Re chixjunileb’ li komon winq re li Iglees li k’ulub’ejeb’, xb’aan li xEmma Allebes

6–12 diciembre

Ebʼ lix Raqalil li Paabʼaal ut li Awa’b’ejil Yehom 1 ut 2

“Laa’o naqapaab’ ”

Naq yooqat chi tzolok chiru li xamaan ut yooqat chixk’uub’ankil aana’leb’ re k’utuk, k’oxla chan ru naru nakatenq’aheb’ li kok’al chixkawob’resinkil lix paab’aaleb’ chirixeb’ li aajel ruhil yaal re li evangelio.

Tz’iib’a li nakak’oxla

Xkanab’ankileb’ chi wotzok

Kut jun li b’olotz’ re jun ch’ina al ut patz’ re naq tixye k’a’ruhaq li naxpaab’ chirix li Jesukristo ut li qaChoxahil Yuwa’. K’iilasuti a’an toj reetal naq li junjunq chi kok’al tixye k’a’ruhaq.

Xk’utb’al li tzol’leb’: Kok’al toj ka’ch’ineb’ xyu’am

Eb’ lix Raqalil li Paab’aal

Ninpaab’ lix evangelio li Jesukristo

Naru nakawoksi Eb’ lix Raqalil li Paab’aal re rilb’al rik’ineb’ li kok’al junjunq reheb’ li aajel ruhil paab’ahom sa’ lix Iglees li Jesukristo. K’a’ut naq aajel ru naq eb’ li kok’al te’xpaab’eb’ li yaal a’an?

Kok’ k’anjel naru chi b’aanumank

• Sik’eb’ ru junjunq reheb’ lix raqalil li paab’aal li nakak’oxla naq aajelaq raj ru choq’ reheb’ li kok’al. Rik’ineb’ li junjunq xraqalil li paab’aal a’an, k’ut jun jalam-uuch (chi’ilmanq li perel re kok’ k’anjel re li xamaan a’in) malaj wotz jun li seraq’ (sa’eb’ li loq’laj hu malaj chirix laa yu’am) li tixk’utb’esi malaj tixch’olob’ junaq li yaal naxk’ut lix raqalil li paab’aal. Ye reheb’ li kok’al k’a’ut naq aajel ru li yaal a’an choq’ aawe, ut kanab’eb’ ajwi’ a’an chixwotzb’al k’a’ut naq aajel ru choq’ reheb’.

• Sik’eb’ li b’ich malaj li b’ich reheb’ li kok’al li tixtenq’aheb’ li kok’al chixtawb’al ru jun malaj junjunq reheb’ lix raqalil li paab’aal. Maare eb’ a’an naru nakate’xtenq’a chixsik’b’aleb’ ru. B’ichahomaqeb’ li b’ich sa’ komonil ut tenq’aheb’ chirilb’al chan ru naq wankeb’ rilom a’an rik’ineb’ lix raqalil li paab’aal.

Eb’ lix Raqalil li Paab’aal 1:9; Awa’b’ejil Yehom 1 ut 2

Li Qaawa’ naxb’eresi lix Iglees rik’in lix profeet.

Jo’ komon re li Iglees neke’qanumsi jalan jalanq chi ch’a’ajkilal, a’b’an naru naqataw tuqtuukilal rik’in xnawb’al naq li qaChoxahil Yuwa’ wan xch’ool chiqab’eresinkil rik’in li k’utb’esinb’il na’leb’. Tenq’aheb’ li kok’al chixkawob’resinkil lix paab’aaleb’ chirix naq li Dios naxb’eresi lix Iglees rik’in jun li yo’yookil profeet.

Li qaChoxahil Yuwa’ nokoxb’eresi rik’ineb’ li profeet.

Kok’ k’anjel naru chi b’aanumank

• K’uteb’ li loq’laj hu ut xjalam-uuch jun yo’yookil profeet (malaj junaq li Liahona re li jolomil ch’utub’aj-ib’ toje’ xnume’). Tenq’aheb’ li kok’al chixk’eeb’al reetal b’ar wan reheb’ li hu a’an wan rilom rik’in li ch’ol aatin “chixjunil li ak xk’utb’esi li Dios” ut b’ar wan rik’in li ch’ol aatin “chixjunil li naxk’utb’esi anajwan” (Eb’ lix Raqalil li Paab’aal 1:9).

• Chup li luz ut k’e jun xjalam-uuch li Jesukristo chiru li pizarron. Kutanob’resi ru li jalam-uuch rik’in jun li pook re xk’utb’esinkil chan ru naq li profeet, jo’ li pook, nokoxtenq’a chirilb’al li Kolonel chi saqen ru.

• Sik’ xch’olob’ankil chan ru xyiib’ankil k’a’ruhaq, jo’ xyiib’ankil junaq xtib’el wa malaj xyiib’ankil junaq b’atz’uul. B’aanu li ch’olob’anb’il rik’ineb’ li kok’al ut ch’olob’ naq, rik’in li profeet, li qaChoxahil Yuwa’ naxch’olob’ chiqu chan ru naru nokoq’aj rik’in a’an. B’ar wankeb’ junjunq li k’a’aq re ru li naxk’ut li profeet re naq tooruuq chi q’ajk rik’in li Dios?

Xk’utb’al li tzol’leb’: Kok’al ak ninqeb’

Eb’ lix Raqalil li Paab’aal

Eb’ lix Raqalil li Paab’aal neke’xk’ut li yaal chirix li evangelio.

Wan naq li evangelio maare chanchan naq mas nim ut ch’a’aj, mas wi’chik choq’ reheb’ li kok’al. Eb’ lix Raqalil li Paab’aal naru naxtenq’aheb’ li kok’al chixtawb’al ru, chi moko ch’a’aj ta, junjunqeb’ li aajel ruhil yaal li neke’qapaab’ jo’ aj santil paab’anel sa’ roso’jikeb’ li kutan.

Kok’ k’anjel naru chi b’aanumank

• Patz’ reheb’ li kok’al naq te’xsik’ ru junaq aatin malaj ch’ol aatin sa’eb’ lix raqalil li paab’aal, ut te’xwotz sa’ li tzoleb’aal. Chirix a’an kanab’eb’ lix komon chixq’ehinkil (malaj chixtawb’al) b’ar wan lix raqalil li paab’aal wan wi’ li aatin malaj ch’ol aatin. Patz’ reheb’ li kok’al naq te’xye k’a’ut naq aajel ru li aatin malaj li ch’ol aatin xe’xsik’ ru.

• Wiib’ oxib’ kutan rub’elaj, patz’ reheb’ junjunq li kok’al naq te’xkawresi rib’ re te’xk’ut jun ch’ina esil chirix lix raqalil li paab’aal mas nawulak chiruheb’. Li esil a’an naru naxk’am jun jalam-uuch, jun b’ich, jun seraq’, jun numsihom, malaj jun raqal sa’eb’ li loq’laj hu. Patz’ reheb’ li kok’al a’an naq te’xwotz k’a’ut naq nawulak chiruheb’ lix raqalil li paab’aal xe’xsik’ ru.

• Tz’iib’aheb’ junjunq li patz’om chiru li pizarron li naru neke’xpatz’ li kristiaan chirixeb’ li na’leb’ neke’qapaab’ ut li naru neke’sumeman rik’in jun lix raqalil li paab’aal. Patz’ reheb’ li kok’al naq te’xsik’ ru jun li patz’om ut te’xtaw jun xraqalil li paab’aal li taasumenq re. Kanab’eb’ chixtzolb’al chan raj ru te’xsume li patz’om rik’in lix raqalil li paab’aal.

Awa’b’ejil Yehom 1 ut 2

Eb’ li profeet nokohe’xtenq’a chixnawb’al li rajom li qaChoxahil Yuwa’.

Eb’ li Awa’b’ejil Yehom 1 ut 2 a’aneb’ chaab’il reetalil chan ru naq li profeet neke’xk’ul k’utb’esinb’il na’leb’ rik’in li Dios ut neke’xb’aanu jo’ chanru naxye a’an. Chan ru naru nakatenq’aheb’ li kok’al chixnimob’resinkil lix paab’aaleb’ chirix naq li Dios naxb’eresi lix Iglees rik’in li k’utb’esinb’il na’leb’?

Kok’ k’anjel naru chi b’aanumank

• Patz’ reheb’ li kok’al naq te’xsik’ junaq xraqalil li paab’aal li na’aatinak chirixeb’ li profeet malaj li k’utb’esinb’il na’leb’. Patz’ reheb’ naq te’xwotz k’a’ut naq neke’xb’antioxi naq wan jun qayo’yookil profeet. Wotzeb’ junjunq reetalil chan ru naq li Dios naxb’eresi lix Iglees rik’in li k’utb’esinb’il na’leb’, jo’ li wankeb’ sa’ li Awa’b’ejil Yehom 1 ut 2, ut patz’ reheb’ li kok’al naq te’xye eetalil neke’xnaweb’ ru (jo’ junaq li jalok xb’aanuman toje’ sa’ li Iglees).

• K’e reheb’ li kok’al eb’ li raqal a’in reheb’ li loq’laj hu: 2 Nefi 26:33; Jakob 2:27. Patz’ reheb’ naq te’xk’e reetal b’ar wankeb’ li raqal wankeb’ rilom rik’in li Awa’b’ejil Yehom 1 (li kiraqman wi’ li sumlaak rik’in numenaq jun sum aatin) ut b’ar wankeb’ li raqal wankeb’ rilom rik’in li Awa’b’ejil Yehom 2 (li kiteeman wi’ li rosob’tesihom li tijonelil ut li santil ochoch choq’ reheb’ chixjunil li kristiaan). Ch’olob’ xyaalal naq li Qaawa’ kixk’utb’esi li rajom chiruheb’ li najteril profeet ut naxk’utb’esi ajwi’ anajwan.

• Tz’iib’a chiru li pizarron li ch’ol aatin a’in re li Awa’b’ejil Yehom 1: “Tento teetz’il rix eejunes.” K’a’ru naraj naxye naq tento taqatz’il rix qajunes rajlal sut naq li profeet naxk’ul k’utb’esinb’il na’leb’? Re xtenq’ankileb’ chixsumenkil li patz’om a’an, naru nakawotz li raatin li Awa’b’ej Russell M. Nelson: “Laa’ex naru nekekaw eejunes eerib’ k’a’ru li yaal ut k’a’ru ink’a’ yaal, wi neketzol rab’inkil lix hasb’ li Musiq’ej” (“The Love and Laws of God” [devocional de la Universidad Brigham Young, 17 septiembre, 2019], 4, speeches.byu.edu).

• Yiib’ xjalam-uuch malaj k’ut junaq xjalam-uuch li ruchich’och’. Patz’ re jun ch’ina al naq taaril ru wiib’ raqal sa’ xraqik li hu re li Xb’eenil Awa’b’ejil re li kutan 8 re junio, 1978 li wan wi’ li Awa’b’ejil Yehom 2 (tixtikib’ b’ar naxye “A’an xrab’i li qatij …”). Patz’ reheb’ naq te’rajla jarub’ sut neke’yeeman li aatin “osob’tesink” ut “rosob’tesihom.” K’a’ruheb’ li osob’tesihom neke’chal xb’aan li evangelio? Patz’ reheb’ li kok’al naq te’xtz’iib’a a’an chiru li pizarron chixk’atq lix jalam-uuch li ruchich’och’. Ch’olob’ xyaalal naq li Dios naxraheb’ chixjunil li ralal xk’ajol sa’ chixjunil li ruchich’och’ ut naraj rosob’tesinkileb’ rik’in lix evangelio.

Xb’oqb’aleb’ chi tzolok sa’ kab’l

Tenq’aheb’ li kok’al chixsik’b’al ru jun xraqalil li paab’aal li neke’raj xkanab’ankil sa’ xk’a’uxleb’ ut tenq’aheb’ chixk’uub’ankil chan ru te’xb’aanu a’an.

Xchaab’ilob’resinkil li qak’utum

Eb’ li kok’al nawulak chiruheb’ xwotzb’al li k’a’ru yookeb’ chixtzolb’al. Us ta toj kok’eb’, li kok’al naru neke’xnimob’resi lix paab’aaleb’ li komon sa’ lix junkab’aleb’. Waklesi xch’ooleb’ chixwotzb’al rik’ineb’ lix junkab’al k’a’ruhaq xe’xtzol sa’ li Tzoleb’aal reheb’ li Kok’al. (Chi’ilmanq Li k’utuk jo’ li Kolonel, 30.)