” (Tzol’leb’ ut Sumwank 134:5).

Kok’ k’anjel naru chi b’aanumank

• Patz’ reheb’ li kok’al naq te’xye k’a’ru li tusulal malaj li chaq’rab’ neke’xpaab’ a’an. Chan raj ru li yu’am wi ta maa’ani raj napaab’ank reheb’ li tusulal a’an? Yaab’asi Tzol’leb’ ut Sumwank 134:1–2 choq’ reheb’ li kok’al ut tenq’aheb’ chixtawb’al ruheb’ li aatin malaj ch’ol aatin maare ink’a’ neke’xnaw ru. K’a’ut naq li Qaawa’ naraj naq te’wanq aj jolominel ut chaq’rab’ re li qatenamit?

• Tz’iib’aheb’ chiru kok’ setb’il hu li aatin malaj ch’ol aatin re li xjunlajuhil ut xkab’lajuhil xraqalil li paab’aal. Junajiheb’ ru li kok’ setb’il hu ut patz’ reheb’ li kok’al naq te’k’anjelaq sa’ komonil re xtusb’aleb’ ru. Chan ru naqak’ut naq naqapaab’ li neke’xk’ut lix raqalil li paab’aal a’an?

reetalil li tzolok

Xb’oqb’aleb’ chi tzolok sa’ kab’l

K’e re li junjunq chi kok’al jun li patz’om re naq tixye re junaq komon sa’ lix junkab’al sa’ kab’l. Qayehaq, wi xe’tzolok chirix li xkab’ xk’ulunik li Kolonel, jun ch’ina al naru naxpatz’, “K’a’ru naru naqab’aanu re xkawresinkil qib’ re naq taak’ulunq wi’chik li Jesus?”

Xchaab’ilob’resinkil li qak’utum

K’e aach’ool chixtawb’al ru xch’ooleb’ li kok’al nakatzoleb’. Laa’at nakanaweb’ ru li kok’al nakatzoleb’. Maare taa’ajmanq ru xjalb’aleb’ li na’leb’ re li tusleb’ aatin re xb’aanunkil li k’a’ru neke’raj ru li kok’al. Jo’ tenq’, ileb’ chixjunil li kok’ k’anjel neke’k’eeman sa’ li tusleb’ aatin a’in, moko ka’ajwi’ ta li k’uub’anb’ileb’ choq’ re xchihab’eb’ li kok’al nakatzoleb’. (Chi’ilmanq Li k’utuk jo’ li Kolonel, 7.)

perel re kok’ k’anjel: li Qaawa’ naraj naq tinpaab’ lix chaq’rab’il li tenamit