Ak q’ojyink chik, xb’aan laj Benjamin McPherson

10-16 junio

Mateo 26; Markos 14; Lukas 22; Jwan 18

”Moko jo’ ta li nawaj laa’in, jo’aq b’an li nakawaj laa’at”

Naq yookat chirilb’al ru Mateo 26; Markos 14; Lukas 22; ut Jwan 18, sikeb’ li na’leb’ li taaweek’a naq tento te’xtaw ruheb’ li kok’al.

Xtz’iib’ankil li nakak’oxla

Xkanab’ankileb’ chi wotzok

K’uteb’ li jalam-uuch re li kik’ulman sa’eb’ li ch’ol a’an, jo’ li Libro de obras de arte del Evangelio, 54, 55 ut 56, ut kanab’eb’ li kok’al chixyeeb’al k’a’ru yoo chi k’ulmank sa’eb’ li jalam-uuch.

Xk’utb’al li tzol’leb’

Kok’al toj ka’ch’ineb’ xyu’am

Markos 14:22–25; Lukas 22:19–20

Li loq’laj wa’ak nikinixtenq’a chixk’oxlankil li Jesus.

Tenq’aheb’ li kok’al chixtawb’al ru naq sa’ xk’ulb’al li loq’laj wa’ak nokoru chixk’oxlankil li Jesus

Kok’ k’anjel naru chi b’aanumank

• K’os ru li seraq’ naq li Jesus kixtikib’ li loq’laj wa’ak. Naru nakawoksi “Ch’ol 49: Li xb’een Loq’laj Wa’ak,” Eb’ li Esilal sa’ li Ak’ Chaq’rab’, 124–126, malaj li video wan sa’ (LDS.org). Chi’ilmanq ajwi’ li video “Sacrament” (LDS.org). Tenq’aheb’ li kok’al chixtawb’al ru naq naqajultika li Jesus sa’ li loq’laj wa’ak.

• Patz’ reheb’ li kok’al ma neke’xnaw k’a’ru neke’reetali li kaxlan wa ut li ha’ re li loq’laj wa’ak. Ch’olob’ naq eb’ li eetalil a’an nokohe’xtenq’a chixjultikankil naq li Jesus kikam sa’ qak’ab’a’ ut naq kiwakli chaq sa’ xyanqeb’ li kamenaq. K’ut jun ch’uyul li kaxlan wa ut jun ch’ina sek’ li ha’ naq yookat chixtenq’ankileb’ li kok’al chixkanab’ankil sa’ xk’a’uxleb’ li ch’ol aatin “Re xnimankil xjultikankil” (Lukas 22:19).

• Patz’ reheb’ li kok’al naq te’xmutz’ li ruheb’ ut te’xk’oxla junaq kristiaan neke’xra, ut chirix a’an kanab’eb’ chawaatinankil chirix li kristiaan a’an. Patz’ reheb’ naq te’xmutz’ wi’chik li ruheb’, te’xk’oxla li Kolonel ut chirix a’an te’xwotz li k’a’ru neke’xnaw chirix a’an. B’oqeb’ chixk’oxlankil li Jesus sa’ li loq’laj wa’ak rajlal xamaan.

• B’oqeb’ li kok’al chixk’utb’al li k’a’ru naru neke’xb’aanu re xjultikankil li Jesus ut re te’oxloq’inq sa’ li loq’laj wa’ak.

• Tenq’aheb’ li kok’al chixyiib’ankil li ch’ina tasal hu li yeeb’il resil sa’ li perel re kok’ k’anjel re li xamaan a’in. Ye reheb’ naq te’roksi jo’ xtenq’ankileb’ re xk’oxlankil li Jesus sa’ li loq’laj wa’ak.

• Tenq’aheb’ li kok’al chixsik’b’aleb’ xjalam-uuch li Jesus sa’eb’ li puktesinb’il hu re li Iglees ut chixyiib’ankil jun xtusb’al ru k’iila jalam-uuch li naru neke’ril sa’ li ch’utam re loq’laj wa’ak.

Mateo 26:36–46

Li Jesus kixnumsi rahilal sa’ ink’ab’a’ xb’aan naq nikinixra.

K’e reetal chan ru naru nakatenq’aheb’ li kok’al chireek’ankil lix rahom li Jesus choq’ reheb’ naq nekex’aatinak chirix li seraq’ re lix rahilal sa’ Getsemani.

Kok’ k’anjel naru chi b’aanumank

• Kanab’eb’ li kok’al chixk’oxlankil junaq li hoonal naq xe’wan chi raheb’ xch’ool malaj xe’raho’. Wi chaab’il li hoonal, kanab’eb’ junjunq li kok’al chixwotzb’al a’an. K’ut li jalam-uuch re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Ch’olob’ naq li Jesus, jo’ chanru ink’a’ naqataw ru chi tz’aqal re ru, kireek’a chixjunil li rahilal ut li rahil ch’oolej li reek’ahomeb’ chixjunileb’ li kristiaan. A’an naraj naxye naq naru chiqatenq’ankil re taasaho’q qach’ool naq naqeek’a xrahil qach’ool, naq nokoraho’, malaj po’jenaq qach’ool.

• B’icha rik’ineb’ li kok’al “Ninnaw naq raabʼilin,” B’ichleb’aal choq’ reheb’ li Kok’al, 42–43. Kanab’eb’ chixwotzb’al chan ru naq reek’ahomeb’ lix rahom li Jesus.

Li Kristo naq kitijok sa’ Getsemani, xb’aan laj Hermann Clementz.

Xk’utb’al li tzol’leb’

Kok’al ak ninqeb’

Markos 14:22–24

Li loq’laj wa’ak nikinixtenq’a chixjultikankil li Jesukristo ut lix mayej aj tojol-ix kixb’aanu choq’ we.

Chan ru naru nakatenq’aheb’ li kok’al chireek’ankil chi mas wi’chik xyaalalil li loq’laj wa’ak?

Kok’ k’anjel naru chi b’aanumank

• Kanab’eb’ li kok’al chixk’eeb’aleb’ xhoonaleb’ chirib’ileb’ rib’ re rilb’aleb’ ru li raqal re Markos 14:22–24 (chi’ilmanq ajwi’Lix Jaltesinkil ru li Santil Hu xb’aan laj Jose Smith, Markos 14:20–24 ut Tzol’leb’ ut Sumwank 20:75–79. K’a’ru li aatin ut li na’leb’ juntaq’eeteb’ sa’ li wiib’ chi raqal a’an?

• Patz’ reheb’ li kok’al k’a’ru neke’xb’aanu li natenq’an reheb’ chixk’oxlankil li Jesus sa’ li loq’laj wa’ak. Tenq’aheb’ chixtawb’aleb’ li raqal sa’eb’ li loq’laj hu malaj sa’ li raatinuleb’ li b’ich re li loq’laj wa’ak li naru neke’ril ru sa’ li loq’laj wa’ak, ut chirix a’an xtz’iib’ankileb’ chiru jun li ch’ina hu li naru neke’ril ru li kok’al li jun sut chik naq te’xk’ul li loq’laj wa’ak. B’ichaheb’ junjunq reheb’ li b’ich a’an rik’ineb’ li kok’al Eb’ li b’ich, 83, 101–120).

• Tz’iib’aheb’ sa’ li pizarron li ch’ol aatin ninqeb’ xwankil sa’eb’ li tij re li loq’laj wa’ak ut tenq’aheb’ li kok’al chixkanab’ankileb’ sa’ xk’a’uxleb’. K’a’ru naraj neke’xye li ch’ol aatin a’an? K’a’ut naq naqab’antioxi naq nokoru chix’ak’ob’resinkil li qasumwank re li qakub’iha’ rajlal xamaan?

• B’oq junaq laj k’amol re li Tijonelil re Aaron re taa’aatinaq rik’ineb’ li kok’al chirix li naxnumsi naq naxkawresi, narosob’tesi ut naxjek’i li loq’laj wa’ak. K’a’ru natenq’an re, re xkawresinkil rib’ choq’ re a’an? K’a’ru nareek’a naq naxb’aanu a’an? Chan ru naq natenq’aak xb’aan li kaxlan wa ut li ha’ chixjultikankil li Kolonel?

• Kanab’eb’ li kok’al li ak kub’sinb’ileb’ xha’ chixwotzb’al li k’a’ru najultiko’ reheb’ chirix lix kub’iha’. K’a’ru xe’reek’a? K’a’ru li sumwank xe’ok wi’? (chi’ilmanq Mosiah 18:8–10). Ye reheb’ naq xb’aan naq nokotz’aqon sa’ li loq’laj wa’ak rajlal xamaan, chanchan naq nakub’e wi’chik qaha’—naru neke’kuye’ li qamaak ut naqa’ak’ob’resiheb’ li qasumwank.

Mateo 26:36–42

Sa’ Getsemani, li Jesukristo kixk’ul sa’ xb’een a’an lin maak ut lin rahilal.

Rik’in xnawb’al li k’a’ru kixb’aanu li Jesus sa’ qak’ab’a’ sa’ Getsemani naru neke’tenq’aak li kok’al chixjalb’al xk’a’uxleb’ chirixeb’ lix maak ut chi sutq’iik chiru li Kolonel naq te’xnumsiheb’ li ch’a’ajkil kutan.

Kok’ k’anjel naru chi b’aanumank

• Kanab’eb’ li kok’al chirilb’al ru Mateo 26:36–42 re xsik’b’aleb’ li aatin malaj ch’ol aatin li neke’xch’olob’ k’a’ru kireek’a li Jesus sa’ Getsemani. K’a’ru kixnumsi li Jesus li kixk’e chireek’ankil chixjunil a’an? K’eheb’ xhoonal li kok’al chixwotzb’al li reek’ahomeb’ chirix li Jesus ut lix mayej aj tojol-ix choq’ qe.

• Kanab’eb’ li kok’al chixwotzb’al resil junaq li hoonal naq xe’wan chi raheb’ xch’ool malaj xe’raho’. Patz’ reheb’ ma neke’xnaw ru junaq li reek’ahom ajwi’ a’an. Ch’olob’ naq sa’ Getsemani, li Jesus kireek’a chixjunil li rahilal li reek’ahomeb’ chixjunileb’ li kristiaan. Kixb’aanu re xk’ojob’ankil qach’ool naq naqaj ru (chi’ilmanq Alma 7:11–12).

• K’e re jun li ch’ina al jun li che’ mas nim wi’chik li roq’ chiru li xnimal ru li okeb’aal re li tzoleb’aal ut patz’ re naq tixchap chi salso ut naq tixyal roksinkil sa’ li okeb’aal. Ch’olob’ naq li che’ nareetaliheb’ li qamaak, li naramok qe chi ok sa’ li rawa’b’ejihom li Dios. Patz’ re naq tixk’e aawe li che’ re xk’utb’esinkil naq li Jesus kixk’ul li qamaak sa’ xb’een re naq taaruuq chi kuye’k li qamaak wi naqajal qak’a’uxl.

Lukas 22:39–44

Naru nintaaqe lix b’aanuhom li Jesus naq tin’ab’inq chiru li qaChoxahil Yuwa’.

Li Jesus kixk’ut li rab’ihom chiru lix Yuwa’ naq kixye, “Ink’a’ chi’uxmanq li nawaj laa’in, a’ b’an laa wajom laa’at” (Lukas 22:42). Chan ru naru nakatenq’aheb’ li kok’al chi tzolok rik’in lix b’aanuhom li Jesus?

Kok’ k’anjel naru chi b’aanumank

• Kanab’ sa’ laa k’a’uxl rik’ineb’ li kok’al li ch’ol aatin “Ink’a’ chi’uxmanq li nawaj laa’in, a’ b’an laa wajom laa’at” (Lukas 22:42) ut aatinanqex chirix li naraj naxye. K’a’ru naru naqab’aanu re ab’ink chiru li rajom li qaChoxahil Yuwa’?

• Tenq’aheb’ li kok’al chixyeeb’al junjunq li taqlahom ak xpaab’ahomeb’. Patz’: k’a’ru li osob’tesihom xe’xk’ul xb’aan naq xe’ab’in chiru li qaChoxahil Yuwa’, us ta ch’a’aj? Kanab’eb’ chixwotzb’al lix numsihomeb’ ut lix nawom xch’ooleb’.

Lukas 22:41–43

Naru nink’ul intenq’ naq nintijok.

Naq li Jesus kitijok sa’ Getsemani, jun li anjel kixk’ut rib’ chiru re xkawob’resinkil xch’ool. Ma neke’xtaw ru li kok’al li nakatzoleb’ naq a’aneb’ ajwi’ naru neke’tijok chiru li qaChoxahil Yuwa’ re xpatz’b’al xkawilal xch’ooleb’?

Kok’ k’anjel naru chi b’aanumank

• Seraq’i li esil wan sa’ Lukas 22:41–43 reheb’ li kok’al (maare rik’in roksinkil li “Ch’ol 51: Li Jesus naxnumsi rahilal sa’ li Awimq Getsemani,” Eb’ li Esilal sa’ li Ak’ Chaq’rab’, 129–132, malaj li video sa’ LDS.org). Ch’olob’ naq xb’aan naq li Jesus kitijok, li qaChoxahil Yuwa’ kixtaqla chaq jun li anjel chixkawob’resinkil xch’ool. Ani naxtaqla chaq li qaChoxahil Yuwa’ chixkawob’resinkil qach’ool laa’o?

• K’ut xjalam-uuch li anjel naq kixk’ojob’ xch’ool li Kristo li natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li Komon ut li Junkab’al , ut wotz jun aanumsihom naq xawek’a naq li qaChoxahil Yuwa’ xkawob’resi aach’ool.

Xb’oqb’aleb’ chi tzolok sa’ kab’l

B’oqeb’ li kok’al chixwotzb’al rik’ineb’ lix junkab’aleb’ li te’xb’aanu chiru li loq’laj wa’ak re xjultikankil li Jesus.

Xchaab’ilob’resinkil li qak’utum

Ye lix nawom aach’ool sa’ li tzoleb’aal. Li xnawom ch’oolej naru naq moko ch’a’ajaq ta jo’ xyeeb’al a’in: “Ninnaw naq li qaChoxahil Yuwa’ nekexxra chejunilex laa’ex” malaj “Nasaho’ inch’ool naq nintzolok chirix li Jesukristo.”