Marso 18–24

Mateo 13; Lucas 8; 13

“Ang May mga Dalunggan nga Makadungog, Kinahanglan Siya Magpatalinghug”

Ang mga sambingay mga yano nga mga istorya nga makapainteres sa mga bata. Kini nga outline ug ang Dali, Sunod Kanako—Alang sa mga Indibidwal ug mga Pamilya makatabang nimo sa paggamit sa mga sambingay sa Manluluwas aron sa pagtudlo sa mga bata og importanting mga kamatuoran.

Irekord ang Imong mga Impresyon

Awhaga ang Pagpaambit

Pagdala og pipila ka mga butang nga makatabang sa mga bata nga makahinumdom sa pipila sa mga sambingay sa Mateo 13, sama sa binhi, perlas, o kahon sa bahandi. Dapita ang mga bata sa pagpaambit kon unsa ang ilang nahinumduman bahin sa mga sambingay.

Itudlo ang Doktrina

Mas Gagmay nga mga Bata

Mateo 13:1–23

Kinahanglang mangandam ko sa pagkat-on sa mga pagtulun-an ni Jesus.

Ang gagmay nga mga bata mahimong dili makasabut sa tanang simbolismo diha sa sambingay sa magpupugas, apan makakat-on sila sa yano nga mga kamatuoran sa ebanghelyo nga gitudlo niini. Unsaon nimo sila pagtabang nga mas makasabut kon sa unsang paagi kini nga sambingay adunay kalabutan kanila?

Posible nga mga Kalihokan

• Ipakita ang lain-laing matang sa yuta (o mga litrato sa yuta) samtang imong i-summarize ang Mateo 13:3–8. Hatagi ang matag bata og binhi nga itanom sa yuta. Pangutan-a ang mga bata kon unsa ang atong mabuhat sa pagtabang sa mga binhi nga motubo. Ipasabut nga ang pagbaton og hugot nga pagtuo sa Langitnong Amahan ug ni Jesukristo maoy usa ka paagi nga matabangan nato ang atong “binhi” sa pagpamatuod nga motubo.

• Gamita ang pahina sa kalihokan karong semanaha aron sa pagtabang sa mga bata nga makasabut kon unsa ang gitudlo sa matag matang sa yuta nga gihulagway diha sa Mateo 13 mahitungod sa atong mga kasingkasing. Pangutan-a ang mga bata unsa nga matang sa kasingkasing ang gusto ni Jesus nga ilang mabatunan aron makakat-on sa Iyang mga pagtulun-an.

• Basaha ang Mateo 13:9, 15, ug dapita ang mga bata nga itudlo ang lain-laing parte sa ilang mga lawas kon makadungog sila nga masulti kini. Unsaon nato paggamit niini nga mga parte sa lawas sa pagkat-on sa mga pagtulun-an ni Jesus?

Mateo 13:24–30, 36–43, 47–48

Gusto sa Langitnong Amahan nga mopili ko sa matarung.

Ang uban sa mga sambingay ni Jesus nagtudlo nga sa katapusan nga adlaw, ibulag sa Dios ang dautan gikan sa mga matarung. Unsaon nimo sa paggamit ang mga sambingay aron madasig ang mga bata sa pagpili sa matarung?

Posible nga mga Kalihokan

• Ipa-aksyon sa mga bata ang sambingay sa trigo ug mga bunglayon (tan-awa sa Mateo 13:24–30). Ipasabut nga ang trigo nagrepresentar sa mga tawo kinsa mihimo og matarung nga mga pagpili, ug ang mga bunglayon (makadaut nga mga sagbut) nagrepresentar sa mga tawo nga wala mohimo niini. Usa ka adlaw, ang Langitnong Amahan mopundok sa matarung nga mga tawo aron mopuyo uban Kaniya.

• Pagsugilon og pipila ka yano nga mga istorya mahitungod sa mga bata nga mihimo og mga pagpili. Hangyoa ang mga bata sa pagsulti og “trigo nga pagpili” kon ang mga bata diha sa mga istorya mopili sa matarung ug “bunglayon nga pagpili” kon ang mga bata mohimo og sayop nga pagpili.

• Pagdala og mga hulagway sa mga punoan sa trigo, ug padrowinga ang mga bata diha sa mga hulagway sa pipila ka mga paagi nga mahimo silang matarung.

• Paghimo og usa ka dula diin ang mga bata motakdo sa mga detalye gikan sa sambingay sa magpupugas ngadto sa interpretasyon sa Mateo 13:18–23.

Mateo 13:44–46

Ang akong pagkamiyembro sa Ang Simbahan ni Jesukristo sa mga Santos sa Ulahing mga Adlaw usa ka bahandi.

Unsaon nimo paggamit sa simbolismo sa bahandi ug bililhon nga mga perlas aron sa pagtabang sa mga bata nga makasabut sa bili sa pagkahimong sakop sa Simbahan ni Kristo?

Posible nga mga Kalihokan

• Pagtago og mga hulagway sa baol sa bahandi ug perlas diha sa lawak, ug ipapangita kini sa mga bata. Gamita ang mga hulagway aron sa pagtabang kanimo sa pagtudlo mahitungod sa mga sambingay diha sa Mateo 13:44–46. Unsa ang mahimong ihatag sa mga bata aron makaangkon og nindot nga perlas o bahandi diha sa umahan? Ipasabut nga usahay kinahanglang isakripisyo nato ang usa ka butang nga maayo alang sa usa ka butang nga mas maayo. Sultihi ang mga bata nganong ang ebanghelyo bililhon alang kanimo.

• Ibutang sulod sa kahon o baol ang pipila ka butang o hulagway nga nagrepresentar sa “mga bahandi” sa Ang Simbahan ni Jesukristo sa mga Santos sa Ulahing mga Adlaw, sama sa mga templo o sa Basahon ni Mormon. Hangyoa ang matag bata sa pagpili og usa ka butang o hulagway ug sa paghisgot kon nganong usa kini ka bahandi.

• Kantaha og dungan ang “Ang Simbahan ni Jesukristo,” Songbook sa mga Bata, 48, ug hangyoa ang mga bata sa pagpaminaw sa mga panalangin nga moabut gumikan sa pagkahimong miyembro sa Simbahan. Pagpamatuod sa mga panalangin nga imong nasinati tungod sa imong pagkamiyembro sa Simbahan.

Itudlo ang Doktrina

Mas Dagko nga mga Bata

Mateo 13:1–23

Kinahanglan nakong andamon ang akong kasingkasing aron sa pagdawat sa mga pagtulun-an ni Jesus.

Unsaon nimo pagtabang ang mga bata nga makaila sa importansya sa pagbaton og malumo ug andam nga kasingkasing aron makatudlo si Jesus kanila?

Posible nga mga Kalihokan

• I-assign ang matag bata sa pagbasa mahitungod sa usa sa upat ka matang sa yuta diha sa Mateo 13:4–8. Dapita sila sa pagpangita ug sa pagpaambit sa unsay mahitabo sa binhi diha sa matang sa yuta nga ilang gibasa. Sa unsang paagi ang atong mga kasingkasing sama sa lain-laing matang sa yuta? (tan-awa sa Mateo 13:19–23).

• Hatagi ang matag bata og duha ka mga binhi, ug dapita sila sa pagtanum sa ilang mga binhi sa humok nga yuta ug sa pundok sa mga bato. Hain nga binhi ang adunay mas dakong purohan nga motubo? Unsaon nato sa pagsiguro nga ang atong mga kasingkasing sama sa humok nga yuta aron makadawat kita sa mga pagtulun-an sa Manluluwas?

• Dapita ang mga bata sa pagbasa sa Mateo 13:9–17. Pagdrowing og mata, dunggan, ug kasingkasing diha sa pisara. Unsaon nato paggamit ang matag usa niini nga mga parte sa lawas aron sa pagkat-on sa mga pagtulun-an ni Jesus?

Mateo 13:24–30, 36–43

Makahimo ako sa pagpili sa matarung bisan kon ang nanaglibut kanako wala maghimo niini.

Sa imong pagbasa niini nga mga bersikulo nga naghunahuna sa mga bata, unsa nga mga impresyon ang miabut kanimo?

Posible nga mga Kalihokan

• Dapita ang mga bata sa pagdrowing og lain-laing mga talan-awon gikan sa sambingay sa trigo ug mga bunglayon, nga makita diha sa Mateo 13:24–30, ug ipaambit ang ilang mga drowing ngadto sa klase. Hangyoa sila nga sulatan ang ilang mga drowing gamit ang interpretasyon sa sambingay nga makita diha sa Mateo 13:36–43. Ipasabut nga ang mga bunglayon makadaut nga mga sagbut.

• Kon mahimo, pagpakita og hulagway sa trigo ug mga bunglayon. Ipasabut nga ang trigo ug mga bunglayon motubo og dungan hangtud sa katapusan sa kalibutan. Nagtudlo kini kanato nga nagpuyo kita nga gilibutan sa maayo ug dautan, ug kinahanglang mag-amping gayud kita nga mopili sa matarung. Hangyoa ang mga bata sa pagpaambit kon unsaon nila pag-ila sa kalainan tali sa maayo ug dautan.

Mateo 13:44–46

Ang akong pagkamiyembro sa Ang Simbahan ni Jesukristo sa mga Santos sa Ulahing mga Adlaw usa ka bahandi.

Nakita ba sa mga bata nga imong gitudloan nga ang ilang pagkamiyembro sa Simbahan usa ka bililhon nga bahandi? Tingali ang mga sambingay sa Mateo 13:44–46 makatabang kanila.

Posible nga mga Kalihokan

• Dapita ang mga bata sa pagbasa sa Mateo 13:44–46 sa ilang mga kaugalingon ug sa pagpaambit sa mga sambingay gamit ang ilang kaugalingong mga pulong ngadto sa laing sakop sa klase.

• Paggunting og pipila ka mga lingin nga morepresentar sa mga sinsilyo, ug isulod kini sa kahon sa mga bahandi. Dapita ang mga bata sa pagkuha og usa ka sinsilyo ug sa pagdrowing o pagsulat diha niini og usa ka butang nga ilang ganahan kaayo mahitungod sa pagka-miyembro sa Simbahan. Hangyoa ang mga bata sa pagpaambit kon unsay ilang gibutang sa ilang sinsilyo.

• Dapita ang usa ka miyembro sa ward sa pagpaambit ngadto sa mga bata sa iyang istorya sa pagkakabig ug sa pagsulti kon unsa ang iyang gisakripisyo aron mahisakop sa Ang Simbahan ni Jesukristo sa mga Santos sa Ulahing mga Adlaw.

Awhaga ang Pagkat-on diha sa Panimalay

Dapita ang mga bata sa pagtudlo sa ilang mga pamilya mahitungod sa usa sa mga sambingay nga ilang nakat-unan sa Primary.

Pagpalambo sa Atong Pagtudlo

Ang mga bata ganahan nga mopaambit sa unsay ilang nakat-unan. Bisan og gagmay pa sila, ang mga bata makapalig-on sa mga sakop sa ilang pamilya. Awhaga sila sa pagpaambit ngadto sa ilang mga pamilya sa mga butang nga ilang nakat-unan sa Primary. (Tan-awa sa Pagtudlo sumala sa Pamaagi sa Manluluwas, 30.)