O Le Oo Mai o le Faatoafaiavā, saunia e Elizabeth Gibbons

15–21 Novema

Mataupu Faavae ma Feagaiga 133–134

“Ia Outou Saunia mo le Afio Mai o le Faatoafaiavā”

Mafaufau i manaoga o tamaiti o e aoaoina—i latou e suesue ma aoao i o latou aiga ma i latou atonu e le o suesue ma aoao i o latou aiga. E faapefea ona e fesoasoani ia i latou e aoao le tasi i le isi e uiga i mea ua latou aoaoina?

Tusi Faamaumau Ou Lagona Uunai

Valaaulia le Fefaasoaai

Faaali atu se ata na e faaaogaina i se lesona talu ai i le Peraimeri, ma valaaulia tamaiti e faasoa mea o loo latou manatua mai le lesona.

Aoao atu le Aoaoga Faavae: Tamaiti Laiti

Mataupu Faavae ma Feagaiga 133:19–21, 25

O le a toe afio mai Iesu Keriso.

I le vaega 133, o loo faamatala mai ai Lona Afio Mai Faalua ma valaaulia Ona tagata e sauniuni mo lenei fuafuaga matagofie. E faapefea ona e fesoasoani i tamaiti e tulimatai atu i le toe afio mai o le Faaola?

Gaoioiga e Mafai Ona Fai

• Ia ufiufi se ata o le Afio Mai Faalua o le Faaola i tua o se ie, e pei o le ie o se pupuni (e mafai ona e faʻaaoga le ata i totonu o le otootoga o lenei vaiaso i le Sau, Mulimuli Mai ia te A’u---Mo Tagata Taitoatasi ma Aiga po o le Tusiata o le Talalelei, nu. 66). Valaaulia tamaiti e auauai e susue le ‘pupuni” ma faafoliga o loo latou tilotilo atu i fafo o se faamalama. Fai atu ia i latou e faasoa mai pe o a ni o latou lagona pe a latou tilotilo atu i fafo o le faamalama ma vaai atu o afio ifo Iesu mai le lagi. Faitau le fuaitau “ia outou o atu ia e faafetaia’i ia te ia” (fuaiupu 19), ma fesoasoani i tamaiti e toe fai le fuaitau.

• I lalo o nofoa o tamaiti taitoatasi, nanā ai se ata e faaalia ai se mea e mafai ona tatou faia e saunia ai mo le Afio Mai Faalua o Iesu Keriso (e pei o le faitauina o tusitusiga paia, faasoa atu o le talalelei, pe auauna atu foi i o tatou aiga). Tuu atu i tamaiti e sue ia ata, ma talanoa e uiga i le auala e fesoasoani ai nei mea ia i tatou ia saunia e feiloai ma le Faaola pe a toe afio mai o Ia.

• Usu se pese e faatatau i le Afio Mai Faalua o le Faaola, e pei o le “Pe A Ia Toe Afio Mai” (Tusipese a Tamaiti, 46). Faasoa atu lou alofa mo le Faaola ma ou lagona e uiga i Lona toe afio mai i le lalolagi. Valaaulia tamaiti e faasoa mai foi o latou lagona.

Mataupu Faavae ma Feagaiga 133:52–53

O Iesu Keriso e alofa ma agalelei.

O nei fuaiupu o loo faamatalaina ai nisi o auala e tele ua faaali mai ai e le Alii Lona “alofa agalelei” i Ona tagata. O le a se mea e mafai ona e faia e fesoasoani ai i tamaiti ia lagonaina le alofa o le Faaola mo i latou?

Gaoioiga e Mafai Ona Fai

• Faaali atu se ata e faaalia ai o Iesu e alofa ma agalelei (tagai Tusi Ata o le Talalelei, nu. 42,47). Fai i tamaiti e faasoa mai nisi mea na faia e Iesu e faaali ai Lona alofa ma le agalelei. Faitau le fuaitau “o le a latou taʼutaʼua le alofa agalelei o lo latou Alii” (fuaiupu 52), ma fesoasoani i tamaiti e mafaufau i auala e mafai ona latou tau atu ai i isi e uiga i le alofa o le Faaola.

• Usu faatasi se pese e faatatau i le alofa o le Faaola, e pei o le “Iesu O La Tatou Uo Pele” (Tusipese a Tamaiti,37). Faasoa atu lau molimau i le auala na faaalia ai e le Faaola lona alofa mo oe.

Mataupu Faavae ma Feagaiga 134:5

E finagalo le Alii ia ou usitaia le tulafono.

O tamaiti laiti e masani lava ona i ai tulafono e mulimuli ai i le fale, i le aoga, ma isi nofoaga. E mafai ona e fesoasoani ia i latou ia malamalama o loʻo finagalo le Alii tatou te mulimuli i tulafono ma lapataiga i totonu o o tatou alaalafaga ma le malo.

Gaoioiga e Mafai Ona Fai

• Valaaulia tamaiti e taaalo i se taaloga faigofie e aunoa ma le mulimuli i soo se tulafono, ona tuu atu lea ia i latou e taaalo ae faaaoga tulafono. E faapefea ona fesoasoani tulafono ia i tatou? Faaali atu lou agaga faafetai mo tulafono o le laueleele.

• Fesoasoani i tamaiti e toe fai le mataupu faavae o le faatuatua lona sefululua. Faamamafa upu autu, e pei o le “usiusitai, faamamalu, ma lagolagoina,” ma talanoa ma tamaiti e uiga i le uiga o na upu. Fetufaai ma i latou pe aisea e taua ai le usitai i le tulafono.

Aoao atu le Aoaoga Faavae: Tamaiti Matutua

Mataupu Faavae ma Feagaiga 133:4–5, 14–15

E finagalo le Alii ia ou mama.

O le Mataupu Faavae ma Feagaiga 133 e mafai ona fesoasoani i tamaiti ia malamalama pe faapefea ona tausia i latou lava ia mama mai faatosinaga faalelalolagi o siomia ai i latou.

Gaoioiga e Mafai Ona Fai

• Valaaulia tamaiti e faitau le “Babel, Babylon” i totonu o le Taiala i Tusitusiga Paia (scriptures.ChurchofJesusChrist.org) ia iloa po o le a Papelonia ma pe o le a le mea ua faatusa i ai. Ona faitau faatasi lea o le Mataupu Faavae ma Feagaiga 133:4–5, 14–15. O le a le uiga o le “ia outou o ese ia i fafo mai Papelonia”? (fuaiupu 5). O a nisi o nofoaga ma tulaga e finagalo le Alii tatou te aloese mai ai? O le a se mea e mafai ona tatou faia e aloese ai ia i latou?

• Tuu se faailoga i le isi itu o le potu o faapea mai “Siona,” ma tuu se isi faailoga i le isi itu e faapea “Papelonia.” Tusi i luga o ni fasipepa upu mai le Mataupu Faavae ma Feagaiga 133:4-5, 14-15 o loo faamatalaina ai Siona po o Papelonia (e pei o le “amioleaga,” “mama,” po o le “faatafunaga”), ma valaaulia tamaiti e tuu ia pepa taitasi i lalo o le faailoga talafeagai.

Mataupu Faavae ma Feagaiga 133:19–25, 46–52

O le a nofotupu lava Iesu i le lalolagi.

Na saunoa mai Elder D. Todd Christofferson, “E matua taua lava le saunia o le lalolagi mo le Afio Mai Faalua o le Alii o Iesu Keriso” (“Saunia mo le Toe Afio Mai o le Alii,” Ensign po o le Liahona, Me 2019, 81). E faapefea ona e fesoasoani i tamaiti ia malamalama pe mafai faapefea ona latou auai i lenei galuega taua?

Gaoioiga e Mafai Ona Fai

• Faaali atu le ata mai le otootoga o lenei vaiaso i le Sau Mulimuli Mai ia te A’u—Mo Tagata Taitoatasi ma Aiga, ma valaaulia tamaiti e fai se lisi o mea latou te iloa e uiga i le Afio Mai Faalua o Iesu Keriso. Ona faaaoga lea o le Mataupu Faavae ma Feagaiga 133:19-25, 46--52, valaaulia i latou e faaopoopo i a latou lisi. Faasoa atu lau molimau o le Afio Mai Faalua o le a avea ma se aso fiafia mo e amiotonu.

• Ina ia fesoasoani i tamaiti ia malamalama i le fuaiupu 19, talanoa atu ia i latou i le auala e tapena ai se tamaitai faaipoipo mo lana faaipoipoga (atonu o se tasi faatoa faaipoipo talu ai nei e mafai ona fesoasoani i lenei talanoaga). E faapefea ona pei i tatou o se tamaitai faaipoipo o loo sauniuni “mo le afio mai o le faatoafaiava” o Iesu Keriso? Afai e te manatu o le a aoga, toe iloilo faatasi ma tamaiti le faataoto i taupou e toasefulu (tagai Mataio 25:1–13). Aisea e taua ai le saunia mo le Afio Mai Faalua o le Faaola? O a ni mea tatou te faia i le taimi nei e saunia ai?

Mataupu Faavae ma Feagaiga 134:1–2

E finagalo le Alii ia ou usitaia le tulafono.

E ui lava e eseese ituaiga malo i le salafa o le lalolagi, ae finagalo le Alii ia i tatou e “lagolago ma sapasapaia malo … ua [tatou] nonofo ai” (Mataupu Faavae ma Feagaiga 134:5).

Gaoioiga e Mafai Ona Fai

• Valaaulia tamaiti e lisi i lalo tulafono ma lapataiga latou te usitaia. O le a faapeī le olaga pe afai e leai se tasi e usitai i nei tulafono? Faitau faatasi ma tamaiti le Mataupu Faavae ma Feagaiga 134:1-2 , fesoasoani ia i latou ia malamalama i soo se upu po o fuaitau atonu latou te le malamalama ai. Aisea e finagalo ai le Alii ia tatou maua ni faigamalo ma tulafono?

• Tusi upu taitasi po o fuaitau mai mataupu faavae o le faatuatua lona sefulutasi ma le sefululua i luga o se isi fasipepa. Faafefiloi pepa, ma fai atu i tamaiti e galulue faatasi e tuu i le faasologa sao. E faʻapefea ona tatou faʻaalia tatou te talitonu i mea o aʻoaʻo mai e nei mataupu faavae o le faʻatuatua?

Uunaia le Aoaoina i le Aiga

Tuu atu i tamaiti taitoatasi se fesili e fesili ai i se tagata o le aiga i le fale. Mo se faataitaiga, afai na e aoao e uiga i le Afio Mai Faalua o le Faaola, e mafai e se tamaitiiti ona fesili, “O le a se mea e mafai ona tatou faia e saunia ai mo Iesu e toe afio mai?”

Faaleleia o Lo Tatou Aoao Atu

Saili ia malamalama i tamaiti o loo e faiaoga ai. Ia e iloa tamaiti e te faiaoga ai. O manatu o loo i lenei otootoga e ono manaomia ona fetuunai ina ia taulima lelei ai manaoga o lau vasega. Ina ia fesoasoani ia te oe, ia tagai i gaoioiga uma o loo lisi atu i lenei otootoga, ae le na o gaoioiga e faatatau i tausaga o tamaiti o loo e aoaoina. (Tagai Aoao Atu i le Ala a le Faaola,7.)