Simbahon Nato Siya, ni Dana Mario Wood

Enero 14–20

Lucas 2; Mateo 2

Mianhi Kami aron sa Pagsimba Kaniya

Sugdi pinaagi sa pagbasa sa Mateo 2 ug Lucas 2. Ang outline niini nga semana gikan sa Dali, Sunod Kanako—Alang sa mga Indibidwal ug mga Pamilya makatabang kanimo sa pagsabut niini nga mga kapitulo, ug kini nga outline makahatag kanimo og mga ideya sa pagtudlo.

Irekord ang Imong mga Impresyon

Awhaga ang Pagpaambit

Hangyoa ang mga bata sa pagsulti kanimo kon unsay ilang nahinumduman mahitungod sa pagkatawo ni Kristo. Unsa ang ilang paborito nga mga parte sa istorya?

Itudlo ang Doktrina

Mas Gagmay nga mga Bata

Lucas 2:1–14

Si Jesus natawo.

Si Jesus mibiya sa Iyang panimalay uban sa Langitnong Amahan aron matawo dinhi sa yuta aron mahimo Siya natong Manluluwas. Unsaon nimo pagtabang ang mga bata nga makahinumdom sa istorya sa pagkatawo ni Kristo?

Posible nga mga Kalihokan

• Samtang imong basahon ang istorya sa pagkatawo ni Kristo, dapita ang mga bata nga ilang sundugon ang mga lihok diha sa istorya o gamita ang pahina sa kalihokan niining semanaha. Tan-awa usab sa “Kapitulo 5: Jesukristo Natawo,” Mga Istorya sa Bag-ong Tugon, 13–15.

• Kon aduna ka, pagdala og Belen [Nativity set] ug dapita ang mga bata sa pagpahimutang sa mga piraso sa tukma nga mga dapit samtang imong isugilon kanila ang istorya sa pagkatawo ni Jesukristo. Mahimo ka usab nga mopakita og hulagway sa talan-awon sa Pagkahimugso ni Kristo (tan-awa, pananglit, ang outline niini nga semana sa Dali, Sunod Kanako—Alang sa mga Indibidwal ug mga Pamilya). Itudlo ang lain-laing mga tawo diha sa Pagkahimugso ni Kristo ug dapita ang mga bata sa pagpaambit sa unsay ilang nahibaloan mahitungod sa matag tawo.

• Kantaha og dungan ang paborito nga mga kanta sa mga bata mahitungod sa pagkatawo ni Jesus. Samtang inyong buhaton, pagtan-aw og mga oportunidad nga makapamatuod ka mahitungod sa Manluluwas ug dapita ang mga bata sa pagpaambit nganong gimahal nila si Jesus.

Mateo 2:1–12

Makahatag ko og maayo nga mga gasa ngadto ni Jesus.

Ang mga Mago mihatag kang Jesus og mga gasa nga bulawan, incienso, ug mirra. Unsaon nimo paggamit niini nga istorya sa pagtudlo sa mga bata nga makahatag usab sila og mga gasa ngadto ni Jesus—sama sa gugma, pagserbisyo, ug pagkamasulundon?

Posible nga mga Kalihokan

• Pagpakita og litrato sa mga Mago samtang imong ribyuhon ngadto sa mga bata ang ilang istorya, nga makita diha sa Mateo 2:1–12. Mahimo nimong ipakita ang hulagway nga Wise Men Present Gifts (LDS.org).

• Ipina-regalo og putos ang mga hulagway o mga butang nga nagrepresentar sa mga gasa nga atong ikahatag ngadto ni Jesus. Dapita ang mga bata nga tabangan ka sa pag-abli sa mga gasa ug hisguti kon sa unsang paagi mohatag kita niini nga mga gasa ngadto sa Manluluwas.

• Tabangi ang matag bata sa pagdrowing o pagsulat og lista sa mga gasa nga ilang mahatag ni Jesus, sama sa “pagkahimong buotan nga higala” o “pag-ampo.” Dapita ang mga bata sa pagpaambit sa ilang mga lista diha sa klase ug sa pagpili og usa nga buhaton niining semanaha.

Lucas 2:40–52

Si Jesus kaniadto usa ka bata sama nako.

Ang pagkat-on mahitungod sa pagkabata sa Manluluwas makatabang sa mga bata nga imong gitudloan nga mobati og koneksyon kaniya. Pangutan-a ang mga bata kon unsay ilang makat-unan gikan niini nga mga bersikulo kon sa unsang paagi sila mahimong sama ni Jesus karon.

Posible nga mga Kalihokan

• Dapita ang usa sa mga batan-on sa ward sa pagbisita sa klase ug sa pagpaambit sa istorya ni Jesus nga nagtudlo diha sa templo niadtong usa Siya ka batan-ong lalaki.

• Paghangyo daan og pipila ka mga bata nga magdala og mga litrato sa ilang kaugalingon sa dihang mga masuso pa sila aron mapakita sa klase. Pangutan-a sila kon sa unsang paagi sila midako. Pagpaambit og pipila ka mga paagi nga si Jesus midako (tan-awa sa Lucas 2:40, 52). Kantaha uban sa mga bata ang “Sa Bata pa si Jesus,” Songbook sa mga Bata, 34, o laing kanta mahitungod sa Manluluwas.

• Basaha ang Lucas 2:52 ug ipasabut kon unsa ang kahulugan sa “kaalam” ug “gidak-on”. Mahimo nimong hangyoon ang mga bata sa paghimo og mga aksyon nga nagpakita kon unsa ang gipasabut sa pagtubo diha sa kaalam ug sa kahimuot sa Dios ug sa ubang tawo. Sama pananglit, mahimo nilang sundugon ang lihok sa pagbasa og libro o pagtabang sa tawo nga nanginahanglan.

Itudlo ang Doktrina

Mas Dagko nga mga Bata

Lucas 2:1–21; Mateo 2:1–2

Ang karaan nga mga propeta nanagna sa pagkatawo sa Manluluwas.

Ang mga propeta ug mga tumutuo nagpaabut sa pagkatawo sa Manluluwas sulod sa daghang mga siglo. Ang pagsabut niini nga kamatuoran makatabang sa mga bata nga makaangkon og mas lawom nga pagsabut sa kinabuhi ug misyon sa Manluluwas.

Posible nga mga Kalihokan

• Hangyoa ang mga bata sa paghisgot mahitungod sa mga butang nga ilang gipaabut, sama sa birthday o holiday. Ipabasa sa mga bata ang Helaman 14:2–5 aron masayud og usa ka butang nga gipaabut sa mga propeta.

• Basaha og dungan ang pipila ka mga panagna sa pagkatawo sa Manluluwas (tan-awa sa Isaias 7:14; 9:6; 1 Nephi 11:18; Helaman 14:5). Tabangi ang mga bata sa paglista og mga detalye nga naglangkob niini nga mga panagna ug sa pagpangita sa katumanan niini diha sa Lucas 2:1–21 ug Mateo 2:1–2.

• Dapita ang mga bata sa pagdrowing og hulagway sa Pagkatawo ni Kristo ug sa pagpaambit kon nganong mapasalamaton sila nga natawo si Jesus.

Si Simeon Nagpakita’g Pagtahud sa Batang Kristo, ni Greg K. Olsen

Lucas 2:40, 52

Si Jesus kaniadto usa ka bata sama nako.

Sama ni Jesus, ang mga bata nga imong gitudloan adunay importante nga misyon nga pangandaman. Unsa ang ilang makat-unan gikan sa ehemplo ni Jesus?

Posible nga mga Kalihokan

• Samtang basahon nimo ang Lucas 2:40, 52, sultihi ang mga bata nga maminaw sa mga butang nga gibuhat ni Jesus. Dapita ang mga bata sa pagpaambit sa mga paagi diin sila midako sukad sa ilang pagkagamay. Ipaambit ang imong kaugalingong kasinatian sa pagkat-on sa ebanghelyo sa hinay-hinay; dayon ihatag ang imong pagpamatuod.

• Kompletuha ang mga kalihokan nga naghulagway sa mga pulong diha sa Lucas 2:40, 52. Sama pananglit, mahimo nimong sukdon ang gitas-on sa matag bata (“si Jesus mitubo sa … gidak-on”) o ipaambit nila ang ilang paborito nga kasulatan (“nahimong kusgan”). Tabangi ang mga bata sa paghimo og rekord sa mga paagi nga sila nagdako ug sa pagpaambit niini sa ilang mga pamilya.

• Human maribyu ang Lucas 2:40, 52, dapita ang mga bata sa pagpaambit kon sama sa unsa kaha si Jesus sa dihang nag-edad Siya og sama kanila. Unsaon kaha Niya pagtratar ang Iyang inahan? Ang Iyang mga igsoon?

Lucas 2:41–52

Makasunod ako sa ehemplo ni Jesus.

Bisan batan-on pa, si Jesus nagtudlo sa mga anciano [elder] diha sa templo. Sa samang paagi, ang mga bata sa imong klase adunay daghang matudlo niadtong naglibut kanila.

Posible nga mga Kalihokan

• Dapita ang usa ka bata nga moabut nga andam sa pag-summarize sa istorya diha sa Lucas 2:41–52. Aron matabangan ang mga bata nga makasabut sa istorya, itudlo kon unsay gipasabut sa “[buluhaton] sa akong Amahan.” Sama pananglit, mahimo nimong sultihan ang mga bata kon unsay gibuhat nimo o sa imong mga ginikanan isip trabaho. Unsa man ang trabaho o “buluhaton” ni Jose, ang yutan-on nga amahan ni Jesus? (tan-awa sa Mateo 13:55). Unsa man ang buluhaton sa Iyang Langitnong Amahan? (tan-awa sa Lucas 2:46–49; tan-awa usab sa Moises 1:39).

• Uban sa mga bata, basaha ang Lucas 2:46–49 ug pangutana, “Giunsa man pagbuhat ni Jesus ang buluhaton sa Iyang Amahan?” Tabangi ang mga bata sa paglista o pagdrowing diha sa pisara sa mga paagi nga makatabang sila sa pagbuhat usab sa buluhaton sa Langitnong Amahan.

• Aron matabangan ang mga bata nga mapalig-on ang ilang pagsalig nga sila, sama sa batang si Jesus, makatudlo sa ebanghelyo, tabangi sila nga magpraktis sa pagtudlo sa usag usa og baruganan gikan sa Alang sa Kalig-on sa mga Kabatan-onan.

Awhaga ang Pagkat-on diha sa Panimalay

Dapita ang mga bata sa pagtudlo sa ilang pamilya og usa ka butang nga ilang nakat-unan mahitungod sa pagkatawo ni Kristo.

Pagpalambo sa Atong Pagtudlo

Ang mga bata kuryuso ug makakat-on sa daghang mga paagi. Ang mga bata malingaw sa pagkat-on pinaagi sa bag-o ug lain-lain nga mga kasinatian. Gamita ang mga kalihokan nga makatabang kanila nga molihok, mogamit sa tanan nilang mga balatian, magsusi-susi, ug mosulay og bag-ong mga butang. (Tan-awa sa Pagtudlo sumala sa Pamaagi sa Manluluwas, 25–26.)