« ថ្ងៃទី ២៥–៣១ ខែ មីនា ។ ម៉ាថាយ ១៤–១៥, ម៉ាកុស ៦–៧, យ៉ូហាន ៥–៦ ៖ ‹ កុំខ្លាចឡើយ › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ២០១៩ )
« ថ្ងៃទី ២៥–៣១ ខែ មីនា ។ ម៉ាថាយ ១៤–១៥, ម៉ាកុស ៦–៧, យ៉ូហាន ៥–៦ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩
ប្រទានអាហារដល់ពួកគេ ដោយ ចច កូកូ
ថ្ងៃទី ២៥–៣១ ខែ មីនា
ម៉ាថាយ ១៤–១៥; ម៉ាកុស ៦–៧; យ៉ូហាន ៥–៦
« កុំខ្លាចឡើយ »
នៅពេលអ្នករៀបចំការបង្រៀនអំពី ម៉ាថាយ ១៤–១៥; ម៉ាកុស ៦–៧ និង យ៉ូហាន ៥–៦ សូមរកមើលសារលិខិតដែលទាក់ទងនឹងជីវិតរបស់កុមារដែលអ្នកបង្រៀន ។ តើអ្នកគិតថា អ្វីទៅដែលនឹងជួយឲ្យពួកគេយល់ពីសារលិខិតទាំងនេះ ? គម្រោងមេរៀននេះនឹងផ្ដល់គំនិតមួយចំនួនដល់អ្នក ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមបង្ហាញរូបភាពព្រះយេស៊ូវយាងលើទឹកមួយសន្លឹក ( សូមមើល គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ) ហើយសូមឲ្យកុមារចែកចាយអ្វីដែលពួកគេដឹងអំពីរឿងនេះ ។
បង្រៀនគោលលទ្ធិ
កុមារតូចៗ
ព្រះយេស៊ូវគ្រីស្ទជ្រាបអំពីអ្វីដែលយើងត្រូវការ ហើយទ្រង់អាចជួយយើងបាន ។
ពេលអ្នកអានអំពីព្រះយេស៊ូវព្យាបាលមនុស្សនៅឯស្រះបេថែសដា សូមសញ្ជឹងគិតអំពីរបៀបដែលអ្នកអាចជួយដល់កុមារឲ្យមើលឃើញអ្វីដែលរឿងនេះបង្រៀនអំពីសន្ដានចិត្តល្អ សេចក្ដីស្រឡាញ់ និងគុណលក្ខណៈផ្សេងទៀតរបស់ព្រះយេស៊ូវ ។
សកម្មភាពដែលអាចជ្រើសរើស
-
សូមប្រើរូបភាព ព្រះគ្រីស្ទព្យាបាលពួកអ្នកឈឺនៅបេថែសដា ( សៀវភៅរូបភាពដំណឹងល្អ ទំព័រ ៤២ ) ដើម្បីតំណាលប្រាប់រឿងនៅក្នុង យ៉ូហាន ៥:១–៩ ដល់កុមារ ។ ឬ សូមបង្ហាញវីដេអូ « Jesus Heals a Man on the Sabbath » ( LDS.org ) ។ សូមឲ្យកុមារស្រមៃថា ពួកគេគឺជាមនុស្សដែលព្រះយេស៊ូវបានព្យាបាល ។ តើពួកគេនឹងមានអារម្មណ៍យ៉ាងណា នៅពេលព្រះយេស៊ូវបានព្យាបាលពួកគេនោះ ?
-
សូមឲ្យកុមារសរសេរនូវការណ៍មួយចំនួនដែលលំបាកចំពោះពួកគេ ឬដែលធ្វើឲ្យពួកគេក្រៀមក្រំ ។ សូមប្រាប់ពួកគេអំពីគ្រាមួយនៅក្នុងជីវិតរបស់អ្នក នៅពេលដែលអ្នកបានទទួលជំនួយពីព្រះអង្គសង្គ្រោះអំឡុងឧបសគ្គដ៏ពិបាកមួយ ។ សូមថ្លែងទីបន្ទាល់ថា ព្រះយេស៊ូវជ្រាបអំពីបញ្ហារបស់យើងទាំងអស់ ហើយចង់ជួយយើង ។
យើងធ្វើតាមគំរូរបស់ព្រះយេស៊ូវ នៅពេលយើងមានសន្ដានចិត្តល្អចំពោះមនុស្សដទៃ ។
របៀបមួយដែលព្រះយេស៊ូវបានបង្ហាញសេចក្ដីស្រឡាញ់នោះគឺ ចម្អែតដល់អ្នកដើរតាមរបស់ទ្រង់ កាលពួកគេស្រេកឃ្លាន ។ តើអ្នកអាចជួយកុមារឲ្យរៀនបម្រើដល់មនុស្សដទៃ ដូចជាព្រះយេស៊ូវបានធ្វើដោយរបៀបណា ?
សកម្មភាពដែលអាចជ្រើសរើស
-
សូមបង្ហាញកន្ដ្រកមួយ និងនំប៉័ងខ្លះៗដល់កុមារ កាលអ្នកតំណាលរឿងនៅក្នុង ម៉ាថាយ ១៤:១៣–២១ ។ សូមពន្យល់ថា ទោះបីជាព្រះយេស៊ូវបានព្យាយាមស្វែងរកទីកន្លែងមួយដើម្បីទៅតែអង្គឯងក្ដី ក៏មនុស្សបានចង់នៅក្បែរទ្រង់ដែរ ។ សូមចែកចាយរឿងទាំងស្រុងដល់កុមារ ហើយសូមឲ្យពួកគេស្ដាប់រកអ្វីដែលព្រះយេស៊ូវបានធ្វើដើម្បីបង្ហាញសន្ដានចិត្តល្អ និងសេចក្ដីស្រឡាញ់ចំពោះពួកគេ ។
-
សូមឲ្យកុមារចែកចាយពីរបៀបដែលនរណាម្នាក់មានសន្ដានចិត្តល្អចំពោះពួកគេ ។ តើពួកគេអាចធ្វើអ្វីខ្លះនាសប្ដាហ៍នេះដើម្បីបង្ហាញសន្ដានចិត្តល្អដល់មនុស្សដទៃ ? សម្រាប់រាល់ចម្លើយដែលពួកគេឆ្លើយ សូមគូសរូបនំប៉័ងមួយ ឬត្រីមួយនៅលើក្ដារខៀន ។ សូមប្រាប់កុមារថា នៅពេលពួកគេធ្វើការណ៍ទាំងនេះ នោះពួកគេកំពុងធ្វើតាមគំរូរបស់ព្រះយេស៊ូវ កាលទ្រង់បានចម្អែតមនុស្សប្រាំពាន់នាក់ដែលបានស្រេកឃ្លាន ។
សេចក្ដីជំនឿទៅលើព្រះយេស៊ូវអាចជួយយើងមិនឲ្យភ័យខ្លាច ។
ពេត្រុសបានបង្ហាញសេចក្ដីជំនឿដ៏អស្ចារ្យ កាលលោកបានដើរលើទឹកដើម្បីទៅឯព្រះយេស៊ូវ ។ តើមានមេរៀនអ្វីខ្លះនៅត្រង់ចំណុចនេះដែលកុមារអាចរៀនពីរឿងនេះបាន ?
សកម្មភាពដែលអាចជ្រើសរើស
-
សូមប្រើរូបភាព ព្រះគ្រីស្ទយាងដើរលើទឹក ( សៀវភៅរូបភាពដំណឹងល្អ ទំព័រ ៤៣ ) កាលអ្នកតំណាលប្រាប់រឿងជាសម្ដីរបស់អ្នកផ្ទាល់ ។ សូមពិចារណាប្រើទំព័រសកម្មភាពសប្ដាហ៍នេះ ដើម្បីជួយកុមារឲ្យតំណាលប្រាប់រឿងដល់អ្នកវិញ ។ អ្នកក៏អាចយកកូនចានក្រឡូមមួយដាក់ទឹកពេញ ហើយសុំឲ្យកុមារធ្វើជាដាក់ម្រាមដៃរបស់ពួកគេ « ដើរ » លើផ្ទៃទឹកនោះ ។
-
សូមបង្ហាញវីដេអូ « Wherefore Didst Thou Doubt ? » ( LDS.org ) ហើយសូមឲ្យកុមាររកមើលអ្វីដែលបានបណ្ដាលឲ្យពេត្រុសបែរជាភ័យខ្លាចទៅវិញ ។ បន្ទាប់មក សូមឲ្យពួកគេប្រាប់អំពីគ្រានានាដែលពួកគេបានមានអារម្មណ៍ភ័យខ្លាច ហើយចែកចាយអ្វីដែលបានជួយដល់ពួកគេ ។ សូមជួយដល់ពួកគេឲ្យមើលឃើញថា សេចក្ដីជំនឿទៅលើព្រះយេស៊ូវគ្រីស្ទនឹងជួយយើងឲ្យយកឈ្នះលើសេចក្ដីភ័យព្រួយ ។
បង្រៀនគោលលទ្ធិ
កុមារធំៗ
ព្រះយេស៊ូវគ្រីស្ទបង្រៀនយើងអំពីព្រះវរបិតាសួគ៌ ។
តើការបង្រៀនរបស់ព្រះយេស៊ូវអំពីព្រះបិតារបស់ទ្រង់ អាចជួយកុមារឲ្យរៀនអំពីព្រះវរបិតាសួគ៌ដោយរបៀបណា ?
សកម្មភាពដែលអាចជ្រើសរើស
-
សូមបង្កើតការផ្គូផ្គងត្រូវគ្នាពីរឈុត ដែលសរសេរពាក្យដែលព្រះយេស៊ូវបានប្រើដើម្បីបង្រៀនអំពីព្រះវរបិតាសួគ៌នៅក្នុង យ៉ូហាន ៥ ដូចជា ស្រឡាញ់ ជីវិត និង ការងារ ( សូមមើល យ៉ូហាន ៥:២០, ២៦, ៣៦ ) ។ សូមផ្កាប់កាតទាំងនោះចុះ ហើយសូមឲ្យកុមារផ្គូផ្គងគូវាដោយត្រឡប់កាតម្តងពីរៗ ។ កាលគូនីមួយៗត្រូវគ្នាហើយ សូមអានខគម្ពីរដែលមានពាក្យនោះ ហើយសូមសួរកុមារថាតើពាក្យអ្វីដែលបង្រៀនយើងអំពីព្រះវរបិតាសួគ៌ ។
-
សូមឲ្យកុមារអាន យ៉ូហាន ៥:៣០ ហើយបន្ទាប់មក សូមបំពេញប្រយោគនេះ ៖ « ខ្ញុំមិនរកតាមតែចិត្តខ្ញុំទេ គឺ … » ។ តើព្រះគ្រីស្ទបានធ្វើតាមព្រះហឫទ័យនៃព្រះវរបិតាសួគ៌របស់ទ្រង់ដោយរបៀបណា ? តើយើងអាចធ្វើតាមព្រះហឫទ័យរបស់ព្រះវរបិតាសួគ៌ដោយរបៀបណា ?
ដង្វាយដ៏តូចតាចរបស់យើងអាចធ្វើឲ្យមានភាពខុសគ្នាមួយ ។
វាគឺជាក្មេងប្រុសម្នាក់ដែលបានផ្ដល់នំប៉័ង និងត្រីដែលព្រះយេស៊ូវបានប្រើដើម្បីចម្អែតមនុស្សប្រាំពាន់នាក់ ។ តើអ្នកអាចជួយកុមារដែលអ្នកបង្រៀនឲ្យឃើញពីរបៀបដែលពួកគេអាចរួមចំណែកដល់កិច្ចការនៃព្រះអម្ចាស់យ៉ាងដូចម្ដេច ?
សកម្មភាពដែលអាចជ្រើសរើស
-
សូមចែកនំពីរបី ឬនំប៉័ងពីរបីចំណិតដល់កុមារ ។ សូមជួយពួកគេឲ្យស្រមៃថា តើហ្វូងមនុស្សប្រាំពាន់នាក់នោះនឹងធំប៉ុណ្ណាទៅ ។ តើវាមានសភាពយ៉ាងណាទៅ ដែលត្រូវចម្អែតមនុស្សច្រើនយ៉ាងនោះដោយមានតែនំប៉័ងប្រាំចំណិត និងត្រីតែពីរនោះ ?
-
សូមឲ្យកុមារម្នាក់ប្រាប់រឿងអំពីការចម្អែតមនុស្សប្រាំពាន់នាក់ជាសម្ដីរបស់គេផ្ទាល់ ។ តើយើងអាចក្លាយដូចជាក្មេងប្រុសនៅក្នុង យ៉ូហាន ៦:៩ ដោយរបៀបណា ? សូមឲ្យកុមារគូររូបនំប៉័ង និងត្រីនៅលើក្រដាស ហើយសរសេរលើរូបនោះនូវការណ៍មួយចំនួនដែលពួកគេអាចធ្វើចំពោះព្រះអម្ចាស់ដើម្បីជួយដល់កិច្ចការរបស់ទ្រង់ ។
-
សូមឲ្យល្បែងតម្រៀបរូបមួយតូចដល់កុមារផ្គុំ ។ តើនឹងមានអ្វីកើតឡើង ប្រសិនបើបំណែករូបមួយនៃល្បែងតម្រៀបនេះបាត់នោះ ? សូមពន្យល់ថា យើងម្នាក់ៗគឺដូចជាបំណែកនៃល្បែងតម្រៀបរូបនេះដែរ—យើងទាំងអស់គ្នាមានអ្វីមួយដែលសំខាន់ដើម្បីធ្វើការរួមចំណែកជួយដល់ជីវិតរបស់មនុស្សដទៃ ។ តើកុមារនឹងធ្វើការរួមចំណែកដល់គ្រួសារ ឬថ្នាក់រៀនរបស់ពួកគេដោយរបៀបណា ?
ព្រះយេស៊ូវបានប្រទានអាហារដល់មនុស្ស ៥០០០ នាក់ ជាមួយនឹងនំប៉័ងប្រាំដុំ និងត្រីពីរក្បាល ។
សេចក្ដីជំនឿទៅលើព្រះយេស៊ូវអាចជួយយើងមិនឲ្យភ័យខ្លាច ។
សេចក្ដីជំនឿ និងភាពភ័យខ្លាចដើរតួយ៉ាងសំខាន់នៅក្នុងរឿងរបស់ព្រះយេស៊ូវ និងពេត្រុសដែលដើរនៅលើទឹក ។ តើកុមារអាចរៀនពីដំណើររឿងនេះអ្វីខ្លះ ?
សកម្មភាពដែលអាចជ្រើសរើស
-
សូមបង្ហាញរូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ សូមឲ្យកុមាររកបទគម្ពីរមួយនៅក្នុង ម៉ាថាយ ១៤ ដែលរៀបរាប់អំពីរូបភាពនេះ ។
-
សូមឲ្យកុមាររកមើលទីសម្គាល់នៃសេចក្ដីជំនឿ និងទីសម្គាល់នៃភាពភ័យខ្លាច កាលពួកគេអាន ម៉ាថាយ ១៤:២២–៣៣ ។ អ្នកក៏អាចបង្ហាញវីដេអូ « Wherefore Didst Thou Doubt ? » ( LDS.org ) បានដែរ ។ តើការមានសេចក្តីជំនឿលើព្រះយេស៊ូវគ្រីស្ទមានន័យយ៉ាងណា ? តើយើងជំនួសភាពភ័យខ្លាចដោយសេចក្ដីជំនឿបានដោយរបៀបណា ?
-
សូមឲ្យកុមារស្រមៃថា ពួកគេបាននៅក្នុងវត្តមាននោះ ហើយបានមានម៉ាស៊ីនថតរូប កាលព្រះយេស៊ូវ និងពេត្រុសបានដើរនៅលើទឹក ។ តើចំណុចពេលវេលាមួយណាដែលពួកគេនឹងជ្រើសរើសដើម្បីថតរូប ហើយហេតុអ្វី ? សូមឲ្យពួកគេសិក្សា ម៉ាថាយ ១៤:២២–៣៣ ដើម្បីរកគំនិតផ្សេងៗ ។ សូមឲ្យពួកគេគូររូបភាពនៃគ្រាដែលពួកគេបានជ្រើសរើសនោះ ចែកចាយរូបភាពរបស់គេ ហើយពន្យល់ពីមូលហេតុដែលពួកគេបានជ្រើសរើសយកចំណុចពេលវេលានោះ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
ប្រសិនបើកុមារបានបំពេញទំព័រសកម្មភាពសប្ដាហ៍នេះហើយ សូមឲ្យពួកគេប្រើវាដើម្បីបង្រៀនដល់គ្រួសាររបស់ពួកគេអំពីអ្វីដែលពួកគេបានរៀននៅថ្ងៃនេះ ។
ការកែលម្អការបង្រៀនរបស់យើង
អញ្ជើញឲ្យចែកចាយ សូមសួរកុមារអំពីគំនិត អារម្មណ៍ និងបទពិសោធន៍របស់ពួកគេ ។ អ្នកនឹងឃើញថា ជាញឹកញាប់ពួកគេមានយោបល់សាមញ្ញ ប៉ុន្ដែប្រសើរក្រៃលែង ។