Siya Nga Walay Sala, ni Liz Lemon Swindle

Abril 29–Mayo 5

Juan 7–10

“Ako Mao ang Maayong Magbalantay sa mga Karnero”

Samtang imong basahon ang Juan 7–10, hunahunaa ang mga bata nga imong gitudloan. Daghan sa mga ideya alang sa dagkong mga bata niini nga outline mahimo usab nga mapahiangay alang sa mas gagmay nga mga bata, o vice versa.

Irekord ang Imong mga Impresyon

Awhaga ang Pagpaambit

Hangyoa ang mga bata sa pagpaambit og butang nga ilang gibuhat sa miaging semana aron mahimong sama sa maayong Samarianhon.

Itudlo ang Doktrina

Mas Gagmay nga mga Bata

Juan 7:14–17

Ang pagsunod sa mga sugo motabang kanako nga masayud nga kini tinuod.

Si Jesus mitudlo nga makaangkon kita og pagpamatuod sa mga kamatuoran nga Iyang gipaambit samtang mosunod kita niini. Unsaon nimo paggamit niini nga istorya sa pagtudlo sa mga bata nga ang kalinaw nga atong bation kon mosunod kita sa mga sugo motabang kanato nga masayud nga kini mga tinuod?

Posible nga mga Kalihokan

• I-summarize ang Juan 7:17 gamit ang mga pulong nga masabtan sa mga bata. Tabangi sila nga masayud nga ang pagsunod sa mga sugo motabang kanato nga mobati nga mas duol kang Jesukristo, tingali pinaagi sa dungan nga pagkanta sa “Sunda ang Kasugoan” o “Pilia ang Matarung nga Paagi,” Songbook sa mga Bata, 68–69, 82–83. Hangyoa ang mga bata sa pagpaminaw kon sa unsang paagi kita mapanalanginan kon mosunod kita sa mga sugo.

• Pagpaambit og kasinatian sa dihang imong nakat-unan nga ang usa ka sugo gikan sa Dios tungod kay gisunod nimo kini, sama sa pagbayad og ikapulo o sa pagpasaylo sa uban kinsa dili mabination. Dapita ang mga bata sa paghunahuna og usa nila ka kasinatian sa dihang misunod sila og usa ka sugo. Pangutana, “Unsay inyong gibati human kamo misunod?”

• Pagpili og pipila sa mga sugo ug pagdrowing og duha ka hugpong sa yano nga mga hulagway nga nagrepresentar sa matag sugo. Ikulob ang mga hulagway diha sa salog ug dapita ang mga bata nga magpuli-puli sa pagparis sa mga sugo. Pagpamatuod sa kaimportante sa mga sugo ug sa unsang paagi ang pagsunod niini nakapalig-on sa imong pagpamatuod.

Juan 8:29

Si Jesus misunod sa Iyang Amahan.

Si Jesukristo kanunay nga nagbuhat sa mga butang nga makapahimuot sa Iyang Amahan sa Langit. Unsaon nimo pagtabang ang mga bata nga makakita og mga paagi sa pagsunod sa Iyang ehemplo?

Posible nga mga Kalihokan

• Tabangi ang mga bata nga balikon ang unsay gisulti ni Jesus mahitungod sa Langitnong Amahan diha sa Juan 8:29: “Sa kanunay ginabuhat ko man ang makapahimuot kaniya.” Hangyoa sila sa pagpaambit og mga butang nga gibuhat ni Jesus nga nakalipay sa Langitnong Amahan. Pakit-a sila og pipila ka mga hulagway gikan sa Libro sa mga Hulagway sa Ebanghelyo aron sa paghatag kanila og mga ideya.

• Pangutan-a ang mga bata kon unsa ang makapalipay kanila. Dayon pangutan-a kon unsa ang ilang mabuhat karong semanaha aron makapalipay og usa ka sakop sa pamilya o higala. Dapita ang mga bata sa pagdrowing og mga hulagway sa ilang mga kaugalingon nga nagbuhat niadto nga mga kalihokan aron madala sa panimalay ug mopahinumdom kanila.

• Dapita ang usa ka ginikanan sa usa sa mga bata sa pagpaambit og kasinatian sa dihang ang bata adunay gihimong butang nga nakapalipay sa ginikanan. Awhaga ang bata sa pagpaambit kon unsa ang iyang gibati.

Juan 10:1–18

Si Jesus nakaila kanako ug nahigugma kanako.

Ang sambingay sa maayong magbalantay sa mga karnero makatabang sa mga bata nga makasabut nga si Jesus nahigugma kanila ug nakaila kinsa sila.

Posible nga mga Kalihokan

• Hangyoa ang mga bata sa pagdrowing og hulagway nga nagrepresentar og usa ka butang diha sa sambingay sa maayo nga magbalantay sa mga karnero, sama sa karnero, tulisan, o lobo. Basaha ang Juan 10:1–18 ngadto sa mga bata, ug hangyoa sila sa pagpataas sa ilang mga hulagway kon makadungog sila nimo nga mibasa mahitungod sa ilang gidrowing. Ipasabut nga sama sa “maayong magbalantay sa mga karnero” nga naggiya ug nagpangga sa iyang panon, si Jesus nagpangga kanato ug naggiya kanatong tanan nga makabalik Kaniya. Sinina-i ang usa sa mga bata nga sama sa magbalantay sa karnero, ug awhaga ang mga bata sa pagpaambit kon sa unsang paagi si Jesus sama sa usa ka magbalantay ngari kanato.

• Ipakita ang hulagway ni Jesus ug ang mga nating karnero diha sa outline niini nga semana sa Dali, Sunod Kanako—Alang sa mga Indibidwal ug mga Pamilya. Unsaon nato pagkahibalo nga gipangga ni Jesus ang mga nating karnero? Unsaon nato pagtino nga ang mga nating karnero nagmahal kang Jesus?

• Tabangi ang mga bata sa pagkompleto sa pahina sa kalihokan niining semanaha.

Itudlo ang Doktrina

Mas Dagko nga mga Bata

Juan 7:14–17

Ang pagsunod sa mga sugo motabang kanako nga masayud nga kini tinuod.

Ikaw ug ang mga bata nga imong gitudloan tingali adunay mga kasinatian sa pagsunod sa mga kamatuoran sa ebanghelyo ug pagkakat-on nga kini mga tinuod. Unsaon nimo sa paggamit niadtong mga kasinatian sa imong pagtudlo?

Posible nga mga Kalihokan

• Isulat ang matag bersikulo sa Juan 7:14–17 sa managlahi nga mga piraso sa papel ug ipakita kini nga dili magsunod. Hangyoa ang mga bata sa pagbutang niini sa sakto nga han-ay ug susihon ang Juan 7:14–17 sa pagsuta kon husto kini. Dapita ang mga bata nga magpares-pares ug ipaambit ang ilang pagsabut sa matag bersikulo ngadto sa ilang pares. Sa unsang paagi ang pagsunod sa mga sugo sa Dios nakatabang kanila nga mahibalo nga ang mga sugo tinuod?

• Pagpaambit og mga ehemplo gikan sa mga kasulatan nga nagpakita kon sa unsang paagi ang mga tawo napanalanginan tungod sa pagsunod sa mga kamatuoran sa ebanghelyo, sama ni Daniel (tan-awa sa Daniel 6) o ni Nephi (tan-awa sa 1 Nephi 3–4).

• Pipila ka adlaw sa dili pa magklase, dapita ang usa sa mga bata sa pagsulat mahitungod sa usa ka higayon nga nakaangkon siya og pagpamatuod mahitungod sa usa ka sugo pinaagi sa pagsunod niini. Panahon sa klase, hangyoa ang bata sa pagpaambit sa unsay iyang gisulat.

Juan 8:31–36

Ang kamatuoran magahatag kaninyog kagawasan.

Samtang magkadako ang mga bata, makasugat sila og mga tawo kinsa nagtuo nga ang pagsunod sa ebanghelyo mapig-uton. Unsaon nimo paggamit ang Juan 8:31–36 aron sa pagbatok sa mao nga mga pangangkon?

Posible nga mga Kalihokan

• Dapita ang mga bata sa pagbasa sa Juan 8:31–36 ug sa pagpaambit kon unsay ilang hunahuna nga gipasabut nga mahimong sulugoon sa sala. Sa unsang paagi ang mga pagtulun-an ni Jesus makatabang sa paghimo kanatong gawasnon?

• Hangyoa ang usa ka bata nga motabang nimo sa pagliyuk sa imong pulsohan og pisi, dako nga panyo, o kurbata aron mapakita kon sa unsang paagi nga mahikot kita sa sala kon balik-balik kitang mohimo niini nga walay paghinulsol.

• Pagpakita og kandado nga magrepresentar sa sala ug usa ka yawe nga magrepresentar kon sa unsang paagi ang mga kamatuoran sa ebanghelyo makahimo kanato nga gawasnon. Sama pananglit, ang pagkasayud kabahin sa Pag-ula sa Manluluwas makahatag kanato og kagawasan sa paghinulsol ug mapasaylo sa atong mga sala. O ang pagkasayud mahitungod sa Pulong sa Kaalam makahatag kanato og kagawasan sa paglikay sa pagkaadik.

Si Jesus mitudlo, “Ang kamatuoran magahatag kaninyog kagawasan” (Juan 8:32).

Juan 10:1–18

Si Jesus sama sa usa ka magbalantay alang kanato.

Samtang magtuon ka sa sambingay sa maayo nga magbalantay sa mga karnero, pangita og mga kamatuoran nga gitudlo niini mahitungod sa atong relasyon ngadto sa Manluluwas. Sa unsang paagi ang pagkahibalo niini nga mga kamatuoran mopanalangin sa mga bata?

Posible nga mga Kalihokan

• Isulat ang maayong magbalantay ug sinuholan diha sa pisara. Ipasabut nga ang sinuholan mao ang usa ka tawo nga gipatrabaho bugti sa kwarta. Hangyoa ang mga bata sa paglista sa mga kalainan nga ilang makita sa Juan 10:1–18 tali sa usa ka maayo nga magbalantay ug sa usa ka sinuholan. Nganong gusto man ninyong sundon ang maayong magbalantay imbis nga ang sinuholan?

• Pagdrowing o pagpakita og usa ka hulagway sa pultahan. Basaha og dungan ang Juan 10:7–9, ug pangutan-a ang mga bata kon sa unsang paagi si Jesus sama sa usa ka pultahan. Sumala sa bersikulo 9, unsa nga mga panalangin ang moabut niadtong “mosulod” sa pultahan? Unsaon nato sa pagsulod sa pultahan nga giandam ni Jesukristo kanato?

Awhaga ang Pagkat-on diha sa Panimalay

Tabangi ang mga bata sa paghunahuna og usa ka sugo nga mas hingpit nilang masunod. Hangyoa sila nga maningkamot sa pagsunod niana nga sugo sa umaabut nga semana.

Pagpalambo sa Atong Pagtudlo

Pangutana og dinasig nga mga pangutana. Paghimo og mga pangutana nga makadapit sa mga bata nga imong gitudloan nga mohimo og labaw pa kay sa pag-report lang sa mga panghitabo. Hinoon, awhaga sila sa pagpaambit sa ilang mga pagpamatuod sa kamatuoran sa ebanghelyo. Sama pananglit, kon naghisgot ka sa mga sugo, mahimo nimong hangyoon ang mga bata sa pagpaambit kon sa unsang paagi ang pagsunod sa mga sugo mipanalangin kanila.