Enero 21–27

Juan 1

Among Nakaplagan ang Mesiyas

Samtang imong basahon ang Juan 1, irekord ang espiritwal nga mga impresyon nga imong madawat. Ang outline niini nga semana sa Dali, Sunod Kanako—Alang sa mga Indibidwal ug mga Pamilya makatabang kanimo nga makasabut niini nga kapitulo. Ang mosunod nga gisugyot nga mga kalihokan makahatag kanimo og mga ideya kon unsaon sa pagtabang sa mga bata nga makakat-on sa mga baruganan diha sa Juan 1. Ang mga kalihokan alang sa mas dagko nga mga bata mahimong mapahiangay, kon gikinahanglan, alang sa mas gagmayng mga bata.

Irekord ang Imong mga Impresyon

Awhaga ang Pagpaambit

Aron matabangan ang mga bata sa pagpaambit sa unsay ilang nahibaloan mahitungod ni Jesus, mahimo ka nga mopakita og mga hulagway Niya nga nagbuhat sa pipila sa Iyang mga tahas nga gihulagway diha sa Juan 1. Dayon hangyoa sila sa paghulagway kon unsa ang nahitabo nianang higayuna (sama sa paglalang sa kalibutan o pagtudlo sa ebanghelyo).

Itudlo ang Doktrina

Mas Gagmay nga mga Bata

Juan 1:1–2

Si Jesus nagpuyo uban sa Langitnong Amahan sa wala pa Siya matawo.

Si Juan mitudlo nga si Jesukristo nagpuyo uban sa Dios sa wala pa ang Iyang mortal nga kasinatian. Kita usab nagpuyo uban sa Dios sa wala pa kita matawo (tan-awa sa “Ang Pamilya: Usa ka Pamahayag ngadto sa Kalibutan,” Liahona, Nob. 2010, 129). Unsaon nimo sa pagtudlo sa mga bata niini nga kamatuoran?

Posible nga mga Kalihokan

• Ipasabut nga “ang Pulong” diha sa Juan 1:1 nagpasabut kang Jesus. Basaha og kusog ang bersikulo, ug hangyoa ang mga bata sa pagsulti og “Jesus” sa matag higayon nga mobasa ka sa “ang Pulong.” Ipakita ang drowing nga Premortal nga Kinabuhi (LDS.org). Ipasabut nga si Jesukristo nagpuyo uban sa Langitnong Amahan sa wala pa Siya moanhi sa yuta.

• Tudloi ang mga bata nga kita usab nagpuyo uban sa Dios sa wala pa kita moanhi sa yuta. Mahimo nimong gamiton ang “Pasiuna: Ang Plano sa Atong Langitnong Amahan,” Mga Istorya sa Bag-ong Tugon, 1–5; o Giya ngadto sa mga Kasulatan, “Kinabuhi nga Wala pa Dinhi sa Yuta,” scriptures.lds.org.

• Pagdapit og usa ka ginikanan sa pagdala og batang masuso diha sa klase, ug gamita kini isip oportunidad sa pagtudlo nga nagpuyo kita sa langit uban sa Langitnong Amahan isip espiritu nga mga anak sa wala pa kita matawo.

Juan 1:3

Si Jesus milalang sa tanan nga mga butang.

Daghan nga mga bata natural nga malingaw nga anaa taliwala sa mga nilalang sa Dios. Ang pagkahibalo mahitungod sa tahas ni Kristo isip Tiglalang makatabang sa pagpalambo sa ilang balaang pagtahud alang Kaniya.

Posible nga mga Kalihokan

• Basaha ang Juan 1:3 uban sa mga bata, ug ipakita ang hulagway sa outline niini nga semana sa Dali, Sunod Kanako—Alang sa mga Indibidwal ug mga Pamilya. Tabangi ang mga bata nga makasag-ulo sa mga pulong nga “ang tanang mga butang nangahimo pinaagi [ni Jesukristo].”

• Dad-a ang mga bata aron manglakaw sa gawas. Papuli-puliha ang mga bata sa paghulagway og usa ka nilalang nga ilang nakit-an, ug hangyoa ang klase sa pagtag-an kon unsay ilang gihulagway.

• Hangyoa ang mga bata sa paghunahuna og mga paagi nga makaamuma sila sa mga nilalang nga naglibut kanila (sama pananglit, magmabination ngadto sa mga hayop).

Si Jesukristo milalang sa kalibutan ug sa tanan nga anaa niini.

Juan 1:35–51

Makadapit ako sa uban sa pagduol kang Jesukristo ug pagkat-on mahitungod Kaniya.

Ang Juan 1 naglangkob og mga istorya sa mga disipulo kinsa midapit sa mga tawo nga “umari ka ug tan-awa” nga si Jesus mao ang Anak sa Dios. Bisan ang gagmayng mga bata makasunod niini nga ehemplo.

Posible nga mga Kalihokan

• Ihulagway kon sa unsang paagi si Juan mitudlo ni Andres mahitungod ni Jesus, ug isulti kon sa unsang paagi si Andres dayon mitudlo ni Pedro (tan-awa sa Juan 1:35–42). Ipaambit kon sa unsang paagi nga nakakat-on ka mahitungod sa Simbahan, o pagdapit og bag-ong miyembro nga mopaambit kon sa unsang paagi siya nakakat-on mahitungod sa Simbahan.

• Ipaambit ang istorya ni Felipe nga nagdapit ni Natanael nga “umari ka ug tan-awa” (Juan 1:43–51). Pagtago og usa ka hulagway ni Jesus sulod sa kahon, ug dapita ang usa ka bata nga “umari ug [motan-aw]” niini ug dayon mosulti sa ubang mga bata kon unsa ang iyang nakita.

• Pakolori sa mga bata ang pahina sa kalihokan karong semanaha, ug awhaga sila sa paggamit niini aron modapit og tawo sa pagkat-on mahitungod ni Jesus.

• Hangyoa ang usa ka bata sa pagsulti og usa ka higayon nga mipaambit siya og usa ka butang, sama sa usa ka dulaan o gasa, ngadto sa usa ka tawo. Sa unsang paagi kita makapaambit sa ebanghelyo? Isaysay ang istorya sa usa ka bata kinsa mipaambit sa ebanghelyo ngadto sa usa ka higala, sama sa istorya ni Elder M. Russell Ballard kabahin ni Joshua (“Pag-follow Up,” Liahona, Mayo 2014, 78–81).

Itudlo ang Doktrina

Mas Dagko nga mga Bata

Juan 1:1–5

Si Jesukristo nagpuyo uban sa Langitnong Amahan sa wala pa Siya matawo.

Bisan sa wala pa Siya matawo, si Jesukristo adunay importanting mga tahas sa plano sa Langitnong Amahan. Samtang imong basahon ang Juan 1:1–5, unsa ang nakadani nimo mahitungod sa premortal nga buhat ni Kristo?

Posible nga mga Kalihokan

• Pangutan-a ang mga bata kon duna ba silay nahibaloan mahitungod sa gibuhat ni Jesus sa wala pa Siya matawo. Dapita sila sa pagpangita sa mga tubag diha sa Juan 1:1–5. Tingali makatabang ang pagtan-aw diha sa Hubad ni Joseph Smith, Juan 1:1–5 (sa Giya ngadto sa mga Kasulatan).

• Ipaambit ang “Pasiuna: Ang Plano sa Atong Langitnong Amahan,” Mga Istorya sa Bag-ong Tugon, 1–5, ngadto sa mga bata. Pangutan-a ang mga bata kon unsay ilang nakat-unan mahitungod ni Jesukristo.

• Dapita ang pipila ka mga bata sa pagtungha sa klase nga andam nga mopakita o mohulagway og usa ka butang nga ilang gihimo. Pagpakita og mga hulagway sa pipila sa mga nilalang sa Ginoo, ug gamita ang Juan 1:3 sa pagpasabut nga si Jesus milalang sa tanang butang.

Juan 1:4–9

Si Jesukristo mao ang akong kahayag.

Ang simbolismo sa kahayag makatabang sa mga bata sa pagsabut sa Manluluwas ug sa Iyang ebanghelyo. Sa unsang paagi nga makadasig ka sa mga bata sa pagtinguha sa kahayag sa Manluluwas kon ang kalibutan daw ngitngit?

Posible nga mga Kalihokan

• Dapita ang mga bata sa pagbasa sa Salmo 27:1; Juan 1:4–9; Mosiah 16:9; ug Doktrina ug mga Pakigsaad 39:1–2, nga mangita sa mga pulong nga komon niini nga mga kasulatan. Sa unsang paagi si Jesukristo sama sa usa ka kahayag?

• Pagpakita og hulagway sa Manluluwas ug pipila ka mga butang nga mohatag og kahayag, sama sa flashlight. Sa unsang paagi si Jesukristo sama niini nga mga butang? Sa unsang paagi nato mapaambit ang Iyang kahayag ngadto sa uban?

• Pangutan-a ang mga bata unsa ang ilang buhaton kon anaa sila sa kangitngit ug mobati og kahadlok. Ipamatuod nga kanunay silang makadangup sa Manluluwas kon sila nahadlok.

Juan 1:35–51

Isip usa ka sumusunod ni Jesukristo, modapit ako uban sa pagsunod Kaniya.

Hunahunaa kon unsaon nimo sa paggamit ang mga ehemplo diha sa Juan 1:35–51 sa pag-awhag sa mga bata nga modapit sa uban sa pagkat-on mahitungod sa Manluluwas.

Posible nga mga Kalihokan

• Tabangi ang mga bata sa pagsiksik sa Juan 1:35–51 aron makakita og mga butang nga gisulti sa mga tawo sa pagdapit sa uban nga magkat-on mahitungod sa Manluluwas. Papraktisa sila sa unsay ilang isulti sa pagdapit og usa ka higala sa pagkat-on mahitungod Kaniya.

• Hangyoa ang mga bata sa paggamit sa pahina sa kalihokan niini nga semana aron sa paghimo og imbitasyon nga ilang magamit sa pagdapit og higala o sakop sa pamilya nga magkat-on pa mahitungod ni Jesukristo.

• Hatagi ang mga bata og oportunidad sa pagsulti sa klase mahitungod sa usa ka butang nga ilang gimahal. Tabangi ang mga bata nga makakita kon sa unsang paagi ang pagpaambit sa ebanghelyo mahimong sama sa pagpaambit sa ubang mga butang nga atong gimahal.

Awhaga ang Pagkat-on diha sa Panimalay

Awhaga ang mga bata sa pagdapit og usa ka tawo nga ilang gimahal nga magkat-on pa mahitungod ni Jesukristo.

Pagpalambo sa Atong Pagtudlo

Tabangi ang mga bata sa paghanduraw sa istorya. Pangita og mga paagi sa paghimo og hulagway sa istorya, lakip sa mga art sa ebanghelyo, mga drowing, mga video, mga puppet, o mga mugbong pasundayag.