Stained-glass nga bintana sa Nauvoo Illinois Temple, gilitratuhan ni Tom Holdman

Enero 28–Pebrero 3

Mateo 3; Marcos 1; Lucas 3

“Andama Ninyo ang Dalan alang sa Ginoo”

Samtang mobasa ka mahitungod ni Juan Bautista ug sa bunyag ni Jesukristo, irekord ang bisan unsang espiritwal nga mga impresyon nga imong madawat. Ang Dali, Sunod Kanako—Alang sa mga Indibidwal ug mga Pamilya makatabang kanimo nga makasabut niini nga mga kasulatan, ug makatabang kini kanimo sa pagsuporta sa pagkat-on nga gihimo sa mga sakop sa imong klase sa ilang kaugalingon.

Irekord ang Imong mga Impresyon

Awhaga ang Pagpaambit

Aron mahatagan ang mga bata og kahigayunan sa pagpaambit sa unsay ila nang nahibaloan, ipakita ang usa ka hulagway ni Jesus nga gibunyagan, ug hangyoa sila sa pagsulti kanimo unsa ang nahitabo dinhi niini nga litrato ug unsay ilang gibati mahitungod sa pagpabunyag.

Itudlo ang Doktrina

Mas Gagmay nga mga Bata

Mateo 3:13–17

Mabunyagan ko sama ni Jesus.

Unsaon nimo paggamit ang istorya sa bunyag ni Jesus aron sa pagtabang sa mga bata nga mangandam sa pagpabunyag?

Posible nga mga Kalihokan

• I-summarize ang istorya sa bunyag sa Manluluwas (tan-awa sa Mateo 3:13–17; tan-awa usab sa “Kapitulo 10: Jesus Gibunyagan,” Mga Istorya sa Bag-ong Tugon, 26–29). Balik-balika ang istorya sa pipila ka higayon ug dapita ang mga bata sa pagpaambit sa mga detalye nga ilang mahinumduman. Ipasabut nga si Jesus gibunyagan sa tawo nga adunay awtoridad sa priesthood pinaagi sa pagpaunlod.

• Ipakita ang usa ka hulagway ni Jesus nga gibunyagan ug ang pahina sa kalihokan karong semanaha. Ipatudlo sa mga bata ang mga pagkasama sa duha ka hulagway.

• Mahimo nimong ribyuhon ang mga saad nga himoon sa mga bata kon sila bunyagan (tan-awa sa Mosiah 18:8–10; DP 20:37; Matinud-anon sa Tinuhoan, 19–20). Pangutan-a sila hain niining mga butanga ang ila na nga ginabuhat.

• Dapita ang usa ka sakop sa bishopric sa pagsulti sa mga bata mahitungod sa ilang interbyu sa bunyag sa dili pa sila mabunyagan.

• Kantaha ang “Bunyag,” Songbook sa mga Bata, 54–55, uban sa mga bata. Ikonsiderar ang paghangyo sa usa ka bata nga nakahibalo og maayo sa kanta nga mangulo sa ubang mga bata sa ilang pagkanta.

Makasunod kita sa ehemplo ni Jesus pinaagi sa pagpabunyag.

Mateo 3:11, 16

Ang Espiritu Santo motabang kanako.

Agig dugang sa pagpangandam alang sa bunyag, ang mga bata mangandam usab sa pagdawat sa gasa sa Espiritu Santo. Unsaon nimo pagtabang kanila?

Posible nga mga Kalihokan

• Gamita ang Mateo 3:11, 16 sa pagtudlo sa mga bata nga ang Espiritu Santo mikunsad ngadto kang Jesus sa dihang Siya gibunyagan (usa ka salampati mipakita isip timailhan aron sa pagpakita nga kini nahitabo). Ipakita ang hulagway nga Ang Gasa sa Espiritu Santo (Libro sa mga Hulagway sa Ebanghelyo, nu. 105), ug ipasabut nga kita makadawat sa gasa sa Espiritu Santo sa dihang kita makumpirmahan.

• Pagdala og kahon nga gisudlan og mga butang sama sa hulagway ni Jesus, habol, ug kompas. Dapita ang mga bata sa pagpili og usa ka butang ug dayon sa pagpaambit kon sa unsang paagi ang matag butang nagrepresentar og paagi nga ang Espiritu Santo makatabang kanato—Siya mopamatuod mahitungod ni Jesus, mohupay [molaban] kanato (tan-awa sa Juan 15:26), ug mopakita kanato sa matarung nga dalan (tan-awa sa 2 Nephi 32:5).

• Ipaambit ang imong kaugalingon nga mga kasinatian sa pagdawat og tabang gikan sa Espiritu Santo.

• Dapita ang mga bata sa pagpaminaw og mga paagi nga ang Espiritu Santo motabang kanato samtang manganta sila sa “Ang Espiritu Santo,” Songbook sa mga Bata, 56.

Itudlo ang Doktrina

Mas Dagko nga mga Bata

Mateo 3

Napanalanginan ko sa mga ordinansa sa Aaronic Priesthood.

Naghupot si Juan Bautista sa Aaronic Priesthood, mao nga maayo kini nga oportunidad sa pagtudlo sa mga bata mahitungod sa Aaronic Priesthood ug sa pagtabang kanila nga makaila sa mga panalangin ug gahum nga moabut sa mga lalaki ug babaye pinaagi niini nga priesthood.

Posible nga mga Kalihokan

• Dapita ang mga bata sa paghimo og lista sa mga katungdanan sa Aaronic Priesthood, gamit ang Doktrina ug mga Pakigsaad 20:46, 58–60; 84:111. Ipasabut nga ang mga priest sa Aaronic Priesthood makahimo sa “pagbunyag, ug pagpangalagad sa sakramento.” Ang mga priest, mga teacher, ug mga deacon kinahanglang “magtudlo, ug magdapit sa tanan sa pagduol ngadto kang Kristo” (D&P 20:46, 59). Hangyoa ang mga bata sa pagtan-aw diha sa Mateo 3 alang sa mga ehemplo nga gituman ni Juan kini nga mga katungdanan. Sa unsang paagi kitang tanan makadapit sa uban sa pagduol kang Kristo, sama sa gibuhat ni Juan?

• Pag-display og pipila ka mga litrato sa mga tighupot sa Aaronic Priesthood nga nagpahigayon sa mga ordinansa sa bunyag ug sakrament (tan-awa sa Libro sa mga Hulagway sa Ebanghelyo, nos. 103, 108). Hisguti kon sa unsang paagi kini nga mga ordinansa nag-andam kanato sa pagdawat ni Jesukristo ug sa Iyang Pag-ula.

• Basaha og dungan ang Doktrina ug mga Pakigsaad 13:1, ug ipasabut nga si Juan Bautista mipahiuli sa Aaronic Priesthood ngadto ni Joseph Smith. Pangutan-a ang mga bata kon sa unsang paagi sila napanalanginan tungod kay gipahiuli ang Aaronic Priesthood.

Mateo 3:13–17; Lucas 3:2–18

Makatuman ako sa akong mga pakigsaad sa bunyag.

Ang istorya sa bunyag ni Jesus usa ka maayo nga oportunidad sa pagtabang sa mga bata sa pagribyu sa ilang mga pakigsaad sa bunyag ug sa pagpasalig og usab sa pagsunod niini.

Posible nga mga Kalihokan

• Hangyoa ang duha ka mga bata sa pagbasa sa Lucas 3:7–9, 15–17, ang usa mobasa sa mga pulong ni Juan Bautista ug ang usa mobasa sa nahabilin nga mga pulong. Human sa matag bersikulo, hunong ug tabangi ang mga bata nga makasabut unsa ang gipasabut sa mga bersikulo.

• Ribyuha ang mga pakigsaad nga gihimo sa mga bata panahon sa bunyag, nga makita diha sa Mosiah 18:8–10 ug Doktrina ug mga Pakigsaad 20:37. (Tan-awa usab ang Matinud-anon sa Tinuhoan, 19–23.) Dapita ang mga bata sa pagsulat niini nga mga pakisayran diha sa pahina sa kalihokan karong semanaha.

• Pag-andam og pipila ka parisan sa mga kard nga adunay magkapares nga mga pulong o mga litrato nga nagrepresentar sa atong mga pakigsaad sa bunyag. Ikulob ang mga kard. Dapita ang mga bata nga magpuli-puli sa pag-ukab og duha ka kard matag higayon, nga mangita og magkapares. Human makaukab og magkapares nga mga kard, dapita ang mga bata sa pagpaambit og mga paagi nga ilang gituman kana nga pakigsaad.

• Ipaambit kon sa unsang paagi ang pagtuman sa imong mga pakigsaad sa bunyag nakapanalangin kanimo.

Mateo 3:11, 16

Ang Espiritu Santo makagiya kanako.

Ang mga bata nagkat-on kon unsaon sa pag-ila ug pagsunod sa giya sa Espiritu Santo. Unsaon nimo pagtudlo kanila nga ang pagtuman sa ilang mga pakigsaad sa bunyag makatabang kanila nga mahimong takus sa pagdawat niini nga giya?

Posible nga mga Kalihokan

• Hangyoa ang matag bata sa pagpili og usa sa mosunod nga mga kasulatan aron basahon ug mopasabut kon sa unsang paagi ang Espiritu Santo mamulong kanato: Doktrina ug mga Pakigsaad 6:23; 8:2–3.

• Hangyoa ang usa ka bata sa pagbasa sa Mateo 3:11. Sa unsang paagi ang Espiritu Santo sama sa kalayo? Sama pananglit, ang kalayo makahupay, ug naghatag kini og kahayag aron sa paggiya kanato (tan-awa sa Juan 15:26; 2 Nephi 32: 5).

• Dapita ang mga bata sa pagpiyong sa ilang mga mata ug sa pagtuyhad sa ilang mga kamot. Dayon tanduga sa hinay ang ilang mga palad gamit ang balahibo o hilo. Dapita sila sa pagsulti kanimo kon makabatyag sila niini. Unsay gitudlo niini nga kalihokan mahitungod sa pag-ila sa mga impresyon sa Espiritu Santo?

• Dapita ang mga bata sa pagpaambit sa ilang mga kasinatian uban sa Espiritu Santo. Nganong ang pagtuman sa atong mga pakigsaad makatabang kanato nga makabaton sa giya sa Espiritu Santo?

Awhaga ang Pagkat-on diha sa Panimalay

Awhaga ang mga bata sa pagpangutana sa ilang mga ginikanan o ubang mga sakop sa pamilya mahitungod sa ilang bunyag.

Pagpalambo sa Atong Pagtudlo

Pagtinguha og imong kaugalingon nga inspirasyon. Ayaw og hunahunaa kini nga mga outline isip mga instruksyon nga kinahanglan gayud nimong sundon samtang magtudlo ka. Hinoon, gamita kini isip mga ideya nga makaawhag og imong kaugalingong inspirasyon samtang mamalandong ka sa mga panginahanglan sa mga bata nga imong gitudloan. (Tan-awa sa Pagtudlo sumala sa Pamaagi sa Manluluwas, 7.)