Enero 7–13

Mateo 1; Lucas 1

“Matuman Unta Kanako Kanang Imong Giingon”

Sugdi pinaagi sa pagbasa sa Mateo 1 ug Lucas 1. Ang Dali, Sunod Kanako—Alang sa mga Indibidwal ug mga Pamilya makatabang kanimo sa pagsabut niini nga mga kapitulo, ug kini nga outline makahatag kanimo og mga ideya sa pagtudlo. Kon nagkinahanglan ka og dugang nga tabang sa pagtudlo sa mas gagmay nga mga bata, tan-awa ang “Pagtubag sa mga Panginahanglan sa Mas Gagmay nga mga Bata” sa sinugdanan niini nga kapanguhaan.

Irekord ang Imong mga Impresyon

Awhaga ang Pagpaambit

Hangyoa ang mga bata sa paglingkod nga mag-alirong, ug dayon hangyoa ang usa ka bata sa pagpaambit og butang nga iyang nakat-unan gikan sa mga kasulatan niining semanaha o sa laing higayon. Kana nga bata mahimong mopaligid og bola padulong o motudlo sa laing bata diha sa mga nag-alirong, kinsa turno na pud niya nga mopaambit.

Itudlo ang Doktrina

Mas Gagmay nga mga Bata

Mateo 1:18–25; Lucas 1:26–38

Ang mga anghel mipahibalo sa pagkatawo ni Jesus.

Si Maria ug Jose tagsa-tagsa nga gibisitahan sa usa ka anghel kinsa mipahibalo sa pagkatawo ni Jesukristo. Kini nga mga kasinatian makatabang sa mga bata nga makita unsa ka importante ang pagkatawo ni Kristo.

Posible nga mga Kalihokan

• Dapita ang mga ginikanan sa usa ka bata nga motambong sa klase nga magsinina nga sama kang Maria ug Jose. Hangyoa sila sa pagpaambit sa ilang mga kasinatian sumala sa narekord diha sa Mateo 1:18–25 ug Lucas 1:26–38.

• Isaysay ang istorya sa mga anghel nga nagpakita kang Maria ug Jose, sumala sa narekord dinhi nga mga bersikulo. (Tan-awa usab sa “Kapitulo 2: Maria ug ang Anghel” ug “Kapitulo 4: Jose ug ang Anghel,” Mga Istorya sa Bag-ong Tugon, 8–9, 12.) Mahimo nimong ipakita ang hulagway sa outline niini nga semana sa Dali, Sunod Kanako—Alang sa mga Indibidwal ug mga Pamilya. Dapita ang mga bata nga isaysay ang istorya balik kanimo.

• Dapita ang mga bata sa pagdrowing og mga hulagway sa mga istorya nga makita diha sa Mateo 1:18–25 ug Lucas 1:26–38.

Lucas 1:5–20, 57–63

Ang Langitnong Amahan motubag sa akong mga pag-ampo.

Si Zacarias ug Elisabet tingali nag-ampo sulod sa daghang katuigan nga makabaton og anak. Sa katapusan ang Langitnong Amahan mitubag sa ilang mga pag-ampo pinaagi sa paghatag kanila og usa ka anak, si Juan Bautista. Unsaon nimo paggamit niini nga istorya sa pagtudlo sa mga bata nga ang Langitnong Amahan motubag sa mga pag-ampo?

Posible nga mga Kalihokan

• Sa imong kaugalingong mga pulong, ipaambit ang istorya gikan sa Lucas 1:5–20, 57–63. Mahimo nimong balikon ang istorya sa pipila ka higayon. Pag-assign og mga bata nga modala sa papel sa anghel, ni Zacarias, ug ni Elisabet ug mosundog sa istorya. Ipasabut og maayo nga ang Langitnong Amahan mitubag sa mga pag-ampo ni Elisabet ug Zacarias, ug pagpaambit og kasinatian diin ang Langitnong Amahan mitubag sa imong pag-ampo.

• Gamita ang “Iduko ang Atong Ulo,” Songbook sa mga Bata, 18, o laing kanta aron sa pagtudlo sa mga bata unsaon sa pag-ampo. Mahimo usab kamong mokanta og dungan sa “Ampo sa Usa ka Bata,” Songbook sa mga Bata, 6–7. Matag higayon nga ang mga bata mokanta sa mga pulong nga “ampo” o “pag-ampo”, dapita sila sa pagduko ug pagpanguyugpos.

• Hangyoa ang matag bata sa paghimo og mga aksyon nga nagrepresentar og usa ka butang nga mahimo niyang iampo. Dapita ang ubang bata sa pagtagna kon unsa ang girepresentaran sa mga aksyon. Makakita sila og mga ideya diha sa pahina sa kalihokan karong semanaha.

Lucas 1:31–35

Si Jesukristo mao ang Anak sa Dios.

Si Jesukristo mao ang Anak sa Langitnong Amahan ug ni Maria. Unsay imong mabuhat aron matabangan ang mga bata nga mas makakat-on pa mahitungod Kaniya?

Posible nga mga Kalihokan

• Sultihi ang mga bata nga ang anghel miingon kang Maria nga ang iyang anak pagatawgon nga Anak sa Dios (tan-awa sa Lucas 1:35). Tabangi ang mga bata nga balikon og sulti ang mga pulong nga “Si Jesukristo mao ang Anak sa Dios.” Tabangi ang mga bata nga makasabut kon kinsa ang mga ginikanan ni Jesus pinaagi sa pagdapit kanila sa pagdrowing og mga hulagway sa ilang kaugalingong mga ginikanan. Samtang nagbuhat sila niini, sultihi sila nga si Jesus dunay mga ginikanan usab—si Maria ug ang Langitnong Amahan. Dugang pa, si Jose gihangyo sa pagpanalipod ug pag-amuma kang Jesus samtang nagpuyo Siya sa yuta.

• Ipaambit ang imong pagpamatuod nga tungod kay si Jesus mao ang Anak sa Dios, mahimo Siyang mamatay alang sa atong mga sala ug mabuhi pag-usab. Pagpakita og mga hulagway sa Paglansang sa Krus ug Pagkabanhaw ni Jesus (tan-awa sa Libro sa mga Hulagway sa Ebanghelyo, nu. 57, 59).

Itudlo ang Doktrina

Mas Dagko nga mga Bata

Mateo 1:18–25; Lucas 1:5–37

Walay imposible sa Dios.

Ang pagkatawo ni Jesus ug ni Juan Bautista nahimong posible lamang pinaagi sa gahum sa Dios. Ang pagkat-on mahitungod niini nga mga milagro makalig-on sa pagtuo sa mga bata nga ang Dios adunay gahum sa pagbuhat og mga milagro diha sa ilang kinabuhi.

Posible nga mga Kalihokan

• Samtang ikaw ug ang mga bata moribyu sa Mateo 1:18–25 ug Lucas 1:5–37, pangutan-a ang mga bata og sama sa “Unsa kaha ang inyong isulti kon kamo pa si Maria?” o “Unsa kaha ang inyong bation kon kamo pa si Zacarias?”

• Sa yanong mga pulong, isaysay ang mga istorya sa pagkatawo ni Juan Bautista ug ni Jesukristo. Hangyoa ang mga bata sa pag-isa sa ilang mga kamot kon makadungog sila og usa ka butang nga daw imposible kon wala ang gahum sa Dios. Unsa pa nga mga istorya ang mapaambit sa mga bata diin ang Dios mibuhat og usa ka butang nga daw imposible?

• Tabangi ang mga bata sa pagsag-ulo sa Lucas 1:37. Aron sa pagbuhat niini, mahimo nimong isulat ang bersikulo diha sa pisara ug dapita ang mga bata sa pag-recite niini sa pipila ka higayon. Human sa matag higayon, pagpapas og usa ka pulong.

Mateo 1:21–25; Lucas 1:30–35, 46–47

Si Jesukristo mao ang Anak sa Dios.

Si Jesukristo mao ang Anak sa Langitnong Amahan ug ni Maria. Unsaon nimo sa pagtabang ang mga bata nga makakat-on niini nga kamatuoran?

Posible nga mga Kalihokan

• Hangyoa ang mga bata sa pagbasa sa Lucas 1:30–35, nga mangita sa mga tubag niini nga mga pangutana: “Kinsa ang inahan ni Jesus?” ug “Kinsa ang Amahan ni Jesus?” Tabangi sila nga makasabut nga si Jesukristo mao lamang ang bugtong tawo kansang pisikal nga amahan mao ang Langitnong Amahan (tan-awa usab sa 1 Nephi 11:18–21).

• Samtang magbasa kamo niini nga mga bersikulo, dapita ang mga bata sa pagpangita sa mga ngalan o titulo ni Jesukristo. Unsay gipasabut niini nga mga ngalan, ug unsay gitudlo niini kanato mahitungod ni Jesus?

• Ipaambit ang imong pagpamatuod kabahin ni Jesukristo, ug dapita ang mga bata sa pagpaambit sa ilang pagpamatuod.

Ang Pagpahibalo, ni John Scott

Lucas 1:5–25, 57–80

Ang Langitnong Amahan maminaw ug motubag sa akong mga pag-ampo.

Ang Dios motubag sa mga pag-ampo apan dili sa kanunay sa mga paagi nga atong gipaabut. Unsaon nimo paggamit ang istorya ni Zacarias ug Elisabet sa pagtudlo sa mga bata niini nga kamatuoran?

Posible nga mga Kalihokan

• Pangutan-a ang mga bata unsay ilang isulti sa tawo nga nag-ampo alang sa usa ka panalangin apan wala pa makadawat niini. Dapita sila sa paghunahuna niini nga pangutana samtang dungan sila nga magbasa sa Lucas 1:5–25, 57–80. (Tan-awa usab sa “Kapitulo 1: Elisabet ug Zacarias” ug “Kapitulo 3: Juan Bautista Natawo,” Mga Istorya sa Bag-ong Tugon, 6–7, 10–11.) Unsa kaha ang isulti ni Zacarias ug Elisabet sa tawo nga mibati nga wala gitubag ang iyang pag-ampo?

• Pagdapit daan og pipila ka mga bata sa pagpaambit og mga kasinatian sa diha nga ang Langitnong Amahan mitubag sa ilang mga pag-ampo. Pagpaambit og higayon nga imong gibati nga ang imong mga pag-ampo gitubag sa wala damha nga paagi.

• Dapita ang mga bata sa pagdrowing og hulagway sa usa ka higayon dihang ang Langitnong Amahan mitubag sa usa ka pag-ampo—ilabi na sa usa sa ilang kaugalingon. Ipaambit nila ang ilang mga drowing diha sa klase.

Awhaga ang Pagkat-on diha sa Panimalay

Dapita ang mga bata sa pagpaambit sa mga hulagway nga ilang gidrowing ngadto sa ilang mga pamilya ug dayon sa paghangyo sa mga sakop sa ilang pamilya sa pagpaambit og mga higayon nga ang Dios mitubag sa ilang mga pag-ampo.

Pagpalambo sa Atong Pagtudlo

Tabangi ang gagmay nga mga bata nga magkat-on gikan sa mga kasulatan. Aron matabangan ang gagmay nga mga bata nga makat-on gikan sa mga kasulatan, tutuki ang usa ka bersikulo sa kasulatan o bisan usa lang ka importanting hugpong sa mga pulong. Mahimo nimong dapiton ang mga bata sa pagbarug o sa pag-isa sa ilang mga kamot kon madungog nila kana nga pulong o hugpong sa mga pulong. (Tan-awa sa Pagtudlo sumala sa Pamaagi sa Manluluwas, 21.)