Ang Transpigurasyon, ni Carl Heinrich Bloch

Abril 1–14

Mateo 16–17; Marcos 9; Lucas 9

“Ikaw Mao ang Kristo”

Samtang pamalandungan nimo kini nga mga kapitulo sa Bag-ong Tugon ug maminaw sa mga mensahe panahon sa kinatibuk-ang komperensya, paminaw og maayo sa mga mensahe nga gibati nimo nga gikinahanglan sa mga bata sa imong klase.

Irekord ang Imong mga Impresyon

Awhaga ang Pagpaambit

Kon ang mga bata sa imong klase naminaw o mitan-aw sa kinatibuk-ang komperensya, dapita sila sa pagpaambit og usa ka butang nga ilang nadunggan o nakita.

Itudlo ang Doktrina

Mas Gagmay nga mga Bata

Mateo 16:13–17

Makaangkon ako og pagpamatuod nga si Jesukristo mao ang Anak sa Dios.

Ikonsiderar kon sa unsang paagi imong magamit ang pagpamatuod ni Pedro ug ang tubag ni Jesus sa pagtudlo sa mga bata kon unsa ang pagpamatuod ug sa pagdasig kanila sa pagtinguha og ilang kaugalingong pagpamatuod.

Posible nga mga Kalihokan

• Hangyoa ang mga bata sa pagpaminaw kon unsa ang gisulti ni Pedro samtang basahon nimo ang Mateo 16:15–17. (Tan-awa usab sa “Kapitulo 32: [Si] Pedro Mipamatuod kabahin kang Kristo,” Mga Istorya sa Bag-ong Tugon, 76–77.) Ipasabut nga si Pedro mihatag sa iyang pagpamatuod mahitungod ni Jesukristo. Basaha pag-usab ang mga bersikulo. Niining higayuna hangyoa ang mga bata sa pagpaminaw kon kinsa ang nagsulti kang Pedro nga si Jesukristo mao ang Anak sa Dios.

• Ipaambit ang imong pagpamatuod mahitungod ni Jesukristo, ug ipasabut kon sa unsang paagi nimo kini nadawat. Dapita ang mga bata sa pagtinguha sa ilang kaugalingong mga pagpamatuod gikan sa Langitnong Amahan.

Mateo 16:15–19

Si Jesukristo mihatag sa mga yawe sa priesthood ngadto sa mga propeta ug apostoles aron sa paggiya sa Iyang Simbahan.

Gitandi sa Manluluwas ang pagpadayag ngadto sa usa ka bato ug ang awtoridad sa priesthood ngadto sa mga yawe. Unsaon nimo paggamit niini nga mga pagtandi aron sa pagtabang sa mga bata nga magbaton og pagtuo niadtong nangulo sa Iyang Simbahan?

Posible nga mga Kalihokan

• Pakit-a ang mga bata og usa ka bato samtang imong basahon ang Mateo 16:18 uban kanila. Isulti og balik uban kanila ang mga pulong nga “ibabaw niining bato pagatukoron ko ang akong simbahan,” nga mohimo og mga aksyon nga mobagay sa mga pulong. Ipasabut nga ang Simbahan natukod diha sa “bato” sa pagpadayag.

• Pakit-a ang mga bata og pipila ka mga yawe ug pangutan-a kon para sa unsa nato gamiton ang mga yawe. Ipasabut nga si Pedro ug ang ubang mga Apostoles nakadawat og mga yawe sa priesthood gikan ni Jesus. Kini nga mga yawe “moabli” sa mga panalangin alang kanato ug moabli sa dalan ngadto sa langit. Sama pananglit, ang mga yawe sa priesthood nagtugot kanato nga mabunyagan ug makaambit sa sakrament. Hatagi ang mga bata og mga papel nga yawe, ug pasulata sila og pipila ka mga panalangin nga “maablihan” sa mga yawe sa priesthood.

• Pagpakita og hulagway sa Presidente sa Simbahan, ug pagpamatuod nga naghupot siya sa tanang mga yawe sa priesthood karon, sama ni Pedro kaniadto.

Si Jesus mihatag og mga yawe sa priesthood ngadto ni Pedro.

Mateo 17:19–20

Ang akong pagtuo makahimo og mga milagro.

Sa imong pagbasa sa saad ni Jesus nga ang pagtuo sama sa usa ka liso sa mustasa makabalhin og bukid, unsa man nga mga impresyon ang imong nadawat mahitungod sa mga bata nga imong gitudloan?

Posible nga mga Kalihokan

• Dapita ang mga bata nga magpuli-puli sa pagdrowing og dagko nga mga bukid ug gagmay nga mga liso diha sa pisara samtang imong basahon ang Mateo 17:19–20 kanila. Ipasabut nga ang mga bukid nga kinahanglan natong ibalhin kasagaran mao ang mga butang nga daw lisud natong buhaton. Unsa ang pipila ka mga butang nga mabati nga daw mga bukid alang kanato? Gamita ang pahina sa kalihokan karong semanaha aron sa pagtabang sa mga bata sa paghunahuna kon sa unsang paagi ang pagtuo makatabang kanila sa pagbuhat sa mga butang nga gusto sa Dios nga ilang buhaton.

• Pagbutang og hulagway sa usa ka bukid sa usa ka kilid sa kwarto, ug isulat diha niini ang mga pulong sama sa kahadlok, pagduha-duha, o kabalaka. Hangyoa ang mga bata sa paghingalan og pipila ka mga butang nga ilang mabuhat aron makaangkon og dugang nga pagtuo kang Jesukristo. Tuguti ang matag bata nga dunay gisugyot nga mopaduol sa bukid ngadto sa pikas nga bahin sa kwarto. Basaha ang Mateo 17:19–20, ug pagpamatuod sa gahum sa pagtuo diha sa imong kinabuhi.

• Hangyoa ang mga bata sa pagkanta sa “Hugot nga Pagtuo,” Songbook sa mga Bata, 50–51, ug dayon hatagi ang matag bata og usa ka liso nga madala sa panimalay. Dapita sila sa pagtanom sa liso ug ibutang kini sa usa ka dapit diin ilang makita ang pagtubo niini aron sa pagtabang kanila nga mahinumdom nga magbaton og pagtuo sa Langitnong Amahan ug ni Jesukristo.

Itudlo ang Doktrina

Mas Dagko nga mga Bata

Mateo 16:13–17

Ang usa ka pagpamatuod kabahin ni Jesukristo moabut pinaagi sa pagpadayag gikan sa langit.

Sa unsang paagi ang pagpamatuod ni Pedro diha sa Mateo 16:13–17 makatabang sa mga bata samtang maglig-on sila sa ilang mga pagpamatuod?

Posible nga mga Kalihokan

• Pangutan-a ang mga bata unsay ilang isulti kon dunay mangutana kanila, “Kinsa si Jesus?” Dapita ang mga bata sa pagbasa sa Mateo 16:13–17 aron mahibalo kon giunsa pagtubag ni Pedro kana nga pangutana. Giunsa niya sa pagkaangkon sa iyang pagpamatuod mahitungod ni Jesus? Unsay atong mahimo sa paglig-on sa atong mga pagpamatuod?

• Tabangi ang mga bata sa pagtandi sa paagi nga masayud kita sa espiritwal nga mga kamatuoran ngadto sa mga paagi nga masayud kita sa ubang kamatuoran. Sama pananglit, unsaon nato pagkasayud kon unsa ka taas ang usa ka tawo o kon unsa ang kahimtang sa panahon? Unsaon nato pagkasayud nga si Jesukristo mao ang Anak sa Dios?

• Ipaambit ang imong pagpamatuod kabahin ni Jesukristo, ug awhaga ang mga bata sa pag-angkon o paglig-on sa ilang kaugalingong pagpamatuod.

Mateo 16:15–19

Ang Simbahan ni Jesukristo gipangulohan niadtong nanaghupot sa mga yawe sa priesthood.

Ang pagtuon sa Mateo 16:15–19 makalig-on sa pagtuo sa mga bata nga Ang Simbahan ni Jesukristo sa mga Santos sa Ulahing mga Adlaw mao ang pagpahiuli sa samang Simbahan nga gitukod ni Jesus samtang mipuyo Siya dinhi sa yuta.

Posible nga mga Kalihokan

• Isulat ang Mateo 16:19 diha sa pisara, nga blangkohan ang pipila ka mga pulong, lakip ang mga pulong nga “mga yawe.” Hangyoa ang mga bata sa pagpangita sa kulang nga mga pulong.

• Ribyuha ang impormasyon sa mga yawe sa priesthood diha sa Matinud-anon sa Tinuhoan,204–205. Unsa ang mga yawe sa priesthood? Sa unsang paagi ang mga yawe sa priesthood sama sa tinuod nga mga yawe?

• Tabangi ang mga bata sa paglista diha sa pisara sa mga tawo nga adunay mga yawe sa priesthood. (Ang Matinud-anon sa Tinuhoan,204–205, adunay lista nga makatabang kanila.) Dapita ang usa ka tawo sa inyong ward nga naghupot niini nga mga yawe nga mamulong sa klase kon nganong importante ang mga yawe sa priesthood.

• Pagtago og pipila ka yawe (o mga litrato sa mga yawe) libut sa kwarto, ug dapita ang mga bata sa pagpangita niini. Human makit-an ang matag yawe, tabangi ang mga bata sa paghunahuna og mga panalangin nga natagamtam nato tungod sa mga yawe sa priesthood (sama pananglit, mahangturong mga pamilya, bunyag, ug ang sakrament).

Lucas 9:28–36

Si Jesukristo mao ang Anak sa Dios.

Ang Transpigurasyon ni Kristo mao ang pipila ka mga higayon diha sa mga kasulatan nga nadungog ang tingog sa Dios nga Amahan nga nagpamatuod kabahin sa Iyang Pinalanggang Anak. Ang pagtuon niini nga istorya uban sa mga bata makalig-on sa ilang pagtuo diha ni Jesukristo.

Posible nga mga Kalihokan

• Dapita ang mga bata sa pagdrowing og mga hulagway sa Transpigurasyon ni Kristo, sumala sa makita diha sa Mateo 17:1–9. Hangyoa sila sa pagpasabut sa ilang mga hulagway ngadto sa usag usa. (Tan-awa usab ang outline niini nga semana sa Dali, Sunod Kanako—Alang sa mga Indibidwal ug mga Pamilya.)

• Hatagi ang mga bata og panahon sa pagpamalandong kon unsa ang gitudlo kanila niini nga istorya mahitungod ni Jesukristo. Dapita sila sa pagsulat sa ilang mga hunahuna diha sa pisara. Dapita ang pipila ka mga bata sa pagpaambit kon giunsa nila pagkasayud nga si Jesukristo mao ang Anak sa Dios.

Awhaga ang Pagkat-on diha sa Panimalay

Dapita ang mga bata sa pagpangutana sa ilang mga ginikanan o ubang mga sakop sa pamilya kon giunsa nila pagkaangkon sa ilang mga pagpamatuod kabahin ni Jesukristo.

Pagpalambo sa Atong Pagtudlo

Paggamit og musika. Ang mga kanta sa primary ug mga himno makatabang sa mga bata sa tanang edad nga makasabut ug mahinumdom sa mga kamatuoran sa ebanghelyo. Ang pagkanta makahimo usab sa mga bata nga aktibong moapil sa usa ka kasinatian sa pagkat-on. (Tan-awa sa Pagtudlo sumala sa Pamaagi sa Manluluwas, 22.)